Oli Mekem Samting We Jeova i Wantem
Wan Fasin Fogif i Openem Rod Blong Sevem Plante Man
OL TEN boe blong Jekob oli stanap long fes blong Praem minista long Ijip, nao tingting blong olgeta i nogud from wan samting we oli fraet blong talem. Sam yia bifo, oli salemaot brata blong olgeta Josef blong i kam slef nomo. Ale, oli wantem giaman long Papa blong olgeta, se wan wael anamol i kilim hem i ded.—Jenesis 37:18-35.
Naoia 20 yia i pas finis, mo kakae we i sot tumas i mekem oli godaon long Ijip blong pem sam kakae olsem wit. Be i no isi long olgeta. Praem minista i stap lukaot long kakae tu, mo man ya i talemaot poen long olgeta se olgeta oli spae, oli kam haed blong lukluksave we kantri ya i strong no nogat. Hem i putum wan long olgeta long kalabus, mo ol narafala, oli mas gohom blong tekem lasbon brata blong olgeta we nem blong hem Benjamin, nao biaen oli save kambak wetem hem. Taem oli kambak, Praem minista i wokem wan plan finis, nao i talem long ol gad blong hem blong holem Benjamin.—Jenesis 42:1 kasem 44:12.
Juda, wan boe blong Jekob, i traem toktok. Hem i talem se: ‘Sipos mifala i gobak mo Benjamin i no kam wetem mifala, be papa blong mifala bambae i ded.’ Nao wan samting i hapen we Juda olgeta, oli sek long hem. Praem minista i girap, i mekem evriwan oli aot long ples ya, ol boe blong Jekob nomo oli stap, mo hem i stat krae bigwan. Nao taem hem i kamgud bakegen, hem i talem se: “!Mi mi Josef ya!”—Jenesis 44:18 kasem 45:3.
Hem i Fogif Mo Oli Kam Fri
Josef i askem ol brata blong hem se: “I tru we papa blong yumi i stap yet?” Oli no ansa. Oli no save talem wan tok. From we oli no save sipos oli mas glad no sipos oli mas fraet. Maet oli save fraet from we 20 yia bifo oli salemaot man ya blong i kam slef nomo. Naoia Josef i gat paoa blong putum olgeta long kalabus, no ating hem i save ronemaot olgeta we oli no gat kakae nating. !Moa nogud yet, ating man ya i save kilim olgeta i ded! Taswe ol brata blong Josef ya oli gat gud risen blong “oli fraet we oli fraet, nao oli no save talem wan samting.”—Jenesis 45:3.
Kwiktaem nomo, Josef i kwaetem ol man ya. Hem i talem se: “Plis, yufala i kam klosap long mi.” Oli obei. Nao hem i talem se: “Mi mi Josef ya. Mi mi brata blong yufala we yufala i bin salemaot mi bifo, blong mi kam slef blong ol man blong ples ya. Be i nogud yufala i stap harem nogud, mo i nogud yufala i stap jajem yufala from we yufala i salemaot mi olsem. Hemia i no wok blong yufala, i wok blong God ya we i sanem mi mi kam fastaem long yufala long ples ya, blong mi save sevem laef blong ol man.”—Jenesis 45:4, 5.
Josef i save fogivim olgeta naoia. Hem i luksave finis we olgeta oli gat sore from samting we oli bin mekem. Wan eksampel, taem hem i bin talem strong long olgeta se oli spae nomo, hem i harem we oli stap taltalem long olgeta se: “!Yu luk! Naoia yumi stap kasem panis from trabol ya we yumi mekem long brata ya blong yumi bifo . . . !Taswe bigfala trabol ya i kasem yumi naoia!” (Jenesis 42:21) Mo tu Josef i luk we Juda i wantem kam slef long ples blong Benjamin, blong yang man ya i gofri blong gobak long papa blong hem.—Jenesis 44:33, 34.
Taswe i stret blong Josef i fogif. Hem i kasemsave se fasin ya blong hem i save sevem laef blong olgeta famle blong hem. From samting ya, hem i talem long ol ol brata blong hem blong gobak bakegen long papa blong olgeta Jekob. Nao oli mas talem long papa ya, se: “Mi mi Josef, mi pikinini blong yu. God i putumap mi blong mi stap lukaot long olgeta ples long kantri ya Ijip. I gud yu aot long ples blong yu naoia nomo, yu kam stap wetem mi. Bambae yu save stap long ples ya Gosen, we i klosap nomo long ples blong mi. Nao yu, wetem ol brata ya blong mi, mo ol smol bubu blong yu, mo ol anamol blong yufala, mo ol narafala samting we yu yu gat, yufala evriwan i save stap long ples ya. Sipos yufala i kam stap long Gosen, bambae mi mi save lukaot gud long yu.”—Jenesis 45:9-11.
Bigfala Josef
I stret blong talem se Jisas i olsem wan bigfala Josef. Plante fasin blong tufala man oli sem mak nomo. Ol brata blong Josef oli mekem trabol long hem, mo ol brata blong Jisas we oli pikinini blong Ebraham tu, oli mekem trabol long Jisas. (Lukluk wetem Ol Wok 2:14, 29, 37.) Mo tu, laef blong tufala man ya i jenis bigwan. Josef i no moa slef, hem i kam Praem minista, nambatu man afta king Fero. Long sem fasin, Jeova i mekem Jisas i girap bakegen long ded mo i leftemap hem i go antap long evriwan, “blong i stap long raetsaed blong hem.”—Ol Wok 2:33; Filipae 2:9-11.
Josef i Praem minista, nao hem i save givimaot kakae long olgeta we oli kam long Ijip blong pem ol kakae olsem wit. Tede, bigfala Josef i gat wan kampani we i olsem wan slef we i stret mo waes, blong givimaot kakae blong spirit “long stret taem blong hem.” (Matiu 24:45-47; Luk 12:42-44) Olgeta we oli kam long Jisas, “bambae oli no moa hanggri bakegen, oli no moa tosta bakegen . . . from we smol sipsip ya we i stap long medel blong bigfala jea blong God, hem bambae i lukaot long olgeta . . . hem bambae i lidim olgeta oli go dring long springwota ya we i save givim laef”.—Revelesen 7:16, 17.
Wan Lesen Blong Yumi
Yumi save folem gudfala fasin sore blong Josef. Sipos Josef i folem stret fasin nomo, bambae hem i save panisim olgeta we i salemaot hem blong hem i kam slef. Hem i no mekem olsem. Mo sipos Josef i folem ol filing blong hem nomo, maet hem i save fogetem nomo rong ya blong olgeta. Be Josef i no mekem olsemia tu. Hem i traem ol brata blong hem fastaem blong save sipos oli rili jenis. Nao biaen, hem i luk we oli gat tru sore, ale hem i fogivim olgeta.
Yumi save mekem olsem Josef. Sipos wan man i mekem sin agens long yumi, mo afta hem i rili sore long samting we hem i mekem, yumi mas fogivim hem. Tru, i nogud blong letem ol filing blong yumi oli winim yumi, nao yumi no moa tingbaot ol bigfala rong. Mo tu, i nogud blong letem kros i blokem yumi, nao yumi no save fogif taem wan man i rili sore. ‘Yumi mas givgivhan long yumi, mo taem wan long yumi i gat wan poen agens long narawan, tufala ya i mas fofogivim tufala.’ (Kolosi 3:13) Sipos yumi mekem olsem, bambae yumi olsem Jeova, we i “rere blong fogif.”—Ol Sam 86:5, NW; Maeka 7:18, 19.