Bilif Blong Yu i Stap Kasem Traem Naoia

“Ol brata mo sista, taem plante samting oli stap kam blong traem yufala, bambae yufala i save luk olgeta olsem samting blong harem gud from. From we yufala i save, taem bilif blong yufala i strong, nao yufala i winim ol samting ya blong traem yufala, bambae yufala i save kam strong moa blong stanap longtaem.”​—JEMES 1:​2, 3.

1. ?From wanem ol Kristin oli save se bilif blong olgeta i mas kasem traem?

OL TRUFALA Kristin oli no wantem safa, mo oli no haremgud taem narafala i kilim olgeta no daonem olgeta. Be, olgeta ya oli no fogetem ol tok antap we Jemes, haf brata blong Jisas, i raetem. Jisas Kraes i mekem i klia long ol disaepol blong hem se bambae ol man oli mekem trabol long olgeta, mo bambae oli kasem ol narafala trabol tu from we oli stap folem ol loa blong God. (Matyu 10:34; 24:​9-​13; Jon 16:33) Nating se i olsem, oli save kasem glad from ol traem ya. ?Olsem wanem?

2. (a) ?Long wanem rod ol samting blong traem bilif blong yumi oli save givim glad? (b) Long saed blong yumi, ?olsem wanem fasin blong stanap strong i save mekem wok blong hem fulwan?

² Wan stampa risen blong glad taem yumi kasem trabol we i traem bilif blong yumi, hemia se gudfala frut i save kamaot from. Olsem Jemes i talem, sipos yumi winim ol traem mo hadtaem, ‘yumi save kam strong moa blong stanap longtaem.’ Sipos yumi wokem nambawan Kristin fasin ya, yumi save kasem plante gudfala samting from. Jemes i raetem se: “Mo yufala i mas letem fasin blong stanap strong olwe i mekem wok blong hem gogo kasem en blong rod, blong bambae yufala i stret gud, yufala i no sot long wan samting, mo yufala i gat olgeta samting blong Kristin laef blong yufala.” (Jemes 1:​4, NW) Fasin blong stanap strong i gat wan “wok” blong mekem. Wok ya i blong mekem yumi kam stretgud we yumi no sot long wan samting, mo yumi strong long ol Kristin fasin. Taswe, sipos yumi stanap strong go kasem en blong wan traem mo yumi no brekem wan loa blong Baebol blong traem mekem traem ya i finis kwik, ale bilif blong yumi bambae i kam strong mo stret moa. Sipos bifo, yumi no bin soemaot longfala tingting, sore, kaen fasin, mo lav long sam man no taem sam samting oli hapen, ale fasin blong stanap strong i save mekem se yumi kamgud moa long ol Kristin fasin ya. Yes, samting we i stap kamaot, hemia: Ol traem oli mekem se yumi gat fasin blong stanap strong; fasin blong stanap strong i mekem yumi kamgud moa long ol Kristin fasin; mo ol Kristin fasin ya oli givim glad long yumi.​—1 Pita 4:​14; 2 Pita 1:​5-8.

3. ?From wanem yumi no mas fraet mo traem ronwe long ol trabol we oli traem bilif blong yumi?

³ Aposol Pita tu i makemgud from wanem yumi no nid blong fraet no traem ronwe long ol samting we oli traem bilif blong yumi. Hem i raetem se: “Yufala i save haremgud from ol samting ya. Nating we naoia yufala i mas harem nogud from plante samting we oli stap kam blong traem yufala. Ol samting ya oli stap kam blong soemaot we fasin blong bilif blong yufala i tru. Gol i wan gudfala samting be i wan samting we i save lus tu. Be oli stap traem hem long faea blong luksave hem. Oraet, long sem fasin, bilif blong yufala we long fes blong God i gud moa long gol, be hem tu i gat ol samting blong traem hem. Nao long Dei ya we bambae Jisas Kraes i kamtru, God bambae i save presem yufala, i save leftemap nem blong yufala, i save ona long yufala.” (1 Pita 1:​6, 7) Naoia, yumi haremgud moa long ol tok ya, from we “bigfala trabol tumas”​—taem ya we God bambae i presem yumi, leftemap nem blong yumi, ona long yumi, mo sevem yumi​—i kolosap moa i bitim wanem we samfala oli tingting, mo i kolosap moa i bitim taem we yumi jes kasem bilif.​—Matyu 24:21; Rom 13:11, 12.

4. ?Wanem tingting blong wan brata long saed blong ol traem we oli bin kasem hem mo sam narafala tabu Kristin?

⁴ Long laswan stadi, yumi bin tokbaot ol traem we oli kasem ol tabu man blong God, stat long 1914 i kam. ?Ol traem ya oli givim glad long olgeta? Taem A. H. Macmillan i tingtingbak long ol traem ya, hem i talem se: “Mi mi luk we plante bigfala traem oli bin kasem ogenaesesen blong God, mo plante trabol oli bin traem bilif blong ol man blong hem. Be tabu speret blong God i givhan long ogenaesesen ya blong stanap strong mo blong gohed blong gru. Mi mi luk se i waes blong wet wetem longfala tingting, blong Jeova i mekem ol save blong Baebol i kam klia, i bitim we yumi harem nogud long wan nyufala save we i kamaot. . . . Nomata wanem tingting we mifala i mas stretem long ol yia bifo ya, samting ya i no jenisim nambawan presen ya blong ransom, mo promes blong God blong givim laef we i no save finis. Taswe, i no nid blong letem bilif blong mifala i kam slak from we sam samting oli no kamtru olsem we mifala i bin tingbaot fastaem, no from we i gat sam save we i jenis.”​—Wajtaoa, Ogis 15, 1966, pej 504.

5. (a) ?Wanem gudfala samting i kamaot from ol traem we oli kasem smol kampani blong ol tabu man? (b) ?From wanem yumi intres naoia long bisnes ya long saed blong ol traem?

⁵ Ol tabu Kristin we oli stanap strong tru long ol traem long 1914 kasem 1919, oli kamfri long paoa blong wol we i holemtaet olgeta, mo oli lego plante gyaman fasin long saed blong skul, we oli kamaot long Babilon fastaem. Smol grup blong tabu man ya i gohed strong olsem ol man we oli kam klin mo stret moa. Oli glad blong presem God olsem wan presen we oli givim i go long hem, mo oli gat strong tingting se hem i agri long olgeta olsem wan grup. (Aesea 52:11; 2 Korin 6:​14-​18) Yes, jajmen i stat long haos blong God, be hem i no save finis long wan sot taem nomo. Ol traem oli gohed blong kasem ol man blong God mo blong mekem olgeta oli kam klin moa long fes blong hem. “Bigfala hif blong man” we oli hop blong laef tru long “bigfala trabol tumas” we i stap kolosap nao, olgeta tu oli stap kasem ol samting blong traem bilif blong olgeta. (Revelesen 7:​9, 14) Ol samting ya oli kolosap sem mak long ol samting we oli bin traem ol tabu man, mo i gat sam narafala samting tu.

?Wanem Ol Traem We Oli Save Kasem Yu?

6. ?Wanem wan strong traem we i bin kasem plante Kristin?

⁶ Plante Kristin oli bin tingbaot se maet oli mas fesem bigfala traem ya we samfala oli agensem olgeta stret, no kilim olgeta. Oli tingbaot store ya: “[Ol lida blong ol man Jyu] oli singaot ol aposol blong oli kam insaed bakegen. Nao oli talem long ol soldia blong oli wipim olgeta. Nao oli tok strong long ol aposol, se bambae oli no yusum nem ya blong Jisas bakegen samtaem blong tij. Nao oli letem olgeta i gofri. Ol aposol oli goaot long Kaonsel [Sanhedrin], nao oli stap harem i gud tumas from we God i luk olgeta olsem we oli naf blong kasem sem long fes blong ol man, from nem blong Jisas.” (Ol Wok 5:​40, 41) Ol samting we oli kamaot long ol man blong God long ol yia we oli pas, antap moa, long tufala bigfala faet blong wol, oli soemaot klia se ol man oli bin mekem plante trabol long ol Wetnes blong Jeova, oli bin wipim olgeta, mo mekem ol narafala samting tu we oli nogud moa.

7. ?Sam Kristin tede oli bin stanap strong go kasem wanem mak blong soemaot bilif blong olgeta?

⁷ Long saed blong trabol we ol man blong wol oli mekem long ol Kristin, oli stap mekem sem samting long bigfala kampani blong “ol narafala sipsip” olsem oli mekem long smol kampani blong ol tabu man. (Jon 10:16) Long ol yia we oli pas, ol man long tufala grup ya evriwan oli bin kasem ol bigfala traem. Ol man oli bin sakem olgeta long kalabus, mo oli bin kilim sam long olgeta i ded tu from we oli holemtaet lav mo bilif long God. Tufala grup ya evriwan oli bin nidim tabu speret blong God, nating se oli gat hop blong go long heven no stap long wol ya. (Skelem wetem Wajtaoa, Jun 15, 1996, pej 31.) Long ol yia afta 1930 mo 1940 taem ol Nasi oli rul long Jemani, plante man blong Jeova, wetem ol pikinini tu, oli bin soemaot bilif we i strong bitim mak. Plante blong olgeta oli bin kasem trabol we i traem olgeta go kasem laswan paoa blong olgeta. Kolosap moa long taem blong yumi, ol man oli bin mekem bigfala trabol long ol man blong Jeova long ol kantri blong Burundi, Eritrea, Itiopia, Malawi, Mosambik, Ruwanda, Singapo, mo Sair. Mo ol traem olsem oli stap gohed yet blong kasem ol man blong God.

8. ?Olsem wanem tok blong wan brata long Afrika i soem se ol traem blong bilif i no minim nomo trabol we yumi kasem taem ol man oli agensem yumi mo kilim yumi?

⁸ Be, olsem yumi makem finis, bilif blong yumi i stap kasem traem long ol rod we oli haed tu. Sam traem oli no kam stret long yumi mo i no isi blong luksave olgeta. Tingbaot wanem samting bambae yu mekem sipos yu kasem trabol olsem: Wan brata long Angola we i gat ten pikinini, i stap long wan kongregesen we, blong smoltaem, oli no gat rod blong toktok wetem ol narafala brata we oli lukaot long ogenaesesen blong God. Biaen, i gat rod blong samfala oli visitim kongregesen ya. Oli askem long brata ya sipos hem mo famle blong hem oli stap kasem naf kakae. I no isi long brata ya blong ansa, mo hem i talem nomo se oli stap long wan hadtaem. ?Ol pikinini blong hem oli stap kakae wan taem evri dei? Hem i ansa se: “Sam samtaem. Mifala i lanem finis blong haremgud long smol samting we mifala i gat.” Nao hem i talem wetem wan voes we i fulap long bilif, i se: “Yumi save se samting ya i mas kamtru long ol las dei, ?i tru no?” Ol man blong wol ya oli sek long wan man we i gat bigfala bilif olsem, be ol Kristin we oli stap tru long God mo we oli bilif fulwan se ol promes long saed blong Kingdom bambae oli kamtru, oli gat bigfala bilif olsem.

9. ?Yumi stap kasem wanem traem we i joen wetem tok blong 1 Korin 11:3?

⁹ Bigfala kampani i stap kasem traem tu long saed blong tiokratik rul. Kongregesen blong ol Kristin long olgeta ples blong wol i stap folem ol loa blong God mo ol tiokratik rul. Hemia i min se, oli luksave Jisas fastaem, olsem Lida blong olgeta mo Man we God i putumap hem olsem Hed blong kongregesen. (1 Korin 11:3) Yumi soem se yumi glad blong obei long Jisas mo Papa blong hem taem yumi respektem ol man we ogenaesesen i putumap olgeta, mo taem yumi bilif long ol tiokratik disisen long saed blong wok blong Jeova we yumi stap mekem tugeta. Mo tu, long ol wanwan kongregesen, i gat ol man we oli gat wok blong lidim kongregesen. Ol man ya oli no stretgud olgeta, mo maet oli gat sam slak fasin we yumi save luk i klia nomo. Be yumi mas respektem ol man ya we oli lukaot long yumi mo yumi mas obei long olgeta. (Hibrus 13:​7, 17) ?Yu yu faenem se i hadwok samtaem blong mekem samting ya? ?Hemia i wan traem long yu? Sipos yes, ?samting ya we i traem bilif blong yu, i stap mekem gudfala frut i kamaot long laef blong yu?

10. ?Yumi kasem wanem traem long saed blong wok blong prij?

¹⁰ Yumi stap kasem traem tu long saed blong blesing mo wok we yumi gat blong gohed blong prij oltaem. Blong winim traem ya, yumi mas luksave se blong joen fulwan long wok blong prij, i no minim se yumi jes spenem smoltaem nomo long hem, no yumi mekem samting we yumi mas ekem nomo. Tingbaot gudfala toktok we Jisas i talem long saed blong wan wido woman we hem i givim olgeta samting we hem i gat. (Mak 12:41-44) Maet yumi tingbaot kwestin ya: ‘?Mi mi olsem wido woman ya, we mi stap givim olgeta samting we mi save givim long wok blong prij?’ Yumi evriwan i Wetnes blong Jeova oltaem nomo, taswe yumi tekem evri jans blong letem laet blong yumi i saenaot.​—Matyu 5:​16.

11. ?Olsem wanem ol nyufala save, no advaes long saed blong ol gudfala fasin, i save traem yumi?

¹¹ Wan narafala traem we i save kasem yumi, i joen wetem fasin tangkyu we yumi gat from laet we i stap kam strong moa blong soemaot ol trutok blong Baebol, mo from advaes we grup ya blong slef we i stret i stap givim. (Matyu 24:45) Sam samtaem yumi nidim blong jenisim sam fasin blong yumi, olsem taem i bin kam klia se ol man we oli stap yusum tabak oli mas stop sipos oli wantem gohed blong joen wetem kongregesen.a (2 Korin 7:⁠1) Maet traem i kamaot taem yumi nidim blong jenisim sam myusek we yumi stap jusum, no wan kaen pleplei we yumi stap joen long hem.b ?Bambae yumi gat tingting se advaes we yumi kasem i no waes? no ?Bambae yumi letem tabu speret blong God i jenisim tingting blong yumi mo halpem yumi blong tekem Kristin fasin blong laef fulwan?​—Efesas 4:​20-​24; 5:​3-5.

12. ?Afta we wan man i tekem baptaes, hem i mas mekem wanem blong kam strong moa long bilif?

¹² Blong plante yia nao, namba blong ol man long bigfala kampani i stap kam antap, mo afta we oli tekem baptaes oli stap gohed moa blong frengud wetem Jeova. Blong mekem olsem, i no naf we oli go long wan Kristin asembli, go long sam miting long Haos Kingdom, no joen long wok blong prij sam samtaem nomo. Tingbaot: Maet wan man i no moa go long ol jyos blong Bigfala Babilon, hemia olgeta gyaman skul blong wol, ?be hem i rili lego olgeta finis? ?Hem i stap holemtaet sam fasin we oli soem tingting blong Bigfala Babilon, hemia tingting blong sakemaot ol stret rul blong God? ?Ating hem i no stap tinghevi long ol gudfala fasin long saed blong seks mo fasin blong stap tru long hasban no waef blong hem? ?Ating hem i tinghae moa long ol samting we hem wan nomo i wantem mo ol sas samting, i bitim ol samting long saed blong speret? Taswe, ?hem i rili klin we i no gat wan doti blong wol i spolem hem?​—Jemes 1:​27.

Kasem Gudfala Frut From Ol Samting We Oli Traem Bilif

13, 14. ?Samfala oli mekem wanem afta we oli stat folem trufala wosip?

¹³ Sipos yumi rili ronwe finis long Bigfala Babilon mo long ol fasin blong wol ya tu, yumi no mas lukluk i gobak long ol samting ya we yumi livim finis. Olsem Luk 9:​62 i talem, sipos yumi lukluk i go biaen, yumi save mestem bigfala blesing ya blong laef aninit long rul blong Kingdom blong God. Jisas i talem se: “Man we i stap holem stia blong bot, be oltaem i stap luklukbak long ples blong hem, hem i no naf blong kam man we God i king blong hem.”

¹⁴ Be samfala we oli kam Kristin finis, oli gobak bakegen long ol fasin blong wol ya. Oli no stap faet agensem ol tingting blong wol. (2 Pita 2:​20-​22) Ol samting blong wol oli pulum intres blong olgeta mo oli kakae taem blong olgeta, nao oli no save gohed gud long Kristin laef blong olgeta. Bitim we oli putum tingting mo hat blong olgeta i stap strong long Kingdom blong God mo ol stret fasin blong hem, mo putum ol samting ya long fasples long laef blong olgeta, oli stat folem narafala rod we oli ronem ol sas samting. Sipos oli no luksave se bilif blong olgeta i slak mo se oli no hot gud no kol gud, mo sipos oli no rere blong lukaot advaes blong God blong jenisim rod we oli stap folem, ale oli stap long denja blong lusum nambawan fasin fren we oli gat wetem Jeova mo ogenaesesen blong hem.​—Revelesen 3:​15-​19.

15. Blong God i stap glad long yumi, ?yumi mas mekem wanem?

¹⁵ Blong God i glad long yumi, mo blong yumi laef tru long taem blong bigfala trabol tumas we i stap kam kwik, yumi mas stap klin, mo ‘wasem klos blong yumi long blad blong Smol Sipsip ya.’ (Revelesen 7:​9-​14; 1 Korin 6:​11) Sipos yumi no stap klin mo stret long fes blong God, hem i no save agri long ol tabu wok blong yumi. Tru ya, yumi wanwan i mas luksave se sipos bilif blong yumi i kasem traem, samting ya bambae i givhan long yumi blong stanap strong longtaem mo blong no mekem samting we God i harem nogud long hem.

16. ?Long wanem rod ol gyaman tok i save traem bilif blong yumi?

¹⁶ Samtaem, ol man blong televisen mo nyuspepa mo sam man blong wol, oli talemaot ol gyaman toktok long saed blong ol man blong God, mo oli givim rong tingting long ol narafala man long saed blong ol Kristin bilif mo fasin blong laef blong yumi. Yumi no mas sapraes long samting ya, from we Jisas i talem klia se ‘ol man blong wol bambae oli no laekem yumi from we yumi no man blong wol.’ (Jon 17:14) ?Bambae yumi letem ol man we Setan i blaenem ae blong olgeta oli mekem yumi fraet, mekem tingting blong yumi i foldaon, mo mekem yumi sem blong talemaot gud nyus? ?Bambae yumi letem ol gyaman toktok blong daonem trutok i blokem yumi blong go oltaem long miting mo long wok blong prij? no ?Bambae yumi stanap strong we yumi no fraet mo tingting blong yumi i strong moa bitim bifo, blong gohed blong talemaot trutok long saed blong Jeova mo Kingdom blong hem?

17. ?Wanem samting we yumi sua long hem we i save pusum yumi blong gohed blong soemaot bilif?

¹⁷ Ol profet tok blong Baebol we oli kamtru finis, oli soemaot se yumi stap long lashaf olgeta, blong taem blong en. Ol tingting blong yumi we oli stanap long Baebol long saed blong nyufala wol blong stret fasin, oli sua blong kamtru long nambawan fasin. Go kasem taem ya, yumi evriwan i mas soemaot bilif we i no seksek nating long Tok blong God. Yumi mas pruvum bilif blong yumi, yumi no mas kam slak long wok blong talemaot gud nyus blong Kingdom long olgeta ples blong wol. Tingbaot se, plante taosen nyufala disaepol oli stap tekem baptaes evri wik. Ating hemia nomo i naf blong mekem yumi luksave se, longfala tingting blong Jeova long saed blong jajmen blong hem, i save sevem laef blong plante moa man. ?Yumi glad se God i bin letem wok blong talemaot Kingdom i gohed blong sevem laef blong plante moa man? ?Yumi glad tumas we plante milyan man oli stap bilif long trutok mo soemaot bilif blong olgeta?

18. ?Yu yu gat strong tingting blong mekem wanem long saed blong wok blong Jeova?

¹⁸ Yumi no save stret taem we ol samting blong traem bilif blong yumi bambae oli finis. Be yumi sua long wan samting: Jeova i putum stret dei finis blong jajem ol rabis man long heven mo wol. Long smoltaem we i stap yet, yumi mas gat strong tingting blong folem nambawan bilif we Jisas, Man ya blong mekem bilif blong yumi i stretgud olgeta, i bin soemaot, nating se hem i kasem plante traem. Mo yumi mas folem eksampel blong ol olfala tabu brata mo ol narafala long medel blong yumi, we oli stap wok wetem strong tingting mo fasin blong no fraet.

19. ?Yu save sua se wanem samting bambae i winim wol ya?

¹⁹ Yumi mas gat strong tingting blong no kam slak nating blong wok wetem enjel we i stap flae long medel blong heven, blong talemaot gud nyus we i blong olwe long olgeta nesen, laen, lanwis, mo kantri. Mekem ol man oli harem mesej we enjel ya i stap talemaot: “Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man.” (Revelesen 14:​6, 7) Taem God i mekem jajmen ya i kamtru, ?wanem bambae i kamaot long saed blong bilif blong yumi we i kasem traem finis? ?Yu agri se bambae yumi win bigwan taem yumi kamfri long fasin blong laef blong olfala wol ya blong go insaed long nyufala wol blong God we i fulap long stret fasin? Sipos yumi stanap strong tru long ol samting we oli traem bilif blong yumi, bambae yumi save talem olsem aposol Jon, se: ‘Yumi winim ol rabis fasin blong wol. Mo rod blong winim wol, hemia bilif.’​—1 Jon 5:⁠4.

[Ol futnot]

?Yu Yu Tingbaot?

◻ ?Olsem wanem ol samting we oli traem bilif blong yumi oli save givim glad?

◻ ?Wanem sam samting we oli save traem bilif blong yumi be i no isi blong luksave olgeta?

◻ ?Sipos yumi stanap strong tru long ol samting we oli traem bilif blong yumi, olsem wanem samting ya i save mekem i gud long yumi?

[Tok Blong Pija Long Pej 17]

A. H. Macmillan (lefsaed long fored) kolosap long taem ya we oli sakem hem mo sam brata blong Watch Tower Sosaeti we oli no gat fol, oli go long kalabus

Hem i joen long asembli long Detroit, Mijigan, long 1928

Long ol laswan yia blong laef blong Brata Macmillan, hem i stap soemaot bilif yet

[Tok Blong Pija Long Pej 18]

Plante Kristin long Afrika oli soemaot bilif we i stap strong tru long ol bigfala traem, olsem famle ya