Yumi Onagud Long God Mo Leftemap Han Blong Yumi Blong Prea Long Hem
“Long evri ples, mi wantem we olgeta man oli mas ona long God, mo oli leftemap han blong olgeta blong prea long hem, we oli no stap kros, mo oli no stap raorao.”—1 TIMOTI 2:8.
1, 2. (a) ?Olsem wanem 1 Timoti 2:8 we i tokbaot prea, i stret long ol man blong Jeova? (b) ?Bambae yumi tokbaot wanem samting naoia?
JEOVA i wantem se ol man blong hem oli onagud long hem mo oli ona long olgeta bakegen. Aposol Pol i joenem fasin ona wetem prea taem hem i raetem se: “Long evri ples, mi wantem we olgeta man oli mas ona long God, mo oli leftemap han blong olgeta blong prea long hem, we oli no stap kros, mo oli no stap raorao.” (1 Timoti 2:8) I klia se Pol i stap tokbaot fasin blong prea long fored blong ol narafala, “long evri ples” we ol Kristin oli mekem miting long hem. ?Hu nao i mas prea long saed blong ol man blong God long ol miting blong kongregesen? Hemia olgeta ya nomo we oli tabu, fasin blong olgeta i stret mo narafala i ona long olgeta. Oli mas man we oli obeigud long God mo oli stap mekem olgeta wok we Baebol i talem se oli mas mekem long God. (Prija 12:13, 14) Olgeta ya oli mas klin long saed blong spirit mo fasin, mo oli mas man we oli givim ful laef blong olgeta i go long God.
2 Ol elda blong kongregesen, olgeta nao oli mas ‘leftemap han blong olgeta blong prea long God.’ Taem oli prea wetem fulhat blong olgeta tru long Jisas Kraes, oli soem se oli onagud long God, mo samting ya i halpem olgeta blong blokem fasin blong kros mo rao. I tru, eni man we i prea long fored blong Kristin kongregesen, hem i no mas man blong kros, no man blong rao, hem i no man we i no save ona long Jeova mo ogenaesesen blong hem. (Jemes 1:19, 20) ?Wanem sam narafala rod we Baebol i soemaot we wan man i save folem taem hem i gat blesing ya blong prea long God long fored blong ol narafala? ?Mo wanem sam rul blong Baebol we yumi mas folem taem yumi prea yumi wan mo wetem famle blong yumi?
Tingbaot Fastaem Ol Samting We Bambae Yu Prea From
3, 4. (a) ?From wanem i gud blong tingbaot fastaem ol samting we bambae yumi talem long prea we yumi mekem long fored blong ol narafala? (b) ?Baebol i talem se prea i mas longfala olsem wanem?
3 Sipos wan brata i askem yumi blong prea long fored blong ol narafala, yumi mas tekem smol taem fastaem blong tingbaot ol samting we bambae yumi talem long prea. Fasin ya bambae i givhan long yumi blong tokbaot ol impoten samting we i stret blong prea from. Hem i givhan long yumi tu blong no mekem wan prea we i longfala tumas mo i fasfas. I tru, taem yumi stap yumi nomo, yumi save prea wetem bigfala voes tu. Ol prea we yumi mekem yumi nomo, maet sam oli longfala, mo sam oli sot. Bifo we Jisas i jusum ol 12 aposol blong hem, hem i spenem wan fulnaet blong prea. Be taem hem i stanemap Memoriol blong tingbaot ded blong hem, i klia se ol prea we hem i mekem blong talem tangkiu long God from bred mo waen, oli sot nomo. (Mak 14:22-24; Luk 6:12-16) Nating se i olsem, yumi save se God i agri fulwan long ol prea ya.
4 Maet yumi gat jans blong mekem prea wetem wan famle long taem blong kakae. Prea olsem i mas sot nomo—be yumi no mas foget blong talem tangkiu long God from kakae we i stap. Sipos yumi stap mekem prea long stat no long en blong wan Kristin miting, yumi no nidim blong mekem wan longfala prea we i kavremap plante poen. Jisas i tok agensem ol tija blong loa we oli stap “mekem ol longlongfala prea blong mekem se ol man oli ona long olgeta.” (Luk 20:46, 47) Wan man we i onagud long God i neva mas mekem olsem. I tru, samtaem i stret blong mekem wan prea we i longfala lelebet taem yumi stap prea long fored blong ol narafala. Eksampel, wan elda we oli jusum hem blong givim laswan prea long taem blong asembli, hem i mas tingbaot fastaem wanem samting bambae hem i talem. Maet hem i wantem prea from sam impoten samting. Nating se i olsem, prea ya tu i no mas longfala bitim mak.
Prea Long God Wetem Bigfala Ona
5. (a) ?Yumi mas tingbaot wanem taem yumi stap prea long fored blong ol narafala? (b) ?From wanem yumi mas gat ona mo respek taem yumi prea?
5 Taem yumi stap prea long fored blong ol narafala, yumi mas tingbaot se yumi no stap toktok long wan man long wol ya. Be yumi we yumi sinman, yumi stap toktok long Jeova, Haefala Masta blong heven mo wol. (Ol Sam 8:3-5, 9; 73:28) Taswe, taem yumi prea, yumi mas soem se yumi onagud long God mo yumi fraet blong mekem hem i harem nogud from tok we yumi talem no fasin blong yumi. (Proveb 1:7) Deved, man blong raetem Ol Sam, i singsing se: “From we oltaem yu yu stap lavem man tumas, mi mi save kam long haos blong yu. Mi save mekem wosip long yu long tabu haos blong yu, mi save bodaon long yu, mi ona long yu.” (Ol Sam 5:7) Sipos yumi gat tingting olsem Deved, ?olsem wanem yumi save soemaot filing blong yumi taem narafala i askem yumi blong mekem prea long wan miting blong ol Witnes blong Jeova? Tingbaot, yumi soem bigfala respek mo ona, taem yumi stap toktok wetem wan king long wol ya. Be taem yumi prea long God, yumi mas soem respek mo ona we i bigwan moa from we yumi stap toktok long Jeova we hem i ‘King blong olwe.’ (Revelesen 15:3) Taswe, taem yumi prea, i nogud blong talem ol tok olsem, “Gud moning, Jeova,” “Mifala i sanem lav blong mifala i go long yu,” no, “Gat wan gudfala dei.” Baebol i soem se Jisas Kraes, Pikinini blong God, wan nomo we hem i gat, i neva talem ol tok olsem long Papa blong hem.
6. ?Wanem samting yumi mas tingbaot taem yumi ‘kam klosap long bigfala jea blong God we hem i laekem yumi tumas’?
6 Pol i talem se: ‘I gud yumi kam long fes blong God we hem i stap givhan long yumi long gladhat blong hem, yumi talemaot tingting blong yumi long hem.’ (Hibrus 4:16) Nating se yumi sinman, yumi save kam klosap long Jeova, mo ‘talemaot tingting blong yumi long hem,’ from we yumi bilif long ransom sakrefaes blong Jisas Kraes. (Ol Wok 10:42, 43; 20:20, 21) I tru se yumi fri blong ‘talemaot tingting blong yumi long God,’ be hemia i no minim se yumi save toktok olbaot nomo wetem hem, no yumi talem ol samting we oli no soem respek nating. Sipos yumi wantem se Jeova i agri long ol prea we yumi mekem long fored blong ol narafala, yumi mas soem bigfala respek mo ona. Taswe, i no stret blong yusum prea olsem rod blong talem wan mesej, mo blong stretem narafala no blong givim advaes long wan grup blong man.
Prea Wetem Tingting Daon
7. ?Olsem wanem Solomon i soem tingting daon long prea we hem i mekem taem oli dediketem tempel blong Jeova?
7 Nating se yumi stap prea long fored blong ol narafala no yumi nomo, yumi mas tingbaot wan impoten rul blong Baebol we i talem se yumi mas soem tingting daon taem yumi prea. (2 Kronikel 7:13, 14) King Solomon i soem tingting daon long prea we hem i mekem long fored blong ol narafala, taem oli dediketem tempel blong Jeova long Jerusalem. Solomon i jes finisim wan bilding we i naes moa i bitim ol narafala bilding long wol. Be, wetem tingting daon, hem i prea se: “Wol ya i smol tumas. ?Bambae yu save kam stap long hem olsem wanem? Heven i bigfala we i bigfala, be olgeta ples long hem oli no naf long yu. !Haos ya we mi mi wokem blong yu i smol we i smol, i no naf nating long yu!”—1 King 8:27.
8. ?Wanem sam samting we oli soemaot se man i gat tingting daon taem hem i prea long fored blong ol narafala?
8 Olsem Solomon, yumi mas gat tingting daon taem yumi stap prea long fored blong ol narafala. Yumi save soem tingting daon long voes blong yumi, be yumi mas lukaot se voes blong yumi i no soem se yumi strong long saed blong spirit. Taem yumi prea wetem tingting daon, yumi no toktok wetem voes we i bigwan tumas, blong leftemap yumi no blong soem filing bitim mak. Ol prea we man i mekem wetem tingting daon oli pulum tingting blong ol narafala i go long Man ya we yumi stap prea long hem, be i no long man we i stap mekem prea. (Matiu 6:5) Yumi save soem tingting daon tu long ol samting we yumi tokbaot long prea. Sipos yumi prea wetem tingting daon, bambae yumi no soem se yumi stap givim oda long God blong folem prapa tingting blong yumi. Be, bambae yumi askem Jeova blong wok folem tabu tingting blong hem. Man blong raetem Ol Sam i soem stret eksampel HS-.25long saed ya, taem hem i prea se: “Hae God. Plis yu sevem mifala. Plis yu mekem mifala i win.”—Ol Sam 118:25; Luk 18:9-14.
Prea i Mas Kamaot Long Hat
9. ?Long Matiu 6:7, Jisas i givim wanem nambawan advaes, mo olsem wanem yumi save mekem advaes ya i wok?
9 Sipos yumi wantem se Jeova i lesin long ol prea we yumi mekem yumi nomo no long fored blong ol narafala, ol prea ya oli mas kamaot long hat blong yumi. Taswe, bambae yumi no talem sem tok bakegen mo bakegen, we yumi no tingting long samting we yumi stap talem. Taem Jisas i mekem Bigfala Toktok blong hem antap long Hil, hem i givim advaes ya se: “Taem yufala i prea, i nogud yufala i stap talem plante tok olsem we ol hiten man oli stap mekem. Ol man ya [oli gat rong tingting,] oli ting se ol god blong olgeta oli save harem olgeta from we oli talem plante toktok.” Blong talem long narafala rod, Jisas i talem se: “Yu no mas talem tumas tok we oli fasfas. Yu no mas talem bakegen mo bakegen ol tok we oli no gat mining.”—Matiu 6:7; futnot.
10. ?From wanem i stret blong prea plante taem from wan samting?
10 I tru, maet yumi mas prea from sem samting bakegen mo bakegen. I no rong blong mekem olsem, from we Jisas i talem se: “Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.” (Matiu 7:7) From we Jeova i stap mekem se wok blong hem i karem plante frut, maet i nidim blong bildim wan niufala Haos Kingdom. (Aesea 60:22) I stret blong gohed blong tokbaot bisnes ya taem yumi prea yumi wan no long ol miting blong ol man blong Jeova. Hemia i no minim se yumi stap ‘talem bakegen ol tok we oli no gat mining.’
Tingbaot Blong Talem Tangkiu Long God Mo Presem Hem
11. ?Olsem wanem yumi save folem Filipae 4:6, 7 taem yumi prea yumi wan mo long fored blong ol narafala?
11 Plante man, taem oli prea, oli stap askem nomo blong God i givim ol samting long olgeta. Be lav we yumi gat long Jeova God i mas pusum yumi blong talem tangkiu long God mo presem hem taem yumi prea yumi wan mo long fored blong ol narafala. Pol i raetem se: “Sipos yufala i trabol from sam samting, i nogud yufala i stap tingting tumas, i gud yufala i prea long God from evri samting. Yufala i mas askem long hem, mo yufala i mas talem tangkiu tu long hem. Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.” (Filipae 4:6, 7) Yes, antap long ol prea we yumi mekem blong askem samting long God, yumi mas talem tangkiu long hem from ol blesing we hem i givim long saed blong spirit mo long saed blong bodi. (Proveb 10:22) Man blong raetem Ol Sam i singsing se: “Mi mi God, mo mi mi hae we mi hae, mo i gud yufala i stap talem tangkiu long mi oltaem. Hemia nao i prapa sakrefaes blong yufala. Mo i gud yufala i stap mekem olgeta samting we yufala i promes finis long mi, se bambae yufala i mekem.” (Ol Sam 50:14) Mo wan singsing blong Deved, we i wan prea blong hem, i karem ol tok ya we oli kasem hat blong yumi, se: “Bambae mi stap presem God long singsing, bambae mi stap talem tangkiu long hem blong leftemap haenem blong hem.” (Ol Sam 69:30) I gud we yumi mekem olsem Deved taem yumi prea yumi wan mo long fored blong ol narafala.
12. ?Olsem wanem Ol Sam 100:4, 5 i stap kamtru tede, mo yumi save talem tangkiu long God mo presem hem from wanem samting?
12 Man blong raetem Ol Sam i singsing long saed blong God, se: “!Yufala i kam! Yumi go insaed long yad blong haos blong hem, mo yumi wokbaot i go we yumi stap talem tangkiu long hem. Yumi go insaed long ples blong wosip, mo yumi wokbaot i go we yumi stap presem hem. Yumi talem tangkiu long hem, yumi leftemap nem blong hem. Hae God, hem i gud tumas. Fasin blong hem, we hem i stap lavem man tumas, bambae i stap oltaem nomo. Hem bambae i holem ol promes blong hem oltaem, gogo i no save finis.” (Ol Sam 100:4, 5) Tede, ol man blong olgeta nesen oli stap go insaed long yad blong haos blong Jeova, mo from samting ya, yumi save presem God mo talem tangkiu long hem. ?Yu yu gat fasin tangkiu long God from Haos Kingdom long ples blong yu? ?Yu yu stap joen oltaem long ol miting wetem ol man we oli laekem God, blong soem se yu gat fasin tangkiu long God? Taem yu stap long Haos Kingdom, ?yu yu stap singsing bigwan wetem fulhat blong yu, blong presem mo talem tangkiu long Papa blong yumi long heven we i lavem yumi tumas?
Yu Neva Mas Sem Blong Prea
13. ?Wanem eksampel long Baebol we i soem se yumi mas prea long Jeova nating we yumi harem se yumi no naf from we yumi mekem wan mastik?
13 Nomata we yumi harem se yumi no naf from we yumi mekem mastik, yumi mas lukluk i go long God mo prea long hem wetem fulhat blong yumi. Taem ol man Jyu oli mekem sin, oli mared wetem ol woman blong ol narafala kantri, Esra i nildaon, i leftemap han blong hem i go long God, mo i prea wetem tingting daon se: “Hae God. Yu yu God blong mi. Mi mi sem tumas, mi no save kam leftemap hed blong mi long fes blong yu. Ol sin blong mifala oli plante we oli plante, nao mifala i harem nogud tumas from. I olsem we oli hivap i go antap we i bitim hed blong mifala, i go kasem skae. Mifala i man blong yu, be oltaem, i stat long taem blong ol bubu blong mifala bifo, kam kasem tede, mifala i stap mekem sin tumas . . . God blong mifala, yu yu panisim ol bubu blong mifala from ol sin blong olgeta, mo from ol fasin nogud blong olgeta, mo mifala i luksave se panis ya i smol nomo, i no kasem mak blong ol sin blong olgeta, mo yu letem olgeta oli stap laef. From samting ya, bambae mifala i no save tanem baksaed long ol tok blong yu bakegen, blong go mared long ol man ya we oli stap mekem ol fasin we i nogud we i nogud. Sipos mifala i mekem olsem, bambae yu kros tumas long mifala, nao bambae yu kilim mifala evriwan i ded we bambae i no gat wan i stap laef. Hae God, yu yu God blong mifala ol laen blong Isrel, mo mifala i man blong yu. Mifala i talemaot ol sin blong mifala long yu, mo from ol sin ya, i no stret nating blong mifala i kam stanap long fes blong yu, from we fasin blong yu i stret olgeta, be plis yu letem mifala i stap laef.”—Esra 9:1-15; Dutronome 7:3, 4.
14. Folem samting we i hapen long taem blong Esra, ?yumi mas mekem wanem sipos yumi wantem se God i fogivim yumi?
14 Sipos yumi wantem se God i fogivim yumi, yumi mas talemaot sin blong yumi long hem. Biaen, yumi mas sore from sin we yumi bin mekem mo ‘soemaot se yumi rili tanem tingting from sin ya.’ (Luk 3:8; Job 42:1-6; Aesea 66:2) Long taem blong Esra, eni man we i tanem tingting from sin blong hem i mas traehad blong stretem rong we hem i mekem. Man ya i mas sanem waef blong hem i gobak long kantri blong hem. (Esra 10:44; skelem wetem 2 Korin 7:8-13.) Sipos yumi mekem wan bigfala sin, nao yumi wantem se God i fogivim yumi, yumi mas prea wetem tingting daon, yumi talemaot sin ya long God mo soemaot long ol fasin blong yumi se yumi rili tanem tingting from sin ya. Mo sipos yumi rili tanem tingting blong yumi mo wantem stretem rong blong yumi, bambae samting ya i pusum yumi blong lukaot help long saed blong spirit long ol Kristin elda.—Jemes 5:13-15.
Harem Gud From Prea
15. ?Olsem wanem stori blong Hana i soem se yumi save harem gud taem yumi prea?
15 Taem sam samting i mekem yumi harem nogud tumas long hat blong yumi, prea i save mekem yumi haremgud bakegen. (Ol Sam 51:17; Proveb 15:13) Hana we i stap onagud long God, hem i mekem olsem. Hem i laef long wan taem we plante man Isrel oli gat ol bigfala famle, be hem i no gat pikinini. Hasban blong hem, Elkana, i gat sam pikinini boe mo sam pikinini gel wetem narafala waef ya blong hem, Penina, we i stap jikim Hana se Hana i no save bonem pikinini. Hana i prea long God wetem fulhat blong hem mo i promes se sipos God i blesem hem wetem wan pikinini boe, ‘bambae hem i givim boe ya long Jeova, blong bambae hem i man blong Jeova oltaem long laef blong hem.’ Prea ya we Hana i mekem mo ol tok blong Hae Pris Ilae oli leftemap tingting blong Hana, nao “hem i harem gud” tumas. Hana i bonem wan boe mo i putum nem blong hem se Samuel. Biaen, hem i tekem boe ya i go wok long haos blong Jeova. (1 Samuel 1:9-28) Hem i gat bigfala tangkiu from kaen fasin we God i soemaot long hem. Taswe hem i prea long God, i talem tangkiu long hem—prea ya i leftemap Jeova se i no gat wan man nating we i hae olsem Hem. (1 Samuel 2:1-10) Olsem Hana, prea i save mekem yumi haremgud bakegen, mo yumi sua fulwan se God i stap harem yumi taem yumi askem samting we i laenap wetem tingting blong hem. Taem yumi talemaot hat blong yumi long hem, yumi mas “harem gud,” from we bambae hem i tekemaot trabol we i stap mekem yumi harem nogud no bambae hem i mekem se yumi naf blong fesem trabol ya.—Ol Sam 55:22.
16. Olsem stori blong Jekob i soem, ?from wanem yumi mas prea taem yumi fraet no yumi wari?
16 Sipos wan samting i mekem yumi fraet, yumi harem nogud long hat blong yumi, no yumi wari, yumi no mas foget blong prea long Jeova blong i mekem yumi harem gud bakegen. (Ol Sam 55:1-4) Jekob i fraet tumas taem hem i go blong mitim brata blong hem, Esao, we i agensem hem. Be, Jekob i prea, i se: “Hae God, yu yu God blong bubu blong mi Ebraham mo blong papa blong mi Aesak. Plis yu harem mi. Yu yu talem long mi se mi mas kambak long ples blong mi, mo long ol famle blong mi, mo yu yu promes se bambae yu mekem laef blong mi i go gud. Fasin blong yu, oltaem yu stap lavem mi tumas, mo oltaem yu stap holem promes blong yu long mi. Mi mi no wan gudfala man, mi man blong wok blong yu nomo, mo i no stret blong yu stap mekem i gud tumas long mi olsem. Taem mi krosem Jodan Reva ya bifo, mi go, mi stap holem stik nomo blong wokbaot, be naoia mi stap kambak we mi gat tufala kampani ya blong ol man wetem ol narafala samting ya blong mi. Hae God, plis yu blokem brata blong mi, yu sevem mi. Mi mi fraet. Mi fraet se hem bambae i kam mekem faet long mifala, nao bambae i spolem mifala evriwan, wetem ol woman ya mo ol pikinini. Bifo, yu yu promes se bambae yu mekem olgeta samting long laef blong mi oli go gud, mo bambae yu mekem olgeta we bambae oli kamaot biaen long mi oli kam plante we oli plante, we man i no save kaontem olgeta, bambae oli plante olsem sanbij daon long solwota. Plis yu no fogetem promes ya blong yu.” (Jenesis 32:9-12) Esao i no mekem faet wetem Jekob mo ol man blong hem. Taswe, i klia se Jeova ‘i mekem laef blong Jekob i go gud’ long taem ya.
17. Blong folem tok we i stap long Ol Sam 119:52, ?olsem wanem prea i save mekem yumi harem gud taem yumi kasem bigfala traem?
17 Taem yumi stap mekem prea, yumi save harem gud taem yumi tingbaot ol samting we Tok blong God i talem. Long Sam we i longfala moa bitim ol narafala Sam—we i wan naesfala prea blong singsing wetem myusek—maet Prins Hesekia nao i bin singsing se: “Hae God, taem mi tingbaot ol tingting blong yu we yu mekem bifo olgeta, be oli mekem tingting blong mi i kam strong bakegen.” (Ol Sam 119:52) Taem yumi kasem wan bigfala traem, nao yumi prea wetem tingting daon, maet yumi tingbaot wan rul no loa blong Baebol we i save halpem yumi blong folem rod we bambae i mekem yumi harem gud, from we yumi sua se yumi stap mekem Papa blong yumi long heven i glad.
Olgeta We Oli Onagud Long God Oli Prea Oltaem
18. ?From wanem yumi save talem se ‘evriwan we oli onagud long God bambae oli prea long God’?
18 Olgeta we oli onagud long Jeova God, oli stap “prea oltaem.” (Rom 12:12) Long Sam 32, we maet Deved i raetem afta we hem i mekem i nogud wetem Batsiba, hem i tokbaot filing blong hem we i bin trabol tumas from we hem i no askem God blong fogivim hem. Mo tu, hem i tokbaot pis we hem i kasem long tingting blong hem afta we hem i tanem tingting mo talemaot sin long hem. Hem i singsing se: “From gudfala fasin ya blong yu, [from we Jeova i save fogivim ol man we oli rili tanem tingting from sin blong olgeta,] i gud olgeta man we tingting blong olgeta i stap strong long yu, oli prea long yu.”—Ol Sam 32:6.
19. ?From wanem yumi mas leftemap han blong yumi, mo yumi prea long God?
19 Sipos yumi wantem holemtaet fasin fren blong yumi wetem God, bambae yumi prea long hem blong i sore long yumi tru long ransom sakrefaes blong Jisas. Wetem bilif, yumi save kam klosap long bigfala jea blong God we hem i lavem yumi tumas mo talemaot tingting blong yumi long hem. Ale bambae hem i sore long yumi mo bambae yumi kasem help long stret taem. (Hibrus 4:16) !Be i gat fulap risen blong prea! Taswe, i gud we ‘oltaem, yumi mas prea.’ Yumi mas yusum ol tok we oli kamaot long hat blong presem God mo talem tangkiu long hem. (1 Tesalonaeka 5:17) Long dei mo long naet, i gud we yumi leftemap han blong yumi, mo yumi prea long God.
?Bambae Yu Yu Ansa Olsem Wanem?
◻ ?From wanem i gud blong tingbaot fastaem samting we bambae yumi talem taem yumi prea long fored blong ol narafala?
◻ ?From wanem yumi mas prea long fasin we i soem bigfala respek mo ona?
◻ ?Yumi mas soem wanem tingting taem yumi stap prea?
◻ ?Taem yumi stap prea, from wanem yumi mas tingbaot blong talem tangkiu long God mo presem hem?
◻ ?Olsem wanem Baebol i soem se prea i save mekem yumi harem gud?
[Tok Blong Pija Long Pej 17]
King Solomon i soem tingting daon long prea we hem i mekem long fored blong ol narafala taem oli dediketem tempel blong Jeova
[Tok Blong Pija Long Pej 18]
Olsem Hana, yu save harem gud taem yu prea