“Trutok Ya Bambae i Mekem Yufala i Fri Man”
“Bambae yufala i save trutok, mo trutok ya bambae i mekem yufala i fri man.” Hemia wanem we Jisas i talem taem hem i stap tijim ol man long haos prea long Jerusalem. (Jon 8:32) Ol aposol blong Jisas oli luksave kwiktaem nomo se ol tijing blong Jisas oli trutok. Oli luk plante pruf finis we i soemaot klia se tija blong olgeta i kamaot long God.
BE, TEDE, maet sam man oli faenem i had blong luksave trutok ya we Jisas i tokbaot. Olsem long taem blong profet Aesea, tede i gat sam man oli ‘stap talem ol fasin we oli nogud, se oli gud nomo, mo ol fasin we oli gud, se oli nogud. Oli stap talem tudak, se i delaet nomo, mo oli stap talem delaet se i tudak. Oli stap talem ol samting we oli konkon, se oli swit nomo, mo oli stap talem ol samting we oli swit, se oli konkon.’ (Aesea 5:20) Tede, i gat fulap defren tingting, waes blong man, mo stael blong laef oli stap kam antap. Taswe, plante man oli bilif se olgeta samting oli sem mak nomo, mo i no gat wan samting we yumi save kolem se trutok.
Taem Jisas i talem long ol man we oli lesin long hem se, trutok bambae i mekem olgeta oli fri, ol man ya oli ansa se: “Mifala ya i kamaot long laen blong Ebraham. Neva mifala i slef blong wan man. ?Wanem mining blong tok ya we yu talem se, ‘Bambae yufala i fri man’?” (Jon 8:33) Olgeta ya oli no ting se oli nidim wan man no wan samting blong mekem olgeta oli fri. Nao, Jisas i eksplenem se: “Tru mi talem long yufala. Olgeta man we oli mekem sin, be sin ya i olsem masta blong olgeta, we i holem olgeta, i mekem olgeta oli kam slef blong hem nomo.” (Jon 8:34) Trutok ya we Jisas i stap tokbaot i save openem rod long man blong oli fri long sin. Jisas i talem se: “Mi mi Pikinini blong God, mo sipos mi mi mekem yufala i fri, bambae yufala i fri man tru.” (Jon 8:36) Taswe, trutok we i save mekem ol man oli fri, hemia trutok long saed blong Jisas Kraes, we hem i Pikinini blong God. I gat wan rod nomo blong kam fri long sin mo ded, hemia se man i mas bilif long sakrefaes blong Jisas we i stretgud olgeta.
Long wan narafala taem, Jisas i talem se: “Tok blong yu i tru olgeta. Plis yu mekem tok ya blong yu i wok long laef blong olgeta, blong oli tabu, oli man blong yu.” (Jon 17:17) Tok blong God we i stap long Baebol, hem i trutok we i save mekem man i fri long ol krangke bilif mo giaman wosip. Long Baebol, i gat trutok long saed blong Jisas Kraes, we i save lidim ol man blong oli bilif long Jisas mo i openem rod long olgeta blong oli gat wan gudfala hop long saed blong fiuja. !I gud tumas blong save trutok ya we i stap long Tok blong God!
?I rili impoten blong save trutok ya? Plante skul tede, oli talem se oli folem Baebol. Be, oli letem waes mo kastom blong man i lidim olgeta. Plante lida blong skul oli no wantem save sipos mesej blong olgeta i stret no i no stret, oli wantem nomo se ol man oli agri long olgeta. Sam man oli ting se God i agri long enikaen wosip we man i mekem wetem fulhat blong hem. Be Jisas Kraes i eksplenem se: “Taem i stap kam, yes, hem i naoia, we ol man blong mekem trufala wosip, bambae oli wosip long Papa wetem spirit mo trutok, from we, i tru, Papa i stap lukaot ol man olsemia, blong oli mekem wosip long hem.”—Jon 4:23, NW.
Sipos yumi wantem se God i agri long wosip blong yumi, yumi mas save trutok. Hemia wan samting we i impoten tumas. Blong harem gud blong olwe long fiuja, yumi mas save trutok ya. Taswe, yumi evriwan i mas askem long yumi wan se: ‘?God i agri long wosip blong mi? ?Mi mi rili wantem lanem trutok long Tok blong God? no ?Mi mi fraet long wanem we wan gudfala stadi bambae i soemaot long mi?’