!Hemia i Dei Blong God i Sevem Man!

“Yufala i mas harem tok ya. Naoia i taem blong God i givhan long man. Tede i dei blong hem i sevem man.”​—2 KORIN 6:2.

1. ?Yumi mas mekem wanem blong gat wan gudnem long fored blong God mo Kraes?

JEOVA i putum finis dei we bambae hem i jajem olgeta man. (Ol Wok 17:31) Sipos yumi wantem se God i sevem yumi long dei ya, yumi mas gat wan gudnem long fored blong hem mo Jaj ya we hem i putumap, Jisas Kraes. (Jon 5:​22) Blong gat gudnem ya, yumi mas mekem laef blong yumi i laenap wetem Tok blong God. Mo tu, bilif blong yumi i mas pusum yumi blong halpem ol narafala blong kam ol trufala disaepol blong Jisas.

2. ?From wanem olgeta man blong wol oli stap longwe long God?

² Olgeta man oli bon wetem sin, mo from samting ya, oli stap longwe long God. (Rom 5:​12; Efesas 4:​17, 18) Taswe, olgeta we yumi prij long olgeta oli gat wan rod nomo blong stap sef, oli mas mekem pis wetem God. Aposol Pol i mekem poen ya i klia taem hem i raetem leta blong hem long ol Kristin long Korin. I gud yumi stadi long 2 Korin 5:⁠10 kasem 6:​10, blong luk wanem samting Pol i talem long saed blong jajmen, fasin blong mekem pis wetem God, mo rod blong God i sevem man.

‘Traem Winim Tingting Blong Ol Man’

3. ?Olsem wanem Pol i “traem winim tingting blong ol man,” mo from wanem yumi mas mekem sem samting tede?

³ Pol i joenem dei blong jajmen wetem wok blong prij, taem hem i raetem se: “Bambae yumi evriwan i mas stanap long fes blong Kraes blong hem i jajem yumi. Nao sipos yumi mekem i gud no yumi mekem i nogud, be bambae yumi save kasem wanem i stret long ol fasin ya we yumi stap mekem long laef blong yumi long wol ya. Nao from we mifala i stap ona narafala Masta blong yumi, we hem i gat raet blong jajem yumi, taswe mifala i stap traem [winim] tingting blong ol man, blong oli bilif long tok blong mifala, mo mi mi wantem we yufala tu i savegud samting ya.” (2 Korin 5:​10, 11) Aposol Pol i gohed blong talemaot gud nius blong ‘traem winim tingting blong ol man.’ ?Olsem wanem long yumi? Yumi stap klosap nomo long en blong rabis wol ya. Taswe, i gud we yumi traem bes blong yumi blong winim tingting blong ol narafala blong oli folem rod we Jisas i save jajem olgeta se oli stret man, mo we Jeova God, Man blong sevem man, i save agri long olgeta.

4, 5. (a) ?From wanem yumi no mas tok flas from ol samting we yumi mekem long wok blong Jeova? (b) ?From wanem Pol i tok flas “from God”?

⁴ Be, sipos God i stap blesem Kristin minista wok blong yumi, yumi no nid blong tok flas from. Sam Kristin long Korin, oli stap leftemap olgeta wanwan no ol narafala man, nao fasin ya i mekem se kongregesen i seraot. (1 Korin 1:​10-​13; 3:​3, 4) Pol i tokbaot samting ya i se: “Mifala i no stap traem bakegen blong talemaot gudfala wok blong mifala long fes blong yufala. Mifala i stap talem semfala tok nomo long yufala, blong bambae yufala i save glad long mifala. Nao bambae yufala i save givim ansa long olgeta ya we oli save tok flas from man, be oli no tok flas from laef blong olgeta, oli tok flas from hae nem blong olgeta nomo. Sipos yufala i ting se mifala i krangke, be hemia, mifala i stap mekem wok blong God. Mo sipos yufala i ting se mifala i waes, be hemia, mifala i stap givhan long yufala.” (2 Korin 5:​12, 13) Ol man we oli stap leftemap olgeta nomo, oli no gat intres nating long fasin blong mekem kongregesen i joen gud, mo i haremgud long saed blong spirit. Oli wantem leftemap olgeta from ol wok we oli mekem, i bitim we oli givhan long ol brata sista blong gat wan gudfala hat long fored blong God. Taswe, Pol i stretem kongregesen mo biaen hem i talem se: ‘Man we i wantem leftemap nem blong hem, hem i save tok from ol samting ya nomo we Jeova i mekem long hem.’​—2 Korin 10:17.

⁵ ?Pol i tok flas? Sam man oli ting olsem from samting we hem i talem long saed blong wan aposol. Be hem i tok flas ‘from God.’ Hem i tok flas from wok we hem i mekem olsem wan aposol, mekem se ol Kristin blong Korin oli no livim Jeova. Pol i mekem samting ya blong tekem olgeta oli kambak long God, from we ol giaman aposol oli lidim olgeta oli go long rong rod. (2 Korin 11:16-​21; 12:11, 12, 19-​21; 13:10) Be, Pol i no stap traem oltaem blong mekem evriwan i sapraes long ol wok we hem i mekem, no gat.​—Proveb 21:4.

?Lav Blong Kraes i Stap Pusum Yu?

6. ?Lav we Kraes i soem long yumi, i mas pusum yumi blong mekem wanem?

⁶ Olsem wan trufala aposol, Pol i tijim ol narafala long saed blong ransom sakrefaes blong Jisas. Sakrefaes ya i gat bigfala paoa long Pol, from we hem i raetem se: “Mifala i mekem olsem, from we Kraes i lavem mifala tumas, nao fasin ya blong hem i stap holemtaet mifala. Mifala i luksave se hem wan nomo i ded blong sevem olgeta man. Nao from samting ya i olsem we olgeta man oli ded finis wetem hem. Hem i ded blong sevem olgeta man, blong bambae ol man oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem ol wok blong hem, we hem i ded, mo i laef bakegen, blong i sevem olgeta.” (2 Korin 5:​14, 15) !Jisas i soem bigfala lav long yumi taem hem i givim laef blong hem blong sevem yumi! I sua se samting ya bambae i pusum yumi. Fasin tangkiu long Jisas from laef blong hem we hem i givim, i pusum yumi blong wok strong blong talemaot gud nius ya se Jeova i wokem wan rod blong sef tru long Pikinini blong hem. (Jon 3:​16; skelem wetem Ol Sam 96:2.) ?‘Lav we yu gat long Kraes,’ i stap pusum yu blong gohed strong long wok blong talemaot Kingdom mo blong mekem disaepol?​—Matiu 28:⁠19, 20.

7. ?Tok ya “mifala i no moa save makem ol man long fasin blong man nomo”, i minim wanem?

⁷ Taem ol tabu Kristin oli yusum laef blong olgeta blong soem tangkiu from samting we Kraes i mekem blong halpem ol man, ‘oli no moa stap laef blong mekem ol samting we olgeta nomo i wantem, be blong mekem ol samting we Jisas i wantem.’ Pol i talem se: “Be stat naoia, mifala i no moa save makem ol man long fasin blong man nomo. Yes, bifo, long taem ya we Kraes i man, maet mifala i save makem hem long fasin blong man nomo, be naoia mifala i no moa save makem hem olsem.” (2 Korin 5:​16) Ol Kristin oli no mas lukluk ol man long saed blong bodi nomo, maet blong laekem moa ol man Jyu bitim ol Hiten man no blong laekem moa ol rijman bitim ol puaman. Ol tabu Kristin oli “mo moa makem man from ol fasin blong man nomo.” From we fasin fren blong olgeta long saed blong spirit we oli gat wetem ol brata sista blong olgeta, hemia nao i impoten. Olgeta we oli ‘makem Kraes long fasin blong man nomo,’ oli no ol man ya nomo we oli luk Jisas taem hem i stap long wol. Nating sipos olgeta we oli gat strong tingting long saed blong Mesaea oli makem hem long fasin blong man, biaen oli no moa makem hem long fasin blong man, oli makem hem olsem wan man we i gat bigfala paoa. Hem i givim bodi blong hem olsem wan ransom mo i laef bakegen olsem wan spirit man we i save givim laef. Sam narafala we oli laef bakegen long heven, bambae oli lego prapa bodi blong olgeta long wol ya, nating se oli neva luk Jisas Kraes taem hem i gat bodi olsem man.​—1 Korin 15:45, 50; 2 Korin 5:​1-5.

8. ?Olsem wanem God i ‘joenem sam man long Kraes’?

⁸ Be taem Pol i stap tokbaot ol man ya, hem i ademap se: “Taem we God i joenem man long Kraes, hem i mekem man ya i kam wan niufala man. Ol fasin blong laef blong hem bifo oli finis, nao laef blong hem i kam niuwan olgeta.” (2 Korin 5:​17) Fasin blong ‘joen wetem Kraes,’ i minim fasin blong kam sem mak olsem hem. (Jon 17:21) Fasin joen ya i stat taem Jeova i pulum man i kam long Pikinini blong hem mo i makemaot man ya wetem tabu spirit. Man ya i kam wan pikinini blong God we Hem i makemaot wetem tabu spirit blong hem, mo hem i “wan niufala man” we i gat hop blong laef wetem Kraes long Kingdom blong heven. (Jon 3:​3-8; 6:​44; Galesia 4:​6, 7) Ol tabu Kristin ya oli bin kasem bigfala wok blong mekem.

‘Kam Fren Blong God’

9. ?God i mekem wanem blong givim jans long ol man blong oli kam fren blong hem bakegen?

⁹ !Jeova i rili glad long olgeta we oli kam “niufala man”! Pol i talem se: “Hemia God nomo we i stap mekem ol samting ya. Hem i mekem rod long Kraes, blong mekem we mifala i no moa enemi blong hem, mifala i fren blong hem. Mo hem putum wok ya long han blong mifala, blong mifala i pulum ol narafala man oli kam, oli fren blong hem. Tok ya we mi talem, i min se God i mekem rod long Kraes blong tekem ol man long wol oli kam, oli fren blong hem. Naoia, hem i no moa makem kaon blong ol sin blong olgeta. Mo hem i givim tok ya long mifala blong talemaot, se God i mekem rod finis, blong olgeta man oli save kam fren blong hem.” (2 Korin 5:​18, 19) Ol man oli stap longwe long God stat long taem we Adam i mekem sin. Be wetem lav, Jeova i mekem faswan step, i openem rod blong ol man oli kam fren blong hem bakegen tru long sakrefaes blong Jisas.​—Rom 5:​6-​12.

10. ?Jeova i givim long hu ‘wok ya blong mekem ol man oli fren blong hem’? ?Mo olsem wanem, olgeta ya we God i jusum, oli mekem wok ya?

¹⁰ Jeova i putum wok ya blong mekem ol man oli fren blong Hem, long han blong ol tabu Kristin. Taswe Pol i talem se: “From samting ya, mifala i mas blong karem tok blong Kraes, we God i stap yusum mifala blong singaot yufala. Long nem blong Kraes, mifala i talem long yufala se, ‘Plis, yufala i letem God i tanem yufala, yufala i no moa enemi blong hem, yufala i kam fren blong hem.’ ” (2 Korin 5:​20) Long ol taem bifo, taem klosap wan kantri i mekem faet, samtaem ol king oli sanem ol ambasada, blong toktok blong traem blokem faet bifo we hem i kamaot. (Luk 14:31, 32) From we olgeta man we oli gat sin oli stap longwe long God, hem i sanem ol ambasada we hem i makemaot, oli kam blong tijim ol man long rod ya blong fren wetem God. Olsem ol man we oli wok long nem blong Kraes, ol tabu Kristin oli stap askem long yumi se: “Plis, yufala i letem God i tanem yufala, yufala i no moa enemi blong hem, yufala i kam fren blong hem.” Hemia wan tok we i singaot yumi blong mekem pis wetem God mo blong akseptem rod we hem i mekem blong sevem man tru long Kraes.

11. ?Hu bambae i kam stret man long fes blong God, tru long bilif long ransom?

¹¹ Olgeta man we oli soem bilif long ransom sakrefaes, oli save kam fren blong God. (Jon 3:​36) Pol i talem se: “Kraes i no mekem sin nating. Be blong sevem yumi, God i mekem hem i karem ol sin blong yumi, blong God i save givim stret fasin blong hem long yumi ya we yumi joen long Kraes, blong mekem yumi kam stret man long fes blong hem.” (2 Korin 5:​21) Stret man ya Jisas, hem i givim sakrefaes ya blong kavremap sin blong olgeta pikinini blong Adam, blong i mekem oli fri long sin ya we oli bon wetem. Tru long Jisas, oli ‘kam stret man long fes blong God.’ Ol 144,000 man blong Kraes, olgeta nao oli faswan blong kam stret man long fes blong God. Biaen, long Wan Taosen Yia Rul blong Kraes, taem ol pikinini blong Jisas Kraes, Papa blong Olwe, we oli laef long wol ya, oli kam stret olgeta, bambae olgeta tu, oli kam stret man long fes blong God. Bambae Jisas i mekem oli kam stret gud, nao oli kam stret man long fes blong God. Long rod ya, oli pruvum se oli stap tru long God mo bambae oli kasem presen ya, laef we i no save finis.​—Aesea 9:6; Revelesen 14:1; 20:​4-6, 11-​15.

“Naoia i TaemBlong God i Givhan Long Ol Man”

12. ?Ol ambasada blong Jeova mo ol narafala man blong hem, oli mekem wanem impoten wok?

¹² Sipos yumi wantem se God i sevem yumi, yumi mas mekem laef blong yumi i laenap wetem tok ya blong Pol, se: “From we mifala i stap joen blong wok wetem God, mifala i talem long yufala bakegen, se God i givhan long yufala finis, long gladhat blong hem. Plis yufala i no mekem gudfala wok ya blong hem i go blong nating nomo. I gud yufala i harem tok blong hem we i talem se, ‘Long taem ya blong givhan long man, mi mi harem yufala. Long dei ya blong sevem man, mi mi givhan long yufala.’ Yufala i mas harem tok ya. Naoia i taem blong God i givhan long ol man. Tede i dei blong hem i sevem man.” (2 Korin 6:​1, 2) Ol tabu ambasada blong Jeova wetem ol narafala man blong hem, “ol narafala sipsip,” oli no mekem gladhat mo wok blong Papa blong olgeta long heven olsem nating nomo. (Jon 10:16) Oli holem stret fasin mo oli wok strong long wok blong prij ‘naoia we i taem blong God i givhan long ol man,’ oli traehad blong mekem God i glad long olgeta mo oli stap talemaot long ol man long wol se naoia, ‘i taem blong God i sevem man.’

13. ?Wanem stamba tingting blong Aesea 49⁠:​8, mo olsem wanem profet tok ya i kamtru fastaem?

¹³ Pol i talem bakegen tok we i stap long Aesea 49:8, se: “Bakegen, profet i talem long ol man blong hem we Hae God i talem se, ‘Olgeta. Long taem we mi mi luk se i stret blong mi sevem yufala, bambae mi mi gat sore long yufala, nao mi harem ol krae blong yufala, mi kam givhan long yufala. Bambae mi mi gad long yufala, mi blokemgud yufala, blong trabol i no kam kasem yufala.’ ” Faswan taem we profet tok ya i kamtru, hemia taem we ol man Isrel oli kam fri long kalabus long Babilon mo biaen oli gobak long kantri blong olgeta we i kam nogud.​—Aesea 49:​3, 9.

14. ?Olsem wanem Aesea 49⁠:8 i kamtru wetem Jisas?

¹⁴ Profet tok ya blong Aesea i kamtru bakegen taem Jeova i sanem Jisas, “man blong wok” blong hem i kam olsem “wan laet long ol man blong ol narafala kantri, blong bambae [God] i save sevem olgeta man long wol ya.” (Aesea 49:​6, 8; skelem wetem Aesea 42:​1-4, 6, 7; Matiu 12:18-​21.) Taem Jisas i stap long wol, hemia nao ‘taem blong God blong givhan long man.’ Hem i prea long God, mo God i “ansa” long hem. Hemia i dei we God i yusum Jisas blong “sevem man” from we Jisas i holemstrong long God fulwan. Long rod ya, hem “i sevem olgeta we oli obei long hem, i save holemgud olgeta, gogo i no save finis.”​—Hibrus 5:​7, 9; Jon 12:27, 28.

15. ?Wetaem ol man Isrel long saed blong spirit oli stat blong traehad blong soemaot se oli naf blong kasem gladhat blong God, mo wanem mak blong olgeta?

¹⁵ Pol i yusum Aesea 49:8 blong tokbaot ol tabu Kristin. Hem i askem strong long olgeta blong ‘no mekem se wok ya blong God blong givhan long olgeta wetem gladhat, i go blong nating nomo.’ Ating oli mekem olsem sipos oli no luksave ‘stret taem blong God’ blong givhan long ol man mo ‘dei blong God blong sevem man.’ Pol i gohed se: “Yufala i mas harem tok ya. Naoia i taem blong God i givhan long man. Tede i dei blong hem i sevem man.” (2 Korin 6:2) Stat long Pentekos yia 33 K.T., Isrel long saed blong spirit i traehad blong soemaot se hem i naf blong kasem gladhat blong God. Long rod ya, oli mekem se ‘stret taem ya blong God’ i save kam wan ‘dei we God i sevem olgeta.’

‘Mifala i Soemaot Klia Se Mifala i Minista Blong God’

16. Pol i soem se hem i rili wan minista blong God. ?Hem i stanap strong tru long wanem strongfala traem blong pruvum samting ya?

¹⁶ Samfala man we oli stap joen wetem kongregesen blong Korin oli no tinghevi long keagud fasin blong God. Oli mekem giaman toktok agensem Pol blong traem spolem wok blong hem olsem aposol, nating se hem i no wantem “mekem sam fasin we narafala i foldaon long hem.” Hem i soem klia se hem i rili wan minista blong God. Hem i ‘gat trabol, hem i gat hadtaem, hem i stap harem nogud tumas, be tingting blong hem i stap gud, i no foldaon. Long sam ples ol man oli wipim hem, long sam ples oli putum hem i kalabus, mo long sam ples oli ronem hem. Hem i hadwok we i bitim mak, we hem i no gat taem blong slip mo kakae.’ (2 Korin 6:​3-5) Biaen, Pol i talem se sipos olgeta ya we oli stap agensem hem, oli minista blong God, hem i “winim ol man ya” from we hem i go long kalabus, ol man oli wipim hem, laef blong hem i stap long denja, mo hem i no gat haos mo kakae, i bitim ol narafala man.​—2 Korin 11:23-​27.

17. (a) ?Yumi mas soem wanem fasin blong soem se yumi ol minista blong God? (b) ?Wanem ‘ol tul blong faet blong stret fasin’?

¹⁷ Olsem Pol mo ol fren blong hem, yumi tu, yumi save soemaot se yumi minista blong God. ?Olsem wanem yumi save soemaot samting ya? Hemia taem yumi holem “klin” fasin mo mekem laef blong yumi i laenap wetem stret save blong Baebol. Yumi save soemaot se yumi minista blong God taem yumi holem ‘longfala tingting,’ mo stanap strong taem wan samting i no stret, no taem ol man i jikim yumi. Mo tu, yumi save soem “kaen fasin” blong mekem ol samting we i blong givhan long ol narafala. Yumi save soem se yumi minista blong God taem yumi akseptem rod we yumi kasem blong lidim yumi tru long tabu spirit blong hem. Yumi soem “lav we i no blong giaman,” talem tru tok, mo dipen long hem blong i givim paoa long yumi blong gohed long minista wok blong yumi. Yumi intres tu blong save se Pol i pruvum se hem i minista blong God ‘taem hem i stap folem stret fasin nomo, mo hemia i olsem naef blong faet blong hem, mo i olsem stik blong hem blong blokem ara.’ Long taem blong faet bifo, man i yusum raet han blong hem blong holem naef blong faet mo lef han i holem sil. Long saed blong spirit, Pol i no talem se bambae yumi yusum ol fasin blong bodi​—⁠olsem fasin blong giaman mo trik​—⁠blong stap faet agensem ol giaman tija. (2 Korin 6:​6, 7; 11:12-​14; Proveb 3:​32) Hem i yusum “stret fasin,” blong mekem trufala wosip i go moa. Taswe, yumi tu i mas mekem olsem.

18. ?Sipos yumi ol minista blong God, bambae yumi soem wanem fasin?

¹⁸ Sipos yumi ol minista blong God, bambae yumi folem eksampel blong Pol mo ol Kristin we oli wok wetem hem. Sipos ol man oli respektem yumi, no nating sipos oli spolem yumi, be bambae yumi soem ol Kristin fasin. Sam man oli tok nogud long wok blong prij blong yumi, be samting ya bambae i no blokem yumi blong gohed long wok ya. Mo bambae yumi no kam flas sipos yumi kasem sam gudfala ripot from wok blong yumi. Yumi tokbaot trutok, mo ating ol man oli talem tangkiu long yumi from we yumi mekem ol wok blong God. Sipos ol enemi blong yumi oli spolem yumi, oli wantem kilim i ded yumi, bambae yumi trastem Jeova. Mo bambae yumi glad taem Jeova i stretem yumi.​—2 Korin 6:​8, 9.

19. ?Olsem wanem yumi save ‘mekem se plante man oli kam rij long saed blong spirit’?

¹⁹ Pol i finisim tok blong hem long saed blong ‘wok ya blong mekem ol man oli kam fren blong God,’ hem i tokbaot hem wan mo ol Kristin we oli wok wetem hem. Hem i talem se oli ‘kasem trabol, be oltaem oli glad tumas. Oli puaman, be oli stap mekem plante man oli rij. Oli no gat wan samting nating, be olgeta samting oli blong olgeta.’ (2 Korin 6:​10) Nating se ol minista ya oli gat sam risen blong harem nogud from we oli kasem trabol, be oli stap glad nomo. Oli pua long saed blong mane, be oli ‘mekem plante man oli kam rij’ long saed blong spirit. Yes i tru, ‘olgeta samting oli blong olgeta,’ from we bilif blong olgeta i mekem se oli kasem plante sas samting long saed blong spirit, mo oli kasem promes blong kam pikinini blong God long heven. Mo tu, oli gat wan laef we i rij mo hapi, olsem ol Kristin minista. (Ol Wok 20⁠:35) !Yumi save mekem i sem mak long olgeta, yumi save ‘mekem se plante man oli kam rij,’ sipos yumi joen long ‘wok blong mekem ol man oli kam fren blong God,’ from we God i stap sevem ol man long taem blong yumi!

Trastem Se Jeova i Save Sevem Ol Man

20. (a) ?Pol i traehad tumas blong mekem wanem samting, mo from wanem ol faswan Kristin oli lukaot gud blong no westem taem? (b) ?Wanem samting i soemaot se yumi stap laef long dei we God i sevem man?

²⁰ Pol i raetem namba tu leta blong hem long ol Kristin blong Korin, raonabaot long yia 55 K.T., sam 15 yia nomo bifo we fasin blong laef blong ol man Jyu i kasem en blong hem. Ol aposol oli traehad blong mekem se ol Jyu mo ol hiten man oli kam fren blong God, tru long Kraes. Taem ya i bin wan taem we God i sevem ol man, mo long taem ya, ol Kristin oli lukaot gud blong no westem taem blong olgeta. Naoia, yumi stap long wan taem we i sem mak long taem blong ol Jyu. Stat long 1914, yumi stap long en blong fasin blong laef blong wol ya. Yumi joen long bigfala wok blong talemaot Kingdom, mo wok ya i wan pruf we yumi stap long dei we God i sevem ol man.

21. (a) ?Wanem stamba vas blong yia 1999? (b) ?Yumi mas mekem wanem tede we i dei blong God i sevem man?

²¹ Ol man blong olgeta nesen oli nidim blong kasem save long plan blong God blong sevem ol man tru long Jisas Kraes. Naoia i no taem blong wet. Pol i raetem se: “!Yufala i luk! Naoia hem i dei blong sevem man.” Ol tok ya we oli kamaot long 2 Korin 6⁠:​2, hemia stamba vas blong yia 1999 we ol Witnes blong Jeova oli jusum. !Vas ya i stret nomo, from we yumi fesem wan taem we i impoten moa, i bitim taem we Jerusalem mo tempel blong hem oli lus! Bambae i no longtaem, fasin blong laef blong wol ya i lus, mo samting ya bambae i jenisim laef blong olgeta man long wol. Naoia, hemia taem blong wok. Ating bambae tumora i let tumas. Sipos yumi bilivim se Jeova nomo i save sevem man, sipos yumi laekem Jeova, mo sipos yumi wantem kasem laef ya we i no save finis, bambae yumi kasem ol frut blong gladhat blong God. Bambae hat blong yumi i pusum yumi blong soemaot long ol tok mo ol fasin blong yumi we yumi rili trastem Jeova taem yumi talem se: “!Yufala i luk! Naoia hem i dei blong sevem man.”

?Bambae Yu Ansa Olsem Wanem?

◻ ?From wanem fasin blong kam fren blong God i impoten tumas?

◻ ?Hu ya ol ambasada mo ol man we Jeova i sanem blong joen long wok blong pulum ol man oli kam fren blong Hem?

◻ ?Olsem wanem yumi save soemaot klia se yumi ol minista blong God?

◻ ?Stamba vas we ol Witnes blong Jeova oli jusum long yia 1999 i minim wanem long laef blong yu?

[Tok Blong Pija Long Pej 17]

?Yu yu wok strong long wok blong prij mo yu traehad blong halpem ol narafala blong kam fren blong God, olsem Pol i mekem?

Yunaeted Stet

Franis

Côte d’Ivoire

[Tok Blong Pija Long Pej 18]

Long taem blong yumi we i dei blong God i sevem man, ?yu yu stap long medel blong bigfala namba blong man we oli kam fren blong Jeova God?