Ripot Long Wok Blong Kingdom
Tekem Olgeta Jans Blong Prij
OL WETNES BLONG JEOVA oli mekem wok blong tijim ol narafala long Baebol, mo plante man long ful wol oli save samting ya. Be oli stap givim sam kos tu we oli karem ol narafala blesing long ol man. Pablik wok ya i bin pulum intres blong sam man, olsem store ya blong Ekwado i soem.
◻ Ol bos blong wan bigfala faktri blong glas, oli wantem givim wan kos long ol man blong wok blong olgeta, long saed long gudfala famle laef. Bos blong ofis we i lukaot long ol man blong wok, hem i singaot sam Katolik pris blong joen long kos ya, be oli no kam. Wan pris i talem long hem se, i no gat plante pris we oli naf blong tokbaot poen ya, from samting ya, i no sua se wan long olgeta i save kam. Wan Wetnes we i wok long ples ya i harem tok ya, nao hem i askem long wan brata we i stap prij oltaem long ol stoa mo ofis, blong kam long faktri ya.
Wan dei biaen, Wetnes ya i kam blong soem plan blong sam kos, long bos blong ofis we i lukaot long ol man blong wok. Long wan pepa, hem i raetem ol defren poen we kos ya i save tokbaot, we oli kamaot long ol buk blong Watch Tower Sosaeti. Bos i sapraes. Hem i jusum tri poen blong tokbaot, hemia, fasin joen blong ol man, ol rul long ples blong wok, mo ol rul long famle. Nao, oli mekem plan blong tokbaot ol advaes ya wetem ol man blong wok.
Oli seraotem ol man blong wok oli go long 7 grup wetem 30 man long wan grup. Nao, tri brata we oli nafgud, oli tokbaot ol advaes wetem olgeta. ?Wanem frut i kamaot? Sam man oli askem sipos wan Wetnes i save kam visitim olgeta long haos blong olgeta. Mo trifala brata ya oli givimaot 216 buk blong halpem ol man ya blong stadi Baebol. Ol bos oli sapraes tumas, ale oli askem sipos ol Wetnes oli save mekem sam narafala kos.
◻ I no longtaem i pas, oli putumap wan loa long Ekwado we i givim raet blong tijim ol tijing blong jyos, long skul blong ol pikinini. Wan sista we hem i misinari, i visitim wan woman we i hed tija long skul. Sista i askem long tija ya, wanem frut i stap kamaot from nyufala loa ya. Tija i talem se, i gat plan blong statem wan kos long wosip blong Meri, be plan ya i neva kamtru. Taem sista i talem long hem se maet kos ya i save mekem sam trabol long ol pikinini we oli no Katolik, tija i agri. Misinari i ansa se: “Mifala i gat wan kos blong tijim ol rul blong Baebol, we i no pusum man blong joen long wan jyos.” Tija i ansa, i se: “?Wetaem yu save kam? ?Afta tumora?” Biaen, misinari i soem buk ya Listening to the Great Teacher long hem, nao tufala tugeta oli agri se bambae oli save lukluk japta ya, “Olgeta Man Blong Mekem Pis Oli Save Haremgud.”
Taem misinari i visitim skul ya bakegen, hem i spenem tri haoa blong visitim seven defren klasrum, mo woman we i hed tija i lesin long evri samting. Afta wan kos wetem klas faef, wan studen i talem se: “Misis, plis meksua se yu visitim klas sikis. !Oltaem oli stap traem blong kilim mifala blong statem wan faet!” Wan tija i talem se: “Tru, raf fasin i wan bigfala samting, yumi nidim moa taem blong tokbaot samting ya.”
Biaen, oli mekem plan blong sista i kambak long skul ya, blong tokbaot ol poen olsem fasin obei mo fasin gyaman. Kam kasem naoia, i gat gudfala frut i kamaot. Naoia, taem misinari sista i wokbaot long rod, ol pikinini oli ron i kam blong talem halo long hem, mo blong askem sam kwestin long saed long Baebol. Sam narafala pikinini oli glad blong soemaot sista ya long papa mama blong olgeta. Mo tu, Wetnes ya i statem Baebol stadi long haos blong tu pikinini blong skul ya.