Ripot Long Wok Blong Kingdom
Hem i Faenem Wan “Perel We i Nambawan”
‘KINGDOM blong heven i olsemia. I gat wan bisnesman we hem i stap lukaot ol gudgudfala perel. Taem hem i faenem wan perel we i nambawan, hem i go salemaot olgeta samting we hem i gat, i go pem perel ya i blong hem.’ Jisas i yusum ol tok ya blong soemaot olsem wanem Kingdom blong God i nambawan. (Matyu 13:45, 46) Plante taem, olgeta ya we oli luksave se Kingdom i nambawan, oli lego plante samting long laef blong olgeta from hem. Store ya we i kamaot long Pintang Kaonti, Taewan, i soemaot samting ya.
Long 1991, Masta mo Misis Lin i stat stadi Baebol wetem ol Wetnes blong Jeova. Taem wan lida blong skul long ples blong tufala i faenemaot samting ya, hem i traem pulum tufala blong joen long jyos blong hem. Blong kasem mane, famle Lin i stap salem blad blong ol pig mo dakdak long maket. Oli askem long lida blong skul ya tingting blong hem long bisnes ya. Hem i ansa se: “Man i save kakae evri samting we God i wokem.” Be, ol Wetnes oli talem samting we i defren long tufala. Oli leftemap tingting blong tufala blong lukluk wanem we Baebol i talem long saed ya. Nao tufala i kasem save se Jeova God i tingbaot blad olsem we i tabu, from we “laef blong man i stap long blad blong hem.” (Levitikas 17:10, 11, The New English Bible) Taswe, ol trufala Kristin oli ‘no tekem blad.’ (Ol Wok 15:20) Afta we Masta mo Misis Lin i luklukgud long Baebol, tufala i mekem disisen blong no moa salem blad, nating se tufala i kasem bighaf blong mane blong olgeta from wok ya. Be smoltaem biaen, tufala i fesem wan traem we i bigfala moa.
Bifo we famle Lin i lanem trutok, oli planem 1,300 tri blong betel nat long graon blong olgeta. Bambae i tekem faef yia bifo we oli kasem mane from ol tri ya, be taem olgeta tri ya oli karem frut, famle Lin i save kasem 7,700,000 vatu evri yia from. Kolosap long taem blong karem kakae blong ol tri ya, tufala i mas mekem wan impoten disisen. Tufala i bin lanem long Baebol stadi blong tufala se ol Kristin oli mas putumaot ‘olgeta samting long bodi blong olgeta mo long tingting blong olgeta, we oli stap mekem olgeta oli doti long fes blong God.’ Hemia se, tufala i no mas mekem ol doti fasin no pulum ol narafala blong mekem ol doti fasin olsem smok tabak, tekem drag, mo kakae betel nat. (2 Korin 7:1) ?Bambae tufala i mekem wanem?
Tingting blong Masta Lin i stikim hem, mekem se hem i stopem stadi blong hem. Long semtaem, Misis Lin i salem betel nat blong ol olfala tri, nao i winim bitim 300,000 vatu from. Hemia i soemaot se oli save winim bigfala mane from ol narafala tri blong olgeta. Be, tingting blong Masta Lin i stikim hem yet.
Hem i traehad blong winim tingting ya, gogo wan dei hem i askem ol Wetnes long ples ya blong katemaot ol tri blong betel nat. Ol Wetnes oli eksplenem se disisen ya i blong hem. Hem i mas ‘karem prapa basket blong hem,’ mo katemaot ol tri ya hem wan. (Galesia 6:4, 5) Oli pulum hem blong tingbaot promes long 1 Korin 10:13, we i talem se: “Ol samting ya we oli stap traem yufala, oli sem mak nomo long olgeta samting we oli stap traem olgeta man. Be God i stap holem promes blong hem. Mo hem i no save letem wan samting bambae i traem yufala, we i strong tumas long yufala. Be stret long taem ya we samting olsem i traem yufala, God bambae i mekem rod blong yufala, blong yufala i winim samting ya.” Mo tu, ol Wetnes oli mekem hem i tingtinggud, oli talem se: “Sipos mifala i katemdaon ol tri blong yu, maet biaen yu yu sore from, mo yu talem se i fol blong mifala we yu lusum ol tri blong yu.” Wan moning, i no longtaem biaen, noes blong wan jenso i wekemap Misis Lin. !Hasban blong hem wetem ol pikinini blong tufala oli stap katemaot ol tri blong betel nat!
Masta Lin i faenemaot se Jeova i stap holem promes blong Hem. Hem i faenem wan wok we tingting blong hem i no jajem hem from, nao hem i stret blong kam wan man blong presem Jeova. Hem i tekem baptaes long wan seket asembli blong ol Wetnes blong Jeova long Epril 1996.
Yes, i olsem we Masta Lin i “salem olgeta samting we hem i gat” blong pem wan “perel we i nambawan.” Naoia, hem i gat bigfala blesing ya blong frengud wetem Jeova God mo mekem wok blong sapotem Kingdom blong Hem.