Ol Anamol We Oli Tantanem Bodi Blong Olgeta Olbaot Long Ol Klif
LONG taem bifo, i gat wan taon long wes saed blong Ded Si, mo draeples we i stap raon long hem, we nem blong tufala se En-gedi. Long ples ya, i gat ol smol rod antap long ol ston mo ol klif we oli stret long ol wael nani blong Promes Lan, olsem olgeta we yumi luk long ol pija ya.
Anamol ya we i save wokbaot gud long ol bigfala hil, i wan long ol samting blong sapraes we God i wokem. I gud we yumi lukluk long Baebol mo faenemaot moa long saed blong anamol ya we i pulum intres blong ol man.
“Ol Bigfala Hil i Ples Blong Ol Wael Nani”
Hemia singsing blong man we i raetem Ol Sam. (Ol Sam 104:18) !Ol wael nani oli gat ol fasin we oli nidim blong laef long ol hae ples! Oli save muf olbaot kwiktaem nomo, oli save klaem antap long ol bigfala ston we oli no seksek nating, mo oli save spid. Wan risen we oli save mekem olsem, hemia from ol sel fingga blong olgeta. Spes bitwin ol fingga long leg blong olgeta i save kam bigwan moa taem oli stanap, mekem se oli save stanap strong mo wokbaot gud long ol smosmol ples, long ol ston we oli antap olgeta.
Mo tu, ol wael nani oli no save foldaon. Oli save jyam ova long wan longfala ples i go long wan smosmol ples long saed blong klif we i jes naf blong oli putum ol fofala leg blong olgeta long hem. Douglas Chadwick, we i stadi long ol laef samting, i luk wan defren kaen wael nani i yusum fasin ya we hem i no save seksek mo foldaon, blong kamaot long wan ples long saed blong klif we i smol tumas blong tanraon long hem. Hem i talem se: “Fastaem, nani i sakem ae blong hem i go long wan narafala smol ples long saed blong klif samwe long 120 mita daon. Nao hem i putum tufala leg blong hem long fored oli stap strong long wan ples, mo sloslou hem i mufmuvum tufala leg blong hem biaen gogo oli kamdaon bitim hed blong hem, olsem ol man we oli tantanem bodi blong olgeta olbaot blong mekem spot. Mi pulum win strong taem mi luk we nani ya i gohed go kasem we tufala leg blong hem biaen oli kamdaon olgeta, nao hed blong hem i poen i gobak long ples we hem i stat long hem fastaem.” (National Geographic) !I klia from wanem ol man oli kolem ol wael nani se “ol anamol we oli tantanem bodi blong olgeta olbaot long ol klif”!
‘?Yu Yu Save Wetaem Ol Wael Nani Oli Bonem Pikinini?’
Ol wael nani oli gat fasin blong sem tumas. Oli laekem moa blong stap laef longwe long ol man. Yes, i hadwok long ol man blong kam kolosap long olgeta blong luklukgud olgeta. Taswe, Man we ‘olgeta anamol long taosen hil’ oli blong hem, i askem wan gudfala kwestin long Job, taem hem i se: “?Yu yu save finis stret taem blong ol wael nani long klif oli bonem pikinini blong olgeta?”—Ol Sam 50:10; Job 39:1.
Waes we God i givim long woman nani long ol hil, i mekem se hem i save wetaem hem i mas bonem pikinini blong hem. Kolosap oltaem, long en blong Mei no long Jun, hem i lukaot wan sefples nao i bonem wan no tu pikinini blong hem. Afta sam dei nomo, ol pikinini ya oli save klaemgud we oli no seksek nating.
“Wan Woman Dia We i Pulum Filing Mo Wan Naesfala Wael Nani”
Waes King Solomon i talem long ol hasban se: “Stap glad wetem waef blong yu we i mared long yu taem yu yu yangfala yet, wan woman dia we i pulum filing blong yu mo wan naesfala wael nani.” (Proveb 5:18, 19) Hem i no talem ol tok ya blong daonem ol woman. I luk olsem se Solomon i stap tokbaot fasin naes, fasin blong muvmuf olbaot isi nomo, mo sam narafala nambawan fasin blong ol anamol ya.
Wael nani i wan long ‘ol laef samting’ we oli soemaot bigwan se Man we i Wokem olgeta samting i waes tumas. (Jenesis 1:24, 25) Yumi glad se God i putum plante anamol we oli pulum intres blong yumi olsem, oli stap raonabaot long yumi.
[Foto Credit Line long pej 24]
Courtesy of Athens University