?Hemia Trufala Fasin No Gyaman Fasin Blong Presem Man?

MAET wan man i talem long yu se: “!Man, nyufala stael blong hea blong yu i naes tumas!” ?Hem i stap presem yu long trufala fasin no i stap tok swit nomo? “!Traoses ya wetem kot blong hem oli stret nomo long yu!” ?Tok ya i blong presem yu no blong switim yu? “!Mi neva testem wan kakae we i gud olsem hemia!” ?Hemia trufala fasin no gyaman fasin blong presem yu? Taem ol man oli talem gudfala tok olsem long yumi, maet yumi no sua sipos oli rili minim tok ya mo oli stap tok tru, no sipos oli wantem mekem yumi glad nomo we oli no rili minim ol tok ya.

?Olsem wanem blong luksave sipos tok blong wan man i blong presem yumi long trufala fasin no i blong tok swit nomo? ?I rili impoten blong luksave samting ya? ?Maet i moagud blong jes bilivim ol gudfala tok ya nomo, mo haremgud long glad we i givim long yumi? ?Olsem wanem long tok blong yumi, taem yumi presem narafala? ?Yumi bin traem blong skelem wanem tingting i stap pusum yumi blong talem ol tok olsem? Sipos yumi tingbaot ol kwestin ya, bambae oli givhan long yumi blong gat fasin luksave, mo blong yusum tang blong yumi long fasin we i givim ona long Jeova God.

Mining Blong, Tok Blong Presem Mo Tok Blong Switim Narafala

Buk ya Webster’s Dictionary i eksplenem mining blong presem se, tok blong soemaot we yumi agri no tinghae long narafala. Presem i save minim tu, fasin blong wosip mo givim ona. Yumi save finis se, laswan mining ya i stret long ol tok we yumi talem long Jeova God nomo blong presem hem. Hemia wan impoten haf blong trufala wosip, olsem man blong raetem Ol Sam i talem, se: “I gud yumi . . . , presem God ya blong yumi, from we fasin ya i gud tumas, mo i stret tu.” “Yumi olgeta samting we yumi gat laef, yumi olgeta evriwan, yumi presem Hae God.”​—Ol Sam 147:1; 150:6.

Be, samting ya i no minim se yumi no mas talem tok blong presem ol man tu. Yumi save talem tok blong soemaot se yumi tinghae, yumi agri, no yumi laekem narafala. Long wan parabol we Jisas i givim, masta i talem long man blong wok blong hem, se: “Ei, wan gudfala wok ya. Yu yu wan gudfala man.Wokblong yu i stret nomo.”​—Matyu 25:21.

Hemia i defren olgeta long mining we diksonari i talem long saed blong tok swit. Hem i tok we i gyaman, we i no rili kamaot long hat blong man, mo tok we i presem man bitim mak. Plante taem, i gat wan tingting nomo we i pusum man blong tok swit, hemia se hem i wantem kasem wan samting blong hem nomo. Man we i trikim narafala wetem ol swit tok no i bitim mak long ol naes tok, hem i wantem se narafala i laekem hem, no maet i wantem se narafala i givim wan samting long hem. Man olsem, i wantem mekem ol narafala oli harem se oli mas givim wan samting long hem from we hem i talem ol gudfala tok ya long olgeta. Taswe, ol man we oli tok swit oli stap tingbaot olgeta nomo. Jud 16 i tokbaot olgeta ya se, oli “rere blong tok swit long narafala man taem oli luk se hemia jans blong olgeta blong kasem samting.”​—The Jerusalem Bible.

Tingting Blong Baebol Long Saed Ya

?Wanem tingting blong Baebol long saed blong fasin ya blong presem narafala man? Jeova i soemaot rod long yumi long saed ya. Baebol i talem se sipos yumi mekem wok blong Jeova, bambae hem i presem yumi. Aposol Pol i talem se, “bambae God i leftemap nem blong ol man wanwan, stret long mak blong ol gudfala fasin we oli mekem.” Pita i talem se, ol traem we yumi winim from bilif blong yumi, oli save mekem se ‘God i presem yumi, i leftemap nem blong yumi.’ Taswe, trutok ya se Jeova i save presem ol man, i soemaot long yumi se ol tok blong presem narafala we i kamaot long hat, i wan rod blong soem kaengud fasin, lav, mo i mekem i gud long narafala. Hemia wan fasin we yumi no mas ting nating long hem.​—1 Korin 4:5; 1 Pita 1:7.

Baebol i soemaot se, tok blong presem yumi long trufala fasin i save kam long ol gavman tu, taem oli lukluk gudfala fasin mo stret fasin blong yumi. Baebol i talem se: “Yufala i mas mekem ol gudfala fasin, nao bambae gavman i save presem yufala.” (Rom 13:3) Maet sam narafala man tu oli talem ol tok blong presem yumi we oli rili bilif se i tru, mo i no gat wan rong tingting i pusum olgeta. Baebol we i kamaot long God i talem long Proveb 27⁠:​2 se: “I gud we wan strenja i presem yu, i bitim we prapa maot blong yu i mekem olsem.” Samting ya i soemaot se i stret nomo we narafala i presem yumi.

Be, i defren olgeta long saed blong swit tok we yumi talem long narafala no we narafala i talem long yumi. ?From wanem Jeova i no laekem nating ol tok blong switim narafala? Faswan samting se, ol tok ya oli no rili kamaot long hat, man we i talem tok ya i no rili bilivim. Jeova i no laekem nating fasin ya. (Skelem wetem Proveb 23:​6, 7.) Mo tu, man olsemia i no stap tok tru. Man blong raetem Ol Sam i tokbaot ol man we God i no glad long olgeta, i se: “Olgeta ya oli stap gyaman nomo, oli stap tok swit, i olsem we tok blong olgeta i kamaot long hat we i seraot long tu haf. I gud we Yawe i katemaot maot blong olgeta man we oli stap tok swit.”​—Ol Sam 12:2, 3, JB.

Laswan samting se, fasin blong tok swit i no soemaot lav. Samting we i pusum man blong tok swit, hemia fasin blong tingbaot hem wan nomo. Deved we i raetem Ol Sam, i tokbaot ol man we oli stap tok swit, mo biaen, hem i talemaot wanem i stap long tingting blong olgeta ya, i se: “Mifala i stap kasem ol samting we mifala i wantem, long ol toktok blong mifala nomo. Mifala bambae i talem ol samting we mifala i wantem talem, mo i no gat man i save blokem mifala.” Jeova i tokbaot ol man ya we oli stap tingbaot olgeta nomo, se oli ‘man nogud, we oli stap spolem ol man mo mekem olgeta oli harem nogud.’ Oli yusum tang blong olgeta we i stap tok swit blong spolem mo mekem narafala i harem nogud, i no blong leftemap tingting blong narafala.​—Ol Sam 12:4, 5.

Tok Swit​—Wan Trap

“Man we i tok swit, hem i stap sakem wan net we hem wan nomo bambae i foldaon long hem.” !Hemia tok we waes King Solomon i talem, mo tok ya i tru tumas! (Proveb 29:5) Ol Farisi oli bin tok swit blong traem trikim Jisas. Oli se: “Tija, mifala i save we yu yu wan stret man. Yu yu tok tru nomo, yu stap tijim ol man long fasin we God i wantem. Yu no save fraet long ol man, from we yu no tingbaot we man i haeman, no i no haeman.” !Ol tok ya i switgud! Be, Jisas i no letem ol naesfala tok blong olgeta i winim hem. Hem i save se oli no bilivim ol trufala tijing blong hem, oli stap traem nomo blong faenem rod blong mekem hem i foldaon long tok blong hem, long saed blong takis we man i mas pem long Sisa.​—Matyu 22:15-​22.

Long faswan handred yia, King Herod i mekem fasin we i defren olgeta long Jisas. Taem hem i toktok fored long ol man long taon blong Sisaria, ol man oli talem se: “Hemia i no man nomo ya, we i stap tok. Hemia wan god ya.” Herod i no stretem ol man ya from ol gyaman tok ya we oli talem blong presem hem, be hem i glad nomo long ol swit tok blong olgeta. Enjel blong Jeova i panisim Herod wantaem nomo. Hem i mekem se ol wom oli kakae ol gat blong hem nao hem i ded.​—Ol Wok 12:21-​23.

Wan Kristin we i strong long bilif, i no save glad blong kasem tok blong switim hem. Ol elda long kongregesena oli mas lukaotgud taem wan man we oli stap stretem hem, i stat talem ol swit tok. Maet man ya i stat skelem elda we i stap stretem hem wetem narawan, se hem i kaengud moa mo i kasem save moa i bitim narafala.

Baebol i soemaot klia wan narafala trap tu we man i save foldaon long hem from fasin ya blong tok swit. Hem i tokbaot wan yangfala man we i letem wan woman i pulum hem blong mekem nogud long saed blong seks. (Proveb 7:​5, 21) Woning ya i laenapgud wetem samting we i stap hapen tede. Bighaf blong ol man we Kristin kongregesen i mas sakemaot olgeta evri yia, oli foldaon long nogud fasin long saed blong seks. Maet sam long olgeta oli stat folem rod we i lidim olgeta blong mekem bigfala sin ya, taem oli lesin long ol swit tok. Yumi ol man, yumi gat fasin we yumi wantem tumas se narafala i talem ol gudfala tok blong leftemap yumi, mo i toktokgud long saed blong yumi. Taswe, ol naesfala swit tok i save slakem strong tingting blong wan Kristin blong agensem rabis fasin. Sipos yumi no blokem ol kaen toktok olsemia, oli save lidim yumi blong mekem bigfala sin.

Blokem Ol Swit Tok

Ol swit tok oli mekem man we i flas mo i laekem hem wan tumas, i haremgud. Tok ya i save pulum man ya blong ting se hem i impoten tumas, mo i hae moa long ol narafala. Wan man we i gat bigfala waes blong wol, François deLa Rochefoucauld, i talem se tok swit i sem mak long gyaman mane, from we, “hem i no gat paoa, hem i gat paoa nomo long man we i flas.” Taswe, rod blong blokem ol swit tok i blong lesin long klia advaes blong aposol Pol se: “Yufala i mas no letem tingting blong yufala i go antap. Tingting blong yufala i mas stap long stret rod, mo yufala i mas makem yufala, stret long fasin blong bilif ya we God i givim long yufala.”​—Rom 12:3.

Nating se, oltaem yumi glad blong harem tok we i leftemap yumi, be plante taem, yumi nidim moa ol tok blong Baebol we i givim advaes mo i stretem yumi. (Proveb 16:25) King Ehab i laekem blong harem tok blong leftemap hem nomo. From samting ya, ol man blong hem oli askem profet Maeka blong talem ol tok we i “olsem tok blong olgeta ya [ol profet blong Ehab we oli stap tok swit], ol gudfala tok nomo.” (1 King 22:13) Sipos Ehab i bin lesin long tok we i stretem hem mo i bin lego fasin rebel, hem i no save lusum ol bigfala faet we Isrel i bin mekem agensem ol enemi blong olgeta, mo hem i no save ded tu. Blong stap strong long saed blong speret, yumi mas kwik blong obei long ol klia advaes blong ol Kristin elda we oli laekem yumi. !Oli wantem halpem yumi blong stap long stret rod blong trutok, i bitim we yumi folem tok blong man we i talem se yumi gud tumas, mo i stap mekem sora blong yumi i haremgud long ol swit tok!​—Skelem wetem 2 Timote 4:3.

Ol Kristin oli neva mas letem wan samting i pulum olgeta blong tok swit. Oli prea wetem strong tingting olsem man blong bilif ya Elaehu, se: “Halpem mi blong mekem i sem mak long olgeta man, mo blong no tok swit long wan man; from we mi no save olsem wanem blong tok swit, sipos no, wantaem nomo Man we i Wokem mi bambae i karemaot mi.” Ale, long sem fasin olsem Pol, oli save talem se: “Mifala i no kam long yufala blong tok swit long yufala, no blong talemaot gud nyus long yufala blong mekem rod blong stilim samting blong yufala.”​—Job 32:21, 22, An American Translation; 1 Tesalonaeka 2:5, 6.

Presem Man Taem i Stret Blong Mekem Olsem

Wan proveb we tabu speret blong God i pusum man blong raetem, i mekem i klia se tok blong presem man i save soemaot trufala fasin blong hem. Hem i se: “Bigfala pot long faea i blong mekem selva i ron, mo pot we i hotgud i blong klinim gol, be tok we i presem man i blong traem fasin blong hem.” (Proveb 27:21, The New English Bible) Yes, ol tok blong presem man i save pulum hem blong tinghae tumas long hem wan mo blong flas, nao biaen, hem i save foldaon from. Be sipos man i gat fasin we i no flas mo tingting blong hem i stap daon, tok blong presem hem i save soemaot samting ya tu. Man olsem i luksave se samting we narafala i presem hem from, i kamaot long Jeova nomo.

Ol trufala tok blong presem man from wan gudfala fasin no wok we hem i mekem, i save leftemap tingting blong hem, mo i save leftemap tingting blong hemia we i talem tok ya tu. Fasin ya i mekem yumi joengud mo i mekem se yumi haremgud long kampani blong narafala. Hem i leftemap tingting blong man blong traem kamgud moa long ol gudfala wok. Tok blong presem ol yangfala we oli mekem gudfala wok, i save pulum olgeta blong wok strong moa. Maet ol tok olsemia i halpem olgeta blong wokem ol gudfala fasin, taem oli stap traehad blong kasem ol mak we oli luk se ol narafala oli tinghae long olgeta.

Taswe, yumi mas stap longwe long fasin blong tok swit​—nomata sipos yumi nao i talem ol tok ya, no narafala i talem long yumi. Yumi mas gat tingting daon taem narafala i presem yumi. Mo yumi mas talem plante gudfala tok blong presem narafala wetem fulhat blong yumi. Yumi save mekem olsem evri dei, taem yumi presem Jeova long wosip blong yumi, mo taem yumi presem ol narafala man long trufala fasin, blong soemaot se yumi tinghae mo yumi glad long olgeta. !Rimemba, “wan tok long stret taem blong hem, hem i gud tumas!”​—Proveb 15:23.

[Futnot]