Stanap Long Doa We i Lidim Yu Long Plante Moa Wok

NOGAT tingting blong kompetisin. Evriwan i wantem se narafala i kasem gudfala mak.” Hemia wanem we Richard mo Lusia, tufala i talem long saed blong ol narafala studen we oli stap wetem tufala long klas namba 105 blong Wajtaoa Baebol Skul blong Gilead. Tufala i talem se: “Mifala evriwan i defren, be long tingting blong mifala, wanwan long olgeta studen ya oli sas tumas.” Wan narafala studen, we nem blong hem Lowell, i agri long tok ya tu, mo hem i ademap se: “From we mifala evriwan i defren, samting ya i pulum mifala i kam wanples.”

Klas ya i kasem stefeket blong hem long Septemba 12, 1998, mo tru tumas, olgeta studen blong hem oli defdefren evriwan. Sam long ol studen oli bin paenia long ol kantri we i nidim bigwan ol pablisa blong Kingdom; sam narafala oli bin paenia klosap long ples blong olgeta nomo. Sam long olgeta, olsem Mats mo Rose-Marie, oli mas wokhad long plante aoa blong lanemgud Engglis bifo we oli kam long skul ya. Plante long ol studen ya oli bin tingbaot wok blong misinari stat long taem we oli pikinini yet. Wan paenia wetem woman blong hem, tufala i askem 12 taem finis blong kam long skul ya. !Tufala i hapi tumas taem tufala i kasem leta we i singaot tufala blong kam joen long klas ya namba 105!

Ol 20 wik blong skul ya oli pas kwiktaem nomo. Taem ol studen oli finisim laswan wok blong olgeta, oli givimaot laswan ripot blong olgeta, oli sek se dei blong givim stefeket i kam finis.

Jeaman blong program ya hem i Albert Schroeder, wan memba blong Hed Kampani blong ol Witnes blong Jeova. Hem i mekem ol studen ya oli tingbaot se oli stap “stanap klosap long wan doa we bambae i lidim olgeta i go blong mekem wan wok blong tijim Baebol we i bigwan moa,” sem mak olsem bitim 7,000 narafala studen blong Gilead oli mekem finis. Hem i talem se long taem blong ol intenasnal asembli, plante misinari we oli stap longtaem finis long wok ya, oli bin kam blong visitim wol hedkwota, nao ol niufala studen ya oli glad tumas from nambawan jans we oli kasem blong mitim plante long ol misinari ya.

Biaen, brata Schroeder i lego ples long Max Larson we i wok long Komiti blong Betel Operesen. Hem i tokbaot stamba tok ya se “Edukesen We i Lidim Man i Go Kasem Laef We i No Save Finis.” Brata Larson i yusum Proveb 1:5 (NW), we i talem se: “Man we i waes bambae hem i lesin long ol tok we oli save tijim hem, mo i holem gud olgeta. Mo man we i save kasem dip save, bambae hem i kasem gudhan blong bos long ol samting.” Blong karem frut long wok blong misinari wan man i mas gat gudhan. Ol man we oli gat gudhan blong wok, bambae oli save kam ol man blong wok blong king. (Proveb 22:29) Ol studen ya oli bin kasem tijing long ol faef manis we i pas, taswe naoia oli rere fulwan blong wok fored long ol King ya we oli hae moa i bitim ol narafala king, hemia Jeova God mo Jisas Kraes.

David Olson, wan brata we i wok long Sevis Dipatmen, i mekem nekis tok we i stanap long “Wok Blong Mekem Hat Blong Jeova i Glad.” Hem i askem se: “?Ol sinman oli save mekem wanem blong mekem hat blong God i glad?” ?Wanem ansa blong kwestin ya? Ol sinman oli save mekem wok blong Jeova wetem wan bilif we i strong, wetem wan tingting we i stap tru long God mo wetem glad. Jeova i wantem se ol man blong hem oli glad long wok we oli mekem blong hem. Taem yumi glad long wok blong God, yumi mekem hat blong hem tu i glad. (Proveb 27:11) Brata Olson i ridim leta blong wan misinari mo waef blong hem we tufala i joen long namba 104 klas blong Gilead. ?Tufala ya i glad long wok we tufala i stap mekem? Long leta ya, tufala i tokbaot kongregesen we tufala i stap long hem, se: “I gat raonabaot 140 pablisa, mo samwe 250 go kasem 300 man oli kam long ol miting. Be beswan samting long ples ya, hemia wok blong prij. Wanwan long mitufala i gat fo stadi, mo sam long ol stadi ya oli stat finis blong kam long ol miting.”

Lyman Swingle, wan memba blong Hed Kampani, i mekem tok ya se “Wan Taem blong Spel Smol mo Kaontem Ol Blesing.” Skul blong Gilead i karem plante blesing. Skul ya i halpem ol studen blong mekem save blong olgeta i gru moa, blong laekem ogenaesesen blong Jeova moa, mo blong wokem ol fasin we oli impoten tumas, olsem tingting daon. Brata Swingle i talem se: “Blong kam long ples ya mo spenem taem blong lesin long narafala i tijim yumi, hemia i wan gudfala rod blong mekem yumi gat tingting daon. Mo taem bambae yu aot long ples ya, yu nafgud moa blong presem Jeova.”

Stamba tok blong nekiswan tok hemia, “Glad Blong Yufala i Bigwan Tumas​—Taswe I No Nid Blong Wari.” Daniel Sydlik, we hem tu i memba blong Hed Kampani, i givim tok ya. Hem i pulum ol studen blong tingbaot se, taem problem i kamaot, oli mas lukaot advaes blong Baebol. Brata Sydlik i yusum sam vas blong Matiu japta 6, blong soemaot olsem wanem blong mekem olsem. Sipos yumi no gat strong bilif, samting ya bambae i mekem yumi wari long ol samting we oli nating nomo, olsem kakae mo klos. Jeova i save finis olgeta samting we yumi nidim. (Matiu 6:​25, 30) Sipos yumi wari, samting ya bambae i jes ademap moa trabol long ol trabol ya we yumi gat finis evri dei. (Matiu 6:​34) Be, i tru se yumi nidim blong mekem plan blong fiuja. (Skelem wetem Luk 14:28.) Brata Sydlik i eksplenem se: “Jisas i no tok agensem waes fasin ya blong mekem plan blong fiuja. Hem i tok agensem fasin blong wari long saed blong fiuja, hemia nao i no waes. Beswan rod blong winim fasin blong wari tumas, hemia wok. Taem yumi stat wari tumas, i gud blong joen long wok blong talemaot trutok long narafala.”

Lastok Blong Ol Tija

Afta long hemia, tri memba blong skul blong Gilead oli givim tok. Karl Adams i mekem faswan tok, long saed blong “?Wanem Samting Bambae Yu Yu Pembak Long Jeova?” Tok blong hem i stanap long Ol Sam japta 116. Maet hemia wan long ol sing we Jisas i singsing long naet bifo we hem i ded. (Matiu 26:30, futnot) ?Yu ting se Jisas i stap tingbaot wanem taem hem i singsing se: ‘Hae God i stap mekem i gud tumas long mi, bambae mi save givim wanem presen long hem’? (Ol Sam 116:12) Maet Jisas i stap tingbaot stretfala bodi ya we Jeova i mekemrere blong hem. (Hibrus 10:5) Wan dei nomo biaen long samting ya, Jisas i givim bodi blong hem olsem wan sakrefaes. Hemia i pruvum se lav blong hem i bigwan. Ol studen blong namba 105 klas oli luksave kaengud fasin blong Jeova long ol faef manis ya we oli pas. Naoia bambae oli gat jans blong soemaot lav we oli gat long God, taem oli wokhad long ples we bambae oli go blong mekem misinari wok blong olgeta.

Mark Noumair hem i namba tu tija blong Gilead skul we i mekem tok. Hem i givim advaes long ol studen blong “Gohed Blong Mekem Samting We i Stret.” Afta we ol brata blong Josef oli salem hem, hem i kam wan slef long Ijip. Long 13 yia hem i harem nogud from we ol man oli mekem i no stret long hem. ?Hem i letem ol rong blong narafala oli blokem hem long wok blong God? No gat. Hem i gohed blong mekem samting we i stret. Ale, long stret taem we God i jusum, Josef i kam fri long ol traem ya. Wantaem nomo, laef blong hem i jenis. Hem i aot long kalabus, i go laef long haos blong king. (Jenesis, japta 37-​50) Nao tija ya i askem ol studen blong hem se: “Sipos laef we yufala i gat long misinari wok blong yufala i defren long wanem we yufala i bin wantem, ?bambae yufala i lego? ?Bambae yufala i letem tingting blong yufala i foldaon? no ?bambae yufala i stanap strong, olsem Josef i mekem?”

Laswan tija we i givim tok, hemia brata we i bin rejistarem ol studen blong Gilead skul, Wallace Liverance. Stamba tok blong tok blong hem se, “Talemaot King mo Kingdom.” Hem i storeyan wetem ol memba blong klas ya. Sam long ol studen oli talemaot ekspiryens blong olgeta taem oli prij long ol haos wanwan, long ol stoa mo long ol rod. Sam narafala oli storebaot olsem wanem oli stap prij long ol man we oli toktok long ol defren lanwis. Sam narafala bakegen oli soemaot olsem wanem blong prij long ol man we oli blong defren skul. Olgeta studen ya evriwan oli wantem tumas blong joen fulwan long wok blong prij olsem misinari.

Ol Hapi Misinari We Oli Mekem Wok Ya Longtaem Finis

Nekis haf, i karem stamba tok ya “Glad We i Kamaot From Ol Gudfala Frut Blong Misinari Wok.” Robert Wallen i mekem tok ya mo hem i askem kwestin long fo brata we oli wok long hedkwota blong Sosaeti. Fofala brata ya oli bin gat nambawan jans blong kampani wetem sam misinari we oli mekem wok ya blong plante yia finis. Ol misinari ya oli talem klia se i no isi long olgeta taem oli mas lanem wan niufala lanwis, mo tu, taem oli mas lan long ol niufala kastom mo defren weta blong ol kantri. Biaen, i no isi long olgeta from we oli sore long hom blong olgeta. Samtaem, i gat ol problem blong helt we oli kamaot. Be, nating se oli fesem olgeta samting ya, ol misinari oli holem wan gudfala tingting, mo oli kasem blesing from we oli gohed strong long wok blong olgeta. Sam long olgeta oli bin halpem plante man blong kasem save long saed blong Jeova. Sam narafala oli givhan long narafala rod, blong mekem se wok blong Kingdom i gru bigwan long kantri we oli wok long hem.

Laswan brata we i toktok, hemia Carey Barber, wan memba blong Hed Kampani. Hem i talem bakegen sam stamba poen we oli kamaot long program blong asembli ya “Fasin Blong Laef We God i Glad Long Hem.” Hem i askem ol man we oli lesin, se: “?Program blong asembli ya i gat paoa long fasin fren blong yufala wetem God olsem wanem?” Brata ya i soemaot gudfala blesing we i kamaot taem man i folem fasin blong God, mo trabol we bambae i kasem olgeta we oli folem fasin blong wol. Hem i tokbaot sin we Moses i mekem long Meriba, mo i givim woning se: “Nating sipos wan man i holemstrong long bilif blong plante yia, Jeova i no ting nating long ol smosmol mastik we man ya i save mekem agensem ol stretfala Loa blong Hem.” (Namba 20:​2-​13) !I gud tumas sipos olgeta man blong God long evri ples, oli holemtaet nambawan jans ya we oli gat blong mekem wok blong hem!

Taem i kam nao blong givimaot stefeket long ol studen. Ale, wan memba blong klas ya i ridimaot leta we ol studen ya oli raetem blong talem tangkiu long gudfala trening we oli kasem. Afta long laswan singsing mo prea, program blong miting ya i finis. Be, long saed blong ol studen blong klas namba 105, i no finis long ples ya. Hemia i jes stat blong wok blong olgeta olsem misinari, from we naoia oli stap “stanap long doa we bambae i lidim olgeta i go blong mekem plante moa wok.”

[Bokis blong pija long pej 23]

Oli Kaontem Klas Ya

Oli kamaot long hamas kantri: 9

Oli go wok long hamas kantri: 17

Hamas studen: 48

Hamas hasban mo waef tugeta: 24

Oli gat hamas yia: 33

Hamas yia long trutok 16

Hamas yia finis oli prij fultaem: 12

[Bokis blong pija long pej 24]

Oli Jusum Fultaem Wok Blong Prij

Ben, wan studen long klas namba 105, i talem se: “Taem mi yang yet, mi no gat plan blong paenia. Mi ting se ol man we oli gat spesel save blong wok mo we laef blong olgeta i laenap wetem wok ya, olgeta ya nomo oli save mekem paenia. Be, mi stat blong laekem tumas wok blong prij. Ale, wan dei mi luksave se wok blong paenia i minim nomo se wan man i spenem moa taem long wok blong prij. Long taem ya nao, mi luksave se mi tu mi naf blong paenia.”

Lusia i talem se: “Long ples blong mi, oltaem mifala i tinghae long ol brata sista we oli wok fultaem long wok blong prij.” Hem i tingbaot bigfala glad we i kamaot long kongregesen blong hem, evri taem we i gat wan misinari i kam visitim olgeta. Hem i se: “Taem mi gruap, i klia se fultaem wok blong prij i wan long ol samting we mi mekem plan from.”

Mama blong Theodis i ded taem hem i gat 15 yia. Brata ya i talem se: “Long taem ya, kongregesen i rili givhan bigwan long mi, taswe mi askem long mi wan se, ‘?Mi save mekem wanem blong soemaot se mi rili tangkiu long olgeta from samting ya? ” Tingting ya i pulum hem blong joen long wok blong fultaem paenia mo naoia hem i wan misinari.

[Tok blong pija long pej 25]

Klas Namba 105 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i go biaen, mo stat long lefsaed i go long raetsaed

(1) Sampson, M.; Brown, I.; Heggli, G.; Abuyen, E.; Desbois, M.; Pourthié, P. (2) Kassam, G.; Lindberg, R.; Dapuzzo, A.; Taylor, C.; LeFevre, K.; Walker, S. (3) Baker, L.; Pellas, M.; Woggon, E.; Böhne, C.; Asplund, J.; Haile, J. (4) Pourthié, T.; Whittaker, J.; Palmer, L.; Norton, S.; Gering, M.; Haile, W. (5) Walker, J.; Böhne, A.; Groenveld, C.; Washington, M.; Whittaker, D.; Abuyen, J. (6) Gering, W.; Washington, K.; Pellas, M.; Desbois, R.; Heggli, T.; Asplund, Å. (7) Woggon, B.; LeFevre, R.; Taylor, L.; Brown, T.; Groenveld, R.; Palmer, R. (8) Norton, P.; Sampson, T.; Baker, C.; Lindberg, M.; Kassam, M.; Dapuzzo, M.