Bilif i Mekem Se Yumi Gat Longfala Tingting Mo Yumi Prea Oltaem
“Yufala i mas mekem tingting blong yufala i longfala mo i strong tu, from we i no longtaem, bambae Masta blong yumi i kambak, mo i stap.”—JEMES 5:8, “NW.”
1. ?From wanem i gud blong tingting dip long Jemes 5:7, 8?
TAEM ya we Jisas Kraes bambae i ‘kambak mo i stap,’ we ol man bifo oli wet longtaem long hem, naoia i kamtru finis. (Matyu 24:3-14) Ol man we oli stap talem se oli gat bilif long God mo Kraes, oli nidim blong tingtinggud naoia, i bitim olgeta taem bifo, long ol tok blong disaepol Jemes, se: “Ol brata mo sista. Yufala i mas mekem tingting blong yufala i longfala . . . blong wet gogo Masta blong yumi i kambak, mo i stap. Man blong wokem garen i mekem tingting blong hem i longfala, blong wet gogo garen blong hem i karem kakae. Hem i save wet long faswan ren blong go planem garen, mo i save wet longtaem blong ren i foldaon bakegen. Long sem fasin, yufala i mas mekem tingting blong yufala i longfala mo i strong tu, from we i no longtaem, bambae Masta blong yumi i kambak, mo i stap.”—Jemes 5:7, 8, NW.
2. ?Ol man we Jemes i raetem leta i go long olgeta oli kasem wanem kaen problem?
2 Olgeta man we Jemes i raetem tok ya blong God i go long olgeta, oli nidim blong mekem tingting blong olgeta i longfala mo stretem plante defren kaen problem. Plante blong olgeta oli stap mekem fasin we i narakaen olgeta long fasin blong man we i bilif long God. Eksampel, oli mas stretem sam tingting we i stap pulum hat blong olgeta blong wantem sam nogud samting. I nidim se pis i stanap bakegen long medel blong ol faswan Kristin ya. Mo tu, olgeta ya oli nidim advaes se oli mas mekem tingting blong olgeta i longfala mo prea oltaem. Naoia, bambae yumi luklukgud long ol tok blong Jemes, mo tingbaot olsem wanem yumi save folem ol tok ya long laef blong yumi.
Tingting We i Pulum Man Blong Wantem Samting Nogud, i Save Spolem Hem
3. ?Wanem i stampa blong ol rao insaed long kongregesen, mo yumi save lanem wanem samting from?
3 Long taem bifo, samfala we oli stap talem se oli Kristin, oli no holem pis wetem ol narafala Kristin. Stampa blong fasin ya, hemia se tingting blong olgeta i stap pulum olgeta blong wantem samting we i no stret. (Jemes 4:1-3) Ol rao bitwin long olgeta oli stap spolem pis, mo samfala oli no stap soem lav from oli stap jajem ol brata blong olgeta. Samting ya i stap kamaot from we oli wantem tumas blong haremgud long ol samting we bodi blong olgeta nomo i wantem, be oli no save kasem ol samting ya. Maet yumi tu i nidim blong prea mo askem God blong halpem yumi blong blokem ol tingting we oli pulum yumi blong wantem haenem, paoa, mo plante samting blong laef. Olsem nao, bambae yumi no mekem wan samting we i spolem pis long kongregesen. (Rom 7:21-25; 1 Pita 2:11) Samfala Kristin long faswan handred yia, oli gat fasin blong wantem tumas sam samting blong narafala man, go kasem mak we oli no laekem nating man ya mo oli wantem kilim hem i ded. God i no save ansarem prea blong olgeta ya we i stanap long tingting we i no stret. Be oli stap gohed blong traem kasem samting we oli wantem. Long sem fasin, sipos yumi wantem samting we i no stret, maet yumi askem samting ya long God, be yumi no save kasem, from we God blong yumi we i tabu mo i klin i no save ansa long ol prea olsemia.—Lamentesin 3:44; 3 Jon 9, 10.
4. ?From wanem Jemes i talem se samfala oli olsem “woman we i stap mekem i krangke long man blong hem,” mo tok ya i mas mekem wanem long yumi?
4 Sam long ol faswan Kristin oli folem fasin blong wol, oli jelas, mo oli flas. (Jemes 4:4-6) Jemes i talem se sam long olgeta oli olsem “woman we i stap mekem i krangke long man blong hem.” From we oli stap folem fasin blong wol, long saed blong speret, oli olsem woman we i go slip wetem narafala man. (Esikel 16:15-19, 25-45) Tru ya, yumi no mas folem ol man blong wol long tingting, toktok mo fasin blong yumi, from we samting ya bambae i mekem se yumi kam enemi blong God. Tok blong Hem i soem se ‘fasin jelas’ i kamaot long nogud tingting no “speret” we i stap long ol sinman. (Jenesis 8:21; Namba 16:1-3; Ol Sam 106:16, 17; Eklesiastis 4:4) Taswe, sipos yumi luksave se yumi mas winim fasin jelas, flas, no wan narafala nogud fasin, yumi mas askem long God blong givim tabu speret long yumi blong halpem yumi. Paoa ya, we God i givim from gladhat blong hem, i bigwan, i naf blong winim ‘fasin jelas.’ Jeova i agensem ol man we oli flas, be bambae i givhan long yumi long gladhat blong hem, sipos yumi traehad blong winim ol nogud tingting we oli pulum yumi blong mekem sin.
5. Blong kasem gladhat blong God, ?yumi mas mekem wanem samting?
5 ?Olsem wanem yumi save kasem gladhat blong God? (Jemes 4:7-10) Blong kasem kaengud fasin blong Jeova, yumi mas obei long hem, glad long ol samting we hem i givim long yumi, mo agri long olgeta samting we hem i wantem. (Rom 8:28) Mo tu, yumi mas “blokem” no ‘stanap strong agensem’ Setan. Bambae hem i ‘ronwe long yumi’ sipos yumi strong blong sapotem hae rul blong Jeova. Jisas i stap givhan long yumi, taem hem i blokem ol rabis paoa blong wol ya blong oli no mekem wan samting we i save spolem yumi blong olwe. Mo yumi neva mas fogetem samting ya: Taem yumi prea, obei, mo bilif long God, yumi kam stap kolosap long Hem, mo Hem bambae i stap kolosap long yumi.—2 Kronikel 15:2.
6. ?From wanem Jemes i talem se samfala Kristin oli “man nogud”?
6 ?From wanem Jemes i yusum tok ya “man nogud” blong tokbaot samfala we oli stap talem se oli bilif long God? From we oli stap mekem “ol faet,” mo oli no stap laeklaekem olgeta nating, i olsem we oli wantem kilkilim olgeta i ded nomo. I no stret we Kristin man i gat fasin olsem. (Taetas 3:3) Oli nidim blong wasem “han” blong olgeta, we i fulap long ol nogud wok. Oli nidim tu blong mekem ‘hat’ blong olgeta i klin, from we hat nao i stampa blong ol fasin blong olgeta. (Matyu 15:18, 19) Olgeta ya oli “gat tu tingting,” we samtaem oli fren wetem God, mo samtaem oli fren wetem wol. Nogud eksampel blong olgeta i wan woning long yumi, blong lukaotgud oltaem se ol fasin ya oli no spolem bilif blong yumi.—Rom 7:18-20.
7. ?From wanem Jemes i talem long samfala blong ‘sore mo krae’?
7 Jemes i talem long ol man we oli ridim leta blong hem se: “I gud yufala i sore, yufala i krae.” Sipos oli harem nogud long fored blong God, samting ya bambae i soemaot se oli tanem tingting blong olgeta from ol sin blong olgeta. (2 Korin 7:10, 11) Tede, samfala we oli talem se oli gat bilif long God, oli stap folem fasin blong wol. Sipos sam long yumi i olsem, yumi mas krae from we yumi slak tumas long saed blong speret, mo yumi mas mekem wan samting kwiktaem blong stretem fasin blong yumi. Sipos yumi jenisim fasin blong yumi mo God i fogivim yumi, bambae yumi haremgud, from we tingting blong yumi i no moa stikim yumi, mo from we yumi glad long hop ya blong kasem laef we i no save finis.—Ol Sam 51:10-17; 1 Jon 2:15-17.
No Jajem Brata Blong Yumi
8, 9. ?From wanem yumi no mas jajem no tok agensem narafala?
8 I wan sin blong tok agensem ol Kristin brata mo sista blong yumi. (Jemes 4:11, 12) Be, maet samfala oli stap tok agensem ol narafala Kristin blong traem soem se oli stret man, no maet oli daonem narafala blong traem leftemap olgeta nomo. (Ol Sam 50:20; Proveb 3:29) Grik tok we yumi tanem i kam ‘tok agensem’ i minim strong fasin agens, tok we i bitim mak mo i no tru. Hemia i sem mak long fasin blong jajem brata blong yumi. ?Olsem wanem man we i mekem samting ya i ‘stap tok nogud long loa blong God, i stap jajem loa ya se i rabis’? Tingbaot ol tija blong Loa mo ol Farisi we oli gat flas fasin, nao ‘oli livim loa we God i givim,’ mo oli yusum ol rul blong olgeta nomo blong jajem narafala. (Mak 7:1-13) Sem mak nao, sipos yumi jajem wan brata we Jeova i no jajem, yumi stap ‘jajem loa blong God.’ Yumi mekem wan sin, from i olsem we yumi stap talem se loa blong God i no naf. Mo tu, taem yumi talem ol tok we i no stret blong daonem Kristin brata no sista blong yumi, yumi no stap folem loa blong lav.—Rom 13:8-10.
9 Yumi no mas fogetem samting ya: ‘Wan Man nomo i gat raet blong putum loa mo jajem man’—hemia Jeova. ‘Loa blong hem i stretgud olgeta,’ yumi no save talem se i no naf. (Ol Sam 19:7; Aesea 33:22) God nomo i gat raet blong putum ol loa mo rul we man i mas folem blong kasem laef. (Luk 12:5) Taswe, Jemes i askem se: “?Yufala i ting se yufala i God, blong yufala i save jajem ol brata blong yufala olsem?” Yes, yumi no gat raet blong jajem mo tok agensem narafala. (Matyu 7:1-5; Rom 14:4, 10) Sipos yumi tingting dip long hae rul blong God, fasin blong hem blong mekem i sem mak long olgeta man, mo fasin blong yumi ol sinman, samting ya i mas pusum yumi blong blokem fasin ya blong jajem narafala man olsem we yumi stret man.
Blokem Tok Flas Mo Fasin Blong Trastem Yumi Wan Tumas
10. ?From wanem yumi no mas fogetem Jeova long laef blong yumi evri dei?
10 Oltaem yumi mas tingbaot Jeova mo loa blong hem. (Jemes 4:13-17) Man we i trastem hem wan tumas i stap fogetem God, mo i stap talem se: ‘Tede no tumora bambae mifala i go long wan narafala taon, stap wan fulyia long ples ya, mo mekem wok blong kasem plante mane.’ Sipos yumi ‘stap hivimap plante samting blong yumi nomo, be long fes blong God yumi no rijman nating,’ nao tumora yumi ded, ale yumi no gat jans nating blong mekem wok blong Jeova. (Luk 12:16-21) Jemes i talem se yumi olsem smok blong hil long moning, we i “stap smoltaem nomo, nao biaen i lus bakegen.” (1 Kronikel 29:15) Taem yumi soem bilif long Jeova, long taem ya nomo, yumi save hop blong kasem glad mo laef blong olwe.
11. ?I minim wanem taem yumi talem se, ‘Sipos Jeova i wantem’?
11 Bitim we yumi tok flas mo fogetem God, i moagud we yumi tingting olsemia: ‘Sipos Jeova i wantem olsem, bambae mifala i stap laef, nao bambae mifala i save mekem olsem, olsem.’ Taem yumi talem, ‘Sipos Jeova i wantem,’ yumi soem se yumi stap traehad blong folem wil blong hem. Maet yumi mas mekem bisnes blong sapotem famle blong yumi, wokbaot i go long ol defren ples blong mekem wok blong Kingdom, mo sam narafala samting olsem. Be yumi no mas tok flas. “Ol tok flas olsem i nogud,” from we man we i mekem olsem, i stap fogetem se hem i mas dipen long God oltaem.—Ol Sam 37:5; Proveb 21:4; Jeremaea 9:23, 24.
12. ?Wanem mining blong tok blong Jemes 4:17?
12 I luk olsem we Jemes i talem nekisfala tok blong finisim ol tok blong hem long saed blong fasin blong trastem yumi wan tumas, mo fasin blong tok flas. Hem i se: “Man we i save wanem fasin i stret blong mekem, be i no mekem, hem i mekem sin ya.” Evri Kristin i mas luksave wetem tingting daon se hem i dipen long God. Sipos hem i no luksave samting ya, “hem i mekem sin ya.” Mo tok ya i stret tu long man we i no mekem ol samting we hem i mas mekem blong soem bilif long God.—Luk 12:47, 48.
Woning Long Saed Blong Ol Rijman
13. ?Jemes i talem wanem long saed blong ol rijman we oli no yusumgud ol sas samting blong olgeta?
13 Sam long ol faswan Kristin oli stat ronem ol sas samting, mo oli tinghae long ol rijman. Taswe, Jemes i talem sam strong tok long saed blong ol rijman. (Jemes 5:1-6) Ol rijman blong wol we oli yusum ol sas samting blong olgeta long fasin we i rong, bambae oli ‘krakrae from ol trabol we i kasem olgeta,’ taem God i givim pei long olgeta stret long ol samting we oli mekem. Long taem bifo, man i rij taem hem i gat plante kaliko, sid blong mekem bred, mo waen. (Joel 2:19; Matyu 11:8) Sam long ol samting ya oli save kam rotin no ‘kakros i save kakae.’ Be Jemes i no stap makem poen ya se oli save kam rotin, no gat. Hem i stap makem se ol sas samting ya oli blong nating nomo. Gol mo selva i no stap rosta, be sipos yumi stap hivimap plante, bambae oli kam olsem we oli no sas nating, olsem samting we i rosta finis. “Rosta” i soem se man i no stap yusumgud ol sas samting. Taswe, yumi evriwan i mas rimemba se ol man we oli trastem ol sas samting blong olgeta, oli stap hivimap samting olsem “faea,” we i save ‘kakae bodi blong olgeta long ol las dei,’ taem God i soemaot kros blong hem long olgeta. Ol tok ya oli gat spesel mining long laef blong yumi, from we yumi stap finis long “taem blong en.”—Daniel 12:4; Rom 2:5.
14. ?Plante rijman oli mekem wanem fasin, mo yumi mas mekem wanem long taem olsem?
14 Plante rijman oli givim smol pei nomo long ol man blong wok blong olgeta. Ale, i olsem se pei blong ol man ya “i stap singaot bigfala” blong wetnes agensem ol rijman ya. (Skelem wetem Jenesis 4:9, 10.) Ol rijman blong wol oli ‘gat isi laef, mo ol samting blong mekem olgeta oli haremgud.’ Oli bitim mak long ol fasin we oli save haremgud long olgeta, nao oli kam olsem buluk we man i fidim i fatfatgud, mo hat blong olgeta i kam strong moa blong no lesin long God. Bambae oli gohed blong mekem olsem gogo “dei” i kamtru we God i makemaot finis blong kilim olgeta i ded. Ol rijman oli ‘jajem mo kilim i ded ol stret man.’ Taswe, Jemes i askem se: “Hem i stap agensem yu, ?no?” (NW) Be, wan narafala rod blong talem vas ya, hemia se: “Stret man, hem i no stap agensem yu.” Nating se i olsem wanem, yumi no mas mekem i moa gud long ol rijman i bitim ol narafala man. Yumi mas putum ol samting long saed blong speret oli stap long fasples long laef blong yumi.—Matyu 6:25-33.
Bilif i Givhan Long Yumi Blong Gat Longfala Tingting
15, 16. ?From wanem i impoten tumas blong mekem tingting blong yumi i longfala?
15 Afta we Jemes i tokbaot strong fasin we ol rijman blong wol oli mekem long ol narafala, hem i pulum ol Kristin we oli stap harem nogud from ol strong fasin ya, blong mekem tingting blong olgeta i longfala. (Jemes 5:7, 8) Taem Kraes i kambak mo i stap, ol man blong bilif we oli mekem tingting blong olgeta i longfala tru long ol hadtaem, bambae oli kasem pei blong fasin blong holem bilif. Long taem ya, jajmen bambae i kamtru long ol man we oli stap mekem i strong tumas long olgeta ya. (Matyu 24:37-41) Ol faswan Kristin ya oli mas olsem man blong wokem garen. Man ya i mekem tingting blong hem i longfala blong wet long ren we i kam bifo long koltaem, nao hem i save planem garen, mo wet bakegen long ren we i kam bifo long hot taem, nao garen i karem kakae. (Joel 2:23) Yumi tu i mas mekem tingting blong yumi i longfala mo no letem hat blong yumi i kam slak, !antap moa, naoia we yumi stap finis long ‘taem ya we Masta Jisas Kraes i kambak mo i stap’!
16 ?From wanem yumi mas mekem tingting blong yumi i longfala? (Jemes 5:9-12) Fasin ya bambae i givhan long yumi blong no toktok smol mo kam kros taem narafala Kristin i mekem yumi harem nogud. Sipos nogud tingting i pusum yumi blong ‘toktok agens long ol narafala oltaem se “Trabol ya i fol blong hem, mo trabol ya i fol blong hem,” Jaj ya Jisas Kraes bambae i jajem yumi. (Jon 5:22) Naoia we hem i ‘kambak mo i stap finis’ mo ‘i stap long doa nomo,’ yumi mas holem pis i stap. Yumi save mekem olsem, sipos yumi gat longfala tingting long ol brata blong yumi, we plante samting i stap traem bilif blong olgeta. Bilif blong yumi bambae i kam strong moa sipos yumi tingbaot se God i givim blesing long Job from we hem i mekem tingting blong hem i longfala blong stanap strong longtaem, tru long ol trabol we hem i kasem. (Job 42:10-17) Sipos yumi gat bilif mo longfala tingting, bambae yumi luk we ‘Jeova i kaen tumas, mo hem i gat sore long man.’—Maeka 7:18, 19.
17. ?From wanem Jemes i talem se ‘yumi no mas ademap sam tok long promes blong yumi blong mekem i strong moa’?
17 Sipos yumi no gat longfala tingting, maet yumi yusum tang blong yumi long rong fasin taem yumi kasem traem. Eksampel, maet yumi kwik tumas blong mekem ol strong promes. Jemes i givim woning agensem fasin blong mekem ol strong promes we yumi no tingtinggud long olgeta fastaem. Hem i talem se: “Taem yufala i mekem promes, bambae yufala i no joenem sam nem long promes blong yufala blong mekem i strong moa.” Mo tu, fasin ya blong ademap sam tok blong mekem tok blong yumi i strong moa, i olsem gyaman fasin nomo. Yumi mas talem trutok nomo. Taem yumi talem ‘yes’ yumi minim ‘yes,’ mo taem yumi talem ‘no’ yumi minim ‘no.’ (Matyu 5:33-37) Be, Jemes i no stap tokbaot strong promes we yumi mekem blong talem trutok taem yumi wetnes long kot.
Bilif Mo Prea Blong Yumi
18. ?Wetaem yumi mas “prea” mo “sing blong presem God”?
18 Prea i mas wan impoten samting long laef blong yumi sipos yumi wantem bos long tang blong yumi, mekem tingting blong yumi i longfala, mo stap strong long saed blong bilif long God. (Jemes 5:13-20) Taem yumi kasem traem, yumi mas “prea” moa. Sipos yumi glad, yumi save “sing blong presem God,” olsem Jisas mo ol aposol blong hem oli mekem taem hem i stanemap lafet blong Memoriol blong ded blong hem. (Mak 14:26, futnot, NW) Sam samtaem, maet yumi fulap long tangkyu long God, mekem se yumi singsing blong presem hem long hat blong yumi. (1 Korin 14:15; Efesas 5:19) !Mo tu, yumi haremgud tumas blong singsing presem Jeova long ol Kristin miting!
19. ?Yumi mas mekem wanem sipos yumi kam sik long saed blong speret, mo from wanem?
19 Maet yumi no wantem singsing sipos yumi stap sik long saed blong speret. Ating yumi harem nogud from wan fasin nogud we yumi bin mekem, no from we yumi no stap tekem kakae oltaem long tebel blong Jeova. Sipos yumi harem nogud olsemia, yumi mas gat tingting daon mo singaot ol elda oli kam ‘prea long yumi.’ (Proveb 15:29) Mo tu, bambae oli ‘kafsaedem oel i go long yumi long nem blong Jeova.’ Ol gudfala tok mo advaes blong Baebol we ol elda oli talem blong leftemap tingting blong yumi, i olsem oel we i mekem wan kil long bodi blong yumi i no moa soa. Ol tok ya bambae i mekem tingting blong yumi we i foldaon i haremgud bakegen, mo bambae i givhan long yumi blong stretem bilif we i hafhaf, mo winim fasin fraet. Sipos yumi gat bilif, ale, ‘prea blong ol man ya we oli bilif bambae i mekem yumi kamgud bakegen.’ Sipos ol elda oli faenemaot se yumi sik long saed blong speret from we yumi bin mekem wan bigfala sin, long kaen mo klia fasin, bambae oli eksplenem wanem sin we yumi bin mekem, mo traem givhan long yumi. (Ol Sam 141:5) Mo sipos yumi tanem tingting blong yumi from sin ya, yumi save bilif se God bambae i harem prea blong olgeta mo fogivim yumi.
20. ?From wanem yumi mas taltalemaot ol sin blong yumi mo prea from narafala?
20 Fasin blong ‘taltalemaot ol sin blong yumi long yumi,’ i save givhan long yumi blong no moa mekem sin. Fasin ya i save givhan long yumi blong soem sore long narafala, mekem se bambae yumi ‘prea from ol narafala.’ Yumi save bilif se fasin ya bambae i karem gudfala frut from we prea blong “stret man”—hemia man we i gat bilif mo we God i luk hem olsem wan gudfala man—i save pulum Jeova blong mekem plante samting. (1 Pita 3:12) Profet Elaeja i bin gat ol slak fasin olsem yumi, be ol prea blong hem oli gat paoa. Hem i prea blong bambae i no ren, nao long tri yia haf i no gat ren nating. Biaen, hem i prea bakegen, nao ren i foldaon bakegen.—1 King 17:1; 18:1, 42-45; Luk 4:25.
21. ?Maet yumi save mekem wanem sipos wan Kristin brata no sista blong yumi i “gowe long trutok”?
21 ?Olsem wanem sipos wan memba blong kongregesen i “gowe long trutok,” i min se i no moa folem stret tijing mo fasin? Maet yumi save yusum ol advaes blong Baebol, prea, mo sam narafala samting, blong mekem hem i luksave nogud rod we hem i stap folem. Sipos yumi lidim hem i kambak long stret rod, ale ransom sakrifaes blong Jisas i save givhan long hem yet. Yumi save blokem hem blong i no ded long saed blong speret mo blong i no kasem panis blong ded tu. Taem yumi halpem wan man we i bin mekem mastik, yumi givhan blong tekemaot plante sin. Taem man ya i kasem advaes blong stretem hem, nao i jenisim nogud fasin blong hem, tanem tingting blong hem from sin ya, mo i askem God blong fogivim hem, bambae yumi glad tumas we yumi bin givhan blong tekemaot sin blong hem.—Ol Sam 32:1, 2; Jud 22, 23.
Advaes Blong Yumi Evriwan
22, 23. ?Ol tok blong Jemes oli mas mekem wanem long yumi?
22 I klia se, leta blong Jemes i karem advaes we i gud blong yumi evriwan. Hem i soem long yumi olsem wanem blong stanap strong tru long ol traem, i givim woning agensem fasin blong mekem i moagud long samfala i bitim ol narafala, mo i pusum yumi blong mekem ol gudfala wok. Jemes i talem long yumi blong bos long tang blong yumi, blokem ol fasin blong wol, mo holem pis wetem ol man. Ol tok blong hem oli mas halpem yumi tu blong gat longfala tingting mo prea oltaem.
23 I tru se, leta blong Jemes i go fastaem long ol faswan Kristin we tabu speret i makemaot olgeta. Be, yumi evriwan i mas lesin long advaes blong hem we i save givhan long yumi blong holemtaet bilif. Ol tok blong Jemes i save mekem bilif blong yumi i strong moa, nao samting ya bambae i pusum yumi blong girap mo mekem moa long wok blong God. Mo tu, leta ya we i kamaot long God i save wokem bilif long yumi we bambae i stap oltaem. Bilif ya bambae i mekem yumi kam ol Wetnes blong Jeova we oli gat longfala tingting mo prea oltaem, long ‘taem ya we Masta Jisas Kraes i kambak mo i stap’ finis.
?Bambae Yu Yu Ansa Olsem Wanem?
◻ ?From wanem sam long ol faswan Kristin oli nidim blong jenisim tingting mo fasin blong olgeta?
◻ ?Jemes i givim wanem woning long ol rijman?
◻ ?From wanem yumi mas mekem tingting blong yumi i longfala?
◻ ?From wanem yumi mas prea oltaem?
[Foto Credit Line Long Pej 19]
Pictorial Archive (Near Eastern History) Est.
[Tok Blong Pija Long Pej 23]
Sam long ol faswan Kristin oli nidim blong soem longfala tingting long ol narafala Kristin
[Tok Blong Pija Long Pej 24]
Ol Kristin oli mas gat longfala tingting, lav, mo prea oltaem