Oli Mekem Samting We Jeova i Wantem

Jisas i Spenem Taem Wetem Ol Pikinini

JISAS i bin spenem tri yia haf long wok blong prij mo naoia wok ya i finis. I no longtaem bambae hem i kamtru long Jerusalem blong safa mo ded. Hem i save finis wanem bambae i hapen long hem, taem hem i talem long ol disaepol blong hem se: “Mi, mi pikinini blong man, bambae wan man i putum mi long han blong ol enemi blong mi, mo bambae oli kilim mi mi ded.”​—Mak 9:31.

I sua se, Jisas i wantem yusum gud ol laswan dei, aoa mo sotfala taem ya we hem i gat yet long wol. Ol disaepol blong hem oli nidim hem yet. Jisas i luksave we oli nidim moa advaes long saed blong tingting daon mo long denja blong foldaon long sin enitaem. (Mak 9:35,42​-48) Oli nidim advaes tu long saed blong mared, divos mo fasin blong livim mared. Jisas i save se i no longtaem bambae hem i ded, taswe hem i tok stret long ol disaepol blong hem blong soemaot we taem i sot. Taem we i stap hem i impoten tumas, be wanem we Jisas bambae i mekem, hem i impoten moa.

Jisas i Welkamem Ol Pikinini

Baebol i talem se: “Nao i gat sam man oli tekem ol pikinini blong olgeta oli kam long Jisas, blong hem i putum han blong hem long olgeta, i blesem olgeta.” Taem ol disaepol oli luk samting ya, kwiktaem nomo oli tok strong blong blokem olgeta. Maet oli ting se Jisas hem i wan haeman we i bisi tumas blong tingbaot ol pikinini. Traem tingbaot, ol disaepol oli sek taem Jisas i tok strong long olgeta i se: “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta.” Mo Jisas i talem tu se: “Tru mi talem long yufala. Man we i no glad blong mekem tingting blong hem i stap daon olsem pikinini ya, bambae hem i no save kam samtaem we God i King blong hem.”​—Mak 10:13-​15.

Jisas i makemgud ol gudfala fasin blong ol pikinini. Oli laekem lanem plante samting mo oli save trastem man tu. Oli bilivim evri tok blong papa mama blong olgeta mo plante taem oli no fraet blong blokem enikaen giaman tok we narafala pikinini i talem long saed blong papa mama blong olgeta. Ol man we oli wantem go insaed long kingdom blong God, oli mas folem fasin ya blong ol pikinini blong lesingud mo rere blong lanem samting. Olsem Jisas i talem: “Sipos yufala i no jenisim fasin blong yufala blong kam olsem pikinini, bambae yufala i no save kam samtaem we God i King blong yufala.”​—Skelem wetem Matiu 18:​1-5.

I no wan taem nomo we Jisas i yusum pijatok long saed blong ol pikinini. Gospel blong Mak i soem klia se Jisas i rili laekem kampani blong ol pikinini. Mak i talem se Jisas “i putum han blong hem i goraon long ol pikinini ya, mo i putum han blong hem long olgeta i blesem olgeta.” (Mak 10:16) Mak nomo i tokbaot naesfala fasin ya blong Jisas we i “putum han blong hem i goraon long ol pikinini.”a Ol papa mama oli karem pikinini blong olgeta i kam blong Jisas i ‘putum han blong hem’ nomo long olgeta. Be, Jisas i mekem wan samting we i moa long wanem we ol man ya oli tingbaot.

?Wanem mining blong tok ya se “Jisas i putum han blong hem long olgeta i blesem olgeta”? Hem i no stap minim wan seremoni blong jos olsem baptaes. Samtaem, tok ya i save minim fasin blong putumap wan man blong mekem wan spesel wok, no samtaem i minim nomo se man i givim blesing long narafala. (Jenesis 48:14; Ol Wok 6⁠:⁠6) Taswe, maet Jisas i stap blesem ol pikinini ya.

Antap long olgeta samting ya, Mak i yusum wan spesel wod blong talem tok ya “blesem” (ka·teu·lo·geʹo), we i soemaot wan strong filing mo paoa. Wod ya i soem se taem Jisas i blesem ol pikinini ya, hem i kaengud mo i laekem olgeta tumas. Taswe, long tingting blong Jisas, ol pikinini oli no wan baden we i mekem hem i westem taem blong hem.

Wan Lesen Blong Yumi Tede

Jisas i neva mekem ol man mo ol pikinini oli fraet long hem mo hem i neva daonem olgeta. Wan buk i talem se: “Hem i wan man we i save smael mo laf wetem glad.” From samting ya, yumi no sapraes we olkaen man oli no fraet blong kam klosap long hem. Sipos yumi wantem folem eksampel blong Jisas, yumi save askem long yumi wan se: “?Ol narafala man oli harem se i isi blong kam storeyan wetem mi?” “?Oli luk olsem se mi mi bisi tumas blong intres long problem mo wari blong olgeta?” Sipos yumi rili traehad blong soem intres long narafala, bambae yumi rere blong givim taem blong yumi long olgeta, olsem Jisas i bin mekem. Fasin ya bambae i pulum olgeta blong kam long yumi from we oli harem save se yumi intres long olgeta.​—Proveb 11:25.

Olsem Mak i soemaot, Jisas i glad blong stap wetem ol pikinini. I sua se, Jisas i bin tekem taem blong lukluk ol pikinini taem oli plei, from we long wan pijatok blong hem, hem i storebaot wan pleplei blong olgeta. (Matiu 11:16-​19) Ating sam long ol pikinini we Jisas i blesem long taem ya oli yang tumas, oli no naf blong kasem save se hem i hu mo tu oli no naf blong kasem save wanem we hem i stap tijim. Be Jisas i neva harem se hem i westem taem blong hem. Hem i spenem taem wetem ol pikinini from we hem i lavem olgeta. Smoltaem biaen, ating plante long ol pikinini ya we oli mitim Jisas, oli kam disaepol blong hem from lav we hem i bin soemaot long olgeta.

Jisas i spenem taem wetem ol pikinini long ol laswan wik blong laef blong hem. Long sem fasin, yumi tu, yumi save tekem taem blong stap wetem ol pikinini blong yumi nating se yumi bisi. Yumi mas tingbaot moa olgeta ya we oli no gat papa no mama. Tru ya, ol pikinini oli kam bigman long tingting mo long saed blong spirit taem yumi intres long olgeta. Mo Jeova i wantem se yumi givim olgeta lav mo help blong yumi long olgeta.​—⁠Ol Sam 10:⁠14.

[Futnot]