?Ol Prea Blong Yu Oli “Olsem Smok Blong Insens”?

‘Plis yu letem prea blong mi i kam olsem smok blong insens long fored blong yu.’​—OL SAM 141:2.

1, 2. ?Fasin blong bonem insens i minim wanem?

JEOVA GOD i talem long profet blong hem, Moses, se hem i mas mekem rere tabu insens blong yusum long haos tapolen, we i ples blong mekem wosip blong ol man Isrel. Blong mekem tabu insens ya, Moses i mas meksemap fo defren kaen paoda we oli gat gudfala smel. (Eksodas 30:34-​38) Tabu insens ya, smel blong hem i gud tumas.

² Kontrak blong loa we God i mekem wetem nesen blong Isrel i talem se ol man Isrel oli mas bonem insens evri dei. (Eksodas 30:7, 8) ?Fasin ya blong yusum insens i gat spesel mining? Yes, from we man blong raetem Ol Sam i singsing se: ‘Plis yu letem prea blong mi i kam olsem smok blong insens long fored blong yu. Taem mi leftemap han blong mi blong prea long yu [Jeova], plis yu glad long mi olsem we yu glad long ol sakrefaes ya we pris i stap bonem long sapa.’ (Ol Sam 141:2) Long buk blong Revelesen, aposol Jon i tokbaot olgeta ya we oli stap raon long bigfala jea blong God long heven. Hem i talem se oli stap holem ol besin blong gol we oli fulap long insens. Ol tok ya we oli kamaot long God, oli talem se insens “i olsem ol prea blong ol man blong God.” (Revelesen 5:8) Taswe, fasin ya blong bonem insens we i gat gudfala smel, i minim ol prea we ol man blong Jeova oli stap mekem long dei mo long naet, mo Jeova i agri long olgeta.​—1 Tesalonaeka 3:​10; Hibrus 5:7.

3. ?Wanem i save halpem yumi blong ‘mekem prea we i olsem smok blong insens long fored blong God’?

³ Sipos yumi wantem se God i agri long prea blong yumi, yumi mas prea long hem tru long nem blong Jisas Kraes. (Jon 16:23, 24) ?Be olsem wanem yumi save mekem ol prea blong yumi oli kam moa gud? Bambae yumi luk sam eksampel blong prea we Baebol i tokbaot. Ol eksampel ya oli save halpem yumi blong mekem ol prea we oli olsem smok blong insens long fored blong Jeova.​—Proveb 15:8.

Prea Wetem Bilif

4. ?Olsem wanem bilif i wan impoten samting blong mekem se God i agri long ol prea blong yumi?

⁴ Sipos yumi wantem se ol prea blong yumi oli go long God olsem smok blong insens we i gat gudfala smel, yumi mas prea wetem bilif. (Hibrus 11:6) Taem ol Kristin elda oli luk se wan man we i sik long saed blong spirit, i lesin long advaes blong Baebol we oli givim long hem, ‘prea we elda ya oli mekem wetem bilif bambae i givhan long man ya blong i kam gud bakegen.’ (Jemes 5:​15) Papa blong yumi long heven i glad tumas taem yumi prea long hem wetem bilif. Hem i glad tu long prea we yumi mekem taem yumi stap stadi long Tok blong hem. Man blong raetem Ol Sam i soemaot nambawan tingting taem hem i singsing se: ‘Bambae mi mi leftemap han blong mi blong prea long yu. Mi mi stap tinghevi long ol tok we yu yu putum, mo mi laekem olgeta tumas. Oltaem nomo, bambae mi stap tingting gud long ol tijing ya blong yu. Plis yu givim waes mo save long mi from we mi mi trastem ol tok we yu yu putumap.’ (Ol Sam 119:48, 66) I gud yumi ‘leftemap han blong yumi,’ ale yumi prea long Jeova wetem tingting daon mo folem ol loa blong hem. Olsem nao, yumi soem se yumi bilif long hem.

5. ?Yumi save mekem wanem sipos yumi sot long waes?

⁵ Maet yumi sot long waes we yumi nidim blong winim wan bigfala traem. No maet yumi no sua long wan impoten profet tok blong Baebol we i stap kamtru naoia. Nating se i olsem, yumi no mas letem samting ya i mekem yumi kam slak long saed blong spirit, be yumi mas askem long God blong i givim waes long yumi. (Galesia 5:​7, 8; Jemes 1:​5-8) Tru ya, yumi no mas ting se bambae God i ansa long yumi tru long wan merikel, no gat. Blong soemaot se yumi prea wetem fulhat blong yumi, yumi mas mekem ol samting we God i wantem ol man blong hem oli mekem. Oltaem yumi mas stadi long Baebol mo ol buk we yumi kasem tru long ‘slef we i stret mo waes’ blong bildimap bilif blong yumi. (Matiu 24:45-​47; Josua 1:​7, 8) Mo oltaem, yumi mas joen wetem ol man blong God long ol miting, blong bildimap save blong yumi long saed blong God.​—Hibrus 10:24, 25.

6. (a) ?Yumi evriwan i mas luksave wanem samting long saed blong taem blong yumi mo ol profet tok blong Baebol we oli stap kamtru? (b) Yumi mas askem long Jeova blong mekem nem blong hem i tabu. ?Be, wanem narafala samting we yumi mas mekem?

⁶ Tede, samfala Kristin oli stap ronem ol samting we olgeta nomo oli wantem mo oli mekem sam kaen wok blong winim plante mane. Oli fogetem se naoia, yumi kam klosap tumas long “taem blong en.” (Daniel 12:4) I stret nomo we ol man blong bilif oli askem long God blong givhan long olgeta ya, blong oli bilif strong bakegen long ol pruf blong Baebol se stat long 1914, Kraes i stap olsem King we Jeova i putumap long heven, mo se naoia, Jisas i stap rul long medel blong ol enemi blong hem. (Ol Sam 110:​1, 2; Matiu 24:3) Yumi evriwan i mas luksave se ol profet tok we oli talem se “Bigfala Babilon”​—⁠olgeta giaman skul​—⁠bambae i lus, Gog blong Magog, hemia Setan, bambae i agensem ol man blong Jeova, mo God ya we i gat Olgeta Paoa bambae i sevem ol man blong hem long faet blong Amageden, bambae oli mekem ol man oli sek mo bambae oli hapen long wan sotfala taem nomo. (Revelesen 16:14, 16; 18:​1-5; Esikel 38:18-​23) Taswe, i gud we yumi askem long God blong i halpem yumi blong wekapgud long saed blong spirit. I gud we yumi evriwan i prea long Jeova wetem fulhat blong yumi, yumi askem hem blong mekem nem blong hem i tabu, mo blong mekem ol samting we hem i wantem oli kamaot long wol ya olsem oli kamaot finis long heven. Yes, i gud we yumi gohed blong soemaot bilif blong yumi mo pruvum se ol prea blong yumi oli kamaot long hat blong yumi. (Matiu 6:​9, 10) Tru ya, man we i laekem Jeova tumas i mas lukaot Kingdom mo stret fasin fastaem, mo joen fulwan long wok blong talemaot gud nius bifo we en i kam.​—Matiu 6:​33; 24:14.

Presem Jeova Mo Talem Tangkiu Long Hem

7. ?Wanem samting we yu laekem tumas long saed blong prea blong Deved we i stap long 1 Kronikel 29⁠:​10-13?

⁷ Wan impoten rod blong ‘mekem prea we i olsem smok blong insens,’ hemia taem yumi presem God mo talem tangkiu long hem wetem fulhat blong yumi. King Deved i mekem wan prea olsem taem hem wetem ol man Isrel, oli givim presen blong bildim tempel blong Jeova. Deved i prea se: “Hae God. Yu yu God blong Isrel, we i olfala bubu ya blong mifala bifo. Bambae mifala i stap presem yu oltaem, gogo i no save finis. Yu yu hae we yu hae, mo yu gat olgeta paoa. Nem blong yu i hae, mo yu yu gud tumas. Yu yu king we yu rul long paoa blong yu. Olgeta samting long heven mo long wol oli blong yu nomo. Yu yu king we yu hae we yu hae olgeta, mo yu rul long olgeta ples. Ol gudgudfala samting we i save mekem man i kam rijman oli kamaot long yu nomo. Yu yu strong we yu strong, mo yu stap rul long olgeta samting long paoa blong yu. Yu nomo yu save mekem man i kam haeman mo i kam strong. God blong mifala, naoia mifala i talem tangkiu long yu, mo mifala i presem haenem blong yu.”​—1 Kronikel 29:10-​13.

8. (a) Long Ol Sam 148 kasem 150, ?wanem tok blong presem God i rili kasem hat blong yu?

⁸ !Ol tok ya blong presem God mo talem tangkiu long hem, oli naes tumas! Maet yumi no yusum ol naesfala tok olsem long ol prea blong yumi. Nating se i olsem, yumi save gat sem fasin ya blong prea wetem fulhat blong yumi. Buk blong Ol Sam i fulap long ol prea blong presem God mo talem tangkiu long hem. Long Ol Sam 148 kasem 150, yumi save faenem ol nambawan tok blong presem God. Plante long Ol Sam, oli gat ol tok blong talem tangkiu long God. Deved i singsing se: “Mi mi askem wan samting long Hae God, wan samting nomo we mi mi wantem. Mi wantem tumas blong mi save stap long haos blong hem oltaem long laef blong mi, blong mi stap lukluk ol gudgudfala fasin blong hem, mi stap tingting gud long olgeta, mo blong mi save askem long hem blong i lidim mi oltaem.” (Ol Sam 27:4) Blong soem se yumi wok folem prea ya, yumi mas gohed strong long wok we Jeova i givim long ol man blong hem. (Ol Sam 26:12) Taem yumi mekem olsem mo yumi tingting dip long Tok blong God evri dei, bambae yumi luk plante risen blong presem Jeova mo blong talem tangkiu long hem wetem fulhat blong yumi.

Lukaot Help Blong Jeova Wetem Tingting Daon

9. ?Olsem wanem King Asa i prea, mo wanem frut i kamaot from?

⁹ Sipos yumi ol Witnes blong Jeova we yumi stap mekem wosip long hem wetem fulhat blong yumi, ale yumi save sua fulwan se bambae Jeova i lesin long yumi taem yumi askem hem blong i givhan long yumi. (Aesea 43:10-​12) Tingbaot King Asa blong Juda. Hem i rul blong 41 yia, mo long ol faswan ten yia we hem i rul (977-​937 B.K.T.), ol man oli stap long pis. Biaen, wan milyan soldia blong Itiopia we Sera i lidim olgeta, oli go insaed long Juda. Nating se Asa wetem ol man blong hem oli no plante, oli goaot blong fesem ol enemi ya. Be bifo we oli goaot, Asa i prea long God wetem fulhat blong hem. Hem i luksave paoa blong Jeova blong sevem man. King ya i prea long God, i se: “Plis yu halpem mifala naoia, from we mifala i stap lukluk long yu nomo. Olgeta ya oli plante we oli plante, be mifala i kam long ples ya blong faet long olgeta long nem blong yu. Hae God, plis yu no letem man ya i winim yu.” Jeova i win fulwan taem hem i sevem Juda from we oli holem nem blong hem we i hae olgeta. (2 Kronikel 14:​1-​15) I nomata sipos God i tekemaot yumi long wan hadtaem no i givim paoa nomo long yumi blong winim hadtaem ya, be yumi sua se hem i harem yumi taem yumi askem help long hem.

10. ?Sipos yumi no save olsem wanem blong winim wan trabol, olsem wanem prea blong King Jeosafat i save givhan long yumi?

¹⁰ Sipos yumi no save olsem wanem blong winim wan trabol, yumi sua se bambae Jeova i lesin taem yumi askem hem blong i givhan long yumi. Samting ya i klia taem yumi tingbaot wanem we i hapen long taem blong King Jeosafat blong Juda. Jeosafat i stat rul long 936 B.K.T. mo hem i rul 25 yia. Taem ol man Moab, Amon, mo ol kantri long ol hil blong Seiri, oli joen wanples mo oli kam blong faet agensem Juda, Jeosafat i prea long Jeova, i se: “!Yu yu God blong mifala! Plis yu panisim olgeta, from we mifala i no naf nating long fes blong olgeta ya we oli stap kam blong mekem faet long mifala. Mifala i no save se bambae mifala i mekem olsem wanem, be mifala i stap lukluk long yu blong yu halpem mifala.” Jeova i ansa long prea ya we Jeosafat i mekem wetem tingting daon. Jeova i faet long saed blong ol man Juda, taem hem i mekem ol enemi oli fraet tumas, nao oli lusum hed mo oli stap kilkilim olgeta oli ded. Taem ol nesen raonabaot oli harem stori blong faet ya, oli fraet tumas, nao from samting ya, kantri blong Juda i stap gud nomo, we i gat pis long olgeta ples. (2 Kronikel 20:1-30) Taem yumi sot long waes we yumi nidim blong winim wan trabol, yumi save prea olsem Jeosafat se: ‘Jeova, mifala i no save se bambae mifala i mekem olsem wanem, be mifala i stap lukluk long yu nomo blong yu halpem mifala.’ Maet tabu spirit i mekem yumi rimemba sam poen long Baebol we yumi nidim blong winim problem ya, no maet God i halpem yumi long wan rod we i bitim tingting blong man.​—Rom 8:​26, 27.

11. ?Samting we Nehemaea i mekem long saed blong stonwol blong Jerusalem i tijim yumi olsem wanem long saed blong prea?

¹¹ Maet yumi mas stap askem bakegen mo bakegen long God blong i givhan long yumi. Nehemaea i harem nogud tumas, i krae, i livim kakae, mo i prea from stonwol blong Jerusalem mo trabol we i kasem ol man Juda. (Nehemaea 1:​1-​11) Prea blong hem i go antap long God olsem gudfala smel blong insens. Wan dei, King Ataksekses blong Pesia i askem long Nehemaea we i stap harem nogud, i se: “?Bambae mi mi mekem olsem wanem blong givhan long yu?” “Nao” Nehemaea i “prea long God blong heven.” God i ansa long sotfala prea we Nehemaea i mekem wetem fulhat blong hem. Nao, King i letem Nehemaea blong mekem wanem we hat blong hem i wantem, hemia blong go long Jerusalem blong bildim stonwol bakegen.​—Nehemaea 2:⁠1-8.

Letem Jisas i Tijim Yu Blong Prea

12. Long prapa tok blong yu, talem ol bigfala poen long prea blong Jisas.

¹² I gat plante prea we ol man blong raetem Baebol oli raetemdaon. Nambawan long ol prea ya, hemia prea we Jisas Kraes i mekem, we i olsem wan eksampel blong yumi. Prea ya i olsem gudfala smel blong insens. Gospel blong Luk i talem se: ‘Wan man blong Jisas i talem long hem se, “Masta. Plis yu tijim mifala, blong mifala i prea, olsem we Jon Baptaes i tijim ol man blong hem bifo.” Nao Jisas i talem long olgeta se, “Taem yufala i prea, bambae yufala i talem se, ‘Papa, nem blong yu i tabu. Letem Kingdom blong yu i kam. Plis, evri dei yu givim kakae long mifala i naf blong wan dei. Yu fogivim mifala from ol sin blong mifala, from we mifala i stap fogivim ol man we oli stap mekem i nogud long mifala. Yu no letem ol samting oli kam traem mifala tumas.’ ” ’ (Luk 11:​1-4; Matiu 6:​9-​13) Bambae yumi tokbaot prea ya, i no blong mekem yumi talem baehat, be i blong luk olsem wanem yumi save yusum prea ya olsem wan eksampel.

13. ?Olsem wanem yu save eksplenem mining blong ol tok ya, “Papa, nem blong yu i tabu”?

¹³ “Papa, nem blong yu i tabu.” Ol man we oli givim laef blong olgeta finis long God, oli gat spesel blesing blong singaot Jeova se Papa. Olsem ol pikinini we oli rere blong kam klosap long wan papa we i gat sore, mo we oli talemaot wari blong olgeta, i gud we oltaem, yumi spenem taem blong prea long Jeova wetem respek mo ona. (Ol Sam 103:13, 14) Yumi wantem tumas blong luk we Jeova i tekemaot olgeta doti we ol man oli stap sakem long nem blong hem. Taswe, taem yumi prea, yumi mas soemaot se yumi rili wantem we Jeova i mekem nem blong hem i tabu. Yes, yumi wantem se nem blong Jeova i hae moa long ol narafala nem mo i stap tabu oltaem.​—Ol Sam 5:​11; 63:​3, 4; 148:12, 13; Esikel 38:23.

14. ?I minim wanem blong prea se, ‘Letem kingdom blong yu i kam’?

¹⁴ ‘Letem kingdom blong yu i kam.’ Kingdom ya, i rul blong Jeova we hem i soemaot tru long gavman blong Mesaea long heven, we Pikinini blong hem, Jisas mo ol “tabu man” oli rul long hem. (Daniel 7:​13, 14, 18, 27; Revelesen 20:6) I no longtaem, bambae kingdom ya i ‘kam’ agensem olgeta man long wol ya we oli agens long hae rul blong God, mo bambae hem i kilim olgeta oli ded. (Daniel 2:​44) Biaen, olgeta samting we Jeova i wantem bambae oli kamaot long wol ya, olsem oli kamaot finis long heven. (Matiu 6:​10) !Hemia i rili wan hapi taem blong olgeta we oli stap gohed blong mekem wok blong Hae Rula blong heven mo wol!

15. ?Taem yumi askem Jeova blong givim kakae long yumi “we i naf blong wan dei,” yumi soem wanem fasin?

¹⁵ “Plis, evri dei yu givim kakae long mifala i naf blong wan dei.” Taem yumi askem Jeova blong givim kakae long yumi we “i naf blong wan dei,” yumi soemaot se yumi no askem tumas samting, be yumi askem nomo ol samting we yumi rili nidim evri dei. Yumi trastem God se bambae hem i givim evri samting we yumi nidim. Be tu, yumi mas wok mo yusum ol defren rod we yumi gat blong kasem kakae mo ol narafala samting we yumi nidim. (2 Tesalonaeka 3:​7-​10) Tru ya, yumi mas talem tangkiu long God blong heven from we tru long lav, waes, mo paoa blong hem, hem i stap givim olgeta samting we yumi nidim.​—Ol Wok 14:15-​17.

16. ?Olsem wanem yumi save kasem fasin fogif long God?

¹⁶ “Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala.” From we yumi no stretgud olgeta mo yumi gat sin, yumi no save kasem fulwan mak blong ol stret rul blong Jeova. Taswe, yumi mas askem long hem blong i fogivim yumi tru long ransom sakrefaes blong Jisas. Be sipos yumi wantem se ‘Man ya blong harem prea’ i yusum praes blong sakrefaes ya blong tekemaot sin blong yumi, yumi mas tanem tingting blong yumi from sin blong yumi mo yumi mas rere blong akseptem eni fasin stretem we hem i givim long yumi. (Ol Sam 65:2; Rom 5:8; 6:​23; Hibrus 12:​4-​11) Mo tu, sipos yumi wantem se God i fogivim yumi, yumi mas ‘fogivim ol man we oli mekem i nogud long yumi,’ no oli mekem sin agensem yumi.​—Matiu 6:​12, 14, 15.

17. ?Ol tok ya, “Yu no letem ol samting oli kam traem mifala tumas,” oli minim wanem?

¹⁷ “Yu no letem ol samting oli kam traem mifala tumas.” Samtaem, Baebol i tokbaot ol samting we Jeova i letem nomo blong oli hapen, olsem se Hem nao i stamba blong olgeta. (Rut 1:​20, 21) God i no save pulum yumi blong mekem sin. (Jemes 1:​13) Ol traem we oli pulum man blong mekem i nogud oli kamaot long Setan, bodi blong yumi we i gat sin, mo wol ya. Setan, Man ya blong traem man, i stap traehad blong pulum yumi blong mekem sin agens long God. (Matiu 4:3; 1 Tesalonaeka 3:5) Taem yumi askem long God se, ‘Yu no letem Setan i traem mifala tumas,’ yumi stap askem long Hem blong i no letem yumi foldaon taem Setan i wantem pulum yumi blong no obei long God. Jeova i lidim yumi, nao Setan, ‘man nogud ya’ i no save kasem mo winim yumi.​—Matiu 6:​13; 1 Korin 10:13.

Wok Folem Prea Blong Yu

18. ?Olsem wanem yumi save wok folem prea blong yumi blong gat wan hapi mared mo famle laef?

¹⁸ Long prea blong Jisas, hem i tokbaot ol impoten samting we yumi mas prea from. Be yumi save prea from eni samting. Eksampel, maet yumi askem long God blong i givhan long yumi blong gat wan hapi mared. No maet yumi askem long hem blong i givhan long yumi blong bos long tingting blong yumi, blong holemtaet klin fasin go kasem mared. Be afta we yumi prea, yumi mas wok folem samting we yumi askem long prea. I minim se yumi mas stap longwe long ol buk mo ol pleplei we oli save pulum yumi blong mekem nogud long saed blong seks. I gud we yumi gat strong tingting blong ‘mared nomo long wan man no woman blong Masta blong yumi.’ (1 Korin 7:​39; Dutronome 7:​3, 4) Blong soem se yumi stap wok folem prea blong yumi blong gat wan hapi mared, yumi mas gohed blong folem ol rul blong God long laef blong yumi bifo mo afta long mared tu. Mo sipos yumi gat pikinini, i no naf we yumi askem nomo long God blong i givhan long olgeta blong oli kam gudfala man blong wok blong Jeova. Yumi mas mekem bes blong yumi tu blong putum trutok blong God long tingting blong olgeta. Blong mekem olsem, yumi mas stadi Baebol wetem olgeta mo tekem olgeta oli go oltaem long ol Kristin miting.​—Dutronome 6:​5-9; 31:12; Proveb 22:6.

19. ?Yumi mas mekem wanem sipos yumi askem God blong i givhan long yumi long wok blong prij?

¹⁹ ?Yumi stap askem God blong i blesem yumi long wok blong prij? Sipos yes, i gud yumi wok folem prea olsem, ale yumi joen fulwan long wok blong talemaot Kingdom. Sipos yumi askem long God blong i givim jans long yumi blong halpem ol narafala blong kam long rod blong laef, yumi mas raetemdaon nem blong olgeta we oli intres mo yumi mas rere blong mekem Baebol stadi wetem olgeta. ?Olsem wanem sipos yumi wantem joen long wok blong fultaem paenia? I gud we yumi wok folem prea blong yumi, nao yumi putum sam mak blong spenem moa taem long wok blong prij mo blong prij wetem ol paenia. Taem yumi putum ol mak olsem mo traehad blong kasem olgeta, yumi soemaot se yumi stap wok folem samting we yumi askem long prea blong yumi.

20. ?Bambae yumi tokbaot wanem long nekis stadi?

²⁰ Sipos yumi stap gohed strong long wok blong Jeova, yumi save sua fulwan se bambae hem i ansarem prea blong yumi we oli laenap wetem tingting blong hem. (1 Jon 5:​14, 15) I sua se yumi bin faenem plante gudfala poen taem yumi luklukgud long ol prea we oli stap long Baebol. Long nekis stadi, bambae yumi luk sam rod blong prea we Baebol i givim long olgeta we oli wantem ‘mekem prea we i olsem smok blong insens long fored blong Jeova.’

?Bambae Yu Yu Ansa Olsem Wanem?

◻ ?From wanem yumi mas prea wetem bilif?

◻ ?From wanem i impoten blong presem God mo talem tangkiu long hem taem yumi prea?

◻ ?From wanem yumi save askem help long Jeova wetem strong tingting se bambae hem i givhan long yumi?

◻ ?Wanem ol bigfala poen long prea we Jisas i tijim long ol disaepol blong hem?

◻ ?Olsem wanem yumi save wok folem samting we yumi askem long prea blong yumi?

[Tok Blong Pija Long Pej 12]

Olsem King Jeosafat, samtaem yumi nidim blong prea se: ‘O Jeova, mifala i no save wanem bambae mifala i mekem. Mifala i stap lukluk i go long yu nomo blong yu givhan long mifala’

[Tok Blong Pija Long Pej 13]

?Prea blong yu i laenap wetem prea blong Jisas we i olsem wan eksampel long yumi?