Ol Studen Blong Tok Blong God Oli Kasem Stefeket

Long olgeta ples blong wol, ol man oli savegud se ol Wetnes blong Jeova oli mekem wok blong prij long ol haos wanwan, olsem ol Kristin blong faswan handred yia. Blong openem miting ya blong givimaot stefeket long ol studen blong klas namba 102 blong Wajtaoa Baebol Skul Blong Gilead, oli tokbaot wok ya.

Long Maj 1, 1997, Albert Schroeder, wan memba blong Hed Kampani blong ol Wetnes blong Jeova, i pulum tingting blong ol man we oli stap lesin long hem, i go long wan store long Franis nyuspepa ya Le Point, we i kamaot i no longtaem i pas. Store ya i tokbaot plan blong ol man Katolik blong statem wok blong prij long ol haos wanwan long Itali. Nyuspepa ya i talem se: “Blong mekem se han blong [ol misinari blong Vatikan] i no emti taem oli kamtru blong traem winim ol Wetnes blong Jeova long wok blong olgeta, Vatikan i prentem wan milyan kopi blong Gospel blong Sen Mak. Wetem samting ya, oli save fesem ol [Wetnes blong Jeova] we oli nambawan long wok ya blong ‘givimaot’ gud nyus long ol haos wanwan.”

Ol 48 studen oli sam long olgeta we oli folem ol nambawan fasin we Jisas i bin yusum, blong talemaot Tok blong God. Oli aot long eit kantri blong kam long Wajtaoa Edukesen Senta long Pateson, Nyu Yok. Long faef manis we oli stap long skul ya blong Gilead, oli stadi long fulwan Baebol. Long kos blong olgeta, oli stadi tu long ogenaesesen blong God long ol yia we oli pas finis, ol samting we oli save kamaot long laef blong ol misinari, mo ol frut blong speret blong God. Kos ya i gat wan mak nomo, hemia blong rerem olgeta from wok blong misinari long 17 kantri. Taem oli kasem stefeket blong olgeta, i gat 5,015 man i stap blong serem glad blong olgeta. Ol man ya oli kamaot long plante defren kantri blong wol. ?Wanem ol laswan advaes we ol studen ya blong Gilead oli kasem blong givhan long olgeta?

Leftemap Tingting Blong Ol Nyufala Misinari

Afta we jeaman i openem miting ya, Ralph Walls, wan man blong givhan long Pesonel Komiti long Hed Kampani, i givim faswan sotfala tok. Long tok ya, hem i talem ol advaes we i save givhan long ol nyufala misinari ya. Nem blong tok ya se, “Yu No Mas Fogetem Blong Soem Lav.” Hem i poen i go long Baebol long 2 Timote japta 3 we i talemaot se, sloslou ol man long wol ya bambae oli no moa soemaot lav. Hem i pulum tingting blong ol nyufala misinari long poen ya we i impoten long olgeta, mo long mining blong lav we yumi faenem long 1 Korin 13:​1-7. Hem i se: “Maet yufala ol misinari i mekem moa haoa long wok blong prij i bitim namba blong haoa we yu mas mekem. Maet yufala i gat plante save from trening we yufala i kasem long Gilead. Mo maet yumi wok strong blong plante moa haoa bitim hemia we yumi mas mekem, long wok blong yumi long ol hedkwota blong Sosaeti. Be olgeta traehad blong yumi mo samting we yumi livim blong mekem ol wok ya, bambae oli nating nomo sipos yumi fogetem blong soem lav.”

Carey Barber blong Hed Kampani, i givim nekiswan tok ya, “Jeova i Stap Lidim Yumi Blong Win.” Stat afta Faswan Bigfala Faet Blong Wol, taem i no gat plante trufala man blong God long wol, Jeova God i bin lidim olgeta blong win long wok blong talemaot gud nyus blong Kingdom, nating se plante man oli agensem olgeta mo ronem olgeta. Long 1931, ol lida blong Krisendom oli harem nogud taem ol Baebol Studen (hemia ol Wetnes long taem ya) oli karem nem ya ol Wetnes blong Jeova. Brata Barber i talem se: “Naoia, ol misinari long klas namba 102 blong Gilead, oli gat bigfala blesing blong joen fulwan long nambawan wok we i givim jans long fulap man blong kasem save long tabu nem ya.” Oli joenem bigfala namba blong 7,131 misinari we oli kasem trening finis long Gilead Skul. Olgeta ya oli bin givhan blong mekem wok blong talemaot Tok blong God we i gohed long 54 kantri long 1943, i go kasem 233 kantri naoia.

Nekiswan brata we i givim tok, hemia Lloyd Barry, blong Hed Kampani tu. Hem i bin stap long klas namba 11 blong Gilead, mo i wok olsem misinari long Japan blong bitim 25 yia. Hem i leftemap tingting blong olgeta wetem tok ya, “Holemstrong Long Ol Samting Ya.” Hem i talem long ol studen se: “Bighaf blong glad we yufala i kasem bambae i kamaot from fasin blong stanap strong.” ?Wanem ol blesing we oli save kamaot from fasin blong stanap strong long misinari wok no long enikaen tiokratik wok? “Samting we i moa impoten se, taem yumi stanap strong, yumi mekem hat blong Jeova i glad . . . Bambae yumi haremgud tumas sipos yumi holemstrong long Jeova tru long ol traem . . . Mekem wok blong misinari long ful laef blong yufala . . . Pei blong yufala, hemia se bambae yufala i kasem gudfala tok ya we i mekem yufala i haremgud se: ‘Ei, wan gudfala wok ya.’ ” (Matyu 25:21; Proveb 27:11) Long en blong tok ya, Brata Barry i pulum ol nyufala misinari wetem fulhat blong hem, blong gat strong tingting blong mekem misinari wok i kam laef blong olgeta. Long rod ya, bambae oli save ‘holemstrong long ol samting ya.’​—1 Timote 4:16.

Karl Adams, we i bin tijim plante klas blong Gilead, i askem kwestin ya, “?Bambae Yufala i Luk Wanem Samting?” Hem i soem se samting we ol nyufala misinari bambae oli luk long ples we oli go wok long hem, i no dipen nomo long prapa ae blong olgeta, be long ol ae blong hat blong olgeta tu. (Efesas 1:​18) Yumi save luk samting ya long eksampel blong ol man Isrel we oli go blong spae long Promes Lan. Ol 12 man ya oli luk ol semfala samting wetem prapa ae blong olgeta. Be tu nomo i gat tingting olsem Jeova i gat long saed blong Promes Lan. Ol misinari tu oli save luk ol samting long plante defren fasin. Long sam kantri we bambae oli wok long hem, maet oli luk we ol man oli pua tumas, oli safa, mo oli no gat hop. Be oli no mas letem tingting blong olgeta i kam slak, mo oli no mas ronwe long kantri ya. Brata Adams i talem tok blong wan misinari we i mekem kos long Gilead Skul i no longtaem i pas, se: “Ol trabol ya oli mekem mi mi luksave se mi mas stap long ples ya. Ol man ya oli nidim wan hop blong fyuja. Mi wantem givhan blong mekem laef blong olgeta i kam moagud.” Long lashaf blong tok blong Brata Adams, hem i leftemap tingting blong ol nyufala misinari blong oli luk ol kantri we bambae oli go long hem, olsem ol ples we bambae Jeova i mekem oli kam haf blong Paradaes wol blong hem. Mo tu, hem i leftemap tingting blong olgeta blong oli luk ol man long ol kantri ya olsem ol man we oli save kam naf blong laef long nyufala wol ya.

Wallace Liverance i mekem laswan tok long haf ya blong miting. Brata ya i mekem misinari wok blong plante yia, bifo we hem i kam wan tija blong Gilead Skul. Hem i givim tok ya, “Soem Se Yu Luksave Ol Nambawan Wok Blong God.” Soem fasin luksave i minim lukaotgud, soem waes, mo stret tingting. Hemia samting we King Sol i no mekem.​—1 Samuel 13:​9-​13; 15:​1-​22.

Wan rod blong soem fasin luksave i blong fesem mo winim ol traem we oli joen wetem wan nyufala fasin blong laef, olsem lanem wan narafala lanwis mo kasem save long ol man. Ol misinari oli save kam strong moa long saed blong speret taem oli fesem mo winim ol traem, olsem Josua mo Kaleb oli kam strong moa taem oli winim graon ya we God i givim long olgeta.

Ol Kwestin

Long nekiswan haf blong miting ya, oli askem kwestin long samfala. Harold Jackson i askem ol kwestin long Ulysses Glass, we i gat 85 yia naoia. Brata ya i rejistarem ol studen blong Gilead skul, mo i tijim olgeta longtaem finis. Plante we oli misinari yet oli savegud ol yia we hem i stanap strong long wok blong tijim mo trenem ol misinari. Biaen, Mark Noumair i givim wan tok. Hem i spenem plante yia long wok blong misinari long Afrika bifo we hem i kam wan tija blong Gilead Skul. Hem i askem kwestin long ol studen long saed blong wok blong prij we oli mekem long ol faef manis blong skul ya. Ol store blong olgeta oli soemaot klia se i gat sam man we oli intres long Tok blong God long ples ya.

Biaen, Robert Ciranko mo Charles Molohan oli storeyan wetem sam man we oli mekem wok blong God plante yia finis. Ol man ya oli stap mekem wan narafala kos long sem ples ya, wan kos blong ol brata we oli lukaot long ol hedkwota long olgeta ples blong wol. Oli givim advaes long ol studen blong klas ya se, oli nidim blong gat tingtingdaon mo givhan long kongregesena blong joengud. Oli talem se ol studen oli no mas gat ol prapa tingting blong olgeta se misinari wok bambae i olsem wanem. No gat. Oli mas rere nomo blong fesem eni samting we i save kasem olgeta. I klia se sipos ol nyufala misinari oli folem advaes ya, bambae oli naf blong mekem wok blong olgeta, olsem ol tija blong Tok blong God.

Theodore Jaracz, wan memba blong Hed Kampani, i laswan blong givim tok long miting ya, nem blong hem, “?Wanem i Gat Paoa Long Hu?” Hem i eksplenem se taem yumi ol Kristin i soem ol frut blong speret, yumi save gat paoa long ol narafala man long wan gudfala rod. Hem i talem se: “Ol misinari we ogenaesesen blong Jeova i sanemaot olgeta finis, oli bin mekem wan nambawan wok blong pulum ol man long ol gudfala rod long saed blong speret.” Biaen, hem i talem tok blong sam man we gudfala eksampel blong ol misinari i pulum olgeta blong wosipim God. Hem i finisim tok blong hem, i se: “I gud yufala i holemtaet gudnem we ol man blong Jeova oli bin wokhad blong kasem, mo gohed blong kilkilim ol doa long kantri we yufala i go long hem, blong faenem ol man we oli stret blong kasem trutok . . . Mo tu, sipos yufala i gat stret fasin mo klin fasin, yufala i save agensem speret blong wol ya mo pulum ol narafala long ol gudfala rod we oli presem Jeova mo givim ona long hem.”

Long en blong miting, jeaman i talemaot ol halo we ol man kolosap mo farawe oli sanem i kam. Nao, hem i givimaot ol stefeket, mo i talemaot ol kantri we bambae ol misinari oli go long hem. Biaen, wan studen i ridim leta we klas i raetem blong talemaot strong tingting blong olgeta blong wok, mo blong talem tangkyu from tijing we oli bin kasem. I klia se miting ya blong givim stefeket long ol studen long klas namba 102 blong Gilead, i givhan long ol narafala we oli lesin blong gat tingting we i strong moa long wok blong talemaot Tok blong God.

[Futnot]

[Tok blong pija long pej 31]

Olgeta Long Klas Namba 102 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo ol nem oli stat long lefsaed i go long raetsaed long wanwan laen.

(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.