“Hat Blong Yu i Stret Wetem Hat Blong Mi?”

“Yu kam wetem mi mo bambae yu luk we mi mi no agri nating long fasin blong ol man we oli agensem Jeova.”​—2 KING 10:16.

1, 2. (a) ?Olsem wanem fasin blong wosip blong ol man Isrel i go nogud tumas? (b) Long 905 B.K.T., ?wanem bigfala jenis i kamaot long Isrel?

¹ LONG yia 905 B.K.T.,a sam bigfala jenis oli kamaot long Isrel. Kolosap 100 yia bifo long taem ya, Jeova i bin mekem se ol laen blong Isrel we oli joen olsem wan kingdom nomo, oli seraot long tu haf, from we Solomon i lego trufala wosip. (1 King 11:​9-​13) Pikinini blong Solomon, nem blong hem Rehoboam, i kam king long kingdom blong saot, hemia Juda. Kingdom blong not, hemia Isrel, i kam aninit long rul blong King Jeroboam, wan man Efrem. Sore tumas, kingdom blong not i stat folem wan nogud rod. Jeroboam i no wantem se ol man we hem i rul long olgeta oli wokbaot i go long kingdom blong saot blong mekem wosip long haos prea. Ating hem i fraet se bambae olgeta ya oli go joen bakegen wetem laen blong Deved. Taswe, hem i stanemap wosip blong pikinini buluk long Isrel. Long rod ya, hem i statem fasin blong wosipim ol aedol, we i gohed blong olgeta yia we kingdom blong not i stap.​—1 King 12:26-​33.

² Ol samting oli go nogud moa taem Ehab, pikinini boe blong Omri, i kam king. Waef blong hem, Jesebel, we hem i wan hiten woman, i leftemap wosip blong Bal, mo i kilim plante profet blong Jeova oli ded. Nating se profet Elaeja i givim ol klia woning long Ehab, hem i no traem stopem waef blong hem. Be, long 905 B.K.T., Ehab i ded, mo Joram, pikinini boe blong hem, i stap rul. Stret taem i kam nao blong klinim nesen ya. Elaesa, we i karem ples blong Elaeja, i talemaot long Jehu, we i jif blong ami blong hem, se Jeova bambae i putumap hem olsem nekiswan king blong Isrel. ?Wanem wok we Jehu i mas mekem? !Hem i mas kilim i ded olgeta rabis man long famle blong Ehab, mo givimbak long Jesebel from blad blong ol profet we hem i bin kilim olgeta oli ded!​—2 King 9:​1-​10.

3, 4. ?Olsem wanem Jonadab i soemaot se hat blong hem i ‘stret wetem hat blong Jehu’?

³ Jehu i obei long oda blong God, mo i kilim rabis Jesebel ya i ded. Nao hem i stat kilim i ded olgeta man long famle blong Ehab tu, blong klinim Isrel. (2 King 9:⁠15 kasem 10:14, 17) Long taem ya, hem i mitim wan man we i sapotem hem. “Hem i mitim Jonadab, pikinini boe blong Rekab, we i stap kam blong luk hem. Jehu i blesem Jonadab, mo i talem long hem se: ‘?Hat blong yu i stret wetem hat blong mi, olsem we hat blong mi i stret wetem hat blong yu?’ Jonadab i ansa se: ‘Yes, hem i stret.’ ‘Sipos i olsem, ale, yu givim han blong yu long mi.’ Nao hem i givim han blong hem long Jehu. Jehu i pulum hem i kam antap long kat blong hem. Mo Jehu i talem se: ‘Yu kam wetem mi mo bambae yu luk we mi mi no agri nating long fasin blong ol man we oli agensem Jeova.’ Mo Jonadab i gohed blong ron wetem hem long kat blong faet ya.”​—2 King 10:15, 16.

⁴ Jonadab (no, Jehonadab) i no wan man Isrel. Nating se i olsem, hem i wosip long Jeova, olsem nem blong hem i soemaot (we i minim “Jeova i Wantem,” “Jeova i Hae,” no “Jeova i Glad blong Givim Presen”). (Jeremaea 35:6) I sua se, Jonadab i intres tumas blong luk olsem wanem Jehu bambae i soemaot se hem i “no agri nating long fasin blong ol man we oli agensem Jeova.” ?Olsem wanem yumi save samting ya? Taem Jonadab i mitim Jehu, we Jeova i jusumaot hem olsem king, samting ya i no kamaot from laki nomo. No gat. Jonadab i stap “kam blong luk hem,” mo hem i mekem olsem long taem ya we Jehu i kilim Jesebel mo sam narafala long famle blong Ehab oli ded finis. Taem Jonadab i agri blong go antap long kat wetem Jehu, hem i save finis wanem samting i stap hapen. Hem i soemaot klia se hem i sapotem Jehu​—mo Jeova​—long faet blong trufala wosip agensem gyaman wosip.

Jehu Mo Jonadab Long Taem Blong Yumi

5. (a) ?Wanem jenis bambae i kamtru i no longtaem, long laef blong olgeta man? (b) ?Hu ya Bigfala Jehu, mo hu i wok long nem blong hem long wol ya?

⁵ I no longtaem, laef blong ol man long wol ya bambae i jenis bigwan, sem mak olsem i bin hapen long Isrel long 905 B.K.T. Taem i kam kolosap nao blong Jeova i klinim wol ya long olgeta rabis frut blong rul blong Setan, wetem ol gyaman skul tu. ?Jehu i pija blong hu ya long taem blong yumi? Hemia Jisas Kraes, we profet tok ya i tokbaot hem se: “King, yu yu strong man blong faet. Yu yu gat ol gudgudfala samting, mo yu hae we yu hae. . . . Yu tekem naef blong faet blong yu, yu hangem long saed blong yu. Yu raed long hos blong yu, yu go long paoa blong yu blong yu win. Yu faet from trutok mo stret fasin.” (Ol Sam 45:​3, 4) “Isrel blong God,” hemia ol tabu Kristin we oli wok long nem blong Jisas long wol ya. Oli “stap obei long ol loa blong God, mo oli stap holem trutok we Jisas i wetnes long hem se i tru.” (Galesia 6:​16; Revelesen 12:17) Stat long 1922, ol tabu brata ya blong Jisas oli talemaot woning long saed blong jajmen blong Jeova we i stap kam, wetem fasin we oli no fraet nating.​—Aesea 61:​1, 2; Revelesen 8:7 kasem 9:​21; 16:​2-​21.

6. ?Hu i kamaot long ol nesen blong sapotem ol tabu Kristin, mo olsem wanem oli kam antap long kat blong Bigfala Jehu?

⁶ Ol tabu Kristin ya oli no stap olgeta nomo. Olsem Jonadab we i kam blong mitim Jehu, plante man blong ol defren kantri tede, oli sapotem Jisas we i Bigfala Jehu, mo ol man blong hem long wol ya we oli leftemap trufala wosip. (Sekaraea 8:​23) Jisas i kolem ol man ya se ol “narafala sipsip” blong hem. Long 1932, i kam klia se olgeta ya oli sem mak long Jonadab blong bifo. Ale, olgeta we oli olsem Jehu oli singaotem “ol narafala sipsip ya” blong ‘kam antap long kat’ wetem olgeta. (Jon 10:16) ?Olsem wanem oli kam antap long kat? Oli “obei long ol loa blong God,” mo oli joen wetem ol tabu man blong God long wok blong talemaot “trutok we Jisas i wetnes long hem se i tru.” Long taem blong yumi, samting ya i minim wok blong talemaot gud nyus blong Kingdom blong God we i stanap finis, mo we Jisas i King blong hem. (Mak 13:10) Long 1935, i kam klia se grup ya we i olsem “Jonadab” i sem mak long ‘bigfala kampani’ we Revelesen 7:​9-​17 i tokbaot.

7. ?Olsem wanem ol Kristin tede oli soemaot se ‘hat blong olgeta i stret’ yet wetem hat blong Jisas?

⁷ Afta long yia 1930, bigfala kampani mo ol tabu brata blong olgeta, oli no fraet blong soemaot se oli sapotem trufala wosip. Long sam kantri long Is mo Wes Yurop, Is Esia, mo Afrika, plante blong olgeta oli ded from we oli holemtaet bilif blong olgeta. (Luk 9:​23, 24) Long sam narafala kantri, sam long olgeta oli go kalabus, no ol grup blong man oli kilim olgeta no mekem trabol long olgeta long sam narafala fasin. (2 Timote 3:​12) !Olgeta ya oli rili soem wan gudfala eksampel long saed blong bilif! Mo Ripot blong Sevis Yia 1997 i soemaot se tingting blong olgeta ya i strong yet blong mekem wok blong God, nomata wanem bambae i hapen. ‘Hat blong olgeta i stret yet’ wetem hat blong Jisas. Samting ya i kam klia long 1997, taem ol 5,599,931 man blong talemaot Kingdom, we bighaf blong olgeta oli blong grup ya “Jonadab,” oli spenem 1,179,735,841 haoa long wok blong givim wetnes long Jisas.

Gohed Blong Prij Wetem Strong Tingting

8. ?Olsem wanem ol Wetnes blong Jeova oli soemaot se oli gat strong tingting long saed blong trufala wosip?

⁸ Ol man oli savegud se Jehu i wan man we i spid bitim mak long kat blong hem​—hemia i soemaot se hem i gat strong tingting blong finisim wok blong hem. (2 King 9:​20) Baebol i talem se strong tingting blong Bigfala Jehu, hemia Jisas, i olsem “faea we i stap laet.” (Ol Sam 69:9) Taswe, yumi no sapraes se ol trufala Kristin tede, oli wok wetem strong tingting tu. Insaed long kongregesen mo long pablik ples, oli “talemaot tok [blong God] . . . nating we ol man oli wantem harem tok ya no oli no wantem harem.” (2 Timote 4:2) Strong tingting blong olgeta i kam klia moa long fashaf blong 1997, afta we Kingdom Wok Blong Yumi i pulum olgeta we oli naf, blong joen long wok blong haftaem paenia. Olgeta kantri wanwan oli putum wan stret namba blong haftaem paenia we oli wantem kasem. ?Wanem risal blong samting ya? !I nambawan tumas! Plante kantri oli bitim namba we oli putum. Ekwado i putum mak blong kasem 4,000 haftaem paenia, be long Maj, ripot i soemaot se i gat 6,936. Ripot blong Japan i soemaot se 104,215 man oli joen long wok blong haftaem paenia long ol trifala spesel manis ya. Long Sambia, oli wantem kasem 6,000 haftaem paenia, be ripot i soem 6,414 long manis Maj; 6,532 long Epril; mo 7,695 long Mei. !Long fulwol, namba blong ol haftaem mo fultaem paenia tugeta i kasem 1,110,251! !Hemia 34.2 pesen antap long namba blong 1996!

9. Antap long wok blong prij long ol haos wanwan, ?wanem sam narafala rod we ol Wetnes blong Jeova oli yusum blong faenem ol man mo talemaot gud nyus long olgeta?

⁹ Aposol Pol i talem long ol elda blong Efesas se: “Taem mi stap talemaot gud nyus, mo taem mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mi talemaot evri samting long yufala.” (Ol Wok 20:20) Ol Wetnes blong Jeova tede, oli folem eksampel blong Pol mo talemaot gud nyus long olgeta haos wanwan wetem strong tingting. Be, maet i no isi blong faenem ol man long haos blong olgeta. Taswe, ‘slef we i stret mo waes’ i pulum ol man we oli stap talemaot Kingdom, blong traem storeyan wetem ol man long ol stoa mo ofis, long rod, long solwora, mo long ol ples blong spel​—long eni ples we i gat man. (Matyu 24:45-​47) Ol frut we oli kamaot from fasin ya oli nambawan.

10, 11. ?Sam man blong prij long tu defren kantri oli yusum wanem gudfala rod blong faenem ol man we oli no stap long haos blong olgeta?

¹⁰ Long Kopenag, Denmak, wan smol grup blong man we oli prij, oli storeyan wetem ol man long rod kolosap long ol stesen blong tren. Stat long Janewari go kasem Jun, oli seremaot 4,733 Wajtaoa mo Wekap!, oli storeyangud wetem plante man, mo oli visitim plante man bakegen. Samfala long kantri ya oli statem sam rod magasin long ol stoa. Long wan taon, i gat bigfala maket evri Fraede, mo plante taosen man oli kam long maket ya. Ale, kongregesen blong ples ya i mekem plan blong prij long maket. Long wan narafala ples bakegen, samfala oli go long ol skul blong pikinini, blong seremaot ol buk we oli save pulum intres blong ol tija long ol skul ya.

¹¹ Long Hawai tu, ol man blong prij oli traehad blong faenem ol man we oli no save faenem olgeta long haos. Ale, oli makemaot ol spesel teritori, olsem ol pablik ples (ol rod, ol ples blong spel, ol ples blong putum trak, mo ol bas stop), medel blong taon, ol bigbigfala stoa, ol epot, oli prij long telefon, long ol pablik transpot (olsem ol bas), mo long ol yunivesiti. Oli meksua se i gat wan stret namba blong ol Wetnes nomo oli go long wan teritori, mo oli mas kasem trening fastaem. Long plante narafala kantri tu, i gat ol gudfala plan olsemia. Long rod ya, oli faenem plante man we oli intres long trutok, we maet oli no save faenem olgeta taem oli prij long ol haos wanwan.

Stanap Strong

12, 13. (a) ?Wanem trik we Setan i yusum agensem ol Wetnes blong Jeova long 1997? (b) ?Long wanem fasin, ol gyaman tok we sam man oli sakem long ol Wetnes long wan kantri i kambak agensem olgeta nomo?

¹² Long plante kantri long 1997, ol man oli sakem plante rabis, gyaman tok agensem ol Wetnes blong Jeova. I luk olsem we oli gat tingting blong traem putumap sam loa blong blokem ol Wetnes. !Be, ol Wetnes oli no letem samting ya i mekem olgeta oli kam slak! (Ol Sam 112:​7, 8) Oli tingbaot prea blong man blong raetem Ol Sam, se: “Ol [flas] man oli stap tokbaot mi long ol gyaman toktok, be mi mi stap holem ol loa we yu yu tijim mifala long hem, mi stap folem olgeta long olgeta tingting blong mi.” (Ol Sam 119:69) Ol gyaman nyus ya i pruvum tok blong Jisas se ol man bambae oli no laekem nating ol trufala Kristin. (Matyu 24:9) Mo samtaem ol gyaman tok ya oli gobak agensem olgeta we oli talemaot. Wan man long Beljiom i ridim wan store long nyuspepa we i tok nogud long ol Wetnes blong Jeova. Hem i sapraes bigwan long ol gyaman tok we hem i ridim, mekem se, long Sande blong semfala wik ya, hem i go long miting long Haos Kingdom. Hem i stadi Baebol wetem ol Wetnes, mo hem i gohed gud long stadi ya. Bifo, man ya i joen long wan stronghed grup we oli brekem loa. Be, stadi blong Baebol i halpem hem blong stretem laef blong hem, mo plante man raonabaot long hem oli luksave samting ya. !I sua se, man we i raetem ol nogud tok agensem ol Wetnes long nyuspepa ya, hem i no bin tingbaot se bambae hem i pulum wan man blong joen wetem ol Wetnes!

¹³ Sam man long Beljiom we hat blong olgeta i stret, oli tok agensem ol gyaman nyus ya. I gat wan man we bifo hem i praem minista blong Beljiom. Hem i talem stret se hem i laekem ol Wetnes blong Jeova from oli mekem gudfala wok. Wan narafala man we i wok blong gavman, i raetem se: “Nating se i gat sam gyaman tok i goraon, be long tingting blong mi, [ol Wetnes blong Jeova] oli no wan denja nating long ol plan blong Gavman. Oli ol manples we oli laekem pis, oli traehad blong mekem i stret oltaem, mo oli gat respek long gavman.” Yes, ol tok blong aposol Pita oli waes, se: “Naoia ol hiten man oli stap faenem poen long yufala se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao, . . . taem God bambae i kam blong jajem olgeta, bambae oli save leftemap nem blong God from ol gudfala wok ya blong yufala.”​—1 Pita 2:​12.

Lafet Blong Memoriol i Nambawan

14. ?Wanem sam nambawan ripot long saed blong namba blong ol man we oli kam long Memoriol long 1997?

¹⁴ I stret nomo se ol man we oli givim wetnes long saed blong Jisas oli tingbaot Memoriol blong ded blong hem olsem wan impoten samting evri yia. Long 1997, 14,322,226 man oli joen long lafet ya long Maj 23. Namba ya i 1,400,000 antap long namba blong 1996. (Luk 22:14-​20) Long plante kantri, namba blong ol man we oli kam long Memoriol i antap bigwan long namba blong ol man blong talemaot Kingdom. Samting ya i soemaot se namba blong ol man blong prij i save gru moa yet long fyuja. Eksampel, long Haiti, long 1997, i gat 10,621 man blong prij, mo 67,259 oli kam long Memoriol. Yu save lukluk ripot blong yia long pej 18 kasem 21. Bambae yu luk plante narafala kantri tu we namba blong ol man we oli kam long Memoriol i bitim namba blong ol man blong prij.

15. Long samfala kantri, ?olsem wanem ol brata blong yumi oli winim sam bigfala problem blong oli save mekem lafet blong Memoriol?

¹⁵ Long samfala, i no isi nating blong kam wanples blong mekem Memoriol. Long Albania, loa i blokem olgeta man se oli no moa aot long haos blong olgeta afta long 7 klok long naet, from we i gat faet i stap gohed bitwin ol man long kantri ya. Long 115 smosmol grup raonabaot long kantri ya, Memoriol i stat long 5:⁠45 long aftenun. San i godaon long 6:⁠08, mo hemia i makem stat blong Naesan 14. Raonabaot long kwota pas sikis, oli pasem bred mo waen. Bighaf blong ol grup ya oli mekem laswan prea long haf pas sikis, nao ol wanwan man oli spid i gobak long haos blong olgeta bifo long seven klok. Nating se i olsem, namba blong ol man we oli kam long Memoriol i kasem 3,154, skelem wetem 1,090 man blong prij. Long wan kantri blong Afrika, i gat plante faet oli stap gohed olbaot we i mekem se ol man oli no save go long Haos Kingdom. Ale, tu elda oli mekem disisen blong go long haos blong wan narafala elda, nao trifala ya i save tokbaot plan blong mekem Memoriol long ol smosmol grup. Blong kasem haos blong narafala elda ya, tufala i mas krosem wan longfala hol we doti wora i stap ron long hem. Be, from we i gat faet i gohed, sam man we oli stap haed raonabaot long ples ya oli stap sutum eniman we i krosem hol ya. Wan long tufala elda ya i resis i gokros we i no gat samting i hapen. Be taem namba tu elda i resis i go, hem i harem wan masket i faerap. Kwiktaem nomo, hem i slip daon long graon mo i wokbaot fo leg go kasem narasaed. Semtaem, ol bolet oli stap flae antap long hed blong hem. Miting blong trifala elda ya i gohedgud, mo oli mekem wan plan we i lukaotgud long nid blong kongregesen.

‘Oli Kamaot Long Olgeta Kala Mo Laen . . . Mo Lanwis’

16. ?Wanem rod we slef we i stret mo waes i yusum blong mekem gud nyus i kasem ol man long olgeta smosmol lanwis?

¹⁶ Aposol Jon i talem se bigfala kampani bambae i kamaot long “olgeta kala mo long olgeta laen, mo long olgeta kantri, mo long olgeta lanwis.” (Revelesen 7:9) Taswe, Hed Kampani i mekem plan blong wokem ol buk long plante moa lanwis​—we sam long ol lanwis ya oli blong ol smosmol velej mo laen blong man nomo. Eksampel, long Mosambik, oli wokem traket ya Laef Long Pis Blong Nyufala Wol long faef moa lanwis bakegen. Long Nikaragwa, oli wokem buklet ya !Yu Yu Save Harem Gud Blong Olwe Long Wol! long lanwis blong Miskito​—hemia faswan buk we Wajtaoa Sosaeti i wokem long lanwis ya. Plante Indian we oli toktok lanwis blong Miskito, oli glad tumas blong karem buklet ya taem oli luk se hem i stap long lanwis blong olgeta. Long 1997, Sosaeti i agri blong wokem ol buk long 25 moa lanwis, mo tu, i wokem bitim wan bilyan Wajtaoa mo Wekap!

17. ?Long Koria, ol Wetnes oli givhan long ol man we oli toktok wanem lanwis, mo olsem wanem ol video kaset oli givhan bigwan long ol man we oli toktok lanwis ya?

¹⁷ Long Koria, ol brata oli stat halpem wan narafala grup blong man we oli toktok defren lanwis. Yes, long yia ya 1997, hemia faswan taem long Koria we i gat wan asembli long lanwis blong ol man we sora blong olgeta i fas (Saen Lanwis). Long Koria, i gat 15 kongregesen blong ol man we sora blong olgeta i fas mo 543 man blong prij long olgeta kongregesen ya, be 1,174 man oli kam long asembli, mo 21 oli tekem baptaes. I hadwok long ol man we sora blong olgeta i fas blong kasem save long toktok we man i talem no raetem. Taswe, blong halpem olgeta ya, Sosaeti i stap wokem sam kaset video long 13 defren saen lanwis, blong eksplenem toktok long sam buk we Sosaeti i prentem finis. Long rod ya, ol man we sora blong olgeta i fas, oli save “ridim” mo stadi long gud nyus, mo plante gudfala frut i stap kamaot from. Long Yunaeted Stet bifo, maet wan man we sora blong hem i fas i stadi faef yia bifo we i tekem baptaes. Be, naoia, from we i gat plante video kaset long Saen Lanwis blong Amerika, samfala man we sora blong olgeta i fas, oli tekem baptaes afta wan yia nomo.

‘Stap Long Kat Oltaem’

18. ?Jehu i mekem wanem wok afta we hem i mitim Jonadab?

¹⁸ Afta we Jonadab i joen wetem Jehu long yia 905 B.K.T., Jehu i gohed blong spolem gyaman wosip. Hem i singaotem olgeta man we oli wosipim Bal se: “Mekem wan tabu asembli blong wosip long Bal.” Ale, hem i sanem mesej i goaot long olgeta ples long kantri, blong meksua se olgeta man we oli wosipim Bal oli kam wanples. Taem bigfala hif blong man oli hivap i kam long haos prea blong gyaman god ya, Jehu i lukaotgud se i no gat wan man we i wosipim Jeova i stap long medel blong kampani ya. Ale, Jehu mo ol ami blong hem oli kilim i ded olgeta man ya we oli wosipim Bal. “Long fasin ya, Jehu i spolemgud wosip blong Bal long Isrel.”​—2 King 10:20-28.

19. Taem yumi tingbaot samting we bambae i kamaot long ol man long fyuja, ?yumi mas soemaot wanem tingting, mo yumi mas bisi long wanem wok?

¹⁹ Long taem blong yumi, laswan jajmen blong olgeta gyaman skul i kam kolosap nao. Ol enjel oli stap lidim ol Kristin blong talemaot gud nyus long olgeta man, blong traem pulum olgeta blong fraetgud long God mo lego ol gyaman skul. (Revelesen 14:​6-8; 18:​2, 4) Oli pulum olgeta we oli gat tingting daon blong obei long Kingdom blong God mo King we Jeova i putumap, Jisas Kraes. (Revelesen 12:10) Long taem ya we i nambawan tumas, yumi no mas letem strong tingting blong yumi blong sapotem trufala wosip, i kam slak.

20. ?Yu mas gat strong tingting blong mekem wanem long sevis yia blong 1998?

²⁰ Wan taem bifo, King Deved i kasem bigfala traem, nao hem i prea se: “!God! !Tingting blong mi i stap strong long yu oltaem! !Bambae mi sing, mi presem yu! Masta, bambae mi mi talem tangkyu long yu long fes blong olgeta man, bambae mi sing blong presem yu long fes blong ol man blong ol narafala kantri.” (Ol Sam 57:​7, 9) Yumi mas stap strong tu. Nating se i gat hadtaem long plante ples long sevis yia blong 1997, fulap voes oli joen blong presem mo givim ona long Jeova God. I gud sipos plante moa voes oli singaot strong long yia ya we i kam. Mo i gud we yumi gohed blong singaot olsemia, nating sipos Setan i traehad blong mekem tingting blong yumi i foldaon no i agensem yumi. Long rod ya, bambae yumi soemaot se hat blong yumi i stret wetem hat blong Bigfala Jehu, Jisas Kraes. Mo bambae yumi obei wetem olgeta laef blong yumi, long tok ya we i kamaot long God se: “Yufala we fasin blong yufala i stret, i gud yufala i glad, yufala i harem gud from ol samting ya we Hae God i mekem. Yufala we i stap obei long hem, i gud yufala i singsingaot from we yufala i glad.”​—Ol Sam 32:11.

[Futnot]

?Yu Yu Save Eksplenem?

◻ ?Wanem sam jenis we oli kamaot long Isrel long 905 B.K.T.?

◻ ?Jehu i pija blong hu tede, mo olsem wanem ‘bigfala kampani’ i soemaot se ‘hat blong hem i stret’ wetem hat blong Bigfala Jehu?

◻ ?Wanem ol namba long ripot blong 1997 we oli soemaot se ol Wetnes blong Jeova oli wok wetem strong tingting long sevis yia ya?

◻ ?Nomata wanem samting we Setan i traem mekem agensem yumi, bambae yumi soemaot wanem tingting long sevis yia blong 1998?

[Ripot lon pej 18-22]

RIPOT BLONG OL WITNES BLONG JEOVA LONG FULWOL LONG SEVIS YIA 1997

(Lukluk niuspepa)

[Pija long pej 15]

Bigfala namba blong ol man we oli kam long Memoriol i soemaot se plante moa man yet oli save joen long trufala wosip

[Pija long pej 16]

Long sem fasin we Jonadab i sapotem Jehu, ‘bigfala kampani’ tede i sapotem Bigfala Jehu, hemia Jisas Kraes, mo ol tabu brata blong hem