?Yu Yu Fren Blong God?—Samting We Ol Prea Blong Yu Oli Soemaot
?SAMTAEM finis yu gat jans blong harem storeyan blong tu man? Ating kwiktaem nomo yu luksave sipos tufala ya oli gudfala fren no strenja, sipos tufala i jes save tufala olsem nomo, no sipos tufala i frengud mo joengud olsem we tufala i trastem tufala. Long sem fasin, ol prea blong yumi oli save soemaot klia wanem kaen fasin fren we yumi gat wetem God.
Baebol i talem klia long yumi se God “i no stap longwe long yumi nating.” (Ol Wok 17:27) Yes, hem i singaotem yumi blong yumi save hem. Yumi save stap olsem ol fren blong hem tu. (Ol Sam 34:8; Jemes 2:23) !Yumi save gat wan fasin fren wetem hem we i olsem se yumi rili stap kolosap long hem! (Ol Sam 25:14) I klia se, fasin frengud blong yumi wetem God, hem i sas moa long olgeta samting we yumi ol sinman i save kasem. Mo Jeova i tinghae tu long fasin fren blong hem wetem yumi. Yumi luksave samting ya from we fasin fren blong yumi wetem hem i stanap long bilif we yumi gat long wan Pikinini ya nomo blong hem, we i givim laef blong hem blong sevem yumi.—Kolosi 1:19, 20.
Taswe, ol prea blong yumi oli mas soemaot bigfala lav mo tangkyu we yumi gat long Jeova. ?Samtaem, yu yu filim se ol prea blong yu oli no soemaot dip filing, nating se oli soem respek? Hemia i wan samting we i hapen long plante man. ?Wanem samting i save givhan blong mekem ol prea blong yu oli kamgud moa? Yu yu mas lukaotgud long fasin fren blong yu wetem Jeova God mo mekem i gru moa.
Faenem Taem Blong Prea
Fastaem, i nidim taem blong wokem mo lukaotgud long wan fasin fren. Ating evri dei, yu stap talem halo long plante man mo maet yu storeyan smol wetem olgeta tu—ol man we oli stap raonabaot long yu, ol man we oli wok wetem yu, ol bas draeva, mo ol man we oli wok long stoa. Be, samting ya i no minim se yu yu frengud wetem olgeta ya. Fasin fren i save gru taem yu toktok plante wetem wan man, mo sloslou ol smosmol tok nating oli jenis, nao yu stat talemaot ol dip filing mo tingting blong yu long hem.
Long sem fasin, prea i halpem yumi blong kam kolosap moa long Jeova. Be yumi mas makemaot taem blong prea. Yumi mas mekem moa i bitim we yumi jes talem tangkyu nomo bifo we yumi kakae. Moa yu toktok wetem Jeova, moa yu save stretem ol filing blong yu, ol tingting we oli pusum yu, mo ol fasin blong yu. Bambae yu stat faenemaot rod blong winim sam bigfala problem, from we speret blong God i stap mekem yu yu rimemba sam rul long Tok blong hem. (Ol Sam 143:10; Jon 14:26) Mo tu, taem yu prea, Jeova i kam olsem wan trufala man long tingting blong yu, mo bambae yu stat luksave moa se hem i laekem yu, i intres long yu, mo se hem i kea long yu tu.
Samting ya i tru moa taem yu luk se yu kasem ansa long ol prea blong yu. !Yes, Jeova “i save mekem antap moa long olgeta samting we yumi stap askem long hem, mo we yumi stap tingbaot”! (Efesas 3:20) Samting ya i no minim se God bambae i mekem ol merikel blong givhan long yu. Be, tru long Tok blong hem, Baebol, tru long ol buk we grup blong slef we i stret i wokem, mo tru long maot blong ol brata sista blong yumi we oli gat lav, maet hem i givim advaes we yu nidim blong lidim yu. Maet hem i givim paoa we yu yu nidim blong stanap strong mo agensem wan traem. (Matyu 24:45; 2 Timote 4:17) !Taem ol samting olsemia oli hapen long laef blong yumi, hat blong yumi i kam fulap wetem tangkyu long Fren blong yumi ya long heven!
Taswe, yu mas makemaot taem blong prea. I tru se, yumi no gat plante fri taem long had laef ya we yumi gat naoia. Be taem yu rili laekem wan man, bambae yu faenem taem blong kampani wetem hem. Makemgud olsem wanem man blong raetem Sam i talemaot filing blong hem, i se: “God, mi mi wantem blong yu yu kam long laef blong mi, olsem we wan anamol i wantem tumas blong dring wora long reva. God, yu yu laef we yu no save ded. Mi mi wantem yu tumas, olsem we mi tosta, mi wantem tumas blong dring wora. ?Wetaem bambae mi save kam stanap long fes blong yu, blong mekem wosip long yu?” (Ol Sam 42:1, 2) ?Yu yu gat semkaen filing olsem, we yu wantem tumas blong toktok wetem God? !Ale, makemaot taem blong mekem olsem!—Skelem wetem Efesas 5:16.
Eksampel, maet yu traem girap eli long moning blong gat smoltaem blong prea yu wan nomo. (Ol Sam 119:147) ?Samtaem yu faenem se yu no save slip long naet? Ale, olsem man blong raetem Sam, yu save yusum ol taem we tingting blong yu i trabol, olsem jans blong talemaot ol wari blong yu long God. (Ol Sam 63:6) No maet yu save mekem plante sotfala prea tru long dei. Man blong raetem Sam i talem long God se: “Yu yu God blong mi, plis yu sore long mi. Mi mi stap prea long yu oltaem, i stat long moning, gogo kasem long sapa.”—Ol Sam 86:3.
Mekem Ol Prea Blong Yumi Oli Dip Moa
Samting we i save givhan long yu, hemia sipos yu mekem ol prea blong yu oli kam longfala moa. Plante taem, long ol prea we oli sot, yu tokbaot ol samting we oli no impoten tumas. Be taem yu mekem ol prea we oli longfala moa mo we oli dip moa, ale yu rere moa blong talemaot ol tingting mo dip filing blong yu. Wan taem, Jisas i bin mekem wan prea we i gohed blong fulnaet. (Luk 6:12) I sua se, sipos yu no spid tumas, bambae yu faenemaot se yu kam kolosap moa long God, mo ol prea blong yu oli gat moa mining tu.
Samting ya i no minim se yu toktok olbaot from we yu no gat plante samting blong talem. Mo hem i no minim tu se yu talem ol semfala tok bakegen mo bakegen, mekem se tok ya i no moa gat mining. Jisas i givim woning ya se: “Taem yufala i prea, i nogud yufala i stap talem plante tok olsem we ol hiten man oli stap mekem. Ol hiten man ya oli ting se ol god blong olgeta bambae oli harem olgeta from we oli talem plante toktok. Bambae yufala i no folem fasin blong olgeta. Papa blong yufala, hem i save finis ol samting we yufala i sot long hem, taem we yufala i no askem ol samting ya long hem yet.”—Matyu 6:7, 8.
Prea i gat moa mining taem yu tingting fastaem long samting we yu wantem tokbaot. I gat fulap samting we yumi save tokbaot—glad we yumi kasem long wok blong prij, ol slak fasin mo mastik blong yumi, ol samting we yumi harem nogud from, ol wari blong yumi long saed blong mane, hadtaem long wok no skul, mekem famle blong yumi i haremgud, mo blong kongregesen blong yumi i gohed gud long saed blong speret. Hemia i jes sam nomo long olgeta samting we yumi save tokbaot.
?Sam samtaem, tingting blong yu i tingbaot narafala samting taem yu prea? Ale, traehad moa blong putum tingting blong yu i stap strong long samting we yu stap talem. Tingbaot, Jeova hem i rere blong ‘harem krae blong yumi.’ (Ol Sam 17:1) Ating yumi tu yumi mas traehad blong putum tingting blong yumi i stap strong long ol prea blong yumi. Yes, ‘mekem tingting blong yu i stap long ol samting blong speret,’ mo no letem hem i flae olbaot.—Rom 8:5.
Fasin blong yumi blong toktok long Jeova tu, hem i impoten. I tru se hem i wantem yumi blong luk hem olsem wan fren, be yumi neva mas fogetem se yumi stap toktok long Haefala Masta blong heven mo wol. Ridim mo tingting dip long nambawan pija we Revelesen japta 4 mo 5 i stap tokbaot. Long ples ya, Jon i luk wan vison we i soemaot olsem wanem Man ya we yumi kam kolosap long hem long prea, hem i hae mo i nambawan tumas. !Yumi gat wan bigfala jans taem yumi kam kolosap mo toktok wetem “God ya we i stap sidaon long bigfala jea blong hem”! Yumi neva mas yusum toktok we i no soem respek mo i no givim ona long hem. Be, yumi mas traehad blong mekem ‘ol tok blong yumi mo ol tingting blong yumi oli stretgud long fes blong Jeova.’—Ol Sam 19:14.
Be, yumi mas luksave tu, se yumi no save mekem Jeova i haremgud sipos yumi yusum ol bigfala tok we i had blong kasem save long hem. Hem i glad long ol tok blong yumi we oli soemaot respek, mo we oli kamaot long hat blong yumi, nating se yumi yusum ol isi tok nomo blong talem.—Ol Sam 62:8.
Hem i Leftemap Tingting Mo Kasem Save Long Yumi
Taem yumi nidim narafala blong givhan long yumi mo leftemap tingting blong yumi, plante taem yumi go luk wan gudfala fren blong i sapotem yumi mo soem sore long yumi. Long saed ya, i no gat wan fren we i isi moa blong kasem kwiktaem i bitim Jeova. Hem i “rere blong givhan long yumi long taem blong trabol.” (Ol Sam 46:1) From we hem i “God we i stampa blong givhan,” hem i kasem save moa long ol trabol we yumi stap kasem, i bitim olgeta narafala man. (2 Korin 1:3, 4; Ol Sam 5:1; 31:7) Mo hem i rili kasem save long ol filing blong olgeta we oli fesem hadtaem, mo hem i sore long olgeta tu. (Aesea 63:9; Luk 1:77, 78) Taem yumi tingbaot Jeova olsem wan fren we i kasem save long yumi, ale yumi harem se yumi fri blong toktok long hem wetem dip filing we i kamaot long hat blong yumi. Yumi harem se yumi save talemaot ol bigfala fraet mo wari we i stap dip insaed long yumi. Long rod ya nao, yumi stat haremsave long laef blong yumi wanwan olsem wanem we Jeova i ‘mekem tingting blong yumi i kamgud bakegen, mo yumi stap glad.’—Ol Sam 94:18, 19.
Samtaem maet yumi filim se yumi no naf blong kam fored long God from ol sin blong yumi. ?Be olsem wanem sipos wan gudfala fren blong yu i mekem wan mastik agensem yu mo i askem strong long yu blong yu fogivim hem? Bambae yu harem se yu wantem leftemap tingting blong hem mo mekem hem i haremgud bakegen, ?i tru no? Ale, ?from wanem yu tingting se Jeova i no wantem mekem olsem? Hem i glad nomo blong fogivim ol fren blong hem we oli sin from we oli no stretgud olgeta. (Ol Sam 86:5; 103:3, 8-11) Taem yumi save samting ya, yumi no traem haedem ol mastik blong yumi long hem. Yumi save sua long lav mo fasin fogif blong hem. (Ol Sam 51:17) Sipos tingting blong yumi i foldaon from slak fasin blong yumi, yumi save haremgud long ol tok blong 1 Jon 3:19, 20 se: “Sipos yumi stap mekem fasin ya long laef blong yumi, bambae yumi save we yumi man blong trutok. Mo yumi save mekem tingting blong yumi i strong long fes blong God, i nomata wanem tok tingting blong yumi i stap talem blong jajem yumi, from we God i hae moa long tingting blong yumi, mo hem i save evri samting.”
I no minim se yumi mas harem nogud fastaem, nao biaen, bambae yumi jes kasem lav mo sore blong God. Jeova hem i intres long evri samting we maet oli spolem yumi long saed blong speret mo filing. Yes, yumi neva mas gat tingting ya se ol filing, tingting, mo wari blong yumi oli no impoten, olsem we yumi no mas tokbaot olgeta long ol prea blong yumi. (Filipae 4:6) Taem yu stap wetem wan gudfala fren, ?yutufala i tokbaot ol bigbigfala samting nomo we oli hapen long laef blong yu? no ?yutufala i serem ol smosmol wari tu? Ale, long sem fasin, yu save tokbaot enikaen samting long laef blong yu wetem Jeova, from we yu save se ‘hem i stap tingbaot yu.’—1 Pita 5:7.
I tru tu se, fasin fren blong yu wetem wan narafala i no save stap longtaem sipos oltaem nomo yu tokbaot yu wan. Long sem fasin, yumi no mas tokbaot yumi wan nomo long ol prea blong yumi. Yumi mas talemaot tu, olsem wanem yumi laekem tumas mo tingbaot Jeova mo ol samting we hem i wantem. (Matyu 6:9, 10) Prea i no jes wan rod blong yumi askem God blong halpem yumi nomo, be hem i wan jans tu blong talem tangkyu mo blong presem hem. (Ol Sam 34:1; 95:2) Stadi we yumi mekem wanwan blong kasem moa “save,” bambae i halpem yumi long saed ya. Hem i save halpem yumi blong save moa Jeova mo ol fasin blong hem. (Jon 17:3) Sipos yu ridim buk blong Ol Sam mo yu makemgud olsem wanem ol man blong wok blong Jeova bifo oli bin toktok long hem, maet yu save faenem se samting ya bambae i halpem yu bigwan.
Fasin fren wetem Jeova hem i rili wan sas presen. Yumi save soemaot se yumi gat tangkyu from samting ya, taem yumi traem kam kolosap moa long Jeova long ol prea blong yumi, prea wetem fulhat blong yumi, mo talemaot olgeta dip filing blong yumi. Ale, bambae yumi kasem glad we man blong raetem Sam i tokbaot, taem hem i se: “Olgeta man we yu yu stap jusumaot olgeta yu stap tekem olgeta oli kam stap long tabu ples blong yu, oli save harem gud.”—Ol Sam 65:4.
[Tok blong pija long pej 28]
Yumi save tekem olgeta jans we yumi kasem tru long dei, blong prea long God