Strong Tingting Blong Folem Rod Blong Fasin Blong Laef We God i Glad Long Hem

!Asembli ya “Fasin Blong Laef We God i Glad Long Hem” i givhan bigwan long ol man we oli wantem mekem wok blong God! Wan sista i tokbaot asembli ya olsem “wan nambawan taem blong kasem tijing, leftemap tingting, mo givim save we i moa klia.”

WAN narafala i talem se “i gat fulap samting blong mekem yumi haremgud, blong yumi tingting dip long hem, mo blong yumi kasem save moa.” Bambae yumi tokbaot ol tijing we oli kamaot long taem ya.

Jisas Kraes​—Rod Ya, Trutok Ya, Laef Ya

Hemia stamba tok long faswan dei blong asembli. (Jon 14:6) Faswan tok i eksplenem from wanem yumi joen tugeta long asembli ya: blong kasem moa tijing long saed blong beswan rod blong laef, yes rod ya blong God we i lidim man i go long laef. Jeova i tijim ol man blong hem olsem wanem oli save folem ol fasin blong hem. Hem i mekem samting ya tru long Baebol, ‘slef we i stret mo waes,’ mo tabu spirit. (Matiu 24:​45-​47; Luk 4:⁠1; 2 Timoti 3:​16) !I wan nambawan jans blong kasem tijing blong Hae Rula blong heven mo wol!

Bigfala tok we i laenap wetem stamba tok blong dei ya, hemia “Ransom Blong Kraes​—Rod Blong God Blong Sevem Man.” Blong folem fasin blong laef we God i glad long hem, i impoten tumas blong yumi luksave wok we Jisas Kraes i gat long plan blong God. Man we i givim tok ya i talem se: “Nomata wanem kaen bilif no wok blong ol man, God i no save givim laef we i no save finis long olgeta, sipos i no gat ransom sakrefaes.” Biaen, brata hem i tokbaot Jon 3:​16, we i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” Blong yumi bilif long ransom sakrefaes blong Kraes, yumi mas kasem stret save long trutok. Mo tu yumi mas givim laef blong yumi i go long Jeova, mo soemaot samting ya tru long baptaes long wota, mo laef blong yumi i mas folem eksampel we Jisas Kraes i soem.​—1 Pita 2:​21.

Aftenun i stat wetem tok ya “Lav Hem i Rod We i Wokgud Oltaem.” Tok ya i eksplenem ol wanwan vas long 1 Korin 13:​4-8. Hemia ol tok we Pol i yusum blong tokbaot lav. Ol man we oli lesin long tok ya, oli harem bakegen se lav we i no tingbaot hem wan, i wan mak blong Kristin skul. Mo fasin blong lavem God mo ol man raonabaot long yumi, i wan impoten haf blong wosip we Jeova i glad long hem.

Tok we i kam biaen i gat tri haf long hem se, “Ol Papa Mama​—⁠Tijim Ol Pikinini Blong Yufala Blong Folem Fasin Blong Laef We God i Glad Long Hem.” Sipos ol papa mama oli givim gudfala eksampel blong ridim mo stadi long Tok blong God, bambae oli givhan long ol pikinini blong olgeta blong mekem wok blong God. Sipos oli mekem famle stadi oltaem, bambae oli mekem se trutok i gru insaed long ol pikinini blong olgeta. Ol papa mama oli skelemgud stadi ya blong mekem se hem i stret long ol samting we famle i nidim. I impoten tu blong givhan long ol pikinini blong oli joen long ol wok insaed long kongregesen mo long wok blong prij. Long wol ya we i rabis, i no isi blong tijim ol pikinini blong oli fraetgud long God. Be, sipos papa mama i traehad blong mekem olsem, bambae oli kasem bigfala blesing.

Afta long tok ya we i gat tri haf long hem, i gat tok ya se “Letem Jeova i Jenisim Fasin Blong Yu, Blong Yu Save Givim Moa Ona Long Hem.” Olsem wan man we i wokem graonpot, God i wokem olgeta we oli wantem mekem wok blong hem. (Rom 9:​20, 21) Hem i mekem olsem taem hem i givim ol advaes insaed long Tok blong hem mo tru long ogenaesesen blong hem. Bambae Jeova i givhan long yumi blong yusum gudhan blong yumi fulwan, sipos yumi stap rere oltaem blong wok, yumi akseptem ol jans we oli kamtru long yumi, mo yumi letem hem i lidim yumi long rod.

Wan nambawan haf long program i kam biaen​—“Wok Blong Ol Misinari.” Naoia i gat 2,390 Kristin brata mo sista we oli wok olsem misinari long 148 kantri blong wol. Oli givim wan gudfala eksampel blong fasin blong stap tru long God mo blong wok strong. Mo tu oli tangkiu bigwan from jans we oli gat blong wok long ol narafala kantri. Long ol intenasnal asembli, tok ya i givim jans long ol misinari blong oli tokbaot ol traem mo ol glad blong misinari laef.

Laswan tok blong faswan dei, stamba tok blong hem se “?I Gat Laef Afta Ded?” Blong plante taosen yia, kwestin ya i mekem se tingting blong ol man i fasfas. Ol man blong evri kantri oli traem faenem ansa long kwestin ya mo oli givim plante defren kaen ansa long hem. Ol ansa ya oli defdefren folem ol kastom mo skul blong ol man ya. Be ol man oli nidim yet blong lanem trutok.

Taswe, man we i givim tok ya i talem se i gat wan niufala buklet blong 32 pej long kala, we nem blong hem ?Wanem Bambae i Hapen Long Yumi Taem Yumi Ded? Buklet ya i eksplenem stamba blong tijing ya se sol i no save ded, mo hem i soemaot olsem wanem bilif ya i kam wan impoten tijing long klosap olgeta skul long wol tede. Buklet ya i tok klia mo i pulum tingting blong man blong lukluk wanem we Baebol i talem long saed blong sol, from wanem yumi ded, mo wanem i hapen long yumi taem yumi ded. Buklet ya i eksplenem tu, wanem hop blong ol dedman mo blong olgeta we oli laef. !Buklet ya bambae i givhan bigwan long ol man blong evri ples, we oli lukaot trutok!

Lukaotgud Long Ol Fasin We Yufala i Stap Mekem

!Stamba tok ya we i stap long namba tu dei blong asembli ya i stret nomo! (Efesas 5:⁠15) Program long moning i tokbaot wok blong prij mo blong mekem disaepol. Afta long toktok blong vas blong dei, program i gohed wetem tok ya “Givhan Long Ol Man Blong Wokbaot Long Rod Blong Laef.” Blong mekem wok ya, i impoten blong gat stret tingting. Yumi mas luksave se wok ya blong serem trutok long narafala i wan jans mo wan oda we yumi kasem. Long ol faswan handred yia K.T. bighaf blong ol man oli sakemaot Tok blong God. Be nating se i gat fasin agens, i bin gat sam man we ‘oli stret blong kasem laef we i no save finis, mo olgeta ya oli bilif.’ (Ol Wok 13:​48, 50; 14:​1-5) Tede i sem mak. Nating se i gat plante man we oli no bilif long Baebol, yumi gohed yet blong traem faenem olgeta we bambae oli soem intres.​—Matiu 10:​11-​13.

Nekis tok i tokbaot bigfala wok blong karem mesej we i givim laef, i go long ol narafala. Tede i hadwok blong faenem ol man long haos blong olgeta. Taswe yumi mas traem mekem wok ya fulwan mo faenem ol niufala rod blong kasem plante moa man wetem tok blong kingdom. Long plante kantri, ol pablisa we oli talemaot gud nius oli karem frut, taem oli prij long telefon mo long ol bisnes teritori. From samting ya, oli faenem ol man we i had blong kasem olgeta long haos blong olgeta.

Tok ya “Tijim Ol Disaepol Long Olgeta Tok Blong Jisas,” i makemgud olsem wanem i impoten blong gat gudhan long wok blong prij. Tijing blong yumi i kamgud moa taem yumi lanem samting from narafala mo yumi yusum nambawan trening we yumi kasem long ol miting. Moa yumi tij gud blong givhan long ol man blong oli save Baebol, moa yumi glad mo haremgud long wok ya.

Program long moning i finis wetem tok we i eksplenem mining blong givim laef blong yumi long Jeova mo baptaes. Brata we i givim tok i talem poen ya se, sipos yumi trastem God fulwan mo yumi traehad blong mekem wok blong hem, bambae hem i blesem yumi mo hem i sapotem yumi. Wan waes man i bin raetem se: “Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” (Proveb 3:⁠6) Long asembli ya, taem blong baptaes i impoten blong soem se plante man oli stat finis blong folem fasin blong laef blong God.

Afta long spel, program blong aftenun i stat wetem tok ya se “Wok Wetem Tingting Blong Stap Laef Gogo i No Save Finis.” Stamba tingting blong God se, olgeta man long wol ya oli obei long hem blong olwe, bambae i mas kamtru. Taswe i stret we olgeta tingting blong yumi, plan blong yumi, mo hop blong yumi, oli stanap long wok blong Jeova blong olwe. Nating se yumi tingbaot “dei blong Jeova” oltaem, i impoten tumas we yumi no fogetem se mak blong yumi i blong mekem wok blong God gogo i no save finis. (2 Pita 3:12) Yumi no save wetaem bambae Jisas i mekem jajmen blong God agensem ol man i kamtru. Samting ya i mekem se yumi mas stap wekap, mo i givim jans long yumi blong pruvum se yumi no stap mekem wok blong Jeova jes blong kasem samting we yumi nomo i wantem.

Tufala tok we i kam biaen oli stanap long japta 4 blong leta blong Pol long ol man Efesas. Wan long ol samting we i kamaot long tok ya, hem i long saed blong “ol man we oli olsem presen,” hemia bigman long saed long spirit, we tabu spirit i putumap olgeta. Ol elda ya oli talem ol advaes mo rod we yumi mas folem blong haremgud long saed long spirit. Mo tu leta blong Pol, we i kamaot from tabu spirit, i pusum yumi blong “kam niufala man.” (Efesas 4:​8, 24) Fasin we i olsem God hemia fasin sore, kaen fasin, fasin daon, kwaet fasin, longfala tingting, mo lav.​—Kolosi 3:12-14.

Nekis tok i soemaot se sipos yumi stap lukaot gud long ol fasin blong yumi, i minim se yumi lukaot gud tu se ol rabis fasin blong wol ya oli no spolem yumi. I nidim fasin skelem taem yumi jusum ol pleplei, taem yumi joen wetem narafala, mo long ol samting long saed blong bodi. Sipos yumi folem advaes blong Jemes 1:​27, blong no letem ol rabis fasin blong wol oli spolem yumi, bambae yumi haremgud from we yumi klin long fored blong God mo tingting blong yumi i no jajem yumi. Mo tu laef blong yumi i gat mining. Laef ya bambae i fulap long pis, yumi haremgud long saed blong spirit, mo yumi gat nambawan kampani.

Afta i gat wan tok wetem tri haf long hem se “Ol Yangfala​—Folem Ol Rod Blong God.” God i laekem ol yangfala mo hem i glad long traehad we oli mekem blong holemstrong long klin wosip. From we ol yangfala oli save samting ya, oli mas trenem tingting blong olgeta blong luksave wanem i stret mo wanem i no stret, nao oli save mekem wok blong God, mo stap tru long hem. Wan rod blong trenem tingting blong olgeta olsem, i blong ridim Tok blong God evri dei, mo tingting dip long hem. Sipos yumi mekem olsem, yumi lanem ol fasin blong Jeova. (Ol Sam 119:​9-​11) Fasin ya blong luksave wanem i gud mo wanem i nogud, i save kam antap tu, sipos ol yangfala oli akseptem ol waes advaes blong papa mama blong olgeta, ol elda, mo ol buk blong Sosaeti. Taem ol yangfala oli yusumgud fasin luksave blong olgeta, bambae oli no bisi tumas wetem ol samting long saed blong bodi, oli no yusum ol doti tok, mo oli no bitim mak long ol pleplei, olsem wol ya we i stap longwe long God i stap mekem. Ol yangfala mo ol olfala we oli folem fasin blong laef we God i glad long hem, oli haremgud from we oli kasem gudfala frut.

Laswan tok blong dei ya se “Man We i Wokem Yumi​—Ol Fasin Mo Rod Blong Hem.” Brata we i givim tok ya i soemaot se plante bilyan man oli no save Man ya we i wokem olgeta. Nao hem i gohed se: “Trufala mining blong laef i laenap stret wetem save blong Man We i Wokem Yumi, we i God blong yumi. Yumi mas luksave ol fasin blong hem, mo folem ol rod blong hem. . . . I gat sam samting long saed blong wol ya mo bodi blong yumi, we oli save givhan long ol man, blong agri se i gat wan Man We i Wokem Yumi we i stap. Mo yumi save givhan long olgeta blong oli faenem se mining blong laef blong olgeta i laenap wetem Hem.” Man we i givim tok ya i tokbaot ol samting we oli soem klia se i gat Man We i Wokem yumi we hem i waes mo i laekem yumi. Taem tok ya i finis oli talemaot niufala buk ya​—Is There a Creator Who Cares About You?

“Hemia Nao Rod Ya, Wokbaot Long Hem”

Hemia stamba tok blong namba tri dei long asembli ya. (Aesea 30:⁠21) Program i stat wetem wan gudfala tok we i gat tri haf long hem, we i tokbaot vison blong Esikel long saed blong tempel blong God. Vison ya i impoten tumas long ol man blong God tede from we i tokbaot klin wosip long taem blong yumi. Wan rod blong kasem save long vison ya hemia se: Bigfala tempel blong Jeova long saed long spirit i minim ol samting we hem i stanemap blong sapotem klin wosip. Ol tok ya oli eksplenem gud ol defren haf blong vison ya. Long taem ya, olgeta we oli stap lesin, oli tingting dip long wok we oli stap mekem blong sapotem ol tabu brata we oli wok olsem ol elda we oli gat lav, mo wok blong olgeta ya we bambae oli joen long grup blong ‘Jif.’

Biaen long semfala moning ya, i gat wan drama we i laef mo we i kamaot long Baebol. Long drama ya wan grup blong man i werem klos blong bifo. Stamba tok blong drama ya se “Ol Famle​—!Mekem Baebol Riding i Kam Wan Fasin Blong Laef Evri Dei!” Hem i soemaot bilif mo strong tingting blong ol trifala Hibru man ya we oli no wantem bodaon long pija blong gol we Nebukadnesa, King blong Babilon, i stanemap. Stamba mak long drama ya i blong soem se Baebol i no wan olfala buk nomo. Ol advaes blong Baebol oli stret long ol yangfala mo ol bigman tu long taem blong yumi.

Long program blong aftenun i gat pablik tok ya “Wan Rod Nomo Blong Kasem Laef We i No Save Finis.” Afta we brata we i givim tok i tokbaot olsem wanem ol man oli foldaon long sin mo biaen oli ded, hem i finisim tok blong hem wetem ol tok we oli pusum yumi blong tingting dip, se: “Vas blong Baebol blong stamba tok blong tede i kamaot long Aesea japta 30, vas 21. Vas ya i talem se: ‘Sipos yufala i lusum rod, we yufala i gowe long hem long saed i go lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, “Hemia rod. Yufala i folem.” ’ ?Olsem wanem yumi harem voes ya? Yumi mas lesin long Tok blong God, Tabu Baebol, mo folem rod we Jeova i givim tru long hem. Mo tu, yumi mas folem Kristin ogenaesesen blong hem tede. Yes, hem i rod ya nomo we i lidim man i go long laef blong olwe.”

Afta long Wajtaoa stadi blong wik ya i gat laswan tok se, “Gohed Blong Wokbaot Long Rod Blong Jeova.” Tok ya, i mekem yumi tingtingbak long ol stamba poen blong asembli ya. Nao, brata we i givim tok ya i talemaot wan disisen we i soem strong tingting blong gohed blong folem fasin blong God.

Afta we brata i ridimaot disisen ya finis hem i talem strong tok ya se: “Yumi mekem strong disisen ya from we, long tingting blong yumi, i no gat narafala rod we i moagud bitim hemia: blong folem ol rul, ol advaes mo ol narafala tok blong Baebol. Taem yumi folem Baebol i olsem we yumi putum wan strong fandesen blong fiuja. Nao bambae yumi save kasem laef ya we i prapawan. Be antap long olgeta risen ya, yumi mekem strong disisen ya from we yumi laekem Jeova God long olgeta hat, sol, tingting, mo paoa blong yumi.” Olgeta man we oli stap lesin oli soem se oli agri long disisen ya taem oli talem long strong voes se: yes.

[Bokis blong pija long pej 8]

?I Gat Wan Man We i Wokem Yumi Mo We i Kea Long Yumi?

Hemia stamba tok blong niufala buk ya we i soem klia pruf se Man We i Wokem Yumi, Jeova, i rili stap, mo i tokbaot ol fasin blong hem. Buk ya i stret long ol man we oli gat hae save long saed blong wol we, be oli no bilif long God. Buk ya blong 192 pej, bambae i mekem bilif blong olgeta we oli bilif finis long God i kam strong moa, mo i givhan long olgeta blong laekem ol fasin mo tingting blong Hem.

Buk ya Is There a Creator Who Cares About You? we i stap long engglis mo franis, i no tok olsem se olgeta we oli ridim hem oli bilif finis long God. Be hem i tokbaot olsem wanem ol samting we sayens i faenemaot i no longtaem, oli pruvum se i gat wan Man We i Wokem Yumi i stap. I gat sam japta olsem: “?Wanem i Givim Mining Long Laef Blong Yu?,” “Olsem Wanem Yunivas i Kamaot?​—Defren Tingting,” mo “!Yu Yu Defren Long Ol Narafala!” Sam narafala japta oli soemaot from wanem yumi sua se Baebol i kamaot long God. Mo tu, niufala buk ya i givim save long saed blong Baebol, from we Baebol i soemaot ol fasin blong Man ya We i Wokem Yumi. Buk ya i tokbaot from wanem God i letem man i safa, be tu i eksplenem olsem wanem bambae God i finisim fasin ya fulwan.

[Tok Blong Pija Long Pej 7]

Fulap man i tekem baptaes

[Tok Blong Pija Long Pej 7]

A. D. Schroeder, wan memba blong Hed kampani blong ol Witnes blong Jeova, i talemaot niufala buklet we i kamaot

[Tok Blong Pija Long Pej 8, 9]

Wan drama we i gat filing i leftemap fasin blong ridim Baebol evri dei