Ol Papa Mama—!Lukaotgud Long Ol Pikinini Blong Yufala!

LONG wan haeskul long Naejeria, wan gel we i stap slip olbaot i laekem blong givim advaes long saed blong seks, long ol narafala gel long skul ya. Wan advaes we hem i givim, hemia se oli save kilim pikinini long bel, sipos oli dring wan spesel kaen blak bia we oli ademap wan strong drag long hem. Drag ya i kamaot long tabak. Ol store blong hem we hem i faenem long ol doti buk long saed blong seks, oli pulum intres blong plante studen. Sam long olgeta oli stat slip olbaot. I no longtaem, wan gel i faenemaot se hem i gat bel. Blong kilim bebi we i stap long bel blong hem, hem i folem advaes we gel ya i bin givim long saed blong strong dring ya. Afta we sam haoa i pas, hem i stat traot blad. Hem i go slip long hospital, mo sam dei biaen, hem i ded.

Tede, plante yangfala oli stap tokbaot seks oltaem. Samting ya i save spolem ol narafala yangfala we oli lesin long olgeta mo bilivim olgeta. ?Ol yangfala oli save lukluk i go long hu blong kasem stret save we bambae i lukaotgud long olgeta? I gud tumas sipos oli save lukluk i go long papa mama blong olgeta we tufala i ona long God. Hem i wok blong ol papa mama blong ‘stretem mo trenem tingting blong ol pikinini blong olgeta olsem we Jeova i wantem.’​—Efesas 6:4.

Tingting Blong Ol Man Afrika Long Fasin Blong Tijim Pikinini Long Seks

Long plante kantri blong wol, ol papa mama oli faenem i hadwok blong tokbaot ol bisnes blong seks wetem pikinini blong olgeta. Samting ya i tru tumas long Afrika. Donald, wan papa long Siera Leon, i talem se: “Kolosap se ol man oli neva mekem samting ya. Hemia i no kastom blong ol man Afrika.” Wan woman Naejeria, nem blong hem Confident, i agri, i se: “Papa mama blong mi oli ting se seks i wan samting we i tabu blong tokbaot long klia fasin. Samting ya i agensem kastom blong ol manples.”

Long sam ples long Afrika, ol man oli tingting se ol tok ya, olsem, samting blong man, wora blong seks, mo sikmun, oli ol tok swea. Wan Kristin mama i blokem gel blong hem blong yusum tok ya “seks,” be i letem hem i yusum tok ya “slip olbaot.” Tok blong God, Baebol, i no mekem olsem. Baebol i tokbaot seks mo ol tabu haf blong bodi, long fasin we i klia mo i tru. (Jenesis 17:11; 18:11; 30:16, 17; Levitikas 15:2) Hemia i no blong mekem ol man blong God oli sek, no blong wekemap filing blong olgeta long saed blong seks, be i blong tijim olgeta mo i blong lukaotgud long olgeta.​—2 Timote 3:​16.

Wan papa long Naejeria i talem wan narafala samting, antap long kastom, we i blokem sam papa mama blong tokbaot seks. Hem i se: “Sipos mi tokbaot seks wetem ol pikinini blong mi, maet mi stap pulum olgeta blong mekem rabis fasin.” ?Be, ol tok long saed blong seks we i soem respek mo i stanap long Baebol, hem i rili pulum ol yangfala blong slip olbaot? No gat. Maet i moa tru blong talem se, ol yangfala we oli gat smol save nomo long saed blong seks, olgeta ya nao oli save kasem trabol long saed ya. Baebol i talem se: “Waes [we i stanap long stret save] i blong lukaotgud long man.”​—Eklesiastis 7:12.

Long wan pijatok, Jisas i storeyan long saed blong wan waes man we i luksave se bambae i gat hariken, ale, hem i wokem haos blong hem antap long wan ston. Be wan narafala man we i no waes nating, i wokem haos blong hem long sanbij, mo biaen, haos ya i lus. (Matyu 7:​24-​27) Long sem fasin, ol Kristin papa mama we oli waes, oli save se ol pikinini blong olgeta bambae oli fesem ol bigfala traem we oli olsem hariken, mo we oli save pulum olgeta blong joen long rabis fasin blong wol ya. Taswe, oli eksplenem ol stret save long ol pikinini blong olgeta, blong mekem oli strong, nao bambae oli no save foldaon long ol traem ya.

Wan woman Afrika i talem wan narafala samting we i blokem plante papa mama blong tokbaot seks wetem ol pikinini blong olgeta. Hem i se: “Taem mi mi yangfala, papa mama blong mi we oli Wetnes, oli no tokbaot ol bisnes blong seks wetem mi. Taswe, mi tu mi no gat tingting blong tokbaot ol samting ya wetem ol pikinini blong mi.” Be, ol traem we ol yangfala tede oli kasem, oli strong moa i bitim ol traem we ol yangfala blong 10 no 20 yia bifo oli bin kasem. Yumi no sapraes long samting ya. Baebol i talem se ‘long ol las dei . . . ol man nogud, mo ol man blong gyaman oli save gyaman moa long ol man, mo bambae olgeta tu oli save bilif long ol gyaman tok blong olgeta.’​—2 Timote 3:1, 13.

Samting we i mekem problem ya i kam bigwan moa, hemia se plante pikinini oli fraet no oli no naf blong talemaot olgeta samting we i stap long tingting blong olgeta, long papa mama blong olgeta. Plante famle oli no stap toktokgud tugeta, nating se i long saed blong ol smosmol samting nomo. Wan yangfala we i gat 19 yia, i talem wetem sore se: “Mi no stap tokbaot ol samting wetem papa mama blong mi. Mi mo papa blong mi i no save toktokgud tugeta. Hem i no lesin long mi.”

Mo tu, plante yangfala oli fraet se sipos oli askem kwestin long saed blong seks, bambae papa mama blong olgeta oli tingting nogud long olgeta. Wan gel we i gat 16 yia i talem se: “Mi mi no stap tokbaot ol problem blong seks wetem papa mama blong mi, from we tufala i save tingting nogud long mi. Bifo finis, bigfala sista blong mi i askem sam kwestin long Mama long saed blong seks. Mama i no givhan long hem nating. Long defren fasin, hem i no moa trastem hem. Plante taem, Mama i askem long mi se sista blong mi i stap mekem wanem, mo samtaem, hem i tok olsem we sista blong mi i stap mekem rabis fasin. Mi no wantem lusum lav blong mama blong mi, taswe mi haedem ol problem blong mi.”

?From Wanem i Impoten Blong Tijim Pikinini?

I stret nomo blong tijim ol pikinini blong yumi long saed blong seks, go kasem mak we oli naf blong kasem save. Mo fasin ya i kaengud tu. Sipos ol papa mama oli no tijim pikinini blong olgeta long saed blong seks, sam narafala man bambae oli tijim olgeta. Samting ya i save kamaot kwik moa i bitim wanem we papa mama i bin tingbaot. Mo kolosap oltaem, ol narafala ya oli givim save we i no laenap wetem ol rul blong God. Wan gel we i gat 13 yia nomo, i slip wetem wan boe, from we wan fren blong hem long skul i talem se, sipos hem i no mekem olsem, bambae hem i kasem bigfala soa long bodi blong hem long fyuja. Fren ya i talem se: “Bambae oli katem seks blong yu wetem sisis.” Biaen, samfala oli askem long gel ya from wanem hem i no talemaot ol tok blong fren blong hem long Kristin mama blong hem. Gel ya i talem se ol yangfala oli no stap tokbaot ol samting ya wetem ol bigman.

Wan gel Naejeria i talem se: “Ol fren blong mi long skul oli traem pulum mi blong bilif se seks i wan samting we evriwan oli mas joen long hem. Oli talem se, sipos mi no joen wetem olgeta blong slip olbaot, ale, taem mi gat 21 yia, bambae mi kasem wan sik we i save spolem laef blong mi olsem wan woman. Taswe, sipos mi no wantem se nogud samting ya i kamaot long mi, mi mas slip wetem wan man bifo we mi mared.”

Gel ya i gat gudfala fasin blong toktok wetem papa mama blong hem. Taswe, wantaem nomo, hem i luksave se tok ya we hem i harem long skul i defren long tok we papa mama blong hem i bin talem. Hem i se: “Olsem oltaem, mi gobak long haos mo mi storeyan wetem mama blong mi long ol tok ya we mi bin harem long skul.” Nao mama blong hem i eksplenem long hem from wanem ol save ya i gyaman.​—Skelem wetem Proveb 14:15.

Taem ol papa mama oli givim save we ol pikinini blong olgeta oli nidim blong kasem waes blong God long ol bisnes blong seks, oli mekem se ol pikinini ya oli naf blong luksave ol denja, mo blong luksave ol man we oli wantem mekem nogud long olgeta. Save ya i lukaotgud long olgeta, nao oli no save kasem wan sik no gat bel, olsem ol man we oli slip olbaot. Save ya i givhan long ol pikinini ya blong tinghae long olgeta bakegen, mo i pulum ol narafala blong respektem olgeta. Hem i mekem se oli no gat ol rong tingting, mo oli no wari. Hem i givim wan gudfala mo klin tingting long olgeta long saed blong stret fasin blong seks. Nao, sipos oli mared biaen, samting ya bambae i halpem olgeta blong faenem glad. Save ya bambae i givhan long olgeta blong holem wan gudnem wetem God tu. Mo taem ol pikinini oli luk se papa mama blong olgeta i laekem olgeta mo tufala i wari long olgeta, samting ya i save pulum olgeta blong laekem mo respektem papa mama blong olgeta moa.

Toktokgud Tugeta

Blong ol papa mama oli save givim advaes we i stret long ol wanwan pikinini blong olgeta, ol pikinini tu oli mas toktok. Ol papa mama oli mas save wanem i stap long tingting mo hat blong pikinini blong olgeta. Sipos no, maet oli givim gudfala advaes, be advaes ya i no givhan long pikinini. Hemia i olsem wan dokta we i givim meresin long sikman, be hem i no save wanem sik we man ya i gat. Blong givim gudfala advaes, ol papa mama oli mas save trufala tingting mo filing blong ol pikinini blong olgeta. Oli mas kasem save long ol traem mo problem we ol pikinini blong olgeta oli stap fesem, mo ol kwestin we oli stap tingbaot. I impoten we oli lesingud long ol pikinini blong olgeta. Oli mas ‘rere oltaem blong lesin, be no hareap blong tok.’​—Jemes 1:​19; Proveb 12:18; Eklesiastis 7:8.

Ol papa mama oli mas spenem taem, gat longfala tingting, mo traehad bigwan, blong wokem mo holem wan gudfala fasin fren wetem ol pikinini blong olgeta. Hemia wan fasin fren we i mekem ol pikinini oli harem se oli save talemaot olgeta dip filing blong olgeta. !Wan fasin fren olsemia i nambawan tumas! Wan papa long Wes Afrika we i gat faef pikinini, i talem se: “Mi mi wan papa, be tu, mi mi wan man we ol pikinini blong mi oli save kam talemaot ol tokhaed blong olgeta long mi. Oli tokbaot evri samting wetem mi, mo oli tokbaot seks tu. Ol gel blong mi tu oli trastem mi. Mifala i tektaem blong storeyan long ol problem blong olgeta, mo oli talemaot ol glad blong olgeta long mi.”

Wan gel blong hem, Bola, i talem se: “Mi mi no haedem wan samting long papa blong mi. Hem i kaengud long mifala mo i gat sore. Hem i no mekem i strong tumas long mifala, mo i no stap kilim mifala. Samting ya i sem mak taem mifala i mekem i rong tu. Hem i no faerap long kros, be hem i eksplenem bisnes ya long mifala, mo i soem wanem we mifala i mas mekem, mo wanem rong we mifala i bin mekem. Plante taem, hem i yusum tufala buk ya Ol Yangfala mo Hapi Famle.”a

I gud sipos ol papa mama oli stat toktok wetem ol pikinini blong olgeta long saed blong seks, taem ol pikinini ya oli smol nomo. Olsem nao, i moa isi blong gohed blong storeyan wetem olgeta biaen, long ol yia blong yangtaem we oli strong tumas. Sipos oli no stat taem ol pikinini oli smol, i hadwok blong stat taem oli kam bigwan moa. Nating se i hadwok, sam papa mama oli bin mekem olsem. Wan mama we i gat faef pikinini, i talem se: “Mi fosem mi blong tokbaot seks wetem ol pikinini blong mi gogo mi no moa sem, mo ol pikinini tu oli no moa sem.” Fasin traehad olsem i no blong nating nomo, taem yumi tingbaot olsem wanem fasin ya i save mekem i gud long ol pikinini blong yumi.

Pikinini i Hapi Taem Papa Mama i Lukaotgud Long Hem

Ol pikinini oli glad tumas taem papa mama i tijim olgeta wetem lav, mo tufala i givim save we bambae i lukaotgud long olgeta. Tingbaot tok ya blong sam Wetnes blong Jeova long Afrika:

Taem Mojisola i gat 24 yia, hem i talem se: “Bambae mi talem tangkyu long mama blong mi gogo i no save finis. Hem i tijim mi long saed blong seks long stret taem we mi nidim. Nating se mi mi sem taem hem i tokbaot bisnes ya wetem mi longtaem finis, be naoia mi luk se mama blong mi i bin mekem i gud tumas long mi.”

Iniobong i talem se: “Mi glad tumas taem mi tingtingbak long samting we Mama i mekem long mi, taem hem i tijim mi long saed blong seks. Hemia i bin givhan bigwan blong lidimgud mi long ol yia blong yangtaem. Mi promes blong mekem i sem mak long ol pikinini blong mi long fyuja.”

Kunle we i gat 19 yia, i talem se: “Papa mama blong mi oli bin givhan long mi blong stanap strong taem sam woman blong wol oli traem pulum mi blong mekem rabis fasin wetem olgeta. Sipos tufala i no bin tijimgud mi, mi save se bambae mi foldaon finis. Bambae mi talem tangkyu long tufala blong olwe, from samting ya we tufala i bin mekem long mi.”

Christiana i talem se: “Taem mi toktok wetem mama blong mi long saed blong seks, samting ya i givhan bigwan long mi. From samting ya nao, mi no bin kasem wan nogud sik mo mi no gat bel. Mo tu, mi mi naf blong givim wan gudfala eksampel long ol yangfala brata mo sista blong mi. Ol narafala man tu oli respektem mi, mo hasban blong mi long fyuja bambae i respektem mi. Samting we i impoten moa se, mi mi frengud wetem Jeova God from we mi mi obei long ol loa blong hem.”

Bola we yumi tokbaot fastaem finis, i talem se: “Wan fren long klas blong mi i talem se yumi mas haremgud long seks we yumi no nidim blong mekem wan promes blong mared. Long tingting blong hem, seks i wan pleplei nomo. Be biaen, hem i faenemaot se i no wan pleplei, taem hem i gat bel mo i no save pasem bigfala eksam wetem mifala. Sipos mi no gat wan gudfala papa we i stap lidimgud mi, ating mi tu mi sem mak long hem, we mi mas kasem ol hadtaem blong lanem fasin we i stret.”

!Yes, ol Kristin papa mama oli rili wan bigfala blesing, taem oli givhan long ol pikinini blong olgeta blong kasem ‘waes we i save sevem laef blong olgeta,’ long wol ya we i krangke long saed blong seks! (2 Timote 3:​15) Tijing blong olgeta we i stanap long Baebol, i olsem wan sas gol jen we i flasem ol pikinini blong olgeta, mo i mekem olgeta oli naes tumas long ae blong God. (Proveb 1:​8, 9) Ol pikinini olsem oli harem se oli stap sefgud, mo ol papa mama blong olgeta oli haremgud tumas long hat blong olgeta. Wan papa long Afrika we i stap traehad oltaem blong toktokgud wetem ol pikinini blong hem, i talem se: “Mitufala i gat pis long tingting blong mitufala. Mitufala i sua se ol pikinini blong mitufala oli save ol fasin we Jeova i glad long olgeta, mo ol man blong wol oli no save lidim olgeta oli go krangke. Mitufala i sua se bambae oli no mekem samting we i givim soa long famle. Mi talem tangkyu long Jeova we ol pikinini blong mitufala oli bin pruvum se fasin blong mitufala blong trastem olgeta i no blong nating nomo.”

[Futnot]

[Tok blong pija long pej 10]

Ol yangfala Kristin we oli kasem tijing long Baebol long ol papa mama blong olgeta, oli naf blong sakemaot ol gyaman save we ol narafala yangfala oli givim long olgeta