Tingting We i Jajem Man—?Wan Baden No Wan Gudfala Samting?

‘!TINGTING blong mi i stap stikim mi!’ Sam samtaem, yumi evriwan i harem se tingting blong yumi i stikim yumi. Hem i save stikim yumi smol nomo no hem i save mekem yumi harem nogud tumas. Sipos tingting blong wan man i gohed blong stikim hem, hem i save harem nogud tumas we hem i ting se hem i nogud nomo.

Ale, from samting ya, ?i stret blong talem se tingting we i jajem man hem i wan baden? Maet samfala oli harem se i olsem. Long ol yia we oli pas finis, plante laen blong man oli bilif se tingting ya we i stap jajem man, hem i wan fasin we i stap insaed long man finis taem hem i bon. Plante blong olgeta oli bin ting se God hem wan i givim tingting ya, blong lidim man blong mekem ol gudfala fasin. Taswe, samfala oli kolem tingting ya se “wan haf blong God insaed long man,” “fasin we man i bon wetem,” mo “voes blong God.”

Be, long ol yia we oli jes pas, plante man oli stat bilif se tingting ya we i stap jajem man, hem i wan samting we man i kasem. Oli se, hem i kamaot from fasin blong papa mama blong yumi mo fasin blong ol man raonabaot long yumi, we oli gat paoa long yumi. Olsem nao, samfala man blong stadi long fasin mo tingting blong ol man, oli talem se wan pikinini i lanem blong stap longwe long nogud fasin from we hem i fraet blong kasem panis. Oli bilif se tingting blong pikinini ya bambae i stikim hem folem ol rul mo bilif we papa mama i tijim long hem. Sam narafala man oli talem se fasin blong ol man raonabaot, hemia nao ol fasin mo rul we bambae yumi folem. !Samfala oli talem se tingting ya we i stikim man, hem i jes tu tingting we man i gat we tufala i stap agensem tufala, wan hemia ol samting we man ya i wantem mekem, mo narawan hemia ol samting we ol man raonabaot oli traem fosem hem blong mekem!

Nomata wanem bilif blong ol man long saed ya, be plante man oli bin stanap agensem papa mama, famle, mo kantri blong olgeta tu, from we tingting ya insaed long olgeta i bin pulum olgeta blong mekem olsem. !Samfala oli rere blong ded blong folem tingting blong olgeta we i save jajem olgeta! Mo nating se kastom blong ol man raon long wol oli defdefren, long olgeta ples blong wol ol man oli agensem ol nogud fasin olsem fasin blong kilim man i ded, stil, stilim woman no man blong narafala, gyaman, mo fasin blong mekem nogud wetem wan prapa famle blong olgeta. From samting ya, ?yumi save talem se tingting ya we i jajem man hem i stap finis insaed long man, taem hem i bon?

?Baebol i Talem Wanem Long Saed Blong Tingting We i Jajem Man?

Jeova God nomo i save talem trutok long bisnes ya. Yes, “hem [God] nomo i mekem yumi, mo yumi i blong hem.” (Ol Sam 100:3) Hem i savegud olgeta haf blong bodi mo tingting blong yumi mo olsem wanem oli wok. Tok blong God, Baebol, i eksplenem se God i wokem man olsem stret “pija” blong Hem. (Jenesis 1:​26) God i wokem man we hem i naf blong haremsave wanem samting i gud mo wanem samting i nogud. Stat long taem we God i wokem man, tingting ya we i jajem man i stap finis insaed long hem.​—Skelem wetem Jenesis 2:​16, 17.

Aposol Pol i soemaot samting ya long leta blong hem long ol man Rom. Hem i se: “Ol hiten man oli no save Loa ya [blong God]. Be taem we oli gohed long tingting blong olgeta nomo, nao oli stap mekem ol samting olsem we Loa ya i talem, i olsem we oli gat loa blong olgeta finis. Oli no save Loa ya blong Moses, be oli stap folem loa blong olgeta nomo. Fasin blong olgeta i stap soemaot we God i putum ol samting we Loa blong Moses i talem oli stap finis long tingting blong olgeta.” (Rom 2:​14, 15) Yumi makem long ples ya se, nating we plante man oli no bin gruap folem Loa we God i givim long ol man Jyu, be oli folem sam long ol rul we oli stap long Loa blong God. !Oli mekem olsem, i no from we oli laef wetem ol man we oli folem Loa ya, be from we loa ya i ‘stap finis long tingting blong olgeta’!

Taswe, tingting ya we i jajem man i no wan baden nating. Hem i wan presen we God i givim, wan gudfala samting. I tru se, hem i save mekem yumi harem nogud. Be taem yumi folemgud tingting ya, hem i save mekem yumi haremgud mo yumi save gat pis insaed long yumi. Hem i save lidim yumi mo lukaotgud long yumi, mo hem i save pusum yumi blong mekem samting. The Interpreter’s Bible i talem se: “Man i save haremgud long tingting mo filing blong hem nomo sipos samting we hem i mekem mo samting we hem i harem se i mas mekem, oli sem mak, oli no defren.” ?Olsem wanem wan man i save joenem tufala samting ya? ?I gat rod blong trenem mo stretem tingting ya we i jajem yumi? Haf we i kam biaen bambae i tokbaot ol kwestin ya.