?Wanem Ya Rod Blong Kasem Trufala Glad?

GOD i wokem man blong stap glad. ?Olsem wanem yumi save samting ya? I gud blong tingbaot taem ya we God i wokem faswan man.

Jeova God i wokem Adam mo Iv we tufala i naf blong haremgud mo glad. God i putum tufala ya long wan paradaes long Iden, hemia wan garen we tufala i save haremgud nomo long hem. Man we i Wokem tufala i givim evri samting we tufala i nidim blong stap laef. Long garen ya, i gat “ol tri [we] oli gud tumas blong luk, mo ol frut blong olgeta oli gud tumas blong kakae.” (Jenesis 2:9) Adam mo Iv i gat gud helt, tufala i strong, tufala i naes​—tufala i stretgud olgeta mo tufala i gat trufala glad.

Be, ?wanem nao stampa samting we i mekem tufala i glad? ?Hemia paradaes we tufala i stap long hem mo bodi blong tufala we i stretgud olgeta? I tru se, ol presen ya we God i givim oli mekem tufala i haremgud long laef. Be glad blong tufala i no dipen long ol samting ya. Garen blong Iden i no jes wan naesfala ples blong spel nomo. Hem i wan tabu ples, wan ples blong wosip long God. Rod blong kasem glad blong olwe i dipen long tufala, sipos tufala i wokem mo holemtaet wan gudfala fasin fren wetem Man ya we i Wokem olgeta samting. Yes, blong stap glad, tufala i mas strong long saed blong speret.​—Skelem wetem Matyu 5:3.

Strong Long Saed Blong Speret i Mekem Man i Glad

Fastaem olgeta, Adam i frengud long saed blong speret wetem God. Fasin fren ya i fulap long lav mo kaengud fasin, olsem wan pikinini boe wetem papa blong hem. (Luk 3:​38) Long garen blong Iden, evri samting i stret blong Adam mo Iv i givim wosip long God olsem we tufala i wantem. Sipos tufala i obei mo soem lav long Jeova, bambae tufala i presem mo givim ona long God moa, i bitim wanem we ol anamol raonabaot long tufala oli save mekem. Tufala i gat waes we i mekem se tufala i naf blong presem God from ol nambawan fasin blong hem, mo tufala i naf blong sapotem hae rul blong hem. Mo tu, tufala i save gohed blong kasem lav mo fasin keagud blong Jeova.

Fasin ya blong toktok wetem Man we i Wokem olgeta samting mo obei long ol loa blong hem, i karem trufala glad i kam long faswan papa mama blong yumi. (Luk 11:28) Adam mo Iv i no nid blong spenem plante yia blong traem ol defren rod blong luk weswan nao bambae i mekem tufala i glad. No gat. Tufala i glad finis taem God i wokem tufala. Tufala i gat pis wetem God mo tufala i letem hem i lidim tufala, ale, samting ya nao i mekem tufala i glad.

Be, glad ya i finis wantaem nomo taem Adam mo Iv i no moa obei long God. Taem tufala i mekem stronghed, tufala i brekem gudfala fasin fren long saed blong speret we tufala i gat wetem Jeova. Tufala i no moa stap olsem fren blong God. (Jenesis 3:​17-​19) I luk olsem se stat long dei we Jeova i sakemaot tufala long garen, hem i no moa toktok wetem tufala. Tufala i no moa stretgud olgeta, mo tufala i lusum hop blong laef olwe, wetem garen ya we i olsem ples blong tufala. (Jenesis 3:​23) Be samting we i moa nogud se, taem tufala i lusum fasin fren wetem God, ale, tufala i lusum rod blong stap glad.

Yumi Naf Blong Jusum

Bifo we Adam mo Iv i ded, tufala i gat ol pikinini we oli karem fasin blong tufala. Ol pikinini ya oli gat wan tingting we i save jajem olgeta, mo oli naf blong kasem save long ol samting long saed blong speret. Oli no kam nogud bitim mak gogo oli olsem anamol. No gat. Taswe, yumi save fren bakegen wetem Man ya we i Wokem Olgeta Samting. (2 Korin 5:​18) From we ol man oli gat hed, oli naf blong jusum sipos oli wantem obei long God no nogat. Yumi save samting ya from we plante handred yia biaen long Adam mo Iv, Jeova i letem nyufala nesen blong Isrel i jusum laef no ded. Moses i talemaot tok blong God, i se: “Tede mi putum long fored blong yufala laef mo gud fasin, mo ded mo nogud fasin.”​—Dutronome 30:15-​18.

Naoia tu, nating se faswan Paradaes i lus plante taosen yia finis, ol man oli naf yet blong jusum wanem i stret. Yumi gat wan tingting we i save jajem yumi long samting we yumi mas mekem mo samting we yumi no mas mekem. Mo yumi naf tu blong obei long ol loa blong God. Baebol i tokbaot “tingting” we i stap insaed long yumi. (2 Korin 4:​16; Rom 7:​22) Tok ya i soemaot se yumi bon we yumi save kam naf blong soemaot ol fasin olsem God, mo blong tingting olsem hem. Yes, yumi naf blong kam bigman long saed blong speret.

Aposol Pol i tokbaot fasin we yumi bon wetem mo tingting ya we i save jajem yumi, i se: “Ol hiten man oli no save Loa ya. Be taem we oli gohed long tingting blong olgeta nomo, nao oli stap mekem ol samting olsem we Loa ya i talem, i olsem we oli gat loa blong olgeta finis. Oli no save Loa ya blong Moses, be oli stap folem loa blong olgeta nomo. Fasin blong olgeta i stap soemaot we God i putum ol samting we Loa blong Moses i talem oli stap finis long tingting blong olgeta . . . samtaem oli harem long tingting blong olgeta we oli mekem i stret, mo samtaem oli harem we oli mekem i no stret.”​—Rom 2:​14, 15.

Waes Blong God Mo Fasin Obei​—Hemia Nao Rod

Be, maet wan man i askem se: ‘Sipos wan tingting i stap finis insaed long yumi we yumi wantem wosip long God, mo sipos yumi save haremgud mo kasem glad from, ale, ?from wanem ol man long olgeta ples oli no glad?’ Hemia from we, blong kasem glad, fastaem yumi wanwan i mas kam bigman long saed blong speret. Nating se God i wokem ol faswan man blong oli karem fasin blong hem, be biaen oli gowe long Man ya we i Wokem Olgeta. (Efesas 4:​17, 18) Taswe, yumi wanwan i mas traehad blong stanemap mo holemtaet fasin frengud wetem God long saed blong speret. Wan fasin fren olsemia bambae i no kam hem wan.

Jisas i makemaot tu impoten rul blong folem blong kam bigman long saed blong speret. Faswan rul se, yumi mas kasem stret save long saed blong God, mo narawan se, yumi mas obei mo folem samting we hem i wantem. (Jon 17:3) Jisas i talem bakegen wan vas blong Baebol, i se: “Baebol i talem se ‘Kakae nomo i no save mekem man i laef. Evri tok we God i talem, hemia nao samting blong mekem man i laef.’ ” (Matyu 4:4) Long wan narafala taem, Jisas i talem se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:​34) Yumi no nidim blong westem plante yia blong traem ol defren samting blong luk weswan nao i save karem glad. Hemia i no rod blong faenem glad. Be, waes we i kamaot long God mo fasin blong obei long Man ya we i Wokem Yumi, hemia nao i save lidim yumi blong kasem trufala glad long laef.​—Ol Sam 19:​7, 8; Eklesiastis 12:13.

I klia se, yumi save faenem glad sipos yumi folem waes blong God mo gat wan gudnem wetem hem. (Ol Wok 17:26, 27) Save long saed blong Jeova mo ol stampa tingting blong hem i stap, blong olgeta man oli save kasem. Baebol i stap yet olsem buk we i kasem plante moa man i bitim ol narafala buk long wol. Oli wokem finis plante bilyan kopi blong hem long plante lanwis. Baebol i save halpem yu blong kam wan fren blong God mo blong kasem trufala glad, from we hem i talem se ‘!olgeta we Jeova i God blong olgeta, oli save glad!’​—Ol Sam 144:15.

[Bokis Blong Pija Long Pej 6]

Rod Blong Kasem Glad

1. Yumi mas luksave se ol samting long saed blong speret oli gud tumas, mo wokem fasin blong laekem ol samting ya. Jisas i talem se: “Man we i harem tok blong God mo i obei long hem, hem i save [glad] moa.”​—Luk 11:28.

2. Yumi mas luksave se i moa impoten we God i agri long yumi i bitim we yumi kasem mane mo ol sas samting blong laef. Pol i raetem se: “Yes i tru, fasin blong stap fasgud long God i wan rod blong kasem plante samting. Be yumi mas haremgud long wanem samting we yumi gat. . . . Taswe sipos yumi gat kakae mo klos blong yumi, hemia i naf, yumi save glad long ol samting ya.”​—1 Timote 6:​6-8, NW.

3. Traehad blong trenem tingting blong yumi folem Baebol, blong i jajem yumi long samting we yumi mas mekem mo samting we yumi no mas mekem, mo yumi mas obei long hem.​—Rom 2:​14, 15.

4. Mekem strong disisen blong obei long Jeova God. Long rod ya, yumi save kam naf blong stap olsem ol man blong hem. Deved i raetem long taem bifo, se: “!Ol man we Jeova i God blong olgeta, oli save glad!”​—Ol Sam 144:​15, NW.

[Tok Blong Pija Long Pej 7]

“Olgeta we oli luksave se oli nidim ol samting long saed blong speret, oli save glad.”​—Matyu 5:​3, “NW.”