Banabas ‘Pikinini Blong Fasin Ya Blong Leftemap Tingting Blong Man’

TRAEM tingbaot laswan taem we wan fren i leftemap tingting blong yu. Nao traem tingbaot laswan taem we yu yu leftemap tingting blong wan narafala. Sam samtaem, yumi evriwan i nidim we narafala i leftemap tingting blong yumi. !Yumi laekem tumas ol man we oli mekem samting ya wetem lav! Leftemap tingting i min se oli tekem taem blong lesin, kasem save, mo givhan. ?Yu yu rere blong mekem samting ya?

Wan man we i soemaot se hem i rere blong mekem samting ya oltaem, hemia Banabas, ‘wan gudfala man we tabu speret i fulap long hem, mo bilif blong hem i strong.’ (Ol Wok 11:24) ?Olsem wanem Banabas i mekem olsemia? ?Hem i mekem wanem samting blong pulum ol man blong talem gudfala tok ya long saed blong hem?

Glad Oltaem Blong Givhan

Stret nem blong Banabas hemia Josef. Be ol aposol oli putum nem ya Banabas long hem folem fasin blong hem, from we nem ya i minim ‘pikinini blong fasin blong leftemap tingting.’a (Ol Wok 4:​36) Kristin kongregesenb i stanap smoltaem nomo bifo long samting ya. Samfala oli ting se Banabas i wan disaepol blong Jisas bifo. (Luk 10:1, 2) Nating sipos tingting ya i tru no nogat, man ya i bin mekem plante gudfala wok.

Smoltaem afta long Pentekos 33 K.T.,c Banabas, we i wan Livaet blong Saepras, i salem wan graon mo i givim mane blong graon ya i go long ol aposol. ?From wanem hem i mekem olsem? Buk blong Ol Wok i talem se ol Kristin long Jerusalem long taem ya, oli “stap seraot ol mane ya, long ol memba blong kampani blong olgeta, we oli sot long sam samting.” I klia se Banabas i luksave se samfala oli nidim sam samting, nao gudfala fasin long hat blong hem i pulum hem blong mekem wan samting blong givhan. (Ol Wok 4:​34-​37) Maet Banabas i gat plante samting. Nating sipos i olsem, be hem i kwik blong givim olting blong hem wetem taem mo paoa blong hem tu, blong givhan long wok blong Kingdom.d Wan man blong hae save, F. F. Bruce, i talem se: “Nomata weples Banabas i faenem man we i trabol no we i nidim tok blong leftemap tingting, hem i mekem evri samting we hem i save mekem blong givhan long man ya.”

Samwe long 36 K.T., Sol blong Tasas (biaen i kam aposol Pol), we hem i wan Kristin finis, i stap traehad blong faenem kongregesen long Jerusalem. ‘Be olgeta ya oli fraet tumas long hem, from we oli no save bilif se hem i wan man blong Jisas.’ ?Olsem wanem hem i save mekem ol man ya oli bilif se hem i rili jenisim fasin blong hem, mo hem i no stap lukaot olgeta blong mekem i nogud long olgeta bakegen? “Banabas i kam givhan long hem, i tekem hem i go luk ol aposol.”​—Ol Wok 9:​26, 27; Galesia 1:​13, 18, 19.

Baebol i no talem from wanem Banabas i trastem Sol. Nating se i olsem, ‘pikinini blong fasin blong leftemap tingting’ i folem fasin ya we i stret long nem blong hem. Hem i lesin long Sol mo i givhan long hem blong winim wan trabol we i luk olsem se i no gat rod blong winim. Nating se, biaen, Sol i gobak long ples blong hem, long Tasas, be tufala i frengud finis. Long ol yia we oli kam biaen, fasin fren ya i lidim tufala blong mekem plante impoten wok.​—Ol Wok 9:​30.

Long Antiok

Samwe long 45 K.T., nyus i kasem Jerusalem long saed blong wan narakaen samting we i stap kamaot long Antiok long Siria. Plante man long ples ya we oli stap toktok long lanwis Grik, oli stat bilif. Kongregesen i sanem Banabas blong lukluk long bisnes ya, mo blong mekem wan plan blong wok, we ol man longwe oli save folem. Disisen ya blong sanem Banabas i waes tumas. Luk i talem se: ‘Taem hem i kamtru, i luk we God i givhan bigfala long ol man ya long gladhat blong hem, nao hem i glad tumas. Nao hem i tok long olgeta blong mekem olgeta oli strong blong biaen long Masta blong yumi, we tingting blong olgeta i no save foldaon. Banabas i wan gudfala man we tabu speret i fulap long hem, mo bilif blong hem i strong. Nao God i pulum plante man blong oli biaen long Masta blong yumi.’​—Ol Wok 11:22-​24.

I no hemia nomo we Banabas i mekem. Man blong hae save, Giuseppe Ricciotti, i talem se: “Banabas i wan man we i mekem ol save blong hem i wok, ale, wantaem nomo, hem i luksave se oli nidim blong folem wan gudfala plan blong wok, sipos oli wantem se sid we i stap gru i karem plante frut. Taswe, faswan samting we oli nidim, hemia sam moa man blong wok.” From we Banabas i blong Saepras, ating hem i savegud fasin blong ol man we oli no man Jyu. Maet hem i tingting se hem nao i nafgud blong prij long ol hiten man. Be, hem i rere blong pulum sam narafala tu blong joen long wok ya we i givim glad mo i leftemap tingting.

Banabas i tingbaot Sol. Ating Banabas i save profet tok we Ananaeas i kasem taem Sol i kam wan Kristin, se man ya we bifo i ronem ol Kristin i ‘wan man we Jisas i jusumaot, blong i talemaot nem blong hem long ol hiten man.’ (Ol Wok 9:​15) Ale, Banabas i wokbaot i go long Tasas blong faenem Sol. Hemia wan trep blong bitim 200 kilomita. Nao tufala i wok tugeta blong wan fulyia. “Long ples ya Antiok, ol man afsaed oli givim wan nem long ol man blong Jisas, se oli Kristin man, mo hemia fastaem we nem ya i kamaot.”​—Ol Wok 11:​25, 26.

Long taem ya we Claudius i rul, plante ples we gavman blong Rom i rul long olgeta, oli kam sot long kakae. Josephus, wan man Jyu we i raetem histri, i talem se long Jerusalem, “plante man oli ded from oli no gat mane we oli nidim blong kasem kakae.” Taswe, ol disaepol long Antiok ‘oli tingbaot se bambae olgeta evriwan oli mas sanem hamas mane we oli save sanem, blong givhan long ol brata blong olgeta, we oli stap long Judia. Nao oli mekem olsem, mo oli putum mane ya long han blong Banabas mo Sol, blong tufala i go givim long ol elda blong kongregesen longwe.’ Afta we tufala i mekem wok ya, tufala wetem Jon Mak oli gobak long Antiok. Long ples ya, oli wok olsem ol profet mo tija long kongregesen.​—Ol Wok 11:29, 30; 12:​25; 13:1.

Spesel Misinari Wok

Nao wan narakaen samting i kamaot. ‘Wan taem olgeta oli lego kakae blong olgeta, mo oli stap mekem wosip long Jeova, nao tabu speret i talem long olgeta, i se “Mi mi wantem yufala i putumap Banabas mo Sol, olsem we tufala i tabu, tufala i stap blong mekem wok ya nomo we mi mi singaot tufala from.” ’ !Tingbaot! Tabu speret blong Jeova i givim oda blong putum wan spesel wok long han blong tufala ya. ‘From we tabu speret i sanem tufala olsem, Banabas mo Sol, tufala i godaon long Selusia. Nao long ples ya, tufala i jyam long wan sip, tufala i go long aelan ya Saepras.’ Yes, yumi save talem se Banabas tu i olsem wan aposol, no wan man we God i sanem hem.​—Ol Wok 13:​2, 4; 14:14.

Ale, tufala i wokbaot olbaot long Saepras, mo tufala i pulum hedgavman we Rom i putumap long aelan ya, nem blong hem, Sejas Polas, blong i kam wan Kristin. Nao tufala i tekem sip i go long Pega, wan taon kolosap long solwora long saot blong Esia Maena. Long ples ya, Jon Mak i lego tufala mo i gobak long Jerusalem. (Ol Wok 13:13) I luk olsem we kam kasem taem ya, Banabas i lidim tufala, ating from we hem i bin stap olsem wan Kristin longtaem moa i bitim Pol. Be, stat long taem ya, Sol (we naoia Baebol i kolem hem se Pol) i lidim tufala. (Skelem wetem Ol Wok 13:​7, 13, 16; 15:2.) ?Banabas i harem nogud long jenis ya? No gat. Hem i wan bigman long ol Kristin fasin, mo hem i luksave wetem tingting daon, se Jeova i stap yusum Pol tu long wan bigfala fasin. Jeova i wantem se tufala ya i go talemaot gud nyus long sam narafala ples yet.

Bifo we ol man oli ronemaot Pol mo Banabas long Antiok long Pisidia, tufala i talemaot tok blong God olbaot long ples ya, mo plante man oli bilif. (Ol Wok 13:​43, 48-​52) Long Ikoniam, “plante man Isrel mo plante man Gris tu oli bilif long Jisas.” From samting ya, Pol mo Banabas i stap longtaem lelebet long ples ya. ‘Tufala i no fraet, tufala i strong blong talemaot nyus blong Jeova. Nao Jeova i givim paoa long tufala blong tufala i mekem ol saen mo ol samting blong sapraes.’ Taem tufala i harem tok se samfala oli stap mekem wan rabis plan blong stonem tufala, long waes fasin, tufala i ronwe. Tufala i gohed blong wok long Likonia, Listra, mo Debe. Nating se kolosap Banabas mo Pol i ded from ol samting we oli kamaot long Listra, tufala i gohed blong “mekem tingting blong ol man blong Jisas i strong moa, tufala i stap givim tok long olgeta blong mekem olgeta oli stanap strong long fasin blong bilif. Tufala i talem se ‘Long rod blong go insaed long nyufala wol ya we God i king long hem, yumi save kasem plante trabol.’ ”​—⁠Ol Wok 14⁠:​1-7, 19-22.

Tufala man ya blong prij strong, oli no fraet long ol man we oli agensem tufala. Defren olgeta, tufala i gobak blong leftemap tingting blong ol nyufala Kristin long ol ples we tufala i bin kasem strong fasin agens. Ating tufala i givhan long sam man we oli naf, blong oli save olsem wanem blong lidim nyufala kongregesen.

Kwestin Long Sakomsaes

Samwe 16 yia afta long Pentekos, 33 K.T., Banabas i joen long wan bigfala bisnes long histri blong ol man blong God, hemia kwestin ya long saed blong sakomsaes. “Nao i gat sam man oli aot long Judia, oli kamdaon long Antiok [long Siria]. Nao oli tijim ol brata blong yumi, se ‘Sipos yufala i no kasem sakomsaes, stret olsem we Loa blong Moses i talem, bambae God i no save sevem yufala.’ ” Banabas mo Pol i gat plante save finis, taswe tufala i save se samting ya i no tru, mo tufala i no agri long tok ya. Be tufala i no traem soemaot paoa blong tufala mo tekem wan disisen. No gat. Tufala i luksave se hemia wan kwestin we kongregesen i mas stretem, blong mekem i gud long olgeta Kristin brata. Taswe, tufala i karem kwestin ya i go long hed kampani long Jerusalem. Long ples ya, ripot blong tufala ya i givhan blong stretem kwestin ya. Biaen, Pol mo Banabas, “tufala gudfala fren ya . . . we kolosap tufala i lusum laef blong tufala finis, long ol wok ya blong Masta blong yumi Jisas Kraes,” tufala wetem sam narafala brata oli kasem wok ya blong karem disisen blong hed kampani i go long ol brata long Antiok. Taem tufala i ridim leta we hed kampani i sanem mo tufala i toktok longtaem wetem ol brata long ples ya, olgeta long kongregesen ‘oli harem gud, from we tok blong tufala i leftemap tingting blong olgeta,’ mo i “mekem olgeta oli strong.”​—⁠Ol Wok 15:​1, 2, 4, 25-​32.

‘Tufala i Rao Strong’

Afta we yumi ridim store ya long saed blong ol gudfala fasin blong Banabas, maet yumi ting se yumi neva save kam olsem hem. Be, ‘Pikinini Ya Blong Fasin Blong Leftemap Tingting Blong Man,’ hem i olsem yumi nomo, hem i no stretgud olgeta. Taem hem mo Pol i stap mekem plan blong visitim ol kongregesen long namba tu misinari trep blong tufala, i gat wan samting i kamaot we tufala i no agri long hem. Banabas i wantem tumas blong tekem kasen brata blong hem, Jon Mak, i go wetem tufala. Be Pol i no wantem, from we Jon Mak i ronwe long tufala finis long faswan misinari trep. Ale, ‘tufala i rao strong long bisnes ya, tufala i go wanwan. Banabas i tekem Mak, nao tufala ya i tekem wan sip, tufala i go long aelan ya Saepras.’ “Pol i jusumaot Saelas blong i biaen long hem,” nao tufala i go long wan narafala ples.​—Ol Wok 15:36-​40.

!Sore tumas we trabol ya i kamaot! Be, nating se i olsem, bisnes ya i soemaot wan narafala samting long saed blong fasin blong Banabas. Wan man blong hae save i talem se: “Store ya bambae i stap olwe olsem pruf blong wan gudfala fasin blong Banabas, hemia se hem i rere blong trastem Mak bakegen.” Man ya i talem se maet “tras we Banabas i gat long Mak i givhan long Mak blong gat strong tingting bakegen, mo i pusum hem blong traehad bakegen long wok blong God.” Ol samting we i kamaot biaen, oli soemaot se tras ya we Banabas i gat long Mak i no blong nating nomo. Mo Pol tu i tokbaot olsem wanem Mak i givhan gud long hem long ol Kristin wok.​—2 Timote 4:​11; skelem wetem Kolosi 4:10.

Fasin blong Banabas i save pulum yumi blong tektaem blong lesin, kasem save, mo leftemap tingting blong ol narafala we oli harem nogud, mo blong mekem sam samting blong givhan long olgeta taem yumi luk se oli nidim. Store ya i soem se Banabas i rere blong mekem wok blong ol brata blong hem wetem kwaet fasin mo fasin no fraet, mo i soem ol nambawan frut we i kamaot from. Store ya hem wan i leftemap tingting blong yumi. !Hem i wan bigfala blesing blong gat ol man olsem Banabas long ol kongregesen blong yumi tede!

[Ol futnot]

[Tok Blong Pija Long Pej 23]

Banabas ‘i wan gudfala man we tabu speret i fulap long hem, mo bilif blong hem i strong’