?Olsem Wanem Ol Enjel Oli Save Halpem Yu?

TOK blong God i soemaot se ol enjel oli rili stap. Hem i talem se i gat plante milyan blong ol spirit man ya. Daniel, wan man blong wok blong Jeova God, i luk wan vison long saed blong ol samting long heven. Hem i raetem se: “I gat plante taosen man we oli man blong wok blong hem, oli stap long ples ya, mo i gat plante narafala man we oli plante we plante tumas, man i no save kaontem olgeta, oli stap stanap long fes blong [God].”​—Daniel 7:​10.

Makemgud se long vas ya, Daniel i no jes talem se i gat plante enjel. Hem i talem tu se ol enjel ya oli stap mekem wok blong God. Oli ol wokman blong hem. Man blong raetem Ol Sam, i tokbaot sem samting taem hem i singsing se: “Yufala ol enjel, yufala i strong, mo yufala i gat paoa. Oltaem yufala i stap obei long ol tok blong Hae God, mo yufala i stap lesin long ol samting we hem i talem. !Yufala i mas presem hem! Yufala olgeta long heven, yufala i man blong wok blong Hae God. Yufala i gat paoa, mo yufala i stap mekem ol samting we hem i wantem. !Yufala i mas presem hem!”​—Ol Sam 103:​20, 21.

Mo tu, Baebol i no talem se laef blong ol enjel i stat long wol ya. Nogat. Jeova i wokem ol enjel long heven, bifo we hem i wokem wol. Taem God i ‘putum fandesen blong wol ya, ol enjel long heven oli glad tumas, oli stap singsingaot.’​—Job 38:​4-7.

Ol enjel oli ol spirit man. Yumi no save luk olgeta long prapa ae blong yumi, oli gat bigfala paoa, mo oli waes. Long Baebol, Hibru tok ya mal·ʼakhʹ mo Grik tok ya agʹge·los oli tanem i kam “enjel” taem oli tokbaot ol spirit man. Tufala tok ya i kamaot klosap 400 taem long Baebol. Mo tufala tugeta i minim “man blong karem tok.”

Ol Taem We Enjel i Mitim Man

Tru ya, ol enjel oli ol man blong karem tok. Maet yu yu savegud stori long Baebol, long saed blong taem ya we enjel Gabriel i kamtru long Meri. Enjel ya i talem long hem se, nating we hem i wan vejin, bambae hem i bonem wan pikinini boe we oli mas kolem hem Jisas. (Luk 1:​26-​33) Mo tu, wan enjel i kamtru long sam man blong lukaot sipsip we oli stap afsaed long vilej. Hem i talemaot long olgeta se: ‘Long naet ya nomo, i gat wan pikinini i jes bon, we hem bambae i sevem yufala. Hem i Mesaea ya we i Masta blong yumi.’ (Luk 2:​8-​11) Long sem fasin, ol enjel oli karem mesej i kam long Hega, Ebraham, Lot, Jekob, Moses, Gideon, Jisas, mo sam narafala man we Baebol i tokbaot.​—Jenesis 16:​7-​12; 18:​1-5, 10; 19:​1-3; 32:​24-​30; Eksodas 3:​1, 2; Jajes 6:​11-​22; Luk 22:​39-​43; Hibrus 13:2.

Makemgud se olgeta mesej we ol enjel ya oli karem i kam long man, oli laenap wetem ol stamba tingting blong God, be i no blong mekem wanem we man i wantem. Ol enjel oli olsem ol man we oli wok long nem blong God. Oli folem wanem we hem i wantem, mo oli wok long stret taem we hem i jusum. I no ol man we oli singaot olgeta blong kam.

?I Stret Blong Singaot Ol Enjel Blong Halpem Yumi?

Taem yumi gat trabol, ?i stret blong singaot ol enjel blong oli halpem yumi? Sipos yes, bambae yumi wantem save nem blong enjel we i naf blong givhan moa long yumi. From samting ya, plante buk we ol stoa oli salem, oli givim nem blong plante enjel, posisen blong olgeta, wanem taetel nem oli gat, mo wok we oli mekem. Wan buk i mekem lis blong sam enjel we ol man oli stap talem se oli “ol ten beswan enjel blong heven,” ol “enjel we olgeta man long Wes blong wol, oli savegud olgeta.” Sem buk ya i givim advaes long man blong sarem ae, talem sloslou nem blong enjel ya plante taem, pulum win bigwan, pulum win sloslou, mo “rere blong mitim olgeta.”

Be, Baebol i givim nem blong tu enjel nomo blong God, hemia Mikael mo Gabriel. (Daniel 12:1; Luk 1:​26) Maet Baebol i givim tufala nem ya blong soemaot se olgeta enjel oli prapa spirit man we oli gat wan nem blong olgeta. Oli no jes wan paoa.

Makemgud se, sam enjel oli no wantem talemaot nem blong olgeta long ol man. Taem Jekob i askem wan enjel blong i talem nem blong hem, enjel ya i no wantem talemaot. (Jenesis 32:29) Taem Josua i askem long enjel we i kam toktok wetem hem, se hem i hu, enjel ya i jes ansa se, “mi mi komanda blong ol soldia blong Hae God.” (Josua 5:​14) Taem papa mo mama blong Samson, tufala i askem long wan enjel blong talem nem blong hem long tufala, enjel ya i ansa se: “?From wanem yutufala i wantem save nem blong mi? Save blong man i no naf blong kasem nem blong mi.” (Jajes 13:​17, 18) Baebol i no givim wan lis blong nem blong olgeta enjel. Samting ya i soem se i no stret blong givim ona no wosip i go long ol enjel. Bambae yumi luk se, Baebol i no tijim yumi blong singaot i go long ol enjel.

Singaot i Go Long God

Baebol i talemaot long yumi evri samting we yumi nidim blong save long saed blong ol spirit man. Aposol Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, . . . blong bambae yumi ol man blong [God] yumi save kam waes long olgeta samting, nao bambae yumi savegud ol rod blong mekem ol gudfala wok.” (2 Timoti 3:​16, 17) Sipos God i wantem yumi blong save nem blong plante enjel, ating bambae hem i talemaot ol nem ya long Tok blong hem, Baebol. Mo sipos God i wantem tijim yumi olsem wanem blong singaot mo toktok wetem ol enjel long prea, bambae hem i mas talemaot samting ya long yumi long Baebol.

Be nogat. Jisas Kraes i tijim se: “Taem yu yu prea, i gud yu go yu wan insaed long rum blong yu, yu satem doa, nao yu prea long Papa ya blong yu we man i no save luk hem. . . . Taem yufala i prea bambae yufala i prea olsem: ‘Papa blong mifala. Yu yu stap long heven. Nem blong yu i tabu.’ ” (Matiu 6:⁠6, 9) Tingting blong Baebol i klia se: Yumi no mas singaot ol enjel no prea long olgeta, be yumi mas prea mo kam klosap long Man ya we i Wokem ol enjel, hemia God. Nem blong hem i no wan tok haed, mo i no nidim wan man blong luk vison blong talemaot nem ya long yumi. Nating se ol man oli bin traehad blong haedem nem blong God, nem ya i kamaot bitim 7,000 taem long Baebol. Eksampel, man blong raetem Ol Sam i stap tokbaot Papa blong yumi long heven, taem hem i singsing se: “Yu, we nem blong yu Jeova, yu nomo yu hae king blong olgeta ples long wol.”​—Ol Sam 83:​18, NW.

Neva Jeova i bisi tumas blong lesin long yumi, sipos yumi prea long hem long fasin we i stret. Baebol i talem se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”​—2 Kronikel 16:⁠9.

Ol Enjel Mo Ol Gudfala Fasin

Ol enjel oli no stap jajem man, olsem plante niuspepa mo televisin oli stap talem. Samting ya i stret nomo, from we God i no givim raet long ol enjel blong jajem ol man. Jeova hem i ‘jaj blong olgeta man.’ Be, hem i ‘putum wok ya blong jajem man, long han blong Pikinini blong hem,’ Jisas Kraes. (Hibrus 12:23; Jon 5:​22) Nating se i olsem, yumi no mas ting se ol enjel oli no gat intres long yumi. Jisas i talem se: “Ol enjel blong God oli glad tumas long wan man nomo we i man nogud, be i tanem tingting blong hem from sin blong hem.”​—Luk 15:⁠10.

Ol enjel oli no stap stanap nomo, mo wajem ol man. Long ol taem bifo, oli mekem wok blong givim panis long man, oli mekem jajmen blong God i kamtru. Eksampel, God i yusum ol enjel blong agensem ol man Ijip bifo. Ol Sam 78:49 i talem se: “Hem i kros we i kros, mo taem hem i letem kros blong hem i kam long olgeta, hem i mekem we olgeta oli kasem bigfala trabol. Hem i no moa holem kros blong hem, i sanem ol enjel oli kam blong kilim olgeta long wan sik.” Baebol i givim ripot tu se, long wan naet, wan enjel nomo i kilim i ded 185,000 soldia blong Asiria.​—2 King 19:35.

Long fiuja, ol enjel bambae oli kilim i ded ol man we oli stap spolem laef blong ol narafala man from we oli no wantem folem ol stretfala rul blong God. Jisas bambae i kam ‘wetem ol strong enjel blong hem, mo faea we i laet blong givim panis long olgeta we oli no save ona long God, mo long olgeta we oli no save obei long gud nius.’​—2 Tesalonaeka 1:​7, 8.

Taswe, Baebol i soemaot long yumi se oltaem, ol trufala enjel blong God oli stap mekem wok blong Hem, taem oli folem ol oda blong hem mo taem oli sapotem ol stretfala rul blong hem. I klia se, sipos yumi wantem se ol enjel blong God oli halpem yumi, yumi mas save wanem we God i wantem yumi blong mekem mo traehad blong folem.

Ol Enjel We Oli Lukaot Long Man

?Ol enjel oli kea long ol man mo oli sevem olgeta long trabol? Aposol Pol i talem se: “Ol enjel ya, oli spirit nomo, we oli stap mekem ol wok blong God. Hem i stap sanem olgeta blong oli kam givhan long ol man ya we bambae i sevem olgeta.” (Hibrus 1:⁠14) Ol tok ya blong Pol, oli givim klia ansa se ol enjel oli gat intres long yumi mo oli save sevem yumi long trabol.

From we trifala Hibru man ya Sedrak, Mesak, mo Abednigo, trifala i no wantem bodaon long aedol blong gol we King Nebukadnesa blong Babilon i stanemap, oli sakem trifala i go insaed long faea we i hot we i hot tumas. Be, faea i no kakae ol trufala man ya blong God. Taem king i lukluk i go insaed long faea, hem i luk “fo man,” mo i talem se “namba fo man ya i olsem wan god nomo.” (Daniel 3:​25) Sam yia biaen, oli sakem Daniel long wan hol blong ol laeon, from we hem i stap tru long God. Be, ol laeon ya oli no kakae hem. Hem i talem se: “God i sanem enjel blong hem i kam satem maot blong ol laeon ya.”​—Daniel 6:⁠22.

Long faswan handred yia, taem kongregesen blong ol man blong Kraes i stanap, ol enjel oli kamtru bakegen, mo oli mekem ol aposol we oli stap kalabus, oli gofri. (Ol Wok 5:​17-​24; 12:​6-​12) Mo taem laef blong Pol i stap long denja long solwota, wan enjel i talem long hem se hem i no save ded, bambae hem i go kasem Rom.​—Ol Wok 27:​13-​24.

Ol man blong Jeova God tede, oli bilif fulwan se ol spirit enjel blong God, oli rili stap mo oli naf blong sevem ol man long trabol, olsem we oli bin mekem long Elaesa mo wokman blong hem bifo. (2 King 6:​15-​17) Yes, “oltaem enjel blong [Jeova] i stap lukaot gud long olgeta we oli ona long hem, mo i stap tekemaot olgeta long trabol.”​—Ol Sam 34:7; 91:⁠11.

Wan Mesej We Ol Enjel Oli Stap Talemaot

Ol enjel oli tingbaot ol gudfala samting long laef blong ol man we oli stap mekem wok blong Jeova God. Be tu, oli gat wok ya blong meksua se olgeta man long wol oli kasem save long Jeova mo ol stamba tingting blong hem. Aposol Jon i raetem se: “Mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis. Hem i stap singaot bigwan, i talem se, ‘Yufala i mas ona gud long God, mo yufala i mas leftemap nem blong hem.’ ”​—Revelesen 14:​6, 7.

?Yu yu wantem save wanem i stap long ‘gud nius ya we i blong oltaem nomo’? Sipos yes, ale, askem ol Witnes blong Jeova. Bambae oli glad blong serem nius ya wetem yu.

[Tok Blong Pija Long Pej 7]

Wan enjel antap long skae i stap talemaot gud nius ya we i blong oltaem nomo. ?Yu yu wantem save gud nius ya we hem i stap talemaot?