Tinghevi Long Ol Blesing We Yumi Gat Blong Mekem Tabu Wok

YUMI no mas ting nating long ol tabu wok we yumi kasem. Taem ol pris long Juda bifo oli ting nating long ol wok we oli stap mekem long tempel blong Jeova, Jeova i stretem olgeta long strong fasin. (Malakae 1:​6-​14) Mo bakegen, taem sam man Isrel oli pulum ol Nasaraet blong ting nating long ol responsabiliti we oli akseptem, we i joen wetem tabu wok blong olgeta, Jeova i stretem ol man Isrel ya from sin blong olgeta. (Emos 2:​11-​16) Ol trufala Kristin tu oli mekem tabu wok, mo oli tinghevi long wok ya. (Rom 12:1) Tabu wok ya i gat plante haf blong hem. Mo evri haf blong hem, oli impoten sem mak.

Taem Jisas i stap yet long wol ya wetem ol disaepol blong hem, hem i trenem olgeta blong talemaot Kingdom blong God. Biaen, mesej blong olgeta i mas go kasem olgeta ples long wol. (Matyu 28:19, 20; Ol Wok 1:8) Wok ya i impoten moa tede, long en blong olfala fasin blong wol ya.

Olgeta Wetnes blong Jeova oli joen long wok ya. Plante handred taosen long olgeta, oli faenem glad blong mekem wok blong paenia. Blong fulumap impoten nid long saed blong wok raonabaot long wol, plante taosen long olgeta oli jenisim sam samting long laef blong olgeta, blong oli save wok fultaem long Betel, mekem wok olsem seket no distrik elda, mo wok olsem misinari. ?Olgeta ya oli mas tingbaot wanem, sipos oli wantem gohed long ol spesel wok ya?

Taem i Gat Bigfala Nid Long Famle

Bifo we wan man i joen long fultaem wok, hem i mas jenisim sam samting long laef blong hem. I no evri wan we i save mekem wok ya. Maet, i gat sam samting we Baebol i askem long wan man blong mekem fastaem, nao from samting ya, hem i no save joen long spesel wok ya. ?Be, wan we i stap finis long spesel wok ya bambae i mekem wanem sipos i gat problem long amle blong hem​—⁠maet olfala papa no mama blong hem i sik bigwan? Ol rul mo advaes blong Baebol, olsem hemia we bambae yumi luk naoia, oli soemaot rod we yumi save folem.

Fasin fren blong yumi wetem Jeova i mas bigfala samting long laef blong yumi. (Eklesiastis 12:13; Mak 12:28-​30) Ol tabu samting we yumi kasem, yumi mas tinghae long olgeta. (Luk 1:​74, 75; Hibru 12:16) Wan taem, Jisas i tok long wan man we i nidim blong putum ol samting we hem i ting se oli impoten, oli kam long seken ples. Jisas i talem se, hem i mas wok strong blong talemaot Kingdom blong God. Be man ya i gat tingting se, bambae hem i no mekem wok ya go kasem we papa blong hem i ded. (Luk 9:​59, 60) Long wan narafala taem, Jisas i soemaot klia ol rong tingting blong man we i talem se hem i givim ol samting blong hem long God finis, mo naoia “hem i no moa save mekem wan samting blong givhan long papa no mama blong hem.” (Mak 7:​9-​13) Aposol Pol tu i soem se i impoten tumas we man i lukaotgud long ‘famle blong hem,’ olsem papa mama mo ol olfala bubu.​—1 Timote 5:​3-8.

?Samting ya i min se taem famle i rili nidim wan we i stap mekem fultaem wok, bambae hem i mas lego spesel wok ya mo kam lukaot long famle? Ansa i no sem mak oltaem, i dipen long plante samting. Hem i disisen blong wanwan man. (Galesia 6:5) Plante we oli stap long fultaem wok, nating se oli tinghae tumas long wok blong olgeta, oli filim se i moa waes blong stap wetem papa mama blong olgeta mo givim ol samting we tufala i nidim. ?From wanem? Maet tufala i rili nidim hem, from we i no gat wan narafala memba blong famle we i save givhan long tufala, no kongregesen long ples blong tufala i no save givim ol samting we tufala i nidim. Samfala oli bin joen bakegen long wok blong fultaem paenia afta we oli lukaot long famle blong olgeta. Be plante taem, oli faenem narafala rod blong stretem bisnes ya.

Oli Mekem Wok Blong Olgeta

Samfala we oli stap long fultaem wok, taem papa mama blong olgeta i rili gat nid, oli givim nid ya, be oli no stop long spesel wok blong olgeta. Bambae yumi luk sam nomo long plante eksampel long saed ya.

Wan brata mo woman blong hem we tufala i stap long hedkwota blong ol Wetnes blong Jeova, tufala i bin stat wok long Betel long 1978. Bifo, tufala i bin mekem wok ya blong visitim ol distrik mo seket. Brata ya i gat plante wok insaed long tiokratik ogenaesesen. Be papa mama blong hem tu, tufala i nidim help. Brata ya wetem woman blong hem, we tufala i stap wok long Betel, tufala i bin go tri no fo taem evri yia​—⁠wan trep blong 3,500 kilomita​—⁠blong lukaot long papa mama blong brata ya. Samtaem tufala i wokbaot i go from we papa mama blong brata ya i gat problem long saed long helt. Long 20 yia, kolosap se tufala i yusum olgeta dei blong spel blong tufala blong lukaot long papa mama blong tufala. Tufala i laekem tumas mo gat ona long papa mama blong tufala, be tu tufala i tinghae tumas long blesing ya we tufala i gat blong mekem tabu wok.

Wan narafala brata i bin mekem wok blong visitim ol kongregesen blong 36 yia finis, taem hem i fesem wan traem we hem i talem se, i bitim ol narafala traem long laef blong hem. Mama blong woman blong brata ya, we i gat 85 yia mo i strong long wok blong Jeova, i nidim blong stap wetem wan we i save givhan long hem. Long taem ya, kolosap evri pikinini blong olfala woman ya, oli ting se i no stret blong hem i laef wetem olgeta. Wan man long famle i talem long seket elda ya se, oli wantem we bambae hem mo waef blong hem i mas lego wok blong visitim ol kongregesen, mo lukaot long olfala mama ya. Be brata ya mo waef blong hem, tufala i no lego nambawan wok ya. Nating se i olsem, tufala i no ting nating long ol nid blong mama ya. Long ol naen yia we oli kam biaen, kolosap oltaem mama ya i stap wetem tufala. Fastaem, trifala i laef long wan haos we trak i save pulum. Afta, trifala i muf i go long wan ren haos we ol seket oli givim long trifala. Long plante dei, brata ya we i wan distrik elda long taem ya, i aot i go visitim ol distrik, be waef blong hem i stap mo i lukaotgud long mama blong hem wetem lav. Evri Sande, afta long ol miting, brata ya i mekem longfala trep i gobak blong givhan long tufala. Plante brata we oli save samting ya, oli soem bigfala tangkyu from fasin we brata ya mo waef blong hem, tufala i stap mekem. Biaen, samting ya i pusum ol narafala memba long famle blong givim sam help. Plante taosen man blong Jeova oli stap kasem blesing from wok we brata ya mo waef blong hem, tufala i mekem. Tufala i tingbaot narafala fastaem, taswe tufala i no lego fultaem wok.

Ol Famle Oli Givgivhan Long Olgeta

Taem ol defren memba blong famle oli luksave se fultaem wok i impoten tumas, oli save wok tugeta blong givhan long olgeta we oli joen long wok ya.

Fasin ya we famle i wok tugeta i bin givhan long wan brata blong Kanada mo woman blong hem we tufala i misinari long wes Afrika. Tufala i no wet gogo kasem we trabol i kamaot, mo tufala i no ting se neva wan samting i save hapen. Bifo we tufala i go long Wajtaoa Baebol Skul blong Gilead, blong rerem tufala blong wok long narafala kantri, hasban ya i storeyan wetem smol brata blong hem, blong tokbaot olsem wanem blong lukaot long mama blong tufala sipos hem i sik no i handikap. From we smol brata ya i laekem mama blong hem tumas mo i tingbaot se wok blong misinari i impoten, hem i talem se: “Mi mi gat wan famle mo ol pikinini finis. Mi no save go longwe tumas mo mekem wok we yu yu mekem. Taswe, sipos wan samting i hapen long Mama, bambae mi lukaot long hem.

I gat wan brata mo woman blong hem, tufala i stap wok long Saot Amerika. Famle blong woman ya i givhan plante blong lukaot long olfala mama blong hem. Wan sista blong hem wetem man blong hem, tufala i lukaot long mama ya gogo kasem we wan sik i kilim sista ya i ded. ?Olsem wanem nao? Blong winim ol wari, man blong sista ya i raetem se: “Long taem we mi mo ol pikinini blong mi, mifala i stap laef, bambae yutufala i neva stop long misinari wok.” Wan narafala sista mo hasban blong hem, tufala i kam givhan. Tufala i salem haos blong tufala mo muf i go long ples we mama ya i stap, blong tufala i save lukaot long hem. Mo tufala i lukaot long mama ya gogo kasem we hem i ded. !Hemia wan nambawan fasin blong wok tugeta! Olgeta evriwan oli givhan blong sapotem misinari wok.

Samting We Ol Papa Mama Oli Givim Fri Nomo Long Jeova

Plante taem, ol papa mo mama oli soemaot bigfala tangkyu blong olgeta from tabu wok. Wan nambawan samting we oli save givim blong ona long Jeova, hemia ol stret pikinini blong olgeta. (Proveb 3:9) Plante Kristin papa mama oli leftemap tingting blong ol pikinini blong olgeta blong joen long fultaem wok. Sam long olgeta oli gat filing olsem Ana, we i givim pikinini blong hem Samuel, blong mekem wok blong Jeova “blong olwe,” long “olgeta dei long laef blong hem.”​—1 Samuel 1:​22, 28.

Wan mama we i gat tingting olsem Ana, i raet i go long gel blong hem long Afrika se: “Mitufala i talem tangkyu long Jeova from nambawan jans we yu yu gat. Mitufala i glad tumas long wok blong yu.” Wan narafala taem hem i talem se: “I tru se yumi mas seraot mo stap farawe long yumi. Be mitufala i glad tumas blong luk olsem wanem Jeova i lukaot long yu!”

Afta we wan misinari long Ekwado i tingting bak long ol defren samting we oli hapen taem hem i stap lukaot long olfala papa mama blong hem, hem i raetem se: “Ating help we i bigwan moa we mi wetem waef blong mi, mitufala i kasem, hemia ol prea blong papa blong mi. Afta we hem i ded, mama blong mi i talem long mitufala se: “Evri dei papa blong yu i prea long Jeova, i stap askem hem blong givhan long yutufala blong gohed nomo long wok blong yutufala.”

Wan olfala brata mo woman blong hem long Kalifonia, Yunaeted Stat, tufala i glad tumas from wan pikinini blong tufala i joen long fultaem wok. Pikinini ya mo waef blong hem, tufala i stap long Spen taem mama blong hem i ded. Ol narafala memba blong famle oli ting se oli mas mekem plan blong lukaot long papa we i stap. From we oli bisi wetem wok blong olgeta blong winim mane, mo blong lukaot long ol pikinini blong olgeta, oli ting se oli no save keagud long papa blong olgeta. Ale, oli askem strong long brata ya mo waef blong hem blong kam hom mo lukaot long papa blong olgeta. Be papa ya, nating se hem i gat 79 yia, helt blong hem i gud yet, mo tu hem i gat klia tingting long saed long speret. Long wan miting blong famle, afta we evriwan i talemaot tingting blong hem, papa ya i stanap mo i talem wetem strong tingting se: “Mi wantem se tufala i gobak long Spen mo gohed long wok blong tufala.” Ale, tufala i gobak Spen. Be, oltaem tufala i stap givim ol samting we hem i nidim long laef. Naoia tufala i stap mekem wok blong seket long Spen. Miting we famle ya i mekem, i pulum ol narafala memba blong famle blong luksave wok we brata ya mo waef blong hem i stap mekem long narafala kantri. Sam yia biaen, wan long ol pikinini ya i tekem papa blong hem i go long haos blong hem. Hem i keagud long papa blong hem go kasem we hem i ded.

Long Pensylvania, Yunaeted Stet, wan brata we tabu speret i makemaot, i gat bitim 90 yia, mo hem i bin paenia blong samwe 40 yia. Nao waef blong hem i sik bigwan mo i ded. Hem i gat wan boe mo tri gel, mo hem i gat plante pikinini tu long saed long speret. Wan gel blong hem i bin mekem wok blong fultaem paenia blong bitim 40 yia. Hem i wok wetem hasban blong hem olsem misinari, wok blong visitim ol kongregesen, mo wok long Betel. Sista ya i givhan blong mekem gudfala plan blong halpem papa blong hem. Nao hem i askem long papa blong hem sipos papa i wantem se hem i aot long Betel blong lukaot long hem. Papa blong hem i tinghae long ol tabu samting, mo hem i ting se hem i save kasem nid blong hem long ol narafala rod. Taswe hem i ansa se: “I nogud tumas sipos yu yu mekem olsem, mo i moa nogud yet sipos mi mi letem yu yu mekem samting ya.”

Ol Kongregesen We Oli Givhan

Sam kongregesen, oli bin givhan bigwan long olfala papa mama we pikinini blong olgeta i stap long fultaem wok. Ol kongregesen ya oli rili gat tangkyu long olgeta we oli bin mekem wok olsem blong plante yia finis. I tru, kongregesen i no karemaot olgeta wok ya we Baebol i givim long wanwan man blong mekem. No gat. Be, ol kongregesen ya oli save mekem i moa isi long ol pikinini ya blong oli no lego spesel wok ya blong olgeta.

Wan brata blong Jemani mo woman blong hem, tufala i bin wok long narafala kantri blong samwe 17 yia. Tufala i spenem bighaf blong ol yia ya long wok blong visitim ol kongregesen, kasem taem we mama blong brata ya i olfala tumas. Evri yia, taem tufala i tekem spel blong tufala, tufala i go givhan long hem. Ol Wetnes we oli stap raonabaot long ples ya, olgeta tu oli givhan long hem. Ale, taem brata ya i kam stap wetem mama blong hem from helt blong hem i kam moa nogud, ol elda long kongregesen oli mekem plan blong storeyan wetem brata ya mo waef blong hem. Ol elda ya, oli savegud wanem we tufala i stap mekem oltaem blong givhan long olfala mama blong brata ya. Mo tu, oli luksave se i impoten we tufala i gohed long fultaem wok blong tufala. From samting ya, oli mekem program blong kongregesen i save lukaot long mama blong brata ya. Oli talem se: “Yutufala i no save givhan long hem moa bitim wanem we yutufala i mekem finis. Bambae mifala i givhan long yutufala. Olsem nao, bambae yutufala i save gohed long wok blong yutufala long Spen.” Long ol seven yia we oli pas, ol elda ya oli bin gohed blong lukaot long mama blong brata ya.

Long sem fasin, kongregesen i givhan bigwan blong lukaot long papa blong wan brata we i bin wok long Senegal stat long 1967. Taem wan trabol i kamaot, hasban, wetem help blong waef blong hem, i mekem trep i go long Yunaeted Stet blong halpem papa mama blong hem. Hem i luk se i stret blong stap wetem papa mama blong hem blong sam manis. I no isi blong givhan long tufala. Be, afta we hem i mekem samting we hem i naf blong mekem, kongregesen i givhan long hem, blong hem i save gohed long misinari wok. Bitim 18 yia nao, kongregesen i stap givim help long plante rod. Fastaem, oli givhan long papa (nating se hem i no moa naf blong luksave olgeta) mo biaen oli givhan long mama blong brata ya tu. ?Samting ya i mekem se brata ya i no moa nidim blong lukaot long papa mama blong hem? !No gat! Plante taem, hem i aot long Senegal mo i go spenem smoltaem wetem papa mama blong hem. Long taem ya, hem i mekem bes blong hem blong givhan long tufala. Be plante brata mo sista long kongregesen ya, oli glad blong save se oli stap givhan long brata ya mo waef blong hem we tufala i stap wok strong long fultaem wok long Senegal.

Jisas i talem se olgeta we oli livim olgeta samting blong olgeta from gud nyus, bambae oli gat ol brata, ol sista, mama, mo pikinini wan handred taem antap long hemia we oli lusum. (Mak 10:29, 30) Tok ya i kamtru fulwan long medel blong ol Wetnes blong Jeova. Wan brata mo woman blong hem we tufala i stap wok long Benin, Wes Afrika, tufala i luk samting ya long wan spesel rod taem tu Wetnes long kongregesen blong papa mama blong tufala i talem se tufala i no mas wari long saed ya. Tufala Wetnes ya i talem se: “Papa mama blong yutufala, oli papa mama blong mitufala tu.”

Yes, i gat plante rod we yumi save folem blong soem se yumi tinghevi long blesing we yumi gat blong mekem tabu wok. ?Be i gat sam rod we yu save go moa, blong mekem wok ya fulwan?

[Tok Blong Pija Long Pej 26]

Oli jenisim sam samting long laef blong olgeta blong joen long fultaem wok