Oli Mekem Samting We Jeova i Wantem

Wan Man Sameria i Soem Se Hem i Wan Man Blong Mekem i Gud Long Ol Man Raonabaot Long Hem

LONG taem blong Jisas, ol Jyu oli no laekem nating ol hiten man. Biaen, oli putum wan loa long buk blong olgeta, Misna, we i blokem ol woman Isrel blong halpem ol woman blong narafala laen taem oli bonem wan bebi. Olsem ya bambae oli no givhan blong karem wan narafala hiten man i kam long wol ya.—Aboda Sara 2:1.

Long saed blong skul, mo laen tu, ol man Sameria oli kolosap moa long ol Jyu, i bitim ol narafala hiten man. Be nating, ol Jyu oli luk ol man Sameria olsem wan laen we i daon moa long olgeta. Aposol Jon i raetem se: “Ol Jyu oli no toktok long ol man Sameria.” (Jon 4:​9, NW) Mo tu, Talmud i tijim se “sipos wan man Sameria i tajem wan pis bred, pis bred ya bambae i kam moa doti, i bitim mit blong pig.” Mo tu, sam Jyu oli yusum tok ya “Man Sameria” olsem wan tok blong daonem mo spolem man.​—Jon 8:​48.

Sipos yumi tingbaot samting ya, bambae yumi kasem save moa long ol tok we Jisas i talem long wan man we i savegud loa blong ol Jyu. Man ya i kam luk Jisas mo i askem se: “?Tija, bambae mi mi mas mekem olsem wanem blong kasem laef ya we i no save finis?” Blong ansa, Jisas i tokbaot Loa blong Moses, we i talem se: ‘Yu mas laekem Jeova long olgeta tingting blong yu, mo long olgeta laef blong yu, mo long olgeta paoa blong yu, mo long olgeta maen blong yu. Mo yu mas laekem ol man we oli stap raonabaot long yu, olsem we yu laekem yu wan.’ Man ya we i savegud long loa i askem long Jisas se: “?Be hu ol man ya we oli stap raonabaot long mi?” (Luk 10:25-​29; Levitikas 19:18; Dutronome 6:5) Ol Farisi oli talem se tok ya, “man we i stap raonabaot,” i minim olgeta we oli folem ol kastom blong ol Jyu nomo, be i no save minim ol hiten man no ol man Sameria. Sipos man blong loa ya we i stap askem kwestin, i bin ting se Jisas bambae i sapotem tingting ya, i sua se hem i sapraes long ansa blong Jisas.

Wan Man Sameria We i Gat Fasin Sore

Jisas i talemaot wan parabola blong ansa long kwestin blong man ya. Hem i talem se: “I gat wan man i aot long Jerusalem, i stap godaon long Jeriko.” Jeriko i stap samwe long 23 kilomita longwe long Jerusalem. Rod blong godaon long Jeriko i stap tantanem olbaot, mo i gat plante bigfala sap ston. Samting ya i mekem se i isi long ol man blong stil blong haed, faetem ol man we oli pas, mo ronwe biaen. Nao, Jisas i talem long parabol blong hem, se: ‘Sam man blong stil oli holem man ya we i stap wokbaot long rod. Ale, oli stilim olgeta samting blong hem, mo oli kilim hem long stik, nao oli ronwe long hem we hem i hafded long rod.’​—Luk 10:30.

Jisas i gohed, i talem se: “Nao i gat wan pris i stap folem rod ya i kam, be taem hem i luk man ya, hem i pas long narasaed rod, i wokbaot i go. Mo long sem fasin i gat wan Livaet i stap kam. . . Mo taem hem i kam kasem ples ya, hem i luk man ya, nao hem tu i pas long narasaed rod, i wokbaot i go.” (Luk 10:31, 32) Ol pris mo ol Livaet oli ol tija blong Loa, mo olgeta tu oli tijim loa ya blong laekem ol man raonabaot. (Levitikas 10:​8-​11; Dutronome 33:​1, 10) I stret nomo se tufala grup ya, oli mas gat moa fasin sore i bitim ol narafala man, mo wantem givhan long man ya we i kasem kil.

Ale, Jisas i talem se: “Be i gat wan man Sameria tu we i stap folem rod ya, i kam kasem ples ya.” I sua se man blong loa i wantem save moa, taem Jisas i tokbaot wan man Sameria. ?Bambae Jisas i agri long nogud tingting we ol Jyu oli gat long saed blong ol man Sameria? No gat, taem man Sameria i luk man ya we i kasem kil, “hem i gat sore long hem.” Jisas i talem se: “Nao i go kolosap long hem, i wasem ol sobodi blong hem long waen mo oel, mo i fasemgud olgeta. Nao i putum man ya i sidaon long dongki blong hem, nao i tekem i kam long wan hotel, nao long ples ya, i stap lukaot long hem.b Mo long nekis dei, hem i tekem tu denarias [hemia pei blong leba blong tu dei], i givim long man blong hotel, mo i talem long hem se, ‘Yu lukaotgud long man ya. Mo sipos yu yusum sam mane blong yu antap, taem we mi mi kambak bakegen, bambae mi jenisim mane blong yu bakegen.’ ”​—Luk 10:33-​35, NW.

Nao Jisas i askem long man blong loa ya, i se: “?Tingting blong yu i olsem wanem? ?Long trifala man ya, hu man i mekem i gud long man ya we ol man blong stil oli kam kilim hem?” Man blong loa i save wanem ansa i stret long kwestin ya, be i luk olsem se hem i no wantem talem “Man Sameria.” Ale hem i talem nomo se: “Man ya we i gat sore long hem.” Nao Jisas i talem long hem, i se: “Ale yu go, yu folem fasin blong hem.”​—Luk 10:36, 37.

Samting We Yumi Lanem

Man ya we i askem kwestin long Jisas i mekem samting ya blong “soemaot we fasin blong hem i stret nomo.” (Luk 10:29) Ating hem i ting se bambae Jisas i presem hem from we hem i stap traehad tumas blong folem Loa blong Moses. Be man ya we i glad long fasin blong hem wan i nidim blong kasem save se proveb ya blong Baebol i tru, we i talem se: “Olgeta rod blong wan man oli stret long prapa ae blong hem, be Jeova i stap jekem hat blong ol man.”​—Proveb 21:2.

Parabol ya blong Jisas i soem se wan man we i rili stret, hemia wan man we i obei long ol loa blong God, mo antap long samting ya, we i folem ol nambawan fasin blong God. (Efesas 5:1) Eksampel, Baebol i talem se: “God i stap mekem i sem mak nomo long olgeta man.” (Ol Wok 10:34) ?Yumi stap folem fasin ya blong God? Parabol ya blong Jisas we i wekemap filing blong yumi, i soem se tok ya ‘ol man raonabaot long yumi’ i no jes minim ol man blong sem kantri, kastom no skul blong yumi. Tru ya, ol Kristin oli kasem oda ya blong “mekem i gud long olgeta man,” hemia i no minim olgeta we oli gat sem bilif olsem yumi nomo, be i minim tu ol man blong narafala laen, kantri, mo defren kaen laef.​—Galesia 6:​10.

Ol Wetnes blong Jeova oli traehad blong folem oda ya we i stap long Baebol. Eksampel, taem i gat wan disasta olsem hariken no graon i seksek, ol Wetnes blong Jeova oli halpem ol Kristin brata blong olgeta, mo ol narafala man tu.c Antap long samting ya, evri yia oli spenem moa long wan bilyan haoa blong givhan long ol man blong kasem save long Baebol. Oli traehad blong seremaot mesej blong Kingdom long evri man, from we “God i wantem sevem olgeta kaen man, mo i wantem olgeta man oli kasem stret save blong trutok.”​—1 Timote 2:​4, NW; Ol Wok 10:35.

[Ol futnot]