Ol Faswan Step Blong Wokbaot Wetem God
“Yufala i mas stap klosap long God, nao hem bambae i stap klosap long yufala.”—JEMES 4:8.
1, 2. ?From wanem yu save talem se, i wan bigfala blesing taem yumi mekem wok blong Jeova?
WAN man i bin stap safa long kalabus blong sam yia. Nao oli singaot hem, blong i go stanap long fored blong rula blong kantri ya. Ol samting oli hapen kwiktaem. Smoltaem biaen, presina ya i stap wok wetem wan king we i gat moa paoa, i bitim ol narafala king blong wol long taem ya. Man ya we bifo, i wan presina, naoia king i putumap hem long wan wok we i givim haenem long hem, mo i mekem olgeta man oli ona long hem. !Josef, man ya we bifo oli fasem leg blong hem long jen, naoia i stap wokbaot wetem wan king!—Jenesis 41:14, 39-43; Ol Sam 105:17, 18.
2 Tede, ol man long wol ya oli gat jans blong mekem wok blong wan man we i hae moa long Fero blong Ijip. Man ya we i Hae Olgeta long heven mo wol, i singaot yumi evriwan blong mekem wok blong hem. !I wan bigfala blesing blong mekem wok blong Jeova, God ya we i gat olgeta paoa, mo blong frengud wetem hem! Ol man blong raetem Baebol, oli tokbaot Jeova olsem wan nambawan God we i gat bigfala paoa, hem i gat pis, i naes tumas, i glad oltaem mo hem i gud tumas. (Esikel 1:26-28; Revelesen 4:1-3) Lav i lidim evri fasin we Jeova i soem long ol man. (1 Jon 4:8) Hem i neva giaman. (Namba 23:19) Mo Jeova i neva mekem tingting blong ol man blong hem i foldaon. (Ol Sam 18:25) Taem yumi folemgud ol rul blong hem, yumi save gat wan hapi laef we i gat mining naoia, mo tingting blong yumi i save stap oltaem long laef we i no save finis. (Jon 17:3) I no gat wan rula blong wol ya we i save givim ol bigfala blesing mo jans olsem long yumi.
3. ?Long wanem rod Noa i ‘wokbaot wetem trufala God’?
3 Longtaem bifo, Noa i traehad blong mekem laef blong hem i laenap wetem wanem we God i wantem mo stamba tingting blong Hem. Baebol i tokbaot Noa, i se: ‘Hem i wan stret man, we ol man oli no save jajem hem, mo oltaem hem i stap wokbaot wetem God.’ (Jenesis 6:9) I tru, Noa i no wokbaot wetem God stret, from we i “no gat man we i luk God samtaem.” (Jon 1:18) Be, Noa i wokbaot wetem God, taem hem i mekem wanem we God i talem long hem blong mekem. Noa i givim laef blong hem blong mekem samting we Jeova i wantem. Taswe, hem i haremgud long wan nambawan fasin fren wetem God ya we i gat Olgeta Paoa. Tede, plante milyan man oli mekem olsem Noa. Oli ‘stap wokbaot wetem God’ taem oli mekem laef blong olgeta i laenap wetem ol advaes mo tijing blong Jeova. ?Olsem wanem wan man i save stat blong folem rod ya?
Stret Save i Impoten Tumas
4. ?Olsem wanem Jeova i tijim ol man blong hem?
4 Blong wokbaot wetem Jeova, fastaem yumi mas save hem. Profet Aesea i bin talem se: “I gat taem i stap kam, we hil ya we haos blong mi i stap long hem, bambae i kam hae moa, i winim ol narafala hil. Mo ol man blong ol narafala kantri bambae oli save wokbaot blong kam long hem. Olgeta ya bambae oli kam, oli talem se, ‘Hae God i God blong Jekob. Yufala i kam. Yumi go antap long hil ya blong hem. Yumi go mekem wosip long haos blong hem. Hem bambae i tijim yumi long ol fasin we hem i wantem blong yumi folem, nao bambae yumi save folem ol rod we hem i jusumaot, from we oltaem, tok blong hem i stap kamaot long taon ya Jerusalem, mo oltaem, long hil ya Saeon, hem i stap tijim ol man blong hem long ol loa blong hem.” (Aesea 2:2, 3) Tru ya, yumi save trastem fulwan se Jeova bambae i tijim evriwan we oli stap traehad blong wokbaot long ol rod blong hem. Jeova i givim Tok blong hem, Baebol, mo i halpem yumi blong kasem save long Baebol. Wan rod we hem i yusum blong tijim yumi long Tok blong hem, hemia tru long ‘slef we i stret mo waes.’ (Matiu 24:45-47) Jeova i yusum ‘gudfala slef’ ya blong givim ol tijing long saed blong spirit, tru long ol buk we oli tokbaot Baebol, ol Kristin miting, mo plan ya blong stadi Baebol wetem ol man. God i givim tabu spirit tu long ol man blong hem, blong halpem olgeta blong kasem save long Tok blong hem.—1 Korin 2:10-16.
5. ?From wanem ol trutok blong Baebol oli sas tumas?
5 Nating se yumi no givim mane blong pem ol trutok blong Baebol, ol trutok ya oli sas we oli sas. Taem yumi stadi long Tok blong God, yumi kasem save long God—nem blong hem, fasin blong hem, stamba tingting blong hem, mo olsem wanem hem i stap wok wetem ol man. Mo tu, yumi kasem ansa blong ol bigfala kwestin we ol man oli askem long laef, olsem: ?From wanem yumi stap long wol ya? ?From wanem God i letem ol man blong oli harem nogud? ?Wanem bambae i hapen long fiuja? ?From wanem yumi kam olfala mo yumi ded? ?I gat wan laef afta we man i ded? Ansa blong ol kwestin ya oli mekem yumi friman. Antap long ol samting ya, yumi kasem save long wanem we God i wantem yumi blong mekem. Hem i wantem se yumi wokbaot long rod we i mekem hem i glad. Yumi lanem se ol rul blong hem oli waes mo yumi kasem bigfala blesing taem yumi folem olgeta. Sipos i no gat tijing blong God, neva bambae yumi kasem save long ol samting ya.
6. ?Ol stret save blong Baebol oli mekem yumi naf blong jusum wanem rod?
6 Trutok blong Baebol i gat paoa mo i naf blong pusum yumi blong jenisim laef blong yumi. (Hibrus 4:12) Taem we yumi no kasem save yet long ol stret save blong Baebol, yumi stap folem nomo “ol fasin nogud blong wol ya.” (Efesas 2:2) Be stret save long Tok blong God i soem wan narafala rod long yumi, blong ‘wokbaot wetem Jeova long fasin we hem i glad long hem.’ (Kolosi 1:10) !Yumi glad tumas blong tekem ol faswan step blong wokbaot wetem Jeova, Man ya we i nambawan long olgeta man long heven mo long wol!—Luk 11:28.
Tu Impoten Step —Givim Laef i Go Long God mo Baptaes
7. Taem yumi stadi long Tok blong God, ?yumi kasem save long wanem trutok long saed blong fasin we man i lidim man?
7 Taem yumi stap kasem moa save long Baebol, laet long saed blong spirit, we i kamaot long Tok blong God, i mekem se yumi stat blong skelem fasin blong laef blong man mo prapa laef blong yumi wan. Long rod ya, wan impoten trutok i kam klia. Profet Jeremaea i bin talemaot trutok ya longtaem bifo. Hem i raetem se: “O Jeova, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jeremaea 10:23, NW) Olgeta man long wol—yumi evriwan—i nidim we God i soem rod long yumi.
8. (a) ?Wanem i pusum ol man blong givim laef blong olgeta i go long God? (b) ?Wanem ya Kristin fasin blong givim laef i go long God?
8 Taem yumi kasem save long impoten trutok ya, yumi wantem tumas blong lukluk i go long Jeova blong i lidim yumi. Mo lav we yumi gat long God, i pusum yumi blong givim laef blong yumi i go long hem. Givim laef long God i minim se yumi kam klosap long hem tru long prea, mo mekem wan strong promes long hem se bambae yumi yusum laef blong yumi blong mekem wok blong hem mo wokbaot long rod blong hem oltaem. Olsem nao, yumi folem eksampel blong Jisas, we i givim hem wan i go long Jeova, wetem strong tingting blong mekem wanem we God i wantem.—Hibrus 10:7.
9. ?From wanem ol wanwan man oli givim laef blong olgeta i go long Jeova?
9 Jeova God i neva pusum no fosem wan man blong givim laef i go long hem. (Skelem wetem 2 Korin 9:7.) Mo tu, God i no wantem we man i givim laef i go long Hem jes from we sam filing i pulum hem blong mekem olsem. Man i mas kam wan disaepol, bifo we hem i baptaes. Mo samting ya i min se hem i mas traehad blong kasem stret save. (Matiu 28:19, 20) Pol i talem strong long olgeta we oli baptaes finis se, ‘oli mas givim olgeta laef blong olgeta i go nomo long God. Hemia wan presen we oli save givim blong mekem wosip long hem, wan presen we i laef, we i tabu, mo we God i glad blong tekem. Hemia i olsem prapa wosip long God, we i stanap long paoa blong tingting.’ (Rom 12:1) Sem paoa ya blong tingting, i mas pusum yumi blong givim laef blong yumi i go long Jeova God. Afta we yumi lanem ol save we i joen long bisnes ya mo tingting dip long hem, yumi rere mo yumi glad blong givim laef blong yumi i go long God.—Ol Sam 110:3.
10. ?Olsem wanem fasin blong givim laef i go long God i joen wetem baptaes?
10 Afta we yumi mekem wan prea long God blong talemaot se yumi wantem tumas blong wokbaot long ol rod blong hem, yumi tekem nekis step. Yumi baptaes long wota blong soem se yumi givim laef blong yumi i go finis long God. Ale, ol man oli save se yumi bin promes long God blong mekem ol samting we hem i wantem. Jes bifo we Jisas i statem minista wok blong hem long wol ya, Jon i baptaesem hem, mo long rod ya, hem i soem wan eksampel long yumi blong folem. (Matiu 3:13-17) Biaen, Jisas i givim oda long ol man blong hem blong pulum ol man oli kam disaepol mo blong baptaesem olgeta. Taswe, fasin blong givim laef i go long God mo tekem baptaes, oli impoten step we man i mas tekem sipos hem i wantem wokbaot wetem Jeova.
11, 12. (a) ?Olsem wanem yumi save talem se baptaes i klosap sem mak long lafet blong mared? (b) ?Wanem samting i mas stap long fasin fren blong yumi wetem Jeova, we i sem mak long fasin fren bitwin wan hasban mo waef?
11 Givim laef long God mo baptaes blong kam disaepol blong Jisas Kraes, i klosap sem mak long fasin blong mared. Long plante kantri, i gat sam step we wan man mo woman, tufala i mas tekem bifo long dei blong mared. Fastaem, tufala i mitim tufala, afta tufala i traem savegud tufala, mo tufala i fren. Nekis step, hemia blong mekem promes blong mared. Lafet blong mared i soemaot long ol man wanem disisen we tufala i bin tekem—hemia blong mared mo laef tugeta olsem hasban mo waef. Lafet blong mared nao i makem stat blong spesel fasin fren ya. Dei ya i makem stat blong mared. I sem mak long saed blong baptaes. Baptaes i makem stat blong wan laef we wan man i givim i go long Jeova blong wokbaot mo frengud wetem hem.
12 Hemia wan narafala eksampel. Afta long dei blong mared blong tufala, tufala i mas mekem se lav bitwin tufala i go dip, mo i kam strong. Blong kam moa klosap long tufala, tufala tugeta i mas traehad blong frengud oltaem wetem tufala mo mekem fasin fren ya i kam strong moa. I tru, yumi no mekem wan mared wetem God. Be, afta we yumi baptaes, yumi mas wok strong blong frengud oltaem wetem Jeova. Hem i luk mo i glad tumas long ol traehad blong yumi blong mekem ol samting we hem i wantem mo blong kam klosap long hem. Disaepol Jemes i raetem se: “Yufala i mas stap klosap long God, nao bambae hem i stap klosap long yufala.”—Jemes 4:8.
Wokbaot Folem Jisas
13. Taem yumi stap wokbaot wetem God, ?yumi mas folem eksampel blong hu?
13 Blong wokbaot wetem Jeova, yumi mas folemgud eksampel blong Jisas Kraes. Aposol Pita i raetem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Be from we yumi no stretgud olgeta olsem Jisas, yumi no save folem eksampel blong hem long fasin we i stret olgeta. Nating se i olsem, Jeova i wantem se yumi mekem beswan samting we yumi naf blong mekem. Bambae yumi tokbaot faef defren haf blong laef mo minista wok blong Jisas, we ol Kristin we oli givim laef blong olgeta finis long God, oli mas traehad blong folem.
14. ?Wanem samting i joen wetem fasin ya blong kasem save long Tok blong God?
14 Jisas i gat stret save mo dip save long Tok blong God. Taem Jisas i stap mekem minista wok blong hem, plante taem hem i yusum ol vas long Hibru haf blong Baebol. (Luk 4:4, 8) I tru se ol rabis lida blong skul long taem ya, olgeta tu oli yusum sam vas long Baebol. (Matiu 22:23, 24) Be, Jisas i defren long olgeta. Hem i kasem save mining blong ol vas blong Baebol, mo hem i mekem oli wok long laef blong hem. Hem i no jes ridim ol hanraet blong Loa, be hem i kasem save tu long trufala mining blong Loa. Taem yumi folem eksampel blong Jisas Kraes, yumi tu, yumi mas traehad blong kasem save long mining blong Tok blong God. Long rod ya, yumi kam ol man blong wok blong God, we hem i glad long yumi, from we yumi “stap tijim ol man long trutok blong God long fasin we i stretgud.”—2 Timoti 2:15.
15. ?Olsem wanem Jisas i soem eksampel long fasin blong tokbaot God?
15 Jisas Kraes i tokbaot Papa blong hem long heven long ol narafala. Jisas i no holem save we hem i gat long Tok blong God i stap blong hem wan nomo. Ol man we oli enemi blong hem, be oli singaot hem se “Tija,” from we, long evri ples we Jisas i go long hem, hem i storeyan wetem ol man, i tokbaot Jeova mo stamba tingting blong Hem long olgeta. (Matiu 12:38) Jisas i prij long fored blong ol man long eria blong tempel, long ol haos prea, long ol taon, mo long ol vilej. (Mak 1:39; Luk 8:1; Jon 18:20) Hem i tijim ol man wetem fasin sore mo fasin kaen. Hem i soem lav long ol man we hem i givhan long olgeta. (Matiu 4:23) Olgeta we oli folem eksampel blong Jisas, olgeta tu oli mas traem faenem plante ples mo plante rod blong tijim ol narafala long saed blong Jeova God mo ol nambawan stamba tingting blong hem.
16. ?Fasin fren we Jisas i gat wetem ol man we oli wosip long Jeova i strong olsem wanem?
16 Jisas i rili joengud wetem olgeta we oli wosip long Jeova. Wan dei, taem Jisas i stap toktok long wan hif blong man, mama blong hem wetem ol brata blong hem we oli no bilif, oli kamtru, oli wantem toktok wetem hem. Stori blong Baebol i talem se: “Nao wan man i talem long Jisas se, ‘Ei, mama blong yu wetem ol brata blong yu oli stap stanap afsaed, oli wantem toktok wetem yu.’ Be Jisas i talem long hem se, ‘?Hu i mama blong mi, mo hu i brata blong mi?’ Nao hem i poen long ol man blong hem, i talem se, ‘Olgeta ya oli mama blong mi, mo oli brata blong mi, from we man we i stap mekem ol samting we Papa blong mi long heven i wantem, hem nao i brata blong mi, mo sista blong mi, mo mama blong mi.’ ” (Matiu 12:47-50) Hemia i no minim se Jisas i sakemaot famle blong hem. Sam samting we i hapen bifo, oli soem se Jisas i no mekem olsem. (Jon 19:25-27) Be stori ya i makem lav we Jisas i gat long olgeta we oli gat sem bilif olsem hem. Tede, olgeta we oli stap wokbaot wetem God, olgeta tu oli mas traehad blong kampani oltaem wetem ol man we oli stap wosipim Jeova mo oli gohed moa blong lavlavem olgeta.—1 Pita 4:8.
17. ?Wanem tingting blong Jisas long fasin blong mekem ol samting we Papa blong hem long heven i wantem, mo olsem wanem samting ya i mas gat paoa long yumi?
17 Taem Jisas i mekem ol samting we God i wantem, hem i soem se hem i lavem Papa blong hem long heven. Jisas i obei long evri samting we Jeova i talem long hem. Hem i talem se: “God i sanem mi mi kam, mo kakae blong mi, i blong mi mekem ol samting we hem i wantem blong mi mi mekem, mo blong mi finisim ol wok we hem i givim long mi.” (Jon 4:34) Jisas Kraes i talem tu se: “Oltaem, mi stap mekem ol samting we [God] i wantem.” (Jon 8:29) Jisas i lavem tumas Papa blong hem long heven. Taswe, hem i “mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long [pos].” (Filipae 2:8) Biaen, Jeova i blesem Jisas, i mekem olgeta man oli ona long hem, i givim paoa long hem mo i leftemap hem i go antap, i hae moa long ol narafala man, i mekem hem i stap long namba tu ples afta long Jeova hem wan. (Filipae 2:9-11) Olsem Jisas, yumi soem se yumi lavem God tumas taem yumi folem ol loa blong hem mo mekem ol samting we hem i wantem.—1 Jon 5:3.
18. ?Olsem wanem Jisas i soem eksampel long fasin blong prea?
18 Jisas i wan man blong prea. Hem i prea taem hem i tekem baptaes. (Luk 3:21) Bifo we hem i jusumaot ol 12 aposol blong hem, hem i spenem wan fulnaet blong prea. (Luk 6:12, 13) Jisas i tijim ol disaepol blong hem olsem wanem blong prea. (Luk 11:1-4) Long naet bifo we hem i ded, hem i prea wetem ol disaepol blong hem, mo i prea from olgeta. (Jon 17:1-26) Prea i wan impoten samting long laef blong Jisas. Taswe, prea i mas wan impoten samting tu long laef blong yumi, ol man blong Jisas. !I wan bigfala ona blong toktok wetem Hae Rula blong heven mo wol tru long prea! Antap long hemia, Jeova i stap ansa long ol prea, from we Jon i raetem se: “Taem yumi kam long fes blong God blong prea, yumi bilif strong se sipos yumi askem samting long hem we i stret long tingting blong hem, hem bambae i harem prea blong yumi. Mo sipos yumi save se oltaem hem i stap harem prea blong yumi, oraet, yumi save se evri samting we yumi askem long hem, oli blong yumi finis.”—1 Jon 5:14, 15.
19. (a) ?Wanem ol fasin blong Jisas we yumi mas folem? (b) ?Olsem wanem yumi kasem blesing taem yumi stadi long laef mo minista wok blong Jisas?
19 !I gat fulap samting we yumi save lanem taem yumi stadigud long laef mo minista wok blong Jisas Kraes long wol ya! Tingting dip long ol fasin we hem i soemaot. Hem i soem lav, fasin sore, fasin kaen, strong tingting, stret tingting, waes, tingting daon, hem i no fraet long man, mo hem i no tingbaot hem wan nomo. Moa we yumi kasem save long Jisas, moa we bambae yumi wantem stap olsem trufala man blong hem. Mo tu, save long saed blong Jisas i pulum yumi i kam moa klosap long Jeova. Tru ya, Jisas i folem eksampel blong Papa blong hem long heven, long fasin we i stret olgeta. Hem i rili folemgud fasin blong Jeova, taswe hem i save talem se: “Man we i luk mi, hem i luk Papa blong mi.”—Jon 14:9.
Trastem God Se Hem i Save Givhan Long Yu
20. ?Olsem wanem yumi save wokbaot stret oltaem wetem Jeova?
20 Taem ol pikinini oli jes lanem blong wokbaot, fastaem oli no wokbaot stret. ?Olsem wanem oli save lanem blong wokbaot stret? Wan rod nomo, hemia blong traem plante taem bakegen mo gat strong tingting blong gohed. Olgeta we oli stap wokbaot wetem Jeova, oli traehad blong wokbaot stret oltaem wetem hem. Samting ya tu i tekem taem mo i nidim strong tingting blong gohed. Pol i soemaot from wanem i impoten blong gat strong tingting blong gohed oltaem blong wokbaot wetem God. Hem i raetem se: “Ol brata mo sista. Yufala i lanem finis long mifala, wanem fasin yufala i mas mekem blong mekem God i glad long yufala. Mo yufala i stap folem fasin ya yet. Be naoia, long nem blong Jisas, Masta blong yumi, mifala i talem strong long yufala, blong yufala i gohed moa yet long ol fasin ya.”—1 Tesalonaeka 4:1.
21. ?Taem yumi wokbaot wetem Jeova, yumi save haremgud long wanem blesing?
21 Sipos yumi givim olgeta laef blong yumi i go long God, bambae hem i halpem yumi blong wokbaot oltaem wetem hem. (Aesea 40:29-31) Olgeta samting we wol ya i save givim long yumi, be i no gat wan we i sem mak long ol blesing we God i givim long ol man we oli stap wokbaot long ol rod blong hem. ‘Hem i stap tijim yumi blong givhan long yumi, mo i stap lidim yumi long ol rod we i stret blong yumi folem. Sipos yumi obei long ol tok blong hem, ol gudfala samting we hem i save mekem long yumi, bambae oli save kam long yumi, olsem wan reva we i ron. Bambae hem i save mekem yumi win oltaem nomo, olsem solwota we i stap brok long sanbij mo rif, we neva i save spel.’ (Aesea 48:17, 18) Taem yumi obei long tok ya we i singaot yumi blong wokbaot wetem God mo taem yumi wokbaot wetem God oltaem, yumi save gat pis wetem hem gogo i no save finis.
?Bambae Yu Yu Ansa Olsem Wanem?
◻ ?From wanem i wan bigfala ona blong wokbaot wetem trufala God?
◻ ?From wanem fasin blong stadi, givim laef i go long God, mo tekem baptaes, oli impoten step we man i mas tekem blong wokbaot wetem God?
◻ ?Olsem wanem yumi save wokbaot folem Jisas?
◻ ?Olsem wanem yumi save se bambae Jeova i givhan long yumi taem yumi stap wokbaot wetem hem?
[Tok Blong Pija Long Pej 13]
Stadi, givim laef i go long God, mo baptaes, oli ol faswan step we man i mas tekem blong wokbaot wetem God