I No Longtaem, Bambae Ol Pikinini Blong God Oli Fri Olgeta

‘God i letem olgeta samting ya we hem i mekem, oli kam nating nomo . . . from we God i wantem olsem. Be tingting blong God i stap yet se, olgeta samting ya we hem i mekem bambae oli kam fri we oli no moa slef blong fasin nogud, be bambae oli fri olgeta olsem ol pikinini blong God.’​—ROM 8:​20, 21.

1. ?Wanem samting long Dei Blong Stretem Sin we i pija blong sakrifaes blong Jisas?

JEOVA i givim stret Pikinini blong hem olsem wan ransom sakrifaes, blong openem rod blong 144,000 man oli save go laef long heven, mo blong mekem se ol narafala man oli save kasem laef we i no save finis long wol ya. (1 Jon 2:​1, 2) Long laswan stadi, yumi tokbaot Dei Blong Stretem Sin we ol man Isrel oli bin mekem evri yia. Long dei ya, hae pris i kilim wan buluk, olsem wan sakrifaes blong tekemaot ol sin blong hem, famle blong hem, mo laen blong Livae. Hemia i pija blong sakrifaes we Jisas i mekem blong tekemaot sin blong ol Kristin we tabu speret i makemaot olgeta. Long semfala Dei Blong Stretem Sin, hae pris i kilim wan nani olsem sakrifaes, blong tekemaot sin blong ol narafala man Isrel. Hemia i pija blong sakrifaes blong Kraes we i tekemaot sin blong ol man we tabu speret i no makemaot olgeta. Long Isrel, oli lidim wan narafala nani we i laef i stap, i go long draeples. Hemia i pija tu, i olsem se nani ya i karem ol sin we olgeta man tugeta oli mekem long ful yia, oli go longwe.a​—Levitikas 16:​7-​15, 20-​22, 26.

2, 3. ?Wanem mining blong tok blong Pol long Rom 8:​20, 21?

² Aposol Pol i tokbaot hop blong ol man we bambae oli kam “ol pikinini blong God” long heven. Nao biaen, hem i talem se: ‘Olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem. God i letem olgeta samting ya we hem i mekem, oli kam nating nomo. Mo hemia i no from we olgeta samting ya oli wantem olsem, i from we God i wantem olsem. Be tingting blong God i stap yet se, olgeta samting ya we hem i mekem bambae oli kam fri we oli no moa slef blong fasin nogud, be bambae oli fri olgeta olsem ol pikinini blong God.’ (Rom 8:​14, 17, 19-​21) ?Ol tok ya oli minim wanem?

³ God i wokem faswan papa blong yumi, Adam, we i stretgud olgeta, ale, hem i wan “pikinini blong God.” (Luk 3:​38) Taem Adam i mekem sin, hem i kam ‘slef blong fasin nogud,’ mo hem i mekem se olgeta man we oli kamaot biaen long hem oli kasem semfala fasin ya. (Rom 5:​12) God i letem ol man we oli kamaot biaen long hem oli fesem wan laef we ‘i blong nating nomo,’ from we oli gat sin. Be, tru long ‘laen ya’ Jisas Kraes, hem i givim hop long olgeta. (Jenesis 3:​15; 22:18; Galesia 3:​16) Revelesen 21:​1-4 i tokbaot wan taem we i ‘no moa gat man i ded, mo man we i krae from ded, i no moa gat man i krae, no i harem nogud long bodi blong hem.’ Promes ya i go long “ol man.” Taswe, i klia se nyufala grup blong man we oli stap laef long wol ya aninit long rul blong Kingdom, bambae oli kamgud fulwan long tingting mo bodi blong olgeta, mo bambae oli kasem laef we i no save finis. Bambae oli kam olsem ol “pikinini blong God” long wol ya. Long Rul blong Kraes blong Wan Taosen Yia, ol man we oli gohed blong obei long God, bambae ‘oli kam fri olgeta we oli no moa slef blong fasin nogud.’ Sipos oli stap tru long Jeova long laswan traem, bambae oli kam fri blong olwe, long sin mo ded we Adam i givim long olgeta. (Revelesen20:7-10) Long taem ya, olgeta man long wol ya ‘bambae oli fri olgeta olsem ol pikinini blong God.’

Oli Stap Talem Se “Yu Kam”

4. ?I minim wanem blong “tekem wora ya blong laef, we i olsem presen”?

⁴ !Hemia wan nambawan hop blong olgeta man! !I klia from wanem ol tabu Kristin we oli stap yet long wol, oli strong blong lidim wok blong talemaot hop ya long ol narafala man! Ol tabu man ya oli blong grup ya we bambae i kam “woman” blong Smol Sipsip ya, Jisas Kraes, we i kasem gudfala laef long heven finis. Taswe, olgeta tu oli mekem profet tok ya i kamtru, se: ‘Tabu speret wetem hemia we i olsem woman blong Kraes, tufala i talem se “Yu kam.” Mo olgeta evriwan we oli harem tok ya, oli mas talem olsem tu, se “Yu kam.” Yufala we i tosta, yufala i kam. Yufala we i wantem, yufala i kam tekem wora ya blong laef, we i olsem presen blong yufala.’ (Revelesen 21:​2, 9; 22:​1, 2, 17) Yes, i no ol 144,000 tabu man nomo we oli kasem ol blesing blong ransom sakrifaes blong Jisas. Tabu speret i stap gohed blong wok tru long ol laswan memba blong woman blong Kraes long wol ya. Oli stap talemaot long ol narafala man se “Yu kam.” Eniman we i tosta from stret fasin nao i harem tok ya, hem tu i save talemaot long ol narafala man se “Yu kam,” mo i save tekem bigfala presen ya we Jeova i givim blong sevem laef blong ol man.

5. ?Ol Wetnes blong Jeova oli glad se hu i stap joen wetem olgeta?

⁵ Ol Wetnes blong Jeova oli bilif long rod we God i yusum blong givim laef long ol man tru long Jisas Kraes. (Ol Wok 4:​12) Oli glad se plante man we hat blong olgeta i stret, mo we oli wantem kasem save long ol stampa tingting blong God mo mekem wok blong hem, oli stap joen wetem olgeta. Long ol Haos Kingdom blong olgeta, oli welkamem olgeta man we oli wantem “kam tekem wora ya blong laef, we i olsem presen” nomo, long “taem blong en ya.”​—⁠Daniel 12:4.

Taem Ol Yia Oli Pas Ol Samting Oli Jenis

6. ?Olsem wanem tabu speret blong God i bin wok long ol man blong Jeova long ol defren taem?

⁶ God i gat wan stret taem blong mekem stampa tingting blong hem i kamtru, mo samting ya i gat paoa long fasin we hem i mekem long ol man. (Eklesiastis 3:1; Ol Wok 1:7) Nating se tabu speret i kamdaon long ol man blong God bifo long taem blong Kraes, God i no makemaot olgeta blong oli kam ol speret pikinini blong Hem. No gat. Stat long Jisas nomo, stret taem blong Jeova i kam blong yusum tabu speret blong hem blong makemaot sam man mo woman we oli givim laef blong olgeta i go long hem, blong oli kasem laef long heven long fyuja. ?Mo olsem wanem long taem blong yumi? Semfala tabu speret ya i stap long “ol narafala sipsip” blong Jisas, be i no stap wekemap tingting mo filing blong olgeta blong wantem go long heven. (Jon 10:16) God i givim hop long olgeta ya blong kasem laef we i no save finis long paradaes long wol ya. Taswe, long taem blong yumi ya, we olfala wol i stap lus mo nyufala wol blong God we i fulap long stret fasin i stap kamtru, oli glad tumas blong sapotem ol tabu man we oli stap yet long wol, long wok ya blong givim wan wetnes.​—2 Pita 3:​5-​13.

7. ?Ol Baebol Studen oli bin tingting moa blong hivimap wanem kakae long garen, be oli save wanem samting tu long saed blong paradaes?

⁷ Long Pentekos 33 K.T., taem tabu speret i kamdaon, God i stat makemaot ‘plante pikinini blong hem blong oli go joen long gudfala laef long heven.’ Mo i klia se hem i putum wan stret taem blong “Isrel blong God” long saed blong speret i kasem fulnamba blong hem, hemia 144,000. (Hibrus 2:10; Galesia 6:​16; Revelesen 7:​1-8) Stat long 1879, plante Wajtaoa oli tokbaot wok blong hivimap ol tabu Kristin, olsem wan wok blong karem kakae long garen. Be ol Baebol Studen (naoia, ol Wetnes blong Jeova) oli bin save tu se Baebol i tokbaot hop blong kasem laef we i no save finis long paradaes long wol ya. Eksampel, Wajtaoa blong Julae 1883 i talem se: “Taem bambae Jisas i putumap kingdom blong hem mo i spolem ol rabis fasin, wol ya bambae i kam wan paradaes, . . . mo olgeta man we oli stap long beregraon bambae oli girap bakegen blong stap long paradaes ya. Sipos oli obei long ol loa blong paradaes ya, oli save stap long hem blong olwe.” Taem ol yia oli stap pas, wok blong hivimap ol tabu man ya i godaon, mo sloslou, ol man we oli no gat hop blong go long heven, oli stap joen wetem ogenaesesen blong Jeova. Long semtaem, God i givim spesel save mo fasin luksave long ol tabu man blong hem, hemia ol Kristin we oli bon bakegen.​—Daniel 12:3; Filipae 2:​15; Revelesen 14:15, 16.

8. ?Olsem wanem save long saed blong hop blong laef long wol ya i kam antap moa afta 1930?

⁸ Stat long 1931, plante moa man we oli gat hop blong laef long wol ya, oli joen wetem Kristin kongregesen.b Long yia ya, Jeova i givim save long smol grup blong ol tabu Kristin we oli stap long wol, long saed blong Esikel japta 9. Oli luksave se japta ya i stap tokbaot wan grup blong man we bambae oli laef long wol ya nomo. Wok blong hivimap grup ya, i olsem se i putum mak long olgeta blong bambae oli laef long nyufala wol ya blong God. Long 1932, ol tabu Kristin oli luksave se Jonadab, we hem i fren blong Jehu long taem bifo, hem i pija blong grup ya tede we oli gat fasin olsem ol sipsip. (2 King 10:15-​17) Long 1934, i kam klia se ol man olsem “Jonadab” oli mas “mekem laef blong olgeta i tabu,” no givim laef blong olgeta i go long God. Long 1935, ol tabu Kristin oli luksave se “bigfala hif blong man,” no ‘bigfala kampani,’ hemia ol narafala sipsip we oli gat hop blong laef long wol ya. Fastaem, oli bin tingting se bigfala kampani ya i wan narafala grup blong ol speret man long heven, olsem ‘ol fren’ no woman blong Kraes. (Revelesen 7:​4-​15; 21:​2, 9; Ol Sam 45:14, 15) Stat long 1935, ol tabu man oli lidim wok ya blong faenem ol man we hat blong olgeta i stret, mo we oli wantem tumas blong kasem laef we i no save finis long paradaes long wol ya.

9. Afta 1935, ?from wanem sam Kristin oli no moa kakae bred mo dring waen long Lodsapa?

⁹ Afta 1935, samfala Kristin we fastaem oli kakae bred mo dring waen long Lodsapa, oli no moa mekem samting ya. ?From wanem? From we oli luksave se oli gat hop blong laef long wol ya, i no long heven. Wan woman we i tekem baptaes long 1930, i talem se: “Mifala i bin ting se i stret nomo we mifala i mas [kakae bred mo dring waen], antap moa, olgeta we oli prij fultaem. Be, mi neva bilif fulwan se mi gat hop blong laef long heven. Nao, long 1935, i kam klia se i gat wan bigfala kampani oli stap hivap, we oli gat hop blong stap laef olwe long wol ya. Plante blong mifala i glad tumas blong kasem save se mifala i blong bigfala kampani ya, ale mifala i no moa kakae bred mo dring waen long Lodsapa.” Mo tu, fasin blong ol Kristin buk blong eksplenem ol save, i jenis. Long ol yia bifo, ol save long ol buk ya i stret long ol man blong Jisas we tabu speret i makemaot olgeta. Be, stat long 1935, Wajtaoa mo ol narafala buk we ‘slef we i stret’ i wokem, oli givim kakae long saed blong speret we i stret long tufala grup ya tugeta, ol tabu Kristin, mo ol fren blong olgeta we oli gat hop blong laef long wol ya.​—Matyu 24:45-​47.

10. ?Maet God i mekem wanem sipos wan tabu man i no stap tru long hem?

¹⁰ ?Olsem wanem sipos wan tabu man i lego bilif? ?Wan narafala man bambae i tekem ples blong hem? Pol i yusum pijatok blong wan oliftri blong soemaot se bambae i olsem. (Rom 11:11-​32) Sipos i nidim we narafala i tekem ples blong wan tabu man, ating God bambae i singaot wan man we i bin soemaot gudfala eksampel long saed blong bilif, mo i bin mekem tabu wok blong Hem blong plante yia finis.​—Skelem wetem Luk 22:28, 29; 1 Pita 1:6, 7.

Plante Risen Blong Gat Tangkyu

11. Nating se yumi gat hop blong laef long heven no long wol ya, ?Jemes 1:​17 i talem wanem gudfala samting long yumi?

¹¹ Nomata weples yumi mekem wok blong Jeova, sipos yumi stap tru long hem, bambae hem i givim ol samting we yumi nidim mo ol samting we yumi wantem, we oli laenap wetem stret fasin blong hem. (Ol Sam 145:16; Luk 1:​67-​74) Nating se yumi rili gat hop blong go long heven, no hop blong laef long wol ya, yumi gat plante risen blong soem tangkyu long God. Oltaem hem i mekem beswan samting long olgeta we oli laekem hem tumas. Disaepol Jemes i talem se, “evri samting we oli gud mo evri presen we oli nambawan oli aot long heven nomo, oli kam long yumi. God ya we i mekem olgeta laet blong skae,” hemia Jeova God, “hem i stap givim ol gudfala samting ya long yumi.” (Jemes 1:17) Naoia, bambae yumi tokbaot sam presen mo blesing we hem i stap givim.

12. ?From wanem yumi save talem se Jeova i givim wan nambawan hop long olgeta man blong hem evriwan?

¹² Jeova i givim wan nambawan hop long ol wanwan man we oli stap tru long hem. Hem i singaot samfala blong oli go stap long heven. Long ol Wetnes blong Hem bifo long taem blong Kraes, Hem i givim wan nambawan hop, hemia se oli save laef bakegen long ded, mo kasem laef we i no save finis long wol ya. Wan man we i bilif long laef bakegen, hemia Ebraham. Hem i wet long ‘taon ya we faondesen blong hem i save stap oltaem nomo.’ Hemia Kingdom blong God long heven. Ebraham bambae i laef aninit long rul blong Kingdom ya, taem hem i laef bakegen long wol ya. (Hibrus 11:10, 17-​19) Long taem blong en ya, God i stap givim hop ya blong kasem laef we i no save finis long paradaes long wol ya, i go long plante milyan narafala man tu. (Luk 23:43; Jon 17:3) Tru ya, eniman we Jeova i givim nambawan hop ya long hem, i mas gat bigfala tangkyu from.

13. ?Olsem wanem tabu speret blong God i bin givhan long ol man blong hem?

¹³ Jeova i stap givim presen blong tabu speret long olgeta man blong hem. Ol Kristin we oli gat hop blong laef long heven, tabu speret i makemaot olgeta. (1 Jon 2:​20; 5:​1-4, 18) Be, tabu speret i stap givhan mo lidim ol man blong God we oli gat hop blong laef long wol ya tu. Wan long olgeta ya, hemia Moses. Tabu speret blong Jeova i stap long Moses, olsem i stap long ol 70 man we oli wok wetem hem. (Namba 11:24, 25) Long paoa blong tabu speret, Besalel i wokem ol nambawan samting blong haos tapolen long Isrel. (Eksodas 31:​1-​11) Tabu speret blong God i stap long Gideon, Jefta, Samson, Deved, Elaeja, Elaesa, mo plante narafala man tu. Ol man ya blong bifo, bambae oli no kasem gudfala laef long heven. Be tabu speret i lidim mo i givhan long olgeta, olsem we i stap lidim mo givhan long ol narafala sipsip blong Jisas tede. Taswe, sipos yumi gat tabu speret blong God, hemia i no wan saen se God i stap singaot yumi blong go long heven. Tabu speret blong Jeova i stap lidim yumi, i stap givhan long yumi blong prij mo blong mekem ol narafala wok we God i givim long yumi. Hem i stap givim paoa long yumi we i bigfala tumas i blong God nomo, mo i stap givhan long yumi blong kasem ol fasin olsem lav, glad, pis, longfala tingting, kaen fasin, gud fasin, bilif, kwaet fasin, mo fasin blong bos long tingting. (Jon 16:13; Ol Wok 1:8; 2 Korin 4:​7-​10; Galesia 5:​22, 23) I stret nomo we yumi gat tangkyu from nambawan presen ya we God i givim.

14. ?Olsem wanem save mo waes we God i givim olsem presen oli givhan long yumi?

¹⁴ Save mo waes fasin oli presen we God i givim, mo yumi mas gat tangkyu from, nating se yumi gat hop blong go long heven no blong laef long wol ya. Stret save blong Jeova i stap givhan long yumi blong “jusumaot wanem fasin i stret gud olgeta,” mo blong ‘mekem ol fasin we Jeova i glad tumas long olgeta.’ (Filipae 1:​9-​11; Kolosi 1:​9, 10) Waes we i kamaot long God i save lukaotgud long yumi mo lidim laef blong yumi. (Proveb 4:​5-7; Eklesiastis 7:​12) Trufala save mo waes oli stanap long Baebol. I tru se smol grup blong ol tabu man we oli stap yet long wol, oli rili intres long samting we Baebol i talem long saed blong hop blong olgeta blong go long heven. Be, sipos yumi laekem Baebol tumas mo yumi gat plante save long saed blong Baebol, samting ya i no minim se God i stap soemaot long yumi se bambae yumi go long heven. No gat. Ol man olsem Moses mo Daniel oli bin raetem sam haf blong Baebol, be olgeta ya bambae oli laef bakegen long wol ya nomo. Nating se yumi gat hop blong laef long heven no long wol ya, yumi evriwan i stap kasem kakae long saed blong speret tru long “slef we i stret mo waes” we Jeova i agri long hem. (Matyu 24:45-​47, NW) !Yumi evriwan i gat bigfala tangkyu from ol save we slef ya i stap givim long yumi!

15. ?Wanem presen blong God we i nambawan tumas, mo wanem tingting blong yumi long saed blong presen ya?

¹⁵ Wan nambawan presen we God i givim wetem lav, hemia ransom sakrifaes blong Jisas, we i givhan long yumi evriwan, nating se yumi gat hop blong laef long heven no long wol ya. God i laekem tumas ol man, ‘nao hem i givim stret Pikinini blong hem, wan nomo we hem i gat, blong olgeta man we oli bilif long hem bambae oli no save lus, oli gat laef we i no save finis.’ (Jon 3:​16) Jisas tu i gat lav we i pusum hem blong ‘givim laef blong hem olsem wan ransom blong pem rod blong plante man oli gofri.’ (Matyu 20:28) Olsem aposol Jon i eksplenem, Kraes “i ded blong mekem rod blong God i tekemaot ol sin blong yumi [ol tabu man]. Mo i no blong yumi nomo, i blong olgeta man long wol.” (1 Jon 2:​1, 2) Taswe, yumi evriwan i mas gat bigfala tangkyu from rod we God i mekem wetem lav, blong yumi save kasem laef we i no save finis.c

?Bambae Yu Yu Stap?

16. ?Bambae yumi mekem wanem impoten lafet afta we san i godaon long Epril 11, 1998, mo hu i mas stap long taem ya?

¹⁶ Fasin tangkyu from plan blong ransom sakrifaes we God i mekem tru long Pikinini blong hem, i mas pusum yumi blong stap long Haos Kingdom no long narafala ples we ol Wetnes blong Jeova oli stap hivap long hem, afta we san i godaon long Epril 11, 1998, blong joen long lafet blong tingbaot ded blong Kraes. Taem Jisas i stanemap lafet ya wetem ol gudfala aposol blong hem long laswan naet bifo we hem i ded, hem i talem long olgeta se: “Yufala i mas stap mekem samting ya blong tingbaot mi bakegen.” (Luk 22:19, 20; Matyu 26:26-​30) Long naet ya, smol grup blong ol tabu man we oli stap yet long wol, bambae oli kakae bred we i no gat is long hem, hemia pija blong bodi blong Jisas we i no gat sin. Bambae oli dring red waen we oli no ademap wan samting long hem, hemia pija blong blad blong Jisas we i ron olsem wan sakrifaes. Ol Kristin we tabu speret i makemaot olgeta, olgeta nomo oli gat raet blong kakae bred mo dring waen, from we olgeta nomo oli joen long nyufala kontrak mo Kingdom kontrak, mo olgeta nomo oli gat trufala pruf se tabu speret blong God i bin makemaot olgeta blong go stap long heven long fyuja. Plante milyan narafala bambae oli kam long lafet blong ded blong Jisas, blong lukluk nomo mo blong soem respek. Oli talem tangkyu tumas long God mo long Kraes, from bigfala lav we tufala i soemaot taem Jisas i givim laef blong hem olsem wan sakrifaes, blong mekem rod blong ol man oli save kasem laef we i no save finis.​—Rom 6:​23.

17. ?Yumi no mas fogetem wanem samting long saed blong fasin ya we tabu speret i makemaot wan man?

¹⁷ Maet samfala oli mekem mastik, nao oli ting se oli blong grup ya we bambae i go long heven. Samting ya i save kamaot from ol bilif we ol man ya oli holem taem oli stap yet long ol narafala skul, no from we wan man we oli laekem hem tumas i ded nao oli sore tumas, no from had laef we oli gat naoia long wol, no maet from we oli harem se oli bin kasem wan spesel blesing long Jeova. Be, yumi evriwan i mas tingbaot samting ya: Baebol i no talem se yumi mas kakae bred mo dring waen long Memoriol blong soemaot tangkyu from ransom sakrifaes blong Kraes. No gat. Mo tu, fasin ya we tabu speret i makemaot wan man, i no dipen ‘long ol samting we hem i wantem, no long fasin blong hem blong ron strong, be long sore blong God.’ Hem nao i bin makemaot Jisas olsem speret Pikinini blong hem, mo bambae hem i tekem 144,000 pikinini blong hem nomo oli go joen long gudfala laef long heven.​—Rom 9:​16; Aesea 64:8.

18. ?Bighaf blong ol man blong Jeova tede oli save putum tingting blong olgeta i stap long wanem blesing long fyuja?

¹⁸ Hop we Jeova i givim long bighaf blong ol man blong hem long ol las dei ya, hemia hop blong kasem laef we i no save finis long paradaes long wol ya. (2 Timote 3:​1-5) I no longtaem, bambae oli haremgud long nambawan paradaes ya. Long taem ya, ol prins bambae oli lukaot long wol ya, aninit long gavman long heven. (Ol Sam 45:16) Bambae i gat pis long wol, taem ol man oli stap obei long ol loa blong Jeova mo oli stap lanem moa long saed blong ol fasin blong hem. (Aesea 9:​6, 7; Revelesen 20:12) Bambae i gat plante wok blong mekem blong bildim ol haos mo blong mekem wol i kam wan naesfala ples. (Aesea 65:17-​25) !Mo tingbaot glad blong ol famle taem sam memba blong olgeta oli laef bakegen long ded! (Jon 5:​28, 29) Afta we ol man oli winim laswan traem, olgeta rabis fasin bambae i lus. (Revelesen 20:​7-​10) Long olgeta yia we oli kam biaen gogo i no save finis, wol ya bambae i fulap long ol man we oli stretgud olgeta, we ‘oli no moa slef blong fasin nogud, be bambae oli fri olgeta olsem ol pikinini blong God.’

[Ol futnot]

?Bambae Yu Yu Ansa Olsem Wanem?

◻ ?I minim wanem blong “tekem wora ya blong laef, we i olsem presen”?

◻ Nating se yumi gat hop blong laef long heven no long wol ya, ?wanem sam risen blong talem tangkyu long God?

◻ ?Wanem lafet we yumi mas go long hem evri yia?

◻ ?Bighaf blong ol man blong Jeova, oli gat wanem hop blong fyuja?

[Tok blong pija long pej 18]

Plante milyan man oli stap ‘tekem wora blong laef we i olsem wan presen.’ ?Yu yu wan long olgeta ya?