Wetem Fasin Fri, Folem Kristin Disisen Blong Givim Laef i Go Long Jeova
‘Taem speret blong Jeova i stap wetem man, hem i stap mekem man i fri.’—2 KORIN 3:17.
1. ?Ol Wetnes blong Jeova oli givim laef blong olgeta i go long hu, mo from wanem oli yusum sam kampani we loa i agri long olgeta?
OL WETNES BLONG JEOVA oli bilif se skul blong olgeta bambae i stap blong olwe. From samting ya, oli gat tingting se bambae oli mekem wosip long God “wetem speret mo trutok” gogo i no save finis. (Jon 4:23, 24, NW) Ol Kristin ya we oli fri blong jusum rod we oli wantem folem, oli givim laef blong olgeta fulwan i go long Jeova God, mo oli gat strong tingting blong folem disisen ya. Blong mekem olsem, oli dipen long Tok blong God mo tabu speret blong hem. Long semtaem we ol Wetnes oli gohed wetem fasin fri we God i givim blong folem Kristin disisen blong olgeta blong givim laef i go long God, oli soem respek long “gavman” tu, mo oli yusumgud ol samting we loa i agri long olgeta, mo ol samting we gavman i givim. (Rom 13:1; Jemes 1:25) Eksampel, ol Wetnes oli yusum Watch Tower Sosaeti olsem kampani we loa i agri long hem. Oli yusum plante kampani olsem long ol defren kantri. Kampani ya i olsem wan tul blong givhan long ol Wetnes blong mekem wok blong halpem ol man, antap moa long saed blong speret. Be ol Wetnes oli givim laef blong olgeta i go long God, i no long wan kampani we loa i agri long hem. Mo promes ya we oli mekem long Jeova bambae i gohed gogo i no save finis.
2. ?From wanem ol Wetnes blong Jeova oli gat bigfala tangkyu long Watch Tower Sosaeti mo ol narafala kampani olsem?
2 Ol Wetnes blong Jeova oli ol man blong wok blong God we oli givim laef blong olgeta i go long hem. Taswe, oli mas folem tok blong Jisas blong ‘go long ol man long olgeta ples blong wol, blong pulum olgeta oli kam man blong Kraes, mo blong baptaesem olgeta long nem blong Papa, long nem blong Pikinini, mo long nem blong tabu speret, mo blong tijim olgeta.’ (Matyu 28:19, 20) Wok ya bambae i gohed gogo rabis fasin blong wol ya i finis, from we Jisas i talem se: ‘Bambae ol man oli talemaot gud nyus blong kingdom long olgeta ples blong wol, blong oli wetnes blong hem long fes blong olgeta man. Nao biaen, bambae en i save kam.’ (Matyu 24:3, 14) Evri yia, ol mesin blong wokem ol buk, we Watch Tower Sosaeti mo ol narafala kampani olsem oli yusum, oli prentem plante milyan Baebol, buk, buklet, mo magasin. Ol Wetnes blong Jeova oli yusum ol buk ya long wok blong prij long olgeta ples blong wol. Taswe, ol kampani ya we loa i agri long olgeta, oli impoten tumas blong givhan long ol man blong God, blong folem disisen ya blong givim laef blong olgeta i go long Hem.
3. ?Long ol yia bifo, ol Wetnes blong Jeova oli minim wanem taem oli yusum tok ya “Sosaeti”?
3 Maet samfala oli talem se fasin blong ol Wetnes blong tokbaot Watch Tower Sosaeti—no plante taem “Sosaeti” nomo—i soemaot se oli no jes tingbaot tul ya olsem wan kampani we loa i agri long hem. Oli tingbaot Sosaeti olsem we i gat raet blong mekem ol laswan disisen long saed blong wosip blong olgeta, ?i tru no? Buk ya, Jehovah’s Witnesses—Proclaimers of God’s Kingdom i mekem poen ya i klia, i se: “Taem Wajtaoa (Engglis) [Jun 1, 1938] i tokbaot ‘Sosaeti,’ hem i no minim nomo wan kampani we loa i agri long hem, be i minim wan grup blong ol tabu Kristin we oli stanemap mo oli stap yusum kampani ya.”a Taswe, tok ya i minim “slef we i stret mo waes.” (Matyu 24:45, NW) Kolosap oltaem, ol Wetnes oli yusum tok ya “Sosaeti” long fasin ya. I tru, kampani blong Sosaeti we loa i agri long hem i no sem mak long “slef we i stret mo waes.” Watchtower Sosaeti i vot blong putumap ol daerekta blong hem. Be tabu speret blong Jeova nomo i makemaot ol wetnes we oli joen long ‘slef we i stret.’
4. (a) ?Plante Wetnes oli yusum wanem tok blong mekem se oli no givim rong tingting long ol man? (b) ?From wanem yumi mas gat stret tingting long saed blong ol tok we yumi yusum?
4 Blong no givim rong tingting, ol Wetnes blong Jeova oli lukaotgud long toktok we oli yusum. Plante Wetnes oli no talem se, “Sosaeti i tijim se,” be, “Baebol i talem se,” no, “Mi kasem save long tok blong Baebol olsemia se.” Long fasin ya, oli soemaot prapa disisen we ol wanwan Wetnes oli tekem blong agri long ol tijing blong Baebol. Mo tu, samting ya i no givim rong tingting long ol man, se ol Wetnes oli stap folem ol rul blong wan krangke grup nomo we ol man oli lidim. I tru, ol advaes long saed blong stret tok blong yusum, i mas neva kam wan samting blong rao from. Tingbaot, tok we yumi yusum i impoten nomo blong mekem se ol man oli no kasem rong tingting. Ol Kristin oli mas gat stret tingting long saed ya. Baebol i talem se yumi mas ‘livim fasin ya blong stap rao from ol toktok nomo.’ (2 Timote 2:14, 15) Baebol i talem rul ya tu se: ‘Sipos tok blong yufala i paspas, bambae i no gat man we i save wanem samting we yufala i stap talem.’—1 Korin 14:9.
Tabu Speret i Mekem Se Yumi No Nidim Plante Rul
5. ?Wanem mining blong 1 Korin 10:23?
5 Aposol Pol i talem se: “I fri blong yumi mekem evri samting, be i no evri samting we oli gud blong yumi mekem.” Hem i gohed, i se: “I fri blong yumi mekem evri samting, be i no evri samting we oli save givhan long yumi.” (1 Korin 10:23) I klia we Pol i no minim se i fri blong yumi mekem samting we Baebol i putum tabu long hem. No gat. God i givim bitim 600 loa long ol man Isrel bifo, be ol Kristin oli gat sam loa nomo we oli mas folemgud long laef blong olgeta. Taswe, long plante samting, ol Kristin wanwan oli mas tekem prapa disisen blong olgeta folem tingting we i no jajem olgeta. Wan man we i givim laef blong hem i go long Jeova finis, hem i fri from we tabu speret i stap lidim laef blong hem. From we ol Kristin wanwan oli bilif fulwan long trutok, oli save folem tingting we oli bin trenem from ol rul blong Baebol, mo oli save dipen long God blong lidim olgeta wetem tabu speret blong hem. Samting ya i givhan long ol Kristin blong luksave wanem ‘i gud blong mekem,’ mo wanem ‘i save givhan’ long olgeta wanwan mo long ol narafala. Oli save se ol disisen blong olgeta bambae oli gat paoa long fasin fren blong olgeta wetem God, from we oli givim laef blong olgeta i go long God finis.
6. Long ol Kristin miting, ?olsem wanem yumi save soemaot se yumi bilif fulwan long trutok?
6 Wan Wetnes i soemaot se hem i bilif fulwan long trutok, taem hem i givim ansa long ol Kristin miting. Fastaem, maet hem i ridim nomo ol tok blong buk we yumi stap stadi long hem. Be, biaen, bambae hem i kam naf blong yusum prapa tok blong hem blong eksplenem ol tijing blong Baebol. Olsem nao, hem i soemaot se hem i stap yusum prapa tingting blong hem, i bitim we hem i jes talemaot ol tok blong ol narafala. Taem hem i yusum ol prapa tok blong hem, mo i eksplenem trutok long fasin we i stret mo i kamaot long hat blong hem, bambae hem i haremgud tumas, mo bambae i soemaot se hem wan i bilif fulwan long tok ya.—Eklesiastis 12:10; skelem wetem Rom 14:5b.
7. ?Wanem ol disisen we ol man blong Jeova oli jusum blong folem?
7 Samting we i stap pusum ol Wetnes blong Jeova, hemia lav we oli gat long God mo long ol narafala man. (Matyu 22:36-40) Tru ya, lav ya nao we i sem mak long lav we Kraes i bin soemaot, i joenemgud olgeta, olsem wan kampani blong brata long fulwol. (Kolosi 3:14; 1 Pita 5:9) Be, olgeta wanwan oli fri blong jusum samting we oli wantem. Taswe, oli tekem prapa disisen blong olgeta blong talemaot gud nyus blong Kingdom blong God, blong no joen nating long politik, blong no tekem blad, blong stap longwe long ol rabis pleplei, mo blong folem ol rul blong Baebol long laef blong olgeta. I no gat wan man we i fosem olgeta blong tekem ol disisen ya. Ol disisen ya oli joen wetem wan fasin blong laef we ol man we oli wantem kam Wetnes oli jusum blong folem, bifo we oli tekem Kristin disisen blong givim laef blong olgeta i go long God.
?Oli Mas Talemaot Ol Fasin Blong Olgeta Long Hed Kampani?
8. ?Wanem kwestin we i nidim wan ansa blong hem?
8 Baebol i soemaot klia se i no gat wan man i fosem ol trufala Kristin blong mekem wok blong God. Hem i talem se: ‘Jeova, hem i Speret ya. Mo taem speret blong Jeova i stap wetem man, hem i stap mekem man i fri.’ (2 Korin 3:17) Be, ?olsem wanem tok ya i save laenap wetem tingting ya long saed blong wan “slef we i stret mo waes” mo Hed Kampani blong hem?—Matyu 24:45-47, NW.
9, 10. (a) ?Olsem wanem rul ya long saed blong hu nao i hed, i joen wetem Kristin kongregesen? (b) ?From we oli folem rul ya long Kristin kongregesen long faswan handred yia se i mas gat wan we i hed, oli stanemap wanem plan?
9 Blong ansa long kwestin ya, yumi no mas fogetem rul blong Baebol long saed blong hu nao i hed. (1 Korin 11:3) Efesas 5:21-24 i talem se Kraes i ‘hed blong kongregesen,’ mo se kongregesen i ‘stap obei’ long hem. Ol Wetnes blong Jeova oli bilif se slef we i stret mo waes, hemia ol brata blong Jisas long saed blong speret. (Hibrus 2:10-13) Grup ya we i olsem wan slef we i stret, i stanap blong givim “kakae” long saed blong speret long ol man blong God “long stret taem.” Long taem ya blong en, Kraes i putumap slef ya blong i “lukaot long olgeta samting blong hem.” Taswe, i stret nomo we olgeta man we oli stap talem se oli Kristin, oli mas gat respek long slef ya from haenem mo wok blong hem.
10 I mas gat wan hed blong mekem se ol man oli joengud, mo blong “mekem olgeta samting long fasin we i stret gud, we ol man oli glad long hem.” (1 Korin 14:40) Blong mekem fasin ya i stanap long faswan handred yia, oli jusumaot sam tabu Kristin we oli stap long grup ya blong slef we i stret mo waes, blong oli wok long nem blong ful grup ya. Ol samting we oli kamaot biaen, oli soemaot se Jeova i glad mo i blesem plan ya we hed kampani i lukaot long ol kongregesen. Ol Kristin long faswan handred yia oli glad mo oli agri long plan ya. Yes, oli soemaot bigfala glad mo talem tangkyu from ol gudfala frut we i kamaot.—Ol Wok 15:1-32.
11. ?Yumi mas gat wanem tingting long saed blong Hed Kampani tede?
11 Plan ya i stap wokgud yet. Naoia, i gat ten tabu Kristin we oli olsem Hed Kampani blong ol Wetnes blong Jeova, mo wanwan blong olgeta oli bin folem Kristin fasin blong laef blong plante yia finis. Oli givim advaes blong lidim ol Wetnes blong Jeova long saed blong speret, olsem we hed kampani long faswan handred yia i bin mekem. (Ol Wok 16:4) Olsem ol faswan Kristin, ol Wetnes tede oli glad blong lukluk i go long ol brata long Hed Kampani we oli bigman long saed blong speret, blong kasem advaes blong Baebol blong lidim olgeta long saed blong wosip. Nating se ol memba blong Hed Kampani oli slef blong Jeova mo Kraes olsem ol narafala Kristin, Baebol i talem long yumi se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”—Hibrus 13:17.
12. ?Olgeta Kristin wanwan oli mas talemaot ol fasin blong olgeta long hu?
12 ?Wok ya blong lukaot long ol man blong God we Baebol i givim long Hed Kampani, i mekem se ol Wetnes blong Jeova wanwan oli mas talemaot long kampani ya evri samting we oli mekem? Tok we Pol i talem long ol Kristin long Rom i soemaot samting we i defren olgeta. Hem i se: “Yufala i no gat raet blong jajem ol brata blong yufala, mo yufala i no gat raet tu blong lukluknogud long olgeta. Bambae yumi evriwan i mas stanap long fes blong God, blong bambae hem i jajem yumi. . . . Bambae yumi evriwan i mas talemaot olgeta fasin blong yumi long fes blong God.”—Rom 14:10-12.
13. ?From wanem ol Wetnes blong Jeova oli putum ripot blong wok blong prij?
13 Be, ?i no tru se ol wanwan Wetnes oli mas putum ripot long saed blong ol haoa we oli spenem long wok blong prij? Si, i tru. Be, wan buk blong ol Wetnes i eksplenem klia from wanem oli mekem olsem, i se: “Ol faswan man blong Jisas Kraes oli glad blong harem ol ripot we oli soemaot se wok blong prij i stap gohed strong. (Mak 6:30) Taem wok ya i kam bigwan moa, oli raetem ripot blong namba blong ol man we oli joen long wok ya, mo ol gudfala store long saed blong wok blong prij. . . . (Ol Wok 2:5-11, 41, 47; 6:7; 1:15; 4:4) . . . !Ating ol ripot ya long wok we i stap gohed, oli leftemap tingting blong ol Kristin man blong wok! . . . Tede tu, ogenaesesen blong Jeova i traehad blong holem ol stret ripot long wok ya we ol Kristin oli stap mekem folem tok blong Matyu 24:14.”
14, 15. (a) ?Olsem wanem tok blong 2 Korin 1:24 i laenap wetem Hed Kampani? (b) ?Ol wanwan Kristin oli mas mekem ol prapa disisen blong olgeta oli stanap long wanem samting, mo oli mas luksave wanem samting?
14 Hed Kampani i wan presen we God i givim wetem lav, mo wan eksampel blong bilif we i gud yumi folem. (Filipae 3:17; Hibrus 13:7) Taem ol man blong Hed Kampani oli obei long Kraes mo folem hem olsem eksampel blong olgeta, oli save talem semfala tok olsem Pol, se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, no gat. Bilif blong yufala i stanap finis. Mifala i wantem wok wetem yufala, blong mekem yufala i harem gud moa.” (2 Korin 1:24) Hed Kampani i makemgud ol problem we oli stap kamaot, ale i pulum yumi blong tingbaot gudfala frut we i save kamaot taem yumi folem advaes blong Baebol. Hem i givim advaes we i pulum yumi blong folem ol loa mo rul blong Baebol. Hem i givim woning long ol denja we oli haed, mo i leftemap tingting blong ol man we hem i ‘wok wetem olgeta,’ taem oli nidim. Long rod ya, hem i mekem Kristin wok blong hem, i givhan long ol narafala Kristin blong stap glad, mo i mekem bilif blong olgeta i kam strong moa, nao oli naf blong stanap strong.—1 Korin 4:1, 2; Taetas 1:7-9.
15 Taem wan Wetnes i tekem wan disisen folem advaes blong Baebol we Hed Kampani i givim, man ya hem wan i jusum blong folem rod ya, from we prapa stadi blong hem long Baebol i mekem hem i bilif strong se hemia nao stret rod blong folem. Prapa Tok blong God i pulum ol wanwan Wetnes blong folem advaes blong Baebol we Hed Kampani i givim. Oli luksave fulwan se ol disisen we oli tekem bambae oli gat paoa long prapa fasin fren blong olgeta wetem God, from we oli givim laef blong olgeta i go long hem finis.—1 Tesalonaeka 2:13.
Ol Studen Mo Ol Soldia
16. Nating se ol man wanwan oli mas tekem prapa disisen blong olgeta long fasin we oli folem, ?from wanem kongregesen i sakemaot samfala?
16 Be, sipos ol Wetnes blong Jeova oli tekem prapa disisen blong olgeta long saed blong fasin we oli folem, ?from wanem kongregesen i sakemaot samfala? I no wan man we i tekem disisen folem prapa tingting blong hem se kongregesen i mas sakemaot wan man from sin we hem i mekem. Defren olgeta, Baebol i talem se kongregesen i mas sakemaot man nomo taem hem i stap mekem bigfala sin mo i no wantem tanem tingting blong hem from. Hemia ol sin olsem Fas Korin japta 5 i tokbaot. Taswe, maet kongregesen i sakemaot wan Kristin we i stap mekem rabis fasin long saed blong seks, be samting ya bambae i kamaot nomo sipos man ya i no wantem lesin long advaes long saed blong speret we ol man blong lukaot long sipsip, oli givim wetem lav. I no ol Wetnes blong Jeova nomo we oli folem Kristin fasin ya. Buk ya, The Encyclopedia of Religion, i talem se: “Enikaen grup blong man i gat raet blong blokem wan memba we i save spolem ol narafala memba. Plante skul oli strong blong folem fasin ya we oli gat raet blong mekem, from we oli bilif se fasin ya [blong sakemaot man] i save givim gudnem wetem God.”
17, 18. ?Wanem sam pijatok we oli soem se fasin blong sakemaot man nogud long kongregesen i stret nomo?
17 Ol Wetnes blong Jeova oli stadi Baebol. (Josua 1:8; Ol Sam 1:2; Ol Wok 17:11) Yumi save talem se program we Hed Kampani i givim blong tijim ol man long Baebol, i olsem wan program we kaonsel blong edukesen i mekemrere blong ol tija long ol skul blong pikinini. Kaonsel ya i no stampa blong ol tijing, be hem i mekemrere wan program, hem i tekem disisen long saed blong ol fasin blong tijim pikinini, mo i givim advaes blong lidim ol tija. Sipos wan pikinini i mekem stronghed we i no wantem folem ol rul blong skul ya, no i mekem trabol long ol narafala studen, no i sakem doti long nem blong skul, ale skul i save sakemaot hem. Skul i gat raet blong mekem olsemia, blong lukaotgud long ol narafala studen.
18 Ol Wetnes blong Jeova oli studen, be oli ol soldia blong Jisas Kraes tu, we oli kasem oda blong ‘faet strong long gudfala faet ya we oli stap long hem from we oli bilif.’ (1 Timote 6:12; 2 Timote 2:3) Sipos wan Kristin soldia i gohed nomo blong mekem nogud fasin, yumi save se bambae God i no moa glad long hem. Hem i save tekem prapa disisen blong hem, from we hem i fri blong jusum rod we hem i wantem folem. Be hem i mas rere blong kasem frut blong disisen ya. Pol i mekem yumi tingtinggud, i se: “Man we i soldia, hem i no save mekem ol bisnes blong hem. Hem i mas stap traehad oltaem blong mekem kapten blong hem i harem gud long hem. Mo man we i resis blong winim praes, hem i no save kasem praes sipos i no obei long ol rul blong resis ya.” (2 Timote 2:4, 5) Olgeta we oli bigman long ol Kristin fasin, wetem olgeta long Hed Kampani tu, oli obei fulwan long ol oda blong Lida blong olgeta, Jisas Kraes. Oli folem “ol rul,” from we oli wantem winim praes blong laef ya we i no save finis.—Jon 17:3; Revelesen 2:10.
19. Naoia we yumi luklukgud long ol trufala samting long saed blong Kristin fasin blong givim laef i go long God, ?yumi save sua long wanem samting?
19 Ale, ?yu ting se ol save ya i soemaot klia se ol Wetnes blong Jeova oli ol man blong wok blong God, oli no ol slef blong man? Oli ol Kristin we oli givim laef blong olgeta i go long God finis, ale oli haremgud long fasin fri we Kraes i givim long olgeta. From samting ya, oli letem speret blong God mo Tok blong hem i lidim laef blong olgeta, taem oli gohed blong wok wanples wetem ol Kristin brata mo sista blong olgeta long kongregesen blong God. (Ol Sam 133:1) Ol pruf blong samting ya i mas mekem man i luksave stret stampa blong paoa blong olgeta. Oli save singsing wetem man we i raetem Sam ya, se: ‘Jeova i paoa blong mi mo hem i stap lukaot long mi. Mi mi trastem hem. Hem i stap givhan long mi, mo i stap mekem mi mi glad. Mi mi stap presem hem, long ol singsing blong glad.’—Ol Sam 28:7.
[Futnot]
a Watchtower Bible and Tract Society of New York, Inc., i wokem buk ya.
?Bambae Yu Yu Ansa Olsem Wanem?
◻ ?Olsem wanem Watch Tower Sosaeti mo sam narafala kampani we loa i agri long olgeta, oli givhan long ol Wetnes blong Jeova?
◻ ?Olsem wanem wok blong Hed Kampani blong ol Wetnes blong Jeova i givhan long ol Kristin?
◻ ?From wanem ol man blong Jeova oli putum ripot blong wok blong prij?
◻ ?Wetaem i stret blong sakemaot long kongregesen, wan Kristin we i bin givim laef blong hem i go long God?
[Tok Blong Pija Long Pej 19]
Hed kampani long faswan handred yia i mekem se ol man oli gat wan tingting nomo long saed blong ol tijing
[Tok Blong Pija Long Pej 23]
Long olgeta ples blong wol, ol Wetnes blong Jeova oli haremgud long fasin fri we Kraes i givim long olgeta