!Gohed Blong Gru Long Saed Blong Spirit!
Dei we yumi tekem baptaes i wan dei we yumi laekem mo rimemba oltaem. I tru, hemia dei we yumi talem long fored blong olgeta man se yumi givim laef blong yumi i go long god blong mekem wok blong hem.
PLANTE man oli mas traehad bigwan blong kasem mak ya. Samting ya i minim se oli mas livim sam nogud fasin we oli gat longtaem finis, oli mas lego ol nogud fren blong olgeta, mo oli mas jenisim ol fasin blong tingting mo fasin blong laef we oli folem longtaem finis.
Yes, baptaes i wan taem blong glad we i gat bigfala mining long laef blong wan Kristin. Be nating se i olsem, hemia wan stat nomo. Aposol Pol i talem long ol Kristin blong Judia we oli baptaes finis se: “I gud yumi go stret long ol tok we i blong mekem yumi i kam bigman long Kraes, yumi no gobak bakegen long ol tok ya blong stamba tijing blong gud nius blong Kraes we yumi lanem fastaem.” (Hibrus 6:1) Yes, yumi evriwan ol Kristin, yumi mas “kam wan nomo, we yumi bilif long Pikinini blong God, mo yumi savegud hem. Nao long fasin ya, bambae yumi kam olsem we yumi no moa pikinini, yumi bigman finis. Bambae yumi kam olsem Kraes nomo, we hem i bigman tru.” (Efesas 4:13) I gat wan rod nomo blong mekem se ‘bilif blong yumi i kam strong moa oltaem,’ yumi mas gohed blong kam bigman long saed blong spirit.—Kolosi 2:7.
Long ol yia we oli jes pas, plante handred taosen man blong wosip we oli givim laef blong olgeta i go long Jeova, oli kam insaed long Kristin kongregesen. Ating yu yu wan long olgeta ya. Olsem ol brata blong yu long faswan handred yia, yu no wantem stap wan bebi nomo long saed blong spirit. !Yu yu wantem gru, yu wantem go moa! ?Be olsem wanem? ?Mo long wanem rod yu save gru olsem ya?
Kam Bigman From Fasin Blong Stadi Yu Wan
Pol i talem long ol Kristin long Filipae se: “Mi mi stap prea we oltaem bambae yufala i save kam we yufala i stap lavlavem yufala moa. Mo mi prea we long fasin ya, oltaem bambae yufala i save kasem moa stret save, mo gat fasin luksave fulwan.” (Filipae 1:9, NW) I impoten tumas blong mekem “stret save” i gru moa sipos yumi wantem kam bigman long saed blong spirit. Fasin blong ‘kasem save long Jeova God mo Jisas Kraes’ i wan fasin we i gohed oltaem, hem i no wan samting we i stop taem yumi tekem baptaes—Jon 17:3.
Wan Kristin sista we yumi kolem Alexandra (hemia i no stret nem blong hem), i tekem baptaes taem hem i gat 16 yia. Be ten yia nomo afta we hem i tekem baptaes, hem i kasem se i impoten blong gohed blong gru. Alexandra i gruap long trutok mo hem i joen oltaem long ol miting mo long wok blong prij. Hem i raetem se: “Long ol manis we oli jes pas, mi kasem save se i gat wan samting we i rong olgeta. Mi tekem disisen blong no giaman long mi wan mo blong lukluk gud long laef blong mi, blong save wanem ol filing blong mi long saed blong trutok, mo from wanem mi mi stap yet long trutok.” ?Hem i faenem wanem? Hem i gohed, i se: “Mi faenem se ol risen from wanem mi stap long trutok oli no klia long mi. Mi rimemba se taem mi gruap, ol miting mo wok blong prij, oli impoten. Mi bin tingting se long laef blong mi bambae i isi nomo blong folem ol fasin olsem stadi wanwan mo prea. Be taem mi skelemgud laef blong mi, mi luksave se mi no naf blong mekem olsem.”
Aposol Pol i talem strong se: “Yumi mas gohed long rod ya we yumi stap folem kam kasem naoia.” (Filipae 3:16) Sipos yumi lan blong folem wan program, samting ya i save givhan long yumi blong gohed. Bifo we yu tekem baptaes, i sua se yu bin gat wan program blong stadi Baebol evri wik wetem wan gudfala tija. Sloslou, stadi ya i givhan long yu blong luksave ol impoten samting. Nao yu ademap moa samting long program ya, olsem fasin blong mekemrere stadi blong yu evri wik, yusum Baebol blong jekemap ol vas we stadi i soem, mo ol narafala samting olsem. Be, afta we yu tekem baptaes, ?yu yu gohed blong ‘wokbaot long sem rod ya we yu bin folem?’
Sipos no, ating yu mas skelemgud bakegen ol samting we yu putum long fas ples long laef blong yu, ‘blong jusumaot ol samting we oli impoten moa.’ (Filipae 1:10) I tru se yumi bisi tumas long laef tede, mo yumi mas bos strong long tingting blong putum wan stret taem blong ridim Baebol yumi wan, mo blong stadi. Be ol gudfala frut we oli kamaot from ol traehad ya bambae oli mekem yumi harem gud. Tingbaot bakegen stori blong Alexandra. Hem i talem se: “I klia se long samwe 20 yia we mi stap long trutok, mi go long ol miting mo mi joen long wok blong prij nomo. Be naoia mi kasem save se, ol samting ya oli impoten, be oli no save mekem mi mi stanap strong taem sam trabol oli kamaot. Samting ya i kam klia from we klosap neva mi stadi mi wan, mo mi prea sam samtaem nomo, mo long fasin we i no dip tumas. Naoia mi luksave se mi mas stretem fasin blong tingting blong mi, mo stat folem wan gudfala program blong stadi. Long rod ya bambae mi rili kasem save long Jeova, mo bambae mi laekem hem mo haremgud long ol samting we Pikinini blong hem i givim long yumi.”
Sipos yu nidim sam help blong stanemap wan gudfala program blong stadi yu wan, ol elda mo ol narafala Kristin we oli bigman long saed blong spirit long kongregesen blong yu, bambae oli glad blong givhan long yu. Antap long samting ya, i gat sam gudfala advaes long ol Wajtaoa blong Mei 1, 1995, Ogis 15, 1993, mo Mei 15, 1986 (Engglis no Franis).
Yu Mas Kam Klosap Long God
Yu mas traehad tu blong mekem fasin fren blong yu wetem God i gru moa. Sam man oli nidim tumas blong wokem fasin ya. Tingbaot Anthony, we i tekem baptaes taem hem i yangfala yet. Hem i talem se: “Mi mi faswan pikinini we i tekem baptaes long famle blong mi. Afta we mi baptaes, mama blong mi i putum han blong hem raon long mi mo i holemtaet mi. Mi neva luk mama blong mi i glad bigwan olsemia. Evriwan i glad mo mi harem se mi strong tumas.” Be, i no evri samting we i naes olsemia. Anthony i gohed, i se: “Blong longtaem lelebet, i no gat wan yangfala we i tekem baptaes long kongregesen blong mifala. Taswe mi tinghae tumas long mi wan. Mo tu, mi flas from ol ansa mo ol tok we mi givim long ol miting. Mi stat blong wantem tumas se ol man oli presem mi mo oli glad long mi, i bitim we mi wantem presem Jeova. Mi rili no gat wan gudfala fasin fren wetem Jeova.”
Olsem Anthony, taem samfala oli givim laef blong olgeta i go long Jeova, oli wantem tumas blong mekem se ol fren blong olgeta oli glad, i bitim we oli wantem se Jeova i glad. Nating se i olsem, God i wantem se olgeta ya oli mekem laef blong olgeta i laenap wetem promes blong olgeta blong mekem wok blong hem. (Skelem wetem Prija 5:4.) Be plante taem i hadwok long olgeta blong mekem samting ya sipos oli no gat wan strongfala fasin fren wetem God. Anthony i rimemba se: “Bigfala glad we mi gat taem mi tekem baptaes i no stap longtaem. Sam manis nomo afta we mi baptaes, mi mekem sam bigfala sin mo ol elda blong kongregesen oli mas stretem mi. Be mi gohed long ol nogud fasin blong mi, mekem se kongregesen i mas putumaot mi. Sikis yia afta long taem ya we mi givim laef blong mi i go long Jeova, polis i holem mi mo mi go kalabus from we mi kilim wan man i ded.”
Wokem Fasin Frengud Wetem Jeova
Nomata laef blong yumi i olsem wanem, evri Kristin oli save obei long tok blong Baebol we i singaot yumi se: “Yufala i mas [kam] stap klosap long God, nao hem bambae i kam stap klosap long yufala.” (Jemes 4:8) I sua se fastaem we yu stadi Baebol, yu traehad blong wokem fasin fren wetem God. Yu lanem se God i no wan god we i stap long tingting blong man nomo, olsem god ya we oli wosipim long Krisendom. Yu lanem se hem i wan trufala spirit man we i gat wan nem, hemia Jeova. Yu lanem tu se hem i gat sam nambawan fasin we oli pulum tingting, hem i ‘gat sore long man, mo hem i stap givhan long man long gladhat blong hem. Hem i no save kros kwik. Oltaem hem i stap lavem man.’—Eksodas 34:6.
!Be, blong mekem se laef blong yu i laenap wetem promes we yu mekem blong givim laef blong yu long God, yu mas kam klosap moa long hem! ?Olsem wanem? Man blong raetem Sam i prea se: “Hae God. Plis yu tijim mi long ol fasin blong yu, yu mekem mi mi savegud ol rod blong yu.” (Ol Sam 25:4) Fasin blong stadi yu wan long Baebol mo ol buk blong Sosaeti i save halpem yu blong save gud Jeova. Fasin blong toktok oltaem wetem hem long prea we i kamaot long hat blong yu i impoten tu. Man blong raetem Sam i givim oda ya: “Yufala i mas talemaot ol trabol blong yufala long hem.” (Ol Sam 62:8) Taem yu luk se hem i ansa long ol prea blong yu, ale bambae yu harem se hem i intres long yu. Samting ya bambae i halpem yu blong harem se yu kam klosap moa long hem.
Ol traem mo ol problem oli givim narafala jans blong kam klosap moa long God. Ating yu fesem sam trabol mo sam traem long bilif blong yu, olsem wan sik, sam hadtaem long skul no long wok blong yu, no sam trabol long saed blong mane. Ating tiokratik program blong joen long wok blong prij, go long ol miting, no blong stadi Baebol wetem ol pikinini blong yu, i kam had long yu. !Yu no mas fesem sam trabol olsem yu wan nomo! Yu mas askem strong long God blong i halpem yu, blong givim advaes mo lidim yu. (Proveb 3:5, 6) !Singaot hem blong i sanem tabu spirit blong hem long yu! (Luk 11:13) Taem yu luk se God i givhan long yu wetem lav, ale bambae yu kam klosap moa long hem. Olsem man ya blong raetem Sam, Deved, i talem se: “Hae God, hem i gud tumas. Yufala i traem trastem hem. Bambae yufala i faenemaot we hem i tru. Olgeta we oli go long hem blong faenem sefples, oli save harem gud.”—Ol Sam 34:8.
?Olsem wanem long Anthony? Hem i rimemba se: “Mi stat blong tingbaot taem ya we mi putum ol mak long saed blong spirit blong mekem moa long wok blong Jeova. Taem mi tingbaot samting ya mi harem nogud. Be nating se mi harem nogud mo tingting blong mi i foldaon, mi rimemba lav blong Jeova. Sam taem i pas bifo we mi filim se mi naf blong toktok long Jeova biaen mi prea. Mi talemaot long hem olgeta samting we i stap long hat blong mi, mo mi askem hem blong fogivim mi. Mi stat blong ridim Baebol tu, mo mi sapraes blong luk se mi bin fogetem plante samting, mo mi luksave se mi no rili save Jeova.” Nating se Anthony i mas finisim taem blong hem long kalabus from we hem i kilim wan man i ded, ol Witnes long ples blong hem oli givhan long hem, mo hem i stap gohed blong kamgud bakegen long saed blong spirit. Wetem fasin tangkiu, Anthony i talem se: “From Jeova mo ogenaesesen blong hem, mi kam naf blong sakemaot ol olfala fasin blong mi, mo mi traehad evri dei blong wokem ol niufala fasin. Naoia fasin fren blong mi wetem Jeova i impoten moa i bitim ol narafala samting.”
Kam Bigman Long Wok Blong Prij
Jisas Kraes i givim oda long ol man blong hem se oli mas talemaot ‘gud nius blong kingdom.’ (Matiu 24:14) Sipos yu wan niuwan long wok blong talemaot gud nius, ating yu no gat plante save long wok ya. Ale, ?olsem wanem yu save gru i naf blong ‘finisim olgeta wok ya we God i givim long yu blong mekem’?—2 Timoti 4:5.
Wan rod hemia blong traem kasem wan gudfala tingting long saed blong wok ya. Yu mas lanem blong luk wok blong prij olsem wan “gudgudfala samting,” wan blesing we yu yu gat. (2 Korin 4:7) Hemia wan jans blong soemaot long Jeova se yumi lavem hem, yumi wantem stap tru long hem, mo yumi wantem holemstrong long stret fasin. Wok ya i givim jans long yumi tu blong soemaot se yumi wari long ol man raonabaot long yumi. Fasin blong no tingbaot yumi wan nomo mo blong joen long wok ya i save karem trufala glad.—Ol Wok 20:35.
Jisas hem wan i gat wan gudfala tingting long saed blong wok blong prij. Wok blong serem trutok blong Baebol wetem ol narafala i olsem “kakae” blong hem. (Jon 4:34) Ol tok blong Jisas oli eksplenem wanem i pusum hem blong halpem ol narafala, taem hem i se: “Yes, mi mi wantem.” (Matiu 8:3) Jisas i gat fasin sore long ol man, antap moa long olgeta we oli “trabol tumas, oli no moa gat paoa from wol blong Setan i spolem olgeta.” (Matiu 9:35, 36) ?Yu yu sem mak long hem? ?Yu yu “wantem” halpem olgeta we oli stap long tudak long saed blong spirit, we oli nidim laet blong Tok blong God? Ale bambae hat blong yu i pusum yu blong folem oda blong Jisas we i talem se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi.” (Matiu 28:19) Yes, bambae yu wantem tumas blong joen fulwan long wok ya go kasem mak we helt blong yu mo ol samting long laef blong yu oli letem yu blong mekem.
Wan narafala rod blong kam bigman long wok blong prij, hemia fasin blong joen oltaem long wok ya, evri wik sipos yumi naf. Taem yumi mekem samting ya, bambae yumi naf blong winim ol tingting we oli hafhaf no fasin fraet we i save blokem ol pablisa we oli stap prij sam samtaem nomo. Fasin blong joen oltaem long wok blong prij bambae i karem sam narafala gudfala samting tu long yu. Fasin ya bambae i mekem se yu laekem moa trutok, i mekem lav blong yu long Jeova mo ol man raonabaot long yu i kam bigwan moa, mo i halpem yu blong holem tingting i stap strong long hop blong Kingdom.
Ale, ?olsem wanem sipos ol trabol long laef blong yu oli blokem yu blong no joen plante long wok blong prij? Sipos yu rili no naf blong mekem moa, ale yu save haremgud taem yu tingbaot se, God i glad long wanem we yu naf blong mekem, sipos yu stap wok wetem ful hat blong yu. (Matiu 13:23) Maet yu save gru moa long narafala fasin, olsem fasin blong gat gudhan long wok blong prij. Long kongregesen, Tiokratik Skul mo Miting blong Kingdom Wok oli trenemgud yumi blong mekem wok ya. I tru se, moa yumi gat gudhan long fasin blong prij, moa bambae yumi haremgud long wok ya mo yumi luk ol frut oli kamaot.
Taswe, i klia nomo se taem wan pablisa i tekem baptaes, hem i no mas stop blong gru long saed blong spirit. Pol i tingbaot hop blong hem blong kasem laef ya we i no save finis samtaem long heven, hem i se: “Ol brata mo sista. Tok ya blong mi i tru. Mi mi no ting se mi holem ol fasin ya finis, olsem we mi win finis. Hemia no yet ya. Be wan samting nomo mi stap mekem. Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi. I olsem we mi stap resis i go stret long mak, we i gat praes blong man we i win. Mo praes ya, hemia we God i singaot yumi blong yumi joen long Jisas Kraes, yumi go stap antap, long ples blong hem. I stret nomo blong yumi evriwan we i kam olsem bigman finis long ol fasin blong Kraes, yumi gat sem tingting ya nomo. Be sipos sam long yufala oli gat narafala tingting, God bambae i mekem samting ya i moa klia long olgeta.”—Filipae 3:13-15.
Yes, sam Kristin oli gat hop blong go long heven blong kasem laef, we bambae oli no moa save ded samtaem. Sam narafala oli gat hop blong laef gogo i no save finis long Paradaes long wol. Be nating wanem hop blong olgeta, !oli mas ‘traehad oltaem blong kasem ol samting we oli stap long fes blong olgeta’—oli mas wok had blong kasem mak ya, hemia laef we i no save finis! Baptaes blong yu i wan gudfala stat, be hemia wan stat nomo. Gohed blong wokhad blong gru long saed blong spirit. Tru long ol miting mo stadi blong yu wan, ‘kam bigman long fasin blong yu blong kasem save.’ (1 Korin 14:20) Yu mas ‘kasem paoa blong save se trutok i bigwan olsem wanem, mo i longfala olsem wanem, mo i hae olsem wanem, mo i dip olsem wanem.’ (Efesas 3:18) Fasin blong yu blong kam bigman bambae i halpem yu blong haremgud mo stap glad oltaem naoia. Be tu, bambae i mekem yu yu suagud blong kasem wan ples long niufala wol blong God. !Ale, aninit long rul blong Kingdom blong God long heven, bambae yu gat jans blong gru long saed blong spirit gogo i no save finis!
[Tok Blong Pija Long Pej 29]
Yu mas stretem yu wan blong faenem taem blong stadi
[Tok Blong Pija Long Pej 31]
Gudfala tingting long saed blong wok blong prij i save halpem yumi blong faenem glad long wok ya