Jeova i Bos Long Ol Taem Mo Sisen
‘Ol taem mo ol sisen blong samting ya, i no blong yufala i save, Papa blong mi nomo i gat raet blong jusumaot.’—OL WOK 1:7.
1. ?Olsem wanem Jisas i ansarem kwestin blong ol aposol blong hem long saed blong ol taem?
I GAT sam man tede we oli stap ‘krae mo harem nogud from ol samting nogud ya we ol narafala man oli stap mekem’ long Krisendom mo olbaot long wol. Olgeta ya oli wantem tumas blong save wetaem ol rabis fasin blong wol ya bambae oli finis mo nyufala wol blong God we stret fasin nomo i stap long hem, bambae i kamtru. (Esikel 9:4; 2 Pita 3:13) Jes bifo we Jisas i ded mo smoltaem afta we hem i laef bakegen, ol aposol blong hem oli askem kwestin long hem long saed blong taem. (Matyu 24:3; Ol Wok 1:6) Be, long ansa blong Jisas, hem i no givim save long olgeta blong oli faenemaot ol stret taem. Long wan ansa blong hem, hem i tokbaot wan saen we i gat plante haf blong hem. Mo long wan narafala taem, hem i talem se, ‘ol taem mo sisen blong samting ya, i no blong yufala i save, Papa nomo i gat raet blong jusumaot.’—Ol Wok 1:7.
2. ?From wanem yumi save talem se Jisas i no gat save long olgeta taem we Papa blong hem i jusum blong mekem samting we hem i wantem i kamaot long taem ya blong en?
2 I tru se Jisas i stret pikinini blong Jeova, wan nomo we Hem i gat. Be Jisas hem wan i no save dei ya we Papa blong hem i makemaot finis long plan blong hem. Long profet tok we Jisas i talem long saed blong ol las dei, hem i talem wetem tingting daon se: “Dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matyu 24:36) Jisas i glad blong wet wetem longfala tingting, kasem we Papa blong hem i soemaot long hem stret taem blong spolem rabis wol ya.a
3. ?Yumi save lanem wanem from ol ansa we Jisas i givim long ol kwestin long saed blong stampa tingting blong God?
3 Yumi save lanem tu samting from fasin ya we Jisas i ansarem ol kwestin long saed blong taem we ol samting bambae oli hapen blong mekem stampa tingting blong God i kamtru. Faswan se, Jeova i gat ol stret taem blong hem we hem i makemaot finis. Seken samting se, Jeova nomo i jusumaot ol taem ya, mo ol man blong hem oli no mas ting se bambae hem i stap talemaot klia ol taem mo sisen ya long olgeta.
Ol Taem Mo Sisen We Jeova i Makemaot Finis
4. ?Wanem mining blong ol Grik tok we oli tanem i kam “taem” mo “sisen” long Ol Wok 1:7?
4 ?Ol “taem” mo “sisen” i minim wanem? Long Ol Wok 1:7, Jisas i tokbaot tufala samting ya. Grik wod we oli tanem i kam “taem” i minim “wan taem we i stap pas mo yumi no save wetaem bambae i stop,” (maet taem ya i longfala no i sot nomo). “Sisen” i kamaot long wan wod we i minim wan stret taem we man i makemaot no i jusumaot finis, mo hem i defren long ol narafala taem from sam spesel samting oli kamaot long taem ya. Man ya W. E. Vine i tokbaot tufala wod ya i se: “Long Ol Wok 1:7, ‘Papa i jusumaot’ ol taem (chronos), we i minim longfala blong taem, mo ol sisen (kairos), hemia taem we i defren long ol narafala taem from we i gat sam samting i hapen blong makemaot hem.”
5. ?Wetaem Jeova i talemaot long Noa se hem i gat tingting blong spolem kruked wol long taem blong hem, mo wan bigfala wok we Noa i mekem?
5 Bifo we Bigfala Wora i ron, God i makem 120 yia olsem stret taem blong kruked wol ya we ol man mo ol stronghed enjel oli stampa blong hem. (Jenesis 6:1-3) Noa we i bilif long God, i gat 480 yia finis long taem ya. (Jenesis 7:6) Hem i no gat pikinini yet, mo i stap olsem gogo kasem 20 moa yia i pas. (Jenesis 5:32) Longtaem biaen, afta we ol pikinini boe blong Noa oli bigman finis mo oli mared, God i talemaot stampa tingting blong hem long Noa se bambae Hem i finisim ol rabis fasin blong wol ya. (Jenesis 6:9-13, 18) Long taem ya, nating se Noa i kasem oda blong bildim wan sip mo blong prij, Jeova i no talemaot stret taem blong hem long Noa.—Jenesis 6:14; 2 Pita 2:5.
6. (a) ?Olsem wanem Noa i soemaot se hem i letem fasin blong kaontem ol taem i stap long han blong Jeova nomo? (b) ?Olsem wanem yumi save folem eksampel blong Noa?
6 Long ol yia we oli kam biaen—maet fefte yia—“Noa i mekem olgeta samting ya olsem we God i talem.” “Bilif” blong Noa i pusum hem blong mekem olsemia, nating se hem i no save stret taem we samting ya i mas hapen. (Jenesis 6:22; Hibrus 11:7) Jeova i no talemaot long hem stret taem blong samting ya, gogo kasem wan wik nomo bifo we Bigfala Wora i ron. (Jenesis 7:1-5) Noa i trastem mo i bilif fulwan long Jeova. Taswe, hem i letem bisnes ya long saed blong ol taem, i stap long han blong God. !Noa i mas gat bigfala tangkyu taem hem i luk se Jeova i protektem hem tru long Bigfala Wora mo biaen hem i kamaot long sip, i wokbaot long wol ya we i klin finis! Yumi ya we yumi gat hop tu blong stap sef long fyuja, i gud we yumi soemaot sem bilif long God olsem Noa.
7, 8. (a) ?Ol nesen mo ol wol paoa oli stat olsem wanem? (b) ?Long wanem fasin, Jeova i ‘makemaot ples blong ol man se i bigfala olsem wanem, mo se oli save stap long hem longtaem olsem wanem’?
7 Afta we Bigfala Wora i ron, plante bubu blong Noa oli lego trufala wosip blong Jeova. From we oli no wantem seraot blong go long ol narafala ples, oli stat bildim wan taon mo wan haos we i hae we i hae, blong mekem gyaman wosip. Jeova i luk se naoia i taem blong stretem bisnes ya. Hem i mekem lanwis blong olgeta i fasfas mo i “ronemaot olgeta oli gowe long ples ya [Babel], nao oli go stap olbaot long evri ples long wol.” (Jenesis 11:4, 8, 9) Biaen, ol wanwan grup blong man we oli toktok semfala lanwis oli kam ol nesen. Sam long ol nesen ya oli winim ol narafala nesen, nao oli kam strong moa, oli kam ol wol paoa tu.—Jenesis 10:32.
8 Blong mekem stampa tingting blong Hem i kamtru, sam samtaem God i talemaot ol mak we oli seraotem ol defren nesen, mo i talem tu se long wanem taem wan nesen bambae i kasem bigfala paoa long kantri blong hem no long ful wol. (Jenesis 15:13, 14, 18-21; Eksodas 23:31; Dutronome 2:17-22; Daniel 8:5-7, 20, 21) Taem aposol Pol i toktok long ol waesman Gris long Atens, hem i tokbaot ol taem mo sisen blong Jeova, i se: “God ya nao i mekem wol ya, mo olgeta samting we oli stap long hem . . . Hem i mekem wan man nomo, nao olgeta man long wol oli kamaot long man ya, mo hem i putum olgeta oli stap long evri ples long wol. Mo hem nomo i makemaot fastaem, se ples blong ol man bambae i bigfala olsem wanem, mo oli save stap long hem longtaem olsem wanem.”—Ol Wok 17:24, 26.
9. ?Olsem wanem Jeova i ‘putumap ol king, mo i tekemaot olgeta bakegen’?
9 Samting ya i no minim se Jeova nao i stampa blong olgeta samting we oli hapen long politik mo jenis we i stap gohed naoia long ol nesen. Nogat. Nating se i olsem, hem i save mekem wanem we hem i wantem, long stret taem we hem i jusum blong mekem wan stampa tingting blong hem i kamtru. Profet Daniel i stap long taem ya we Wol Paoa blong Babilon i foldaon mo rul blong Media mo Pesia i girap. Taswe hem i talem se: “Yu yu stap holem olgeta taem, mo yu stap putum ol defren taem blong yia. Yu yu putumap ol king, mo yu save tekemaot olgeta bakegen. Yu nao yu stap givim waes mo save long man.”—Daniel 2:21; Aesea 44:24–45:7.
‘Taem i Kam Kolosap’
10, 11. (a) ?Hamas yia bifo finis, we Jeova i bin makemaot se bambae hem i mekem ol pikinini blong Ebraham oli fri long slef long Ijip? (b) ?Wanem i soemaot se maet ol man Isrel oli no save stret long wanem taem bambae oli gofri?
10 Bitim fo handred yia fastaem finis, Jeova i bin putum wan stret yia blong i daonem king blong Ijip we i holem Wol Paoa. Hem i talemaot tu se bambae hem i mekem ol pikinini blong Ebraham oli no moa slef blong ol man Ijip. God i talemaot stampa tingting blong hem long Ebraham, taem hem i mekem promes se: “Ol pikinini blong yu we bambae oli kamaot biaen long yu bambae oli go stap long wan narafala kantri, we bambae oli strenja nomo long ples ya. Nao bambae oli kam slef nomo blong ol man blong kantri ya, mo ol man ya bambae oli mekem i strong tumas long olgeta, gogo kasem we fo handred yia i pas. Be mi bambae mi panisim ol man ya we bambae oli mekem olgeta i kam slef, mo taem olgeta oli kamaot long kantri ya bakegen, bambae oli karem plante gudgudfala samting blong kantri ya i kam.” (Jenesis 15:13, 14) Taem Steven i storebaot histri blong Isrel, long fored blong Sanedrin, hem i tokbaot ol 400 yia ya i se: “Nao i kam klosap long taem blong God i mekem promes ya blong hem i kamtru we hem i givim finis long Ebraham. Long taem ya, namba blong ol olfala blong yumi i stap kam bigwan moa, gogo i gat wan narafala man i kam king long Ijip, we neva hem i save Josef samtaem.”—Ol Wok 7:6, 17, 18.
11 Nyufala Fero ya i mekem ol man Isrel oli slef blong hem. Long taem ya, Moses i no bin raetem buk blong Jenesis yet. Be i sua se ol man oli bin tokbaot promes we Jeova i talem long Ebraham, no maet oli raetemdaon finis samples blong man i save ridim. Nating se i olsem wanem, ol man Isrel oli no gat naf save blong faenemaot stret taem we bambae oli gofri from ol hadtaem ya. God i save wetaem bambae hem i mekem olgeta oli gofri, be i klia se God i no talemaot taem ya long ol man Isrel. Yumi ridim se: “Plante yia i pas, nao king blong Ijip i ded, be ol laen blong Isrel oli stap harem nogud yet long ol strongfala wok ya we oli stap mekem. Oltaem oli stap krae, from we oli wantem tumas blong God i givhan long olgeta, nao krae blong olgeta i go antap i kasem hem. Hem i harem krae ya blong olgeta, mo i luk we oli stap harem nogud tumas.”—Eksodas 2:23-25.
12. ?Olsem wanem Steven i soemaot se Moses i mekem wan samting bifo long stret taem blong Jeova?
12 Long toktok blong Steven long saed blong histri blong Isrel, hem i soemaot klia se ol man Isrel ya oli no save stret taem we bambae oli gofri. Steven i tokbaot Moses, i se: “Taem Moses i gat foti yia blong hem, hem i tingbaot blong go luk ol man ples blong hem, ol laen blong Isrel. Nao hem i luk we wan man Ijip i stap kilim wan man ples blong hem. Nao hem i go blong givhan long man ples blong hem, blong givimbak fasin ya we man Ijip i mekem, nao i kilim man Ijip ya i ded. Hem i ting se ol man ples blong hem oli save luksave we God bambae i yusum hem blong mekem olgeta oli go fri, be olgeta oli no luksave.” (Ol Wok 7:23-25) Moses i wantem mekem ol man Isrel oli gofri 40 yia bifo long stret taem we God i bin jusum. Steven i soemaot se Moses i mas wet 40 yia bakegen bifo we God i ‘putumap hem blong sevem ol man Isrel.’—Ol Wok 7:30-36.
13. ?Olsem wanem laef blong yumi naoia i sem mak long laef blong ol man Isrel, bifo we oli gofri long Ijip?
13 Nating se “i kam klosap long taem blong God i mekem promes ya blong hem i kamtru,” mo long stret yia we God i jusum finis, Moses mo olgeta man Isrel oli mas gat bilif mo wet long stret taem ya we Jeova i makemaot. I klia se, oli no save faenemaot taem ya tu. Long sem fasin, yumi sua se taem ya we bambae yumi fri long rabis wol ya, i kolosap. Yumi save se yumi stap long ol ‘las dei’ finis. (2 Timote 3:1-5) Taswe i gud we yumi soemaot bilif mo wet long taem ya we bigfala dei blong Jeova bambae i kamtru. (2 Pita 3:11-13) Olsem Moses mo ol man Isrel, maet bambae yumi sing long wan song blong presem Jeova, God we i sevem yumi.—Eksodas 15:1-19.
“Long Stret Taem We God i Makem”
14, 15. ?Olsem wanem yumi save se God i bin makemaot taem we bambae Pikinini blong hem i kam long wol, mo ol profet wetem ol enjel oli stap wet blong luk wanem?
14 Jeova i bin makemaot wan stret taem blong Pikinini blong hem i kam long wol olsem Mesaea. Pol i raetem se: “Be long stret taem we God i makem, hem i sanem stret Pikinini blong hem i kam. Pikinini ya i bon long wan woman, mo i gruap aninit long Loa.” (Galesia 4:4) Hemia i stret folem promes we God i mekem blong sanem wan laen i kam—‘Saelo, we olgeta man bambae oli obei long hem.’—Jenesis 3:15; 49:10.
15 Ol profet blong God—wetem ol enjel tu—oli stap wet blong luk “dei” ya we Mesaea bambae i kamtru long wol ya blong sevem ol man. Pita i talem se: “Ol profet blong bifo oli stap lukaot rod ya we God bambae i yusum blong sevem yufala, mo oli stap askem kwestin long hem. Mo long tok we God i givim long olgeta, oli talemaot we hem bambae i givhan long yufala long gladhat blong hem. Oli stap traem faenemaot se long wanem rod mo long wanem taem ol samting ya bambae oli kamtru, from we [speret] blong Kraes we i stap long olgeta, hem i stap poen long ol samting ya. Hem i stap talemaot long olgeta we bambae Kraes i mas harem nogud long bodi blong hem, mo we biaen bambae God i givim hae nem long hem long heven. . . . Ol samting ya, ol enjel tu oli wantem save.”—1 Pita 1:1-5, 10-12.
16, 17. (a) ?Tru long wanem profet tok, Jeova i halpem ol man Jyu long faswan handred yia blong oli stap wet long taem ya we Mesaea i kam? (b) ?Olsem wanem profet tok blong Daniel i gat paoa long fasin ya we ol man Jyu oli gat blong wet long Mesaea?
16 Tru long profet blong hem Daniel—wan man we bilif blong hem i no seksek—Jeova i givim wan profet tok long saed blong “seventi wik.” Profet tok ya i save givhan long ol man Jyu long faswan handred yia blong save se taem ya we Mesaea bambae i kamtru, i stap kam kolosap nao. Haf blong profet tok ya i talem se: “I stat long taem ya we bambae toktok ya i kamtru blong oli bildim Jerusalem bakegen, go kasem taem we Mesaea we God i jusumaot bambae i kam, bambae i gat seven wik mo sikisti tu wik i pas. Mo long taem ya bambae oli bildim Jerusalem bakegen.” (Daniel 9:24, 25) Ol man Jyu, Katolik, mo Protestan we oli man blong mekem dip stadi, oli agri se ol “wik” long vas ya i minim ol yia. Ol 69 “wik” ya (483 yia) long Daniel 9:25 i stat long 455 B.K.T., taem King Ataksekses blong Pesia, i givim raet long Nehemaea blong “bildim Jerusalem bakegen.” (Nehemaea 2:1-8) Ol wik ya oli finis 483 yia biaen—long 29 K.T., taem Jisas i baptaes mo tabu speret i makemaot hem, nao hem i kam Mesaea, no Kraes.—Matyu 3:13-17.
17 Yumi no sua sipos ol man Jyu long faswan handred yia oli save stret taem we ol 483 yia ya oli stat. Be taem Jon Baptaes i statem minista wok blong hem, “ol man oli stat harem gud tumas long tingting blong olgeta from Jon, nao oli stap talem se: ‘?Ating man ya hem i Mesaea ya, we God i promes bifo finis blong sanem hem i kam blong sevem yumi?’ ” (Luk 3:15) Sam man blong mekem dip stadi long Baebol oli talem se profet tok blong Daniel nao i mekem ol man Isrel oli tingting olsem. Matthew Henry, i tokbaot vas ya i se: “Vas ya i soem . . . olsem wanem ol man oli gat risen, taem oli luk minista wok mo baptaes blong Jon, blong tingbaot Mesaea, mo oli ting se kolosap hem i kamtru. . . . Ol seventi wik we Daniel i tokbaot, oli finis nao.” Franis buk ya Manuel Biblique, (we Vigouroux, Bacuez, mo Brassac oli raetem) i talem se: “Ol man oli save se ol seventi wik blong ol yia we Daniel i bin tokbaot, oli kamtru finis. Taswe, i no gat man i sapraes taem Jon Baptaes i talemaot se kingdom blong God i stap kam kolosap.” Wan man Jyu, we i man blong mekem dip stadi, nem blong hem Abba Hillel Silver, i raetem se folem “kalenda we plante man i yusum” long taem ya, “Mesaea i mas kam samwe bitwin 25 mo 50 K.T. long faswan handred yia K.T.”
Ol Samting We i Hapen—I No Fasin Blong Kaontem Taem
18. Profet tok blong Daniel i halpem ol man Jyu blong luksave taem ya we Mesaea bambae i kamtru be, ?wanem pruf we i strong moa blong soemaot se Jisas i Mesaea?
18 Fasin blong kaontem ol yia i halpem ol man Jyu blong save smol long saed blong taem we Mesaea i mas kamtru. Be, ol samting we oli hapen long taem ya oli soemaot se fasin ya blong kaontem ol yia i no halpem bighaf blong ol man blong bilif fulwan se Jisas hem i Mesaea. Samwe wan yia bifo we Jisas i ded, hem i askem ol disaepol blong hem se: “?Ol man oli stap tokbaot mi se mi hu?” Oli ansa se: “Sam man oli stap talem se yu yu Jon Baptaes, be sam oli stap talem se yu yu Profet Elaeja. Mo sam narafala man oli stap talem se, ‘Wan long ol profet blong bifo i laef bakegen.’ ” (Luk 9:18, 19) Baebol i no talem sipos Jisas i bin tokbaot profet tok ya long saed blong ol wik blong pruvum se hem i Mesaea. Be, wan taem hem i bin talem se: “Mi mi gat wan narafala witnes blong mi tu, we tok blong hem i strong moa long tok ya we Jon i talem. Witnes ya, hemia ol wok ya blong mi we Papa blong mi i givim long mi blong mi mekem. Ol wok ya blong mi oli stap talemaot mi, mo oli stap soemaot we Papa blong mi i sanem mi mi kam.” (Jon 5:36) Samting we i moagud i bitim fasin blong kaontem ol yia, hemia se wok blong prij we Jisas i mekem, ol merikel blong hem, mo ol saen we oli kamaot taem hem i ded (tudak i kavremap ples, kaliko blong haos prea i brok long tu haf, mo graon i seksek) oli pruvum se hem i rili Mesaea ya we God i sanem i kam.—Matyu 27:45, 51, 54; Jon 7:31; Ol Wok 2:22.
19. (a) ?Olsem wanem ol Kristin bambae oli save se taem blong Jerusalem i lus, i kolosap nao? (b) ?From wanem ol faswan Kristin we oli ronwe long Jerusalem oli nidim strongfala bilif?
19 Long sem fasin, afta we Jisas i ded, ol faswan Kristin oli no gat rod blong faenemaot stret taem we fasin blong ol man Jyu bambae i lus. I tru se, profet tok blong Daniel long saed blong ol wik i tokbaot taem ya we fasin blong ol man Jyu bambae i lus olgeta. (Daniel 9:26b, 27b) Be samting ya bambae i kamaot nomo afta long en blong ol “seventi wik” (455 B.K.T.–36 K.T.). Afta we ol faswan Hiten man oli kam man blong Jisas long 36 K.T., profet tok blong Daniel japta 9 i no givim moa save long ol Kristin blong faenemaot stret taem blong ol samting we oli kam biaen. Be blong luksave se i no longtaem fasin blong laef blong ol man Jyu bambae i finis, ol Kristin ya bambae oli mas wajem ol samting we oli stap hapen, i bitim we oli traem kaontem yia. Ol samting we Jisas i talemaot finis se oli mas hapen, oli stat kamtru long 66 K.T., taem ol ami blong Rom oli kam agensem Jerusalem mo oli aot bakegen. Hemia i givim jans long ol Kristin we oli strong long bilif mo we oli stap wajemgud ol samting we oli stap hapen long Jerusalem mo Judia, blong luksave se oli mas ‘ronwe i go haed long ol hil.’ (Luk 21:20-22) From we ol faswan Kristin ya oli no gat eni saen blong givhan long olgeta blong kaontem ol yia, oli no save wetaem stret bambae Jerusalem i lus olgeta. Oli rili nidim strongfala bilif blong lego haos, garen, mo wok blong olgeta, mo aot long Jerusalem blong fo yia go kasem we ami blong Rom i kambak long 70 K.T. mo i spolemgud fasin blong ol man Jyu.—Luk 19:41-44.
20. (a) ?Olsem wanem eksampel blong Noa, Moses, mo ol Kristin long Judia long faswan handred yia, oli save givhan long yumi? (b) ?Bambae yumi tokbaot wanem long nekis stadi?
20 Olsem Noa, Moses, mo ol Kristin long faswan handred yia long Judia, yumi tede tu, i save trastem fulwan se Jeova nomo i bos long taem mo sisen. Blong bilif strong se yumi stap long taem blong en mo se bambae yumi kasem sef i no longtaem, yumi mas dipen long ol profet tok blong Baebol we oli stap hapen raonabaot long yumi i bitim we yumi traem kaontem ol yia. Mo tu, nating se yumi laef long taem we Kraes i stap finis, i no naf jes blong gat bilif mo blong stap lukaot gud. I gud we oltaem yumi wantem tumas blong luk ol nambawan samting we Baebol i talem se oli mas kamtru yet. Hemia nao wanem we bambae yumi tokbaot long nekis stadi.
[Futnot]
a Lukluk Wajtaoa blong Ogis 1, 1996, pej 30-31.
Ol Kwestin Blong Tingtingbak
◻ ?Jisas i talem wanem long ol aposol blong hem long saed blong ol taem mo sisen we Jeova i makemaot?
◻ ?Hamas yia i pas bifo we Noa i save stret taem we Bigfala Wora bambae i kam?
◻ ?Wanem i soemaot se Moses mo ol man Isrel oli no save stret taem we bambae oli gofri long Ijip?
◻ ?Olsem wanem ol eksampel blong Baebol long saed blong ol taem mo sisen we Jeova i makemaot, oli save givhan long yumi?
[Tok Blong Pija Long Pej 11]
Bilif blong Noa i givhan long hem blong letem fasin blong kaontem ol yia, i stap long han blong Jeova