Givim Laef i Go Long Jeova Mo Fasin Fri Blong Jusum Rod Blong Yumi
“Taem Kraes i mekem yumi fri, hem i mekem blong yumi stap fri oltaem.”—GALESIA 5:1.
1. ?Ol Hibru mo Grik tok we yumi tanem i kam “givim i go long God,” “makemaot blong mekem wan wok,” mo “mekem i tabu,” oli joen wetem wanem samting?
OL MAN we oli raetem Baebol, oli yusum plante defren tok long Hibru mo Grik lanwis blong soem fasin blong seraot no stap longwe long ol narafala samting, blong mekem wan tabu wok. Long ol Engglis Baebol, oli tanem ol tok ya oli kam, “givim i go long God,” “makemaot blong mekem wan wok,” mo “mekem i tabu.” Sam samtaem, Baebol i yusum ol tok ya long saed blong ol haos, olsem haos prea blong God long Jerusalem bifo, mo wosip we ol man oli mekem long ples ya. I no plante taem we ol man oli yusum ol tok ya long saed blong ol samting blong wol.
Givim Laef i Go Long “God Blong Isrel”
2. ?From wanem i stret blong talem se Jeova i “God blong Isrel”?
2 Long 1513 B.K.T.,a God i mekem ol man Isrel oli fri long fasin slef long Ijip. Smoltaem biaen, hem i jusumaot olgeta olsem ol spesel man blong hem, mo i mekem wan kontrak wetem olgeta. Hem i talem long olgeta se: ‘Oraet, sipos yufala i obei long mi, mo yufala i holemgud kontrak ya we mi mekem wetem yufala, bambae yufala i nambawan man blong mi, i winim ol narafala man long wol. Olgeta man blong wol ya i blong mi.’ (Eksodas 19:5; Ol Sam 135:4) From we ol man Isrel oli kam ol spesel man blong God, i stret blong talem se Jeova i “God blong Isrel.”—Josua 24:23.
3. ?From wanem Jeova i no stap mekem i gud moa long wan nesen i bitim ol narafala nesen taem hem i jusum ol man Isrel olsem ol man blong hem?
3 Taem Jeova i jusumaot ol man Isrel oli blong hem nomo, hem i no stap mekem i gud moa long wan nesen i bitim ol narafala nesen. No gat. Hem i tingbaot mo i gat lav long ol narafala man we oli no man Isrel tu. Hem i talem long ol man blong hem se: “Sipos wan strenja i kam stap long kantri blong yufala, bambae yufala i no mekem i nogud long hem. Strenja we i stap wetem yufala, bambae yufala i mekem i gud long hem, olsem yufala i stap mekem long ol man ples blong yufala. Mo yufala i mas laekem hem, olsem we yufala i stap laekem yufala. From we yufala tu, bifo yufala i stap olsem strenja long kantri blong Ijip. Mi mi Jeova, mi God blong yufala.” (Levitikas 19:33, 34) Plante handred yia biaen, i gat wan samting i kamaot we i soemaot klia long Pita, wanem tingting blong God long bisnes ya. Nao Pita i talem se: “Naoia mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan man Isrel, no i kamaot long wan narafala laen olgeta.”—Ol Wok 10:34, 35.
4. ?Fasin fren bitwin God mo ol man Isrel i dipen long wanem samting, mo ol man Isrel oli mekem samting ya?
4 Makem tu se, blong stap olsem ol man we God i jusumaot olgeta oli blong hem nomo, ol man Isrel oli mas mekem wan samting. Oli mas obeigud long God mo holem kontrak we hem i mekem wetem olgeta. Long rod ya, oli save stap olsem ‘ol nambawan man blong hem.’ Sore tumas, ol man Isrel oli no mekem samting ya. Oli sakemaot Mesaea we God i sanem long faswan handred yia K.T.,b nao oli lusum blesing ya. Jeova i no moa “God blong Isrel.” Mo ol prapa man Isrel oli no moa ol man we God i jusumaot olgeta oli blong hem nomo.—Skelem wetem Matyu 23:23.
“Isrel Blong God” i Givim Laef i Go Long Hem
5, 6. (a) ?Wanem mining blong profet tok we Jisas i talem long Matyu 21:42, 43? (b) ?Wetaem mo long wanem fasin “Isrel blong God” i stat?
5 ?Samting ya i min se Jeova i no moa gat sam man we oli blong hem? Si, hem i gat. Jisas Kraes i talem tok blong Ol Sam, i se: ‘I gat wan tok long Baebol we i talem se “Pos ya we ol man blong wokem haos oli sakem finis, hem i kam nambawan pos blong haos nao. Samting ya, Jeova i mekem, mo mifala i luk we i gud tumas.” ?Ating yufala i no ridim tok ya yet? From samting ya, bambae God i tekemaot kingdom blong hem long han blong yufala, bambae hem i givim long wan nesen we i stap karem frut blong kingdom ya.’—Matyu 21:42, 43.
6 Kristin kongregesenc nao i kam ‘nesen we i stap karem frut blong kingdom ya.’ Taem Jisas i stap long wol, hem i jusum ol faswan man we oli gat jans blong joen long nesen ya. Be Jeova God hem wan i stanemap Kristin kongregesen long dei blong Pentekos, 33 K.T., taem hem i kafsaedem tabu speret i go long ol faswan 120 memba blong kongregesen ya. (Ol Wok 1:15; 2:1-4) Olsem aposol Pita i raetem biaen, nyufala kongregesen ya i kam ‘wan laen we God i jusumaot, wan kampani blong ol pris blong king, wan tabu nesen, ol man we oli blong God nomo.’ ?God i jusumaot olgeta blong mekem wanem? Blong oli ‘talemaot ol gudfala fasin blong hemia we i singaot olgeta oli aot long tudak, oli kam long nambawan laet blong hem.’ (1 Pita 2:9) Ale, ol man blong Kraes we God i makemaot olgeta wetem tabu speret, oli kam wan nesen we oli blong God nomo, yes “Isrel blong God.”—Galesia 6:16.
7. ?Ol memba blong Isrel blong God oli mas haremgud long wanem fasin, mo from samting ya, oli mas blokem wanem fasin?
7 Nating se ol memba blong tabu nesen ya oli ‘blong God nomo,’ oli no olsem slef. Long defren fasin, oli fri moa i bitim ol prapa man Isrel, nesen ya we i blong God fastaem. Jisas i promes long ol man we oli gat jans blong joen long nyufala nesen ya, se: “Bambae yufala i save ol trutok, mo trutok ya bambae i mekem yufala i friman.” (Jon 8:32) Aposol Pol i soem se ol Kristin oli kam fri long kontrak blong Loa. Long saed ya, hem i givim advaes long ol Kristin long Galesia, i se: “Taem Kraes i mekem yumi fri, hem i mekem blong yumi stap fri oltaem. From samting ya, yufala i mas stanap strong. Bambae yufala i no letem Loa ya i fasem yufala, olsem we yufala i kam slef bakegen.”Galesia 5:1.
8. ?Long wanem rod Kristin plan i givim moa fasin fri long ol man i bitim kontrak blong Loa?
8 Isrel blong God i mekem fasin we i defren long fasin blong ol prapa man Isrel bifo. Long ol yia we oli pas kam kasem naoia, Isrel blong God i obeigud long promes we i mekem taem God i jusumaot hem. Yumi no sapraes long samting ya, from we ol memba blong Isrel blong God wanwan, oli jusum blong obei. Ol prapa man Isrel oli bon long wan nesen we i blong God finis, be ol man long Isrel blong God oli jusum blong givim laef blong olgeta i go long God. Taswe, Kristin plan i defren olgeta long kontrak blong Loa blong ol man Jyu. Loa i fosem ol man blong givim laef long Jeova, oli no save jusum samting ya.
9, 10. (a) ?Olsem wanem Jeremaea i soemaot se fasin blong givim laef i go long God bambae i jenis? (b) ?From wanem i no olgeta Kristin we oli givim laef blong olgeta i go long God tede we oli blong Isrel blong God?
9 Profet Jeremaea i talemaot se ol samting bambae oli jenis long saed blong fasin ya blong givim laef i go long Jeova. Hem i raetem se: “Jeova i talem se, ‘Yufala i luk. Ol dei oli stap kam we bambae mi mi mekem wan nyufala kontrak wetem ol man Isrel mo ol man Juda. Bambae hem i no olsem kontrak ya we mi mekem wetem ol olfala blong olgeta bifo, long dei ya we mi mi holem han blong olgeta blong lidim olgeta oli kamaot long Ijip. “Oli brekem kontrak ya blong mi, nating we mi mi masta mo hasban blong olgeta.” Hemia nao tok blong Jeova.’ ‘Mo bambae mi putum loa blong mi insaed long olgeta, bambae mi raetem long hat blong olgeta. Mi bambae mi kam God blong olgeta, mo olgeta bambae oli kam ol man blong mi.’ ”—Jeremaea 31:31-33.
10 From we ol memba blong Isrel blong God oli gat loa blong God “insaed long olgeta,” no i olsem se God i raetem loa ya “long hat blong olgeta,” samting ya i pusum olgeta blong folem promes blong olgeta blong givim laef i go long Jeova. Tingting we i pusum olgeta i strong moa i bitim tingting we i pusum ol prapa man Isrel. Ol prapa man Isrel ya, oli blong God finis taem oli bon, be oli no jusum blong givim laef blong olgeta i go long God. Tede, strong tingting we i pusum Isrel blong God blong mekem wok blong God, i pusum bitim faef milyan narafala man blong wosip tu, long olgeta ples blong wol. Ol man ya tu oli givim laef blong olgeta i go long Jeova God blong mekem wok blong hem. Olgeta ya oli no gat hop blong go long heven olsem Isrel blong God, be oli glad tumas blong gat hop ya blong kasem laef we i no save finis long wol ya, aninit long rul blong Kingdom blong God long heven. Oli soem bigfala tangkyu long Isrel long saed blong speret, taem oli wok strong blong sapotem smol grup ya we i stap yet long wol. Oli givhan long smol grup ya blong finisim wok blong olgeta blong ‘talemaot ol gudfala fasin blong hemia we i singaot olgeta oli aot long tudak, oli kam long nambawan laet blong hem.’
Yusum Fasin Fri We God i Givim Long Waes Fasin
11. ?God i wokem ol man wetem wanem fasin, mo yumi mas yusum fasin ya long wanem rod?
11 God i wokem ol man blong oli tinghae long fasin fri. Hem i mekem olgeta oli naf blong jusum samting we oli wantem. Faswan man mo woman i yusum fasin fri blong tufala. Be, tufala i no waes mo tufala i no gat lav, taswe tufala i jusum wan rod we i lidim tufala mo ol pikinini blong tufala blong oli kasem bigfala trabol nomo. Nating se i olsem, samting ya i soemaot klia se Jeova i no save fosem ol man we hem i wokem, blong folem wan rod we i agensem tingting we i pusum olgeta, mo we i agensem ol samting we oli wantem long hat blong olgeta. “God i laekem tumas man we i save givim long gladhat blong hem.” Taswe, taem wan man i givim laef blong hem i go long Jeova, Jeova i save agri long promes ya nomo sipos man ya i mekem from lav, mo from we hem i wantem mekem mo i glad blong mekem, wan promes we i stanap long fasin fri blong jusum rod blong hem. (2 Korin 9:7) Fasin blong givim laef long Jeova we i stanap long wan narafala samting, Jeova i no save agri long hem.
12, 13. ?Olsem wanem Timote i wan eksampel long saed blong stret rod blong trenem pikinini, mo eksampel blong hem i bin lidim plante yangfala blong mekem wanem?
12 Ol Wetnes blong Jeova oli luksave samting ya fulwan. Taswe, nating se oli bilif we man i mas givim laef blong hem i go long God, oli neva fosem wan man blong mekem olsem, mo oli no fosem ol prapa pikinini blong olgeta tu. Ol Wetnes oli defren long ol narafala skul, from we oli no baptaesem ol bebi blong olgeta. Long rod ya, oli no stap fosem ol pikinini blong olgeta blong givim laef blong olgeta i go long God, we oli no gat raet blong jusum. Rod we Baebol i soemaot, hemia rod we yangfala Timote i folem. Taem hem i kam bigman finis, aposol Pol i talem long hem se: ‘Yu mas holemstrong ol samting ya we yu lanem finis mo we sam narafala oli pulum yu blong bilifgud long hem finis, from we yu savegud wanem man oli tijim yu. Mo yu save tu we taem yu pikinini yet, kam kasem naoia, be yu yu savegud ol tok blong Baebol. Tok ya i save mekem yu yu waes, i save lidim yu long rod ya we God i stap yusum blong sevem olgeta we oli bilif long Jisas Kraes.’—2 Timote 3:14, 15.
13 Makemgud we Timote i savegud ol tok blong Baebol, from we taem hem i pikinini yet, hem i kasem tijing long saed ya. Mama mo bubu woman blong hem oli pulum hem—oli no fosem hem—blong bilif long ol Kristin tijing. (2 Timote 1:5) From samting ya, Timote i luksave se i waes blong folem Kraes, ale, hem i mekem prapa disisen blong hem blong kam wan Kristin mo givim laef blong hem i go long God. Long taem blong yumi, plante taosen yangfala man mo woman we papa mama blong olgeta oli Wetnes blong Jeova, oli folem semfala rod ya. (Ol Sam 110:3) Samfala oli no folem. Hemia samting we olgeta nomo oli mas jusum.
?Jusum Blong Kam Slef Blong Hu?
14. ?Rom 6:16 i talem wanem long saed blong fasin we man i fri olgeta?
14 I no gat wan man long wol we i fri olgeta. I gat sam loa we oli blokem yumi evriwan long sam samting, olsem loa ya we i mekem se taem yumi jyam long wan haeples, bambae yumi mas foldaon kasem graon. Sipos yumi wantem gohed blong stap laef, yumi no save sakemaot loa ya. Long saed blong speret tu, i no gat wan man we i fri olgeta. Pol i mekem yumi tingtinggud, i se: ‘Yufala i save finis. Sipos yufala i go putum yufala i stap aninit long han blong wan man blong obei long hem, ale, yufala i slef blong hem nao. Yufala i mas obei long hem oltaem. Be sipos fasin blong sin i bos blong yufala, bambae yufala i ded from. Be sipos fasin blong obei long God i bos blong yufala, God bambae i mekem yufala i stret man long fes blong hem.’—Rom 6:16.
15. (a) ?Wanem tingting blong ol man long saed blong fasin slef, be bighaf blong ol man oli folem wanem fasin? (b) ?Wanem ol kwestin we yumi wanwan i save askem?
15 Bighaf blong ol man bambae oli harem nogud sipos oli tingbaot se oli mas kam slef blong wan narafala man. Be, long wol ya tede, hemia nao samting we i stap kamaot. Plante man oli letem ol narafala man oli lidim mo gat paoa long laef blong olgeta long plante rod we oli no luksave, mekem se oli obei long ol man ya nating se oli no jusum blong mekem olsem. Wan eksampel: Ol big bisnes we oli mekem plante toktok blong pulum ol man blong pem ol samting blong olgeta, wetem ol man blong televisen mo singsing tu, oli traehad blong fosem ol man blong folem sam tingting mo fasin. Oli rili stanemap ol rul we ol man ya oli mas folem. Plante man oli sapotem ol tingting mo plan blong ol politik pati mo jyos, i no from we ol pati mo jyos oli givim ol pruf blong mekem ol man ya oli bilif long olgeta, be from we oli pulum ol man ya wetem ol toktok se yumi mas joen tugeta mo stap tru long yumi. Be Pol i talem se ‘sipos yumi obei long wan man, yumi kam slef blong hem nao.’ Taswe, i gud we yumi wanwan i askem se: ‘?Mi mi slef blong hu? ?Hu i gat moa paoa long ol disisen we mi tekem mo long fasin blong laef we mi folem? ?Ol lida blong jyos, politik, ol bigfala bisnesman, mo ol man blong televisin mo singsing, oli gat moa paoa long mi? ?Mi mi stap obei long hu—God no ol man?’
16. ?Ol Kristin oli slef blong God long wanem fasin, mo wanem stret tingting long saed blong fasin slef ya?
16 Ol Kristin oli no gat tingting se fasin blong obei long God i blokem fasin fri blong olgeta tumas. Oli wantem yusum fasin fri blong olgeta long semfala fasin we Jisas Kraes, Man blong Soemaot Rod, i bin yusum. Taswe, oli mekem se ol samting we oli wantem mo ol samting we oli impoten long laef blong olgeta, oli laenap wetem samting we God i wantem. (Jon 5:30; 6:38) Oli kasem “tingting blong Kraes,” nao oli obei long hem olsem Hed blong kongregesen. (1 Korin 2:14-16; Kolosi 1:15-18) Hemia i olsem wan woman we i glad blong wokgud wetem hasban blong hem from we hem i laekem man ya tumas. Mo Baebol i tokbaot grup blong ol tabu Kristin olsem wan yangfala gel we i promes finis blong mared wetem Kraes.—2 Korin 11:2; Efesas 5:23, 24; Revelesen 19:7, 8.
17. ?Olgeta Wetnes blong Jeova oli jusum blong kam wanem?
17 Olgeta Wetnes blong Jeova wanwan, nating se oli gat hop blong go long heven no blong laef long wol ya, oli mekem prapa promes blong olgeta blong givim laef i go long God mo obei long hem olsem Rula. Taem ol wanwan Wetnes oli givim laef blong olgeta i go long God, oli mekem prapa disisen blong olgeta blong kam wan slef blong God, mo blong no moa stap olsem slef blong ol man. Hemia i laenap wetem advaes blong aposol Pol, se: “God i pemaot yufala finis long bigfala praes. From samting ya, yufala i mas no kam olsem slef blong ol fasin blong man.”—1 Korin 7:23.
Lanem Blong Mekem i Gud Long Yumi Bakegen
18. ?Wetaem wan man we i no wan Wetnes i naf blong tekem baptaes?
18 Bifo we wan man i save kam wan Wetnes blong Jeova, hem i mas mekem ol fasin blong hem i laenap wetem ol rul blong Baebol. Ol elda oli tektaem blong luksave gud sipos man we i wantem kam wan Wetnes, i rili kasem save long mining blong Kristin fasin blong givim laef i go long God, mo ol wok we i joen wetem. ?Hem i rili wantem kam wan Wetnes blong Jeova? ?Hem i rere mo glad blong mekem ol samting we oli joen wetem wan laef olsem? Sipos no, hem i no naf blong tekem baptaes.
19. ?From wanem i no gat risen blong tok agensem wan man we i tekem disisen blong givim laef blong hem i go long God?
19 Be, sipos laef blong man i laenapgud wetem ol rul ya, ?hu i save tok agensem prapa disisen blong hem blong letem God mo Baebol i lidim laef blong hem? ?I moagud blong letem God i lidim laef blong yumi i bitim we yumi letem ol man oli lidim? no ?Fasin ya bambae i mekem i nogud long yumi? Ol Wetnes blong Jeova oli no bilif olsem. Wetem fulhat blong olgeta, oli agri long ol tok blong God we Aesea i raetemdaon, i se: “Mi, Jeova, mi mi God blong yufala. Mi nao mi stap tijim yufala blong mekem i gud long yufala bakegen. Mi nao mi stap mekem yufala i wokbaot long rod we i stret blong folem.”—Aesea 48:17.
20. ?Long wanem fasin trutok blong Baebol i save mekem man i fri?
20 Trutok blong Baebol i mekem ol man oli fri long ol tijing blong ol gyaman skul, olsem tijing ya se man i save harem nogud blong olwe long helfaea. (Eklesiastis 9:5, 10) Long defren fasin, trutok i fulumap hat blong olgeta wetem fasin tangkyu from trufala hop blong ol dedman—hemia se, ransom sakrifaes blong Jisas Kraes i save mekem se oli kasem laef bakegen. (Matyu 20:28; Ol Wok 24:15; Rom 6:23) Trutok blong Baebol i mekem man i fri long fasin blong harem nogud from we hem i dipen long ol promes blong ol man blong politik, we oli no stap kamtru. Defren olgeta, trutok blong Baebol i fulumap hat blong man wetem glad, from we hem i save se Kingdom blong Jeova i stap rul finis long heven, mo i no longtaem, bambae Kingdom ya i rul long fulwol. Trutok blong Baebol i mekem man i fri long ol fasin we oli no givim ona long God, nating se sin i strong blong pulum man blong mekem ol fasin ya. Hemia ol rabis fasin we oli spolem fasin fren blong ol man, oli spolem ol famle, mo oli givim sik mo ded. Blong talem long ol sot tok, i moagud olgeta blong kam wan slef blong God i bitim we yumi kam slef blong ol man. Yes, fasin blong givim laef blong yumi i go long God i olsem wan promes se bambae yumi haremgud ‘long wol ya . . . mo long nyufala wol ya we bambae i kam, bambae yumi gat laef we i no save finis.’—Mak 10:29, 30.
21. ?Wanem tingting blong ol Wetnes blong Jeova long saed blong fasin blong givim laef blong olgeta i go long God, mo oli wantem mekem wanem?
21 Tede, taem ol Wetnes blong Jeova oli bon, oli no joen wantaem nomo long wan nesen we i blong God, olsem ol man Isrel bifo. Ol Wetnes oli wan kongregesen blong ol Kristin we oli givim laef blong olgeta i go long God. Ol wanwan Wetnes we oli tekem baptaes finis, oli yusum fasin fri blong olgeta, nao oli jusum blong givim laef blong olgeta i go long God. Tru ya, long tingting blong ol Wetnes blong Jeova, fasin ya blong givim laef i go long Jeova i mekem se olgeta wanwan oli save gat wan nambawan fasin fren wetem God, mo fasin ya i joen tu wetem wok blong hem we oli glad blong mekem. Wetem fulhat blong olgeta, oli wantem holemtaet fasin fren ya we i givim bigfala glad, oli wantem haremgud gogo i no save finis long fasin fri ya we Jisas Kraes i givim long olgeta.
[Ol futnot]
a B.K.T. i minim Bifo Kristin Taem.
b K.T. i minim Kristin Taem.
c Wan grup blong man we oli joen wanples blong wosip.
?Bambae Yu Yu Ansa Olsem Wanem?
◻ ?From wanem God i no stap mekem i moagud long wan nesen i bitim ol narafala nesen taem hem i jusum Isrel olsem “ol nambawan man blong hem”?
◻ ?From wanem Kristin fasin blong givim laef i go long Jeova i no mekem se yumi lusum fasin fri?
◻ ?Wanem ol blesing we oli kamaot taem man i givim laef blong hem i go long Jeova God?
◻ ?From wanem i moagud blong mekem wok blong Jeova i bitim we yumi slef blong ol man?
[Tok Blong Pija Long Pej 15]
Long Isrel bifo, taem man i bon, laef blong hem i blong God finis
[Tok Blong Pija Long Pej 16]
Ol Kristin oli jusum blong givim laef blong olgeta i go long God