Naoia i Gat Stret Fasin Blong Evriwan

“Bambae mifala i traehad long fasin we i nyuwan, blong lesin . . . long olgeta we oli harem nogud, we oli wari, mo we tingting blong olgeta i foldaon from we i no gat man we i harem voes blong olgeta. . . . Naoia i taem blong mekem ol loa oli wok. I taem blong meksua se olgeta man we oli bon oli kasem semfala mak we i stret long fes blong God, mo se olgeta man we oli bon oli kasem semfala mak we i stret long fes blong ol narafala man”​—Presiden blong Yunaeted Stet, Richard Milhous Nixon, long wan tok blong hem long Janewari 20, 1969.

TAEM ol man oli tekem wok olsem king, presiden, mo praem minista, oli laekem tokbaot stret fasin. Richard Nixon, we i presiden blong Yunaeted Stet bifo, i mekem olsemia tu. Be ol naesfala tok blong hem oli lusum paoa blong olgeta taem yumi luk trufala store blong hem. Nating se hem i promes blong ‘mekem ol loa oli wok,’ be biaen oli faenem se Nixon i brekem loa. From samting ya hem i mas finis long wok blong hem. Tate yia afta, ‘olgeta we oli harem nogud, we oli wari, mo we tingting blong olgeta i foldaon,’ oli stap askem yet se wan man i harem voes blong olgeta.

I tru se, blong lesin mo givim wanem we ol man oli askem, i no wan smol samting. Plante lida oli luksave samting ya finis. ‘Stret fasin blong olgeta man’ i olsem wan mak we i hadwok tumas blong kasem. Be plante handred yia bifo, i gat wan promes we yumi intres long hem. Hemia wan nambawan promes long saed long stret fasin.

God i sanem profet blong hem, Aesea, blong talem long ol man blong hem se bambae hem wan i jusum wan “man blong wok” blong sanem i go long olgeta. Jeova i talem long olgeta se: “Mi givim speret blong mi long hem. Bambae hem i mekem stret fasin i kamaot long ol nesen.” (Aesea 42:​1-3) I no gat wan haeman nating we i save mekem wan bigfala tok olsemia, from we tok ya i min se bambae i gat stret fasin long olgeta nesen blong olwe. ?Yumi save trastem promes ya? ?I gat rod blong mekem bigfala wok ya i kamtru?

Wan Promes We Yumi Save Trastem

Blong wan promes i kamtru, samting ya i dipen long man we i mekem promes ya. Long saed blong promes we yumi tokbaot, God ya we i gat Olgeta Paoa hem nao i bin talem se bambae “man blong wok” blong hem i stanemap stret fasin long ful wol. Jeova i defren long ol man blong politik, we oli mekem promes be oli no save holem ol promes ya. Baebol i talem stret se: “God i no save gyaman.” (Hibru 6:​18) God i makemgud se: “Wanem samting we tingting blong mi i strong blong mekem, bambae mi mekem.”​—Aesea 14:24, Today’s English Version.

Mo tu, yumi save trastem moa promes ya taem yumi luk laef long “man blong wok” ya we God i jusumaot, hemia Jisas Kraes. Man we i mas stanemap stret fasin, hem i mas wan man we i laekem fasin ya mo we i gat stret fasin long laef blong hem tu. Jisas i givim klia pruf se hem i wan man we i ‘laekem tumas ol stret fasin, mo hem i no wantem ol fasin nogud, hem i agensem olgeta.’ (Hibru 1:9) Ol tok blong hem, ol fasin blong hem, mo olsem wanem hem i ded tu, oli pruvum se hem i rili wan stret man. Wan kapten long ami blong Rom, we maet i luk taem we Jisas i pas long kot mo taem we hem i ded, i talem se: “Tru, man ya i stret nomo ya.”​—Luk 23:47.

Antap long stret fasin we Jisas hem wan i gat, hem i agensem tu fasin we i no stret, we long taem blong hem i kam antap tumas. Blong mekem samting ya, hem i no rebel agensem ol haeman no traem sakemaot gavman. No gat. Hem i tijim trufala stret fasin long olgeta we oli lesin long hem. Long Bigfala Toktok blong hem antap long Hil, hem i givim klia tok blong soemaot olsem wanem stret fasin i save wok long laef blong man.​—Matyu japta 5 kasem 7.

Olgeta samting we Jisas i tijim, hem i mekem i wok tu long laef blong hem wan. Hem i no daonem olgeta we oli gat leprosi, we ol man Jyu oli talem se oli “man we yu no mas tajem.” Jisas i toktok wetem olgeta, i tajem olgeta, mo tu hem i mekem bodi blong olgeta i kamgud bakegen. (Mak 1:​40-​42) Long tingting blong hem, olgeta man we hem i mitim oli impoten, nating se oli puaman no oli man nating. (Matyu 9:​36) Hem i talem long olgeta se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala.”​—Matyu 11:28.

Antap long ol samting ya, Jisas i no letem ol fasin no stret raonabaot long hem oli pulum hem blong gat kruked fasin. Mo hem i no letem ol fasin ya oli pulum hem blong faerap long kros. Hem i neva givimbak nogud fasin long man we i mekem nogud long hem. (1 Pita 2:​22, 23) Taem hem i safa bigwan tu, hem i prea strong long Papa blong hem long heven from olgeta we oli nilim hem long pos. “Papa, plis yu fogivim olgeta ya, from we oli no save samting ya we oli stap mekem.” (Luk 23:34) I klia se, Jisas ‘i talemaot ol stret fasin blong God long fes blong ol hiten man.’ (Matyu 12:18) ?Nambawan laef long Pikinini blong God hemia i no beswan pruf se God i wantem stanemap wan wol we i stret?

?I Gat Rod Blong Winim Fasin No Stret

Long wol blong yumi tede, i gat sam strong pruf se man i naf blong winim fasin no stret. Fulwan ogenaesesen blong ol Wetnes blong Jeova, mo ol wanwan Wetnes insaed long hem, oli traehad blong winim fasin blong ting nogud long narafala, fasin blong no mekem i sem mak long olgeta man, fasin blong no laekem man blong defren kala, mo raf fasin. Lukluk eksampel we i kam biaen.

Pedroa i gat tingting ya se fasin blong agensem gavman, hemia nomo i save karem stret fasin i kam long Bask Kantri, ples we hem i stap long hem long Spen. From samting ya, hem i joen long wan grup blong teroris. Grup ya i sanem hem i go long Franis blong i kasem trening olsem man blong ami. Taem trening blong hem i finis, oli askem hem blong wokem wan grup blong teroris we i mas sakem bom long wan haos blong ol polis. Grup blong hem i rerem finis ol bom ya taem polis i holem hem. Hem i spenem 18 manis long kalabus, be long ples ya tu hem i gohed long wok blong hem long saed long politik. Wanwan taem hem i livim kakae mo hem i katem ol string long han blong hem.

Pedro i ting se hem i stap faet blong sapotem stret fasin. Be biaen, hem i stat save Jeova mo ol stampa tingting blong hem. Taem Pedro i stap long kalabus, waef blong hem i stat stadi Baebol wetem ol Wetnes blong Jeova. Nao, taem Pedro i aot long kalabus, waef blong hem i singaot hem blong kam long wan miting blong ol Wetnes blong Jeova. Pedro i laekem tumas miting ya taswe hem i askem blong stadi Baebol. Stadi ya i givhan long hem blong jenisim tingting blong hem, mo fasin blong laef blong hem. Ale, long 1989 Pedro mo waef blong hem tufala i tekem baptaes.

Pedro i talem se: “Mi tangkyu long Jeova from we mi neva kilim wan man i ded taem mi stap wan teroris. Naoia mi yusum naef blong God long saed long speret, hemia Baebol, blong talemaot wan mesej blong trufala pis mo stret fasin, hemia gud nyus blong Kingdom blong God.” I no longtaem Pedro we i wan elda blong ol Wetnes blong Jeova, i go visitim ol haos we fastaem hem i wantem spolem. Be, naoia hem i go blong talemaot mesej blong pis long ol famle we oli stap long ples ya.

Ol Wetnes blong Jeova oli jenisim laef blong olgeta from we oli wantem tumas wan wol we i stret. (2 Pita 3:​13) Nating se oli trastem promes blong God blong mekem samting ya i kamtru, oli luksave tu se oli mas soem stret fasin long laef blong olgeta. Baebol i talem klia wanem samting we God i askem long yumi blong mekem.

Planem Sid Blong Stret Fasin

Yes, taem fasin no stret i kasem yumi, maet yumi wantem singaot strong se: “?God ya blong stret fasin i stap wea?” Ol man Jyu long taem long Malakae oli talemaot wan tok olsem. (Malakae 2:​17) ?God i tinghevi long tok blong olgeta? No gat. Tok ya i mekem God i “taed long olgeta” from we oli stap mekem ol nogud fasin, olsem fasin ya blong trikim waef blong olgeta we oli kam olfala, mo divos long olgeta blong nating nomo. Jeova i soem se hem wari long ‘ol waef ya we olgeta oli tekem taem oli yang yet, mo we oli stap mekem i nogud long olgeta, nating se oli fren mo waef blong olgeta we oli mekem promes long olgeta.’​—Malakae 2:​14.

?Yumi save toktok smol agensem fasin no stret sipos long laef blong yumi wanwan, yumi stap mekem i no stret? Defren olgeta, yumi mas traem folem eksampel blong Jisas. Yumi mas sakemaot long hat blong yumi, ol fasin ya olsem fasin blong ting nogud long narafala man mo fasin blong no laekem man blong defren kala. Be tu, yumi mas mekem i sem mak long olgeta man, yumi mas laekem ol man mo yumi no mas givimbak ol nogud fasin long olgeta we oli mekem nogud long yumi. Long ol samting ya yumi soem se yumi rili laekem stret fasin.

Sipos yumi wantem kasem stret fasin, Baebol i pulum yumi blong ‘planem sid blong stret fasin.’ (Hosea 10:12) Nating se i smol olsem wanem, ol fasin blong yumi wanwan blong winim fasin we i no stret oli impoten. Olsem Martin Luther King, Jr., i raetem long Letter From Birmingham Jail, se: “Fasin we i no stret, nomata se hem i stap wea, be hem i save agensem stret fasin long olgeta ples.” Ol man we oli ‘lukaot stret fasin,’ olgeta ya nomo we God i jusumaot olgeta blong stap long nyufala wol we bambae i no longtaem i kam.​—Sefanaea 2:3.

Yumi no save bildimap hop blong yumi long ol promes blong man we faondesen blong olgeta i no strong. Be, yumi save trastem tok blong Man ya we i wokem yumi mo we i laekem yumi. Taswe, Jisas i talem long ol disaepol blong hem se oli mas prea blong Kingdom blong God i kam. (Matyu 6:​9, 10) Jisas, we i king long Kingdom ya, ‘bambae i sevem ol puaman we oli stap singaot i go long hem, mo bambae i givhan long olgeta we oli sot long ol samting, we oli no gat man blong lukaot long olgeta. Hem bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting.’​—Ol Sam 72:⁠12, 13.

Yes, fasin no stret i no save stap blong olwe. Taem we Kraes i rul antap long ful wol, bambae hem i finisim fasin ya olgeta. God i promes long yumi, tru long profet Jeremaea, se: “Taem i stap kam we bambae mi mekem promes we mi talem i kamtru . . . Long taem ya bambae mi jusum wan king, we i wan stret man long laen blong Deved. King ya bambae i mekem wanem i stret long kantri ya.”​—Jeremaea 33:14, 15, TEV.

[Futnot]