Wan Kwestin

“Wajtaoa” blong Novemba 1, 1995, i tokbaot Matyu 24:​34, we Jisas i yusum tok ya “ol man we oli stap laef naoia.” ?Samting ya i minim se yumi no sua sipos Kingdom blong God i stanap long heven long 1914?

Wajtaoa ya i no jenisim nating stampa tijing blong yumi long saed blong 1914. Jisas i tokbaot saen we bambae i soem se hem i stap finis olsem king. Yumi gat plante pruf se saen ya i stat blong kamtru long 1914. Ol pruf olsem, ol faet, man i sot long kakae, ol bigfala sik, graon i seksek, mo plante narafala samting, oli pruvum se stat long 1914, Jisas i mekem wok blong King long Kingdom blong God. Samting ya i soemaot se taem blong en i stat long yia ya.

?Oraet, Wajtaoa ya i stap mekem wanem poen i kam klia? Bigfala poen, hem i long saed blong fasin blong Jisas blong yusum tok ya “ol man we oli stap laef naoia,” long Matyu 24:34. Vas ya i talem se: “Tru mi talem long yufala, ol man we oli stap laef naoia, bambae oli no save ded evriwan, gogo olgeta samting ya bambae oli kamtru.” Taem Jisas i tokbaot “ol man we oli stap laef naoia,” ?hem i minim hu long taem blong hem mo long taem blong yumi?

Plante vas long Baebol oli soem se taem Jisas i yusum tok ya “ol man we oli stap laef naoia,” hem i no stap tokbaot wan smol grup no wan spesel grup nomo, olsem ol lida blong ol man Jyu no ol man blong hem. No gat, hem i yusum tok ya “ol man we oli stap laef naoia” blong jajem olgeta man Jyu we oli sakemaot hem. Be, i gud we, wanwan long olgeta oli gat jans blong mekem samting we aposol Pita i talem long ol man long dei blong Pentekos. Oli save tanem tingting blong olgeta mo “lego ol rabis man blong naoia, blong sevem laef” blong olgeta.​—Ol Wok 2:​40, NW.

Long tok ya, i klia se Pita i no stap talem stret ol man we oli gat sem yia. Mo hem i no stap tokbaot wan taem we i gat stret namba blong yia long hem. Mo hem i no joenem tok ya “ol man we oli stap laef naoia” long wan stret dei. Hem i no talem se ol man oli mas lego ol man we oli bon long sem yia olsem Jisas, no we oli bon long yia 29 K.T.a No gat. Pita i stap tokbaot ol man Jyu long taem ya we oli no bilif​—maet sam oli yangfala, sam oli olfala​—we oli bin harem ol tijing blong Jisas, oli bin luk mo oli bin harem nyus long ol merikel blong hem, be oli no bilif long hem olsem Mesaea.

I klia se, hemia nao mining we Pita i kasem long saed blong tok ya blong Jisas “ol man we oli laef naoia,” taem hem mo tri narafala aposol oli stap wetem Jisas antap long Hil blong ol Oliftri. Profet tok ya blong Jisas i soem se, ol man Jyu long taem ya​—bighaf blong olgeta oli ol man we oli laef long semtaem wetem Jisas​—bambae oli luk ol faet no oli harem nyus se ol man oli mekem faet, graon i seksek, man i sot long kakae, mo ol narafala pruf se en blong fasin blong laef blong ol man Jyu long taem ya, i kolosap nomo. Yes i tru, ol man ya we oli stap laef long taem ya, oli no ded bifo we en i kam long yia 70 K.T.​—Matyu 24:​3-​14, 34.

I tru se yumi no bin kasem save long ol tok ya blong Jisas long rod ya bifo. Yumi ol sinman i gat fasin we yumi wantem save wetaem stret bambae en i kam. Rimemba se, ol aposol tu oli bin wantem blong save stret taem. Taswe, oli askem se: “?Masta, i stret taem nao blong yu stanemap kingdom blong Isrel bakegen, no no yet?”​—Ol Wok 1:​6, NW.

Wetem sem kaen gudfala tingting olsem, ol man blong God long taem blong yumi, oli bin traem blong faenemaot from tok ya blong Jisas “ol man we oli stap laef naoia,” wan stret taem we oli save kaontem i stat long 1914. Eksampel, oli bin tingting se ol man we oli laef long wan taem, i save minim se oli laef 70 no 80 yia. Mo tu, oli bin ting se, ol man ya oli mas gat naf yia long taem blong Faswan Bigfala Faet Blong Wol, blong kasem save long mining blong hem mo ol narafala samting we oli hapen. Long rod ya, oli traem faenemaot se en i kolosap olsem wanem.

Nating se wan gudfala tingting i pusum olgeta, be ?save olsem i stret wetem advaes we Jisas i givim? Jisas i talem se: “Dei blong samting ya, mo taem blong hem, i no gat man naoia we i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save. . . . Ale, from samting ya, yufala i mas lukaot gud. From we yufala i no save long wanem dei, mi, mi Masta blong yufala, bambae mi kamtru.”​—Matyu 24:36-42.

Taswe, save we i kamaot i no longtaem i pas long Wajtaoa long saed blong “ol man we oli stap laef naoia,” i no jenisim save blong yumi long saed blong samting we i hapen long yia 1914. Be, hem i givhan long yumi blong kasem klia moa, fasin blong Jisas blong yusum tok ya “ol man we oli stap laef naoia.” Mo tu, hem i givhan long yumi blong luksave se yumi no save kaontem ol yia stat long 1914, blong makemaot se en i kolosap olsem wanem.

[Futnot]