Ransom Sakrefaes Blong Kraes Rod Blong God Blong Sevem Man

“God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”​—JON 3:​16.

1, 2. Tokbaot trabol we i kasem olgeta man.

TINGBAOT sipos yu kasem wan sik, mo yu save ded sipos dokta i no katem yu from sik ya. ?Bambae yu harem olsem wanem sipos yu no gat inaf mane blong pem dokta ya? ?Olsem wanem sipos ol fren mo famle blong yu oli givhan long yu, be mane blong yufala i no naf yet? !Bambae yu harem nogud tumas sipos yu fesem wan trabol olsem!

² Samting ya i sem mak long wanem we i hapen long laef blong olgeta man. Faswan papa mama blong yumi, Adam mo Iv, God i wokem tufala we tufala i stret gud olgeta. (Dutronome 32:4) Tufala i gat hop blong laef foreva mo mekem stamba tingting ya blong God i kamtru, se: “I gud yutufala i gat plante pikinini blong yutufala, blong olgeta we bambae oli kamaot biaen long yufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” (Jenesis 1:​28) Be, Adam mo Iv, tufala i rebel agensem Man we i wokem tufala. (Jenesis 3:​1-6) From we tufala i no obei, sin i kasem tufala mo ol pikinini blong tufala. Samtaem biaen, Job, wan man we i stap tru long God, i talem se: “Fasin blong mifala i no stret. Neva i gat wan samting we i klin gud i kamaot long samting we i doti tumas, olsem laef blong mifala.”​—Job 14:4.

3. ?Olsem wanem ded i kasem olgeta man?

³ Taswe, sin i olsem wan sik we i kasem yumi evriwan, from we Baebol i talem se, ‘yumi evriwan i mekem nogud finis.’ Sin i mekem ol nogud frut oli kamaot long laef blong yumi. Yes, “ol man we oli stap mekem sin, pei blong olgeta, bambae oli ded from.” (Rom 3:​23; 6:​23) I no gat wan long yumi we i save ronwe long ded. Olgeta man oli mekem sin, taswe, olgeta man oli mas ded. From we yumi kamaot long Adam, yumi bon wetem sin mo yumi mas ded. (Ol Sam 51:5) Pol i raetem se: “Bifo olgeta, wan man nomo i statem fasin blong sin long wol ya. Mo from we hem i mekem sin, hem i ded. Be frut blong samting ya, hemia we ol man oli stap ded, from we olgeta oli mekem sin.” (Rom 5:​12) ?Be samting ya i minim se i no gat wan rod nating blong God i sevem yumi? Si, i gat wan rod.

Tekemaot Sin Mo Ded

4. ?From wanem ol man oli no save tekemaot sik mo ded?

⁴ ?I nidim wanem blong tekemaot sin mo frut blong sin, hemia ded? I klia se i nidim wan samting we i no gat wan man long wol ya we i naf blong givim. Man blong raetem Ol Sam i talem wetem sore se: “Praes blong laef blong man i hae tumas. Wanem samting we man i save givim, neva bambae i naf blong sevem hem blong i no go long beregraon. Hem i no save pem laef blong hem blong bambae i stap laef olwe.” (Ol Sam 49:​8, 9, Today’s English Version) Maet yumi naf blong mekem laef blong yumi i longfala lelebet, taem yumi jusum gud ol kakae blong yumi mo yumi tekem sam meresin. Be i no gat wan long yumi we i save tekemaot sin we yumi bon wetem. I no gat wan long yumi we i save stopem fasin blong kam olfala mo mekem bodi blong yumi i kam stret gud bakegen olsem hemia we God i wokem fastaem. Pol i no bitim mak taem hem i raetem se, from sin blong Adam, ‘olgeta samting we God i mekem, oli mas kam nating nomo’​—no olsem The Jerusalem Bible i talem, “i no moa save kasem prapa mak blong hem.” (Rom 8:​20) Be, yumi glad tumas se Man ya we i wokem olgeta samting, hem i no lego yumi. Hem i mekem wan rod blong tekemaot sin blong olgeta man. ?Olsem wanem hem i mekem rod ya?

5. ?Olsem wanem Loa we God i givim long ol man Isrel i soem se oli mas tinghevi long stret fasin?

⁵ Jeova i ‘wan God we i laekem ol fasin we oli stret mo stret fasin blong jajem man.’ (Ol Sam 33:5) Loa we God i givim long ol man Isrel i soem se oli mas tinghevi long stret fasin mo se oli mas jajem ol man long fasin we i sem mak nomo. Eksampel, wan long ol loa ya i talem se, ‘sipos wan man i ded, narafala man i mas givim laef blong hem blong pembak laef blong man ya.’ Narafala rod blong talem tok ya i olsem se, sipos wan man Isrel i kilim wan man i ded, oli mas kilim hem tu i ded, blong pembak laef blong man ya. (Eksodas 21:23; Namba 35:21) Olsem nao, oli stretem bisnes ya long stret fasin blong God.​—Skelem wetem Eksodas 21:30.

6. (a) ?From wanem yumi save talem se Adam i man blong kilim man i ded? (b) ?Adam i lusum wanem kaen laef, mo wanem sakrefaes i naf blong pembak laef ya long stret fasin?

⁶ Taem Adam i mekem sin, hem i kam olsem man blong kilim man i ded. ?Long wanem rod? Long rod ya we hem i pasem sin mo ded i go long olgeta pikinini blong hem. Fasin blong Adam blong no obei, i mekem se naoia, bodi blong yumi i stap lusum paoa, mo i godaon sloslou blong go long beregraon. (Ol Sam 90:10) Sin blong Adam i stamba blong wan narafala samting bakegen. Tingbaot, samting we Adam mo ol pikinini blong hem oli lusum. Oli lusum wan laef we i no blong 70 no 80 yia nomo, be wan laef we i stret gud olgeta​—⁠i prapa wan, hemia laef we i no save finis. Taswe, ‘sipos wan man i mas givim laef blong hem blong pembak laef ya,’ ?wanem kaen man i save givim laef blong hem blong stretem bisnes ya long stret fasin? Man ya i mas wan man we i stret gud olgeta. Hem i mas sem mak long Adam, we i naf blong karem ol pikinini we oli no gat sin. Sipos wan man we i stret olgeta i givim laef blong hem olsem sakrefaes, samting ya bambae i stretem bisnes ya long stret fasin, be tu sakrefaes ya bambae i naf blong tekemaot sin mo frut blong sin, hemia ded.

Kavremap Pei Blong Sin

7. Tokbaot mining blong tok ya “ransom.”

⁷ Praes ya we yumi nidim blong pemaot sin blong yumi, Baebol i tokbaot olsem “wan ransom.” (Ol Sam 49:​7, NW) Long Engglis, “ransom” i minim mane we man blong stilim pikinini i askem long famle blong pikinini ya. Sipos famle ya i wantem se pikinini ya i gofri, oli mas givim mane ya. I tru, ransom we Jeova i givim, i no blong pemaot yumi long han blong wan man olsem. Be tingting ya blong pem wan praes i sem mak. Mo tu, Grik tok we oli tanem i kam “ransom,” stret mining blong hem se “kavremap.” Blong tekemaot sin, ransom ya i mas stret wetem samting ya we hem i mas kavremap​—⁠hemia laef blong Adam we i no gat sin.

8. (a) Eksplenem rul ya we wan man i pemaot narafala man. (b) ?Olsem wanem rul ya blong pemaot man i laenap wetem fasin blong pemaot yumi ol sinman?

⁸ Fasin ya i laenap wetem rul blong pemaot man​—⁠rul ya i stap long Loa blong Moses. Sipos wan man Isrel i kam pua, nao i salem hem wan olsem slef long wan man blong narafala kantri, famle blong hem i save pemaot (no, ransom) hem. Famle ya i mas givim wan praes we i sem mak long praes blong slef ya. (Levitikas 25:47-​49) Yumi ya we yumi sinman, Baebol i talem se yumi ‘slef blong sin.’ (Rom 6:6; 7:​14, 25) ?I nidim wanem blong pemaot yumi? Olsem yumi luk finis, sipos wan laef we i stret gud olgeta i lus, i mas gat wan laef we i stret gud olgeta blong pembak laef ya​—⁠i no gat wan narafala rod bakegen.

9. ?Olsem wanem Jeova i mekem rod blong kavremap sin?

⁹ I tru se olgeta man oli bon wetem sin. Taswe, i no gat wan long yumi we i sem mak long Adam. Mo i no gat wan long yumi we i save pem ransom ya we i laenap wetem stret fasin. Olsem yumi tokbaot long stat, i olsem se yumi gat wan sik we i save kilim yumi ded, mo yumi no naf blong pem dokta we i save winim sik ya. Taem i olsem, ?yu ting se bambae yumi gat bigfala tangkiu sipos wan man i kam mo i givim mane we i kavremap praes ya? !Hemia nao wanem we Jeova i mekem! Hem i wokem rod blong pemaot yumi long sin. Rod ya i blong wan taem nomo mo bambae i stap oltaem gogo i no save finis. Yes, hem i rere blong givim wan samting we i sas tumas, we yumi no naf blong pem. ?Olsem wanem hem i mekem samting ya? Pol i raetem se: “Ol man we oli stap joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.” (Rom 6:​23) Jon i talem se Jisas i olsem ‘Smol Sipsip blong God, we bambae i tekemaot sin blong olgeta man long wol.’ (Jon 1:​29) Naoia, bambae yumi luk olsem wanem Jeova i yusum Pikinini blong hem, we hem i lavem tumas blong pem praes blong ransom.

“Wan Ransom We i Sem Mak”

10. ?Olsem wanem ol profet tok long saed blong wan “laen” i kamtru long Josef mo Meri?

¹⁰ Stret afta long fasin rebel long Iden, Jeova i talemaot stamba tingting blong hem, blong rerem wan “laen” we bambae i pemaot olgeta man long sin. (Jenesis 3:​15) Long ol defren taem, Jeova i talemaot famle we bambae laen ya i kamaot long hem. Biaen, tok we God i bin talem long saed ya, i kamtru long Josef mo Meri, wan man mo woman long Palestaen we tufala i promes blong mared. Wan enjel blong God i kamtru long Josef long wan drim, nao i talem long hem se Meri i gat bel, be “tabu spirit nomo i mekem we hem i gat bel. Bambae hem i bonem wan boe, mo yu mas putum nem blong hem se Jisas, we i minim Sevia, from we hem bambae i sevem ol man blong hem, i tekemaot ol sin blong olgeta.”​—Matiu 1:​20, 21.

11. (a) ?Jeova i mekem wanem blong bambae Pikinini blong hem i bon olsem wan man we i stret gud olgeta? (b) ?From wanem Jisas i naf blong givim “wan ransom we i sem mak”?

¹¹ Pikinini ya we i stap long bel blong Meri, hem i no olsem ol narafala pikinini we oli stap bon, from we Jisas i bin laef fastaem long heven. (Proveb 8:​22-​31; Kolosi 1:​15) Tru long wan merikel, Jeova i putum laef blong Jisas insaed long bel blong Meri, nao Pikinini ya blong God we hem i lavem tumas, i save bon long wol ya. (Jon 1:​1-3, 14; Filipae 2:​6, 7) Jeova i lidim evri samting, taswe Jisas i no kam doti long sin blong Adam. Defren olgeta, Jisas i bon we hem i no gat sin nating. Olsem nao, hem i gat samting ya we Adam i lusum​—wan laef we i stret gud olgeta. !Naoia, i gat wan man we i naf blong kavremap pei blong sin! Mo hemia nao samting we Jisas i mekem long Naesan 14, 33 K.T.a Long impoten dei ya, Jisas i letem hem wan long ol enemi blong hem, blong oli kilim hem i ded. Long rod ya nao, hem i “givim wan ransom we i sem mak.”​—1 Timoti 2:​6, NW.

Praes Blong Laef We i Stret Gud Olgeta

12. (a) Talem olsem wanem ded blong Jisas i defren olgeta long ded blong Adam. (b) ?Olsem wanem Jisas i kam “Papa blong Olwe” blong olgeta we oli gat fasin obei?

¹² I gat wan samting we i mekem se ded blong Jisas i defren olgeta long ded blong Adam. Spesel samting ya i soemaot se praes blong ransom i hae tumas. Man ya Adam, i stret nomo we hem i ded, from we hem i jusum blong no obei long Man ya we i wokem hem. (Jenesis 2:​16, 17) Be, long saed blong Jisas, i no stret nating blong hem i ded, from we “hem i no mekem wan samting nogud.” (1 Pita 2:22) Taem Jisas i ded, hem i gat wan samting we i sas tumas. Samting ya, Adam i no gat taem hem i ded​—hemia raet blong mekem ol man oli kam stret gud. Taswe, ded blong Jisas i gat praes blong sakrefaes. Taem hem i go antap long heven olsem wan spirit man, hem i givim praes blong sakrefaes blong hem i go long Jeova. (Hibrus 9:​24) Long rod ya, Jisas i pemaot ol man we oli gat sin, mo hem i kam niufala Papa blong olgeta, i tekem ples blong Adam. (1 Korin 15:45) I stret nomo we Baebol i kolem Jisas se, “Papa blong Olwe.” (Aesea 9:6) !Tingbaot mining blong samting ya! Adam, wan papa we i gat sin, i mekem se ded i kasem olgeta pikinini blong hem. Jisas, wan Papa we i stret gud olgeta, i yusum praes blong sakrefaes blong hem blong givim laef we i no save finis long ol man we oli gat fasin obei.

13. (a) Eksplenem olsem wanem Jisas i pemaot kaon we Adam i no save pemaot. (b) ?From wanem sakrefaes blong Jisas i no kavremap sin blong faswan papa mama blong yumi?

¹³ ?Be olsem wanem ded blong wan man nomo i save kavremap sin blong plante man? (Matiu 20:28) Long wan Wajtaoa we i kamaot sam yia bifo, yumi bin tokbaot pijatok ya blong eksplenem ransom, se: “Tingbaot wan bigfala faktri we i gat plante handred wokman blong hem. Wan dei, maneja blong kampani ya i stilim mane, nao bisnes ya i brokdaon. Naoia, plante handred wokman oli lusum wok blong olgeta, mo oli no moa gat rod blong pem ol kaon blong olgeta. !Ol hasban, ol waef, no ol pikinini blong olgeta, wetem ol man we oli gat kaon long olgeta, olgeta evriwan oli safa from kruked fasin blong wan man nomo! Biaen, wan bisnesman i pemaot faktri ya, nao i mekem se kampani ya i wok bakegen. From we bisnesman ya i pemaot kaon ya, hem i givhan long plante wokman, ol famle blong olgeta, mo ol man we kampani ya i gat kaon long olgeta. ?Be olsem wanem long maneja ya we i stil? ?Hem i save kasem haf blong ol mane we i kamaot long niufala kampani ya? !No gat, hem i stap long kalabus mo kampani ya bambae i neva tekem hem bakegen! Samting ya i sem mak long sin blong Adam. Taem God i fogetem sin blong Adam, plante milyan pikinini blong Adam oli kasem blesing​—⁠be i no Adam.”

14, 15. ?From wanem yumi save talem se Adam mo Iv, tufala i wantem nomo blong mekem sin, mo from wanem yumi no olsem tufala?

¹⁴ Samting ya i stret nomo. Tingbaot, Adam mo Iv, tufala i wantem blong mekem sin. Tufala i jusum blong no obei long God. Be long saed blong yumi, yumi gat sin finis taem yumi bon. Yumi no gat wan disisen blong mekem long saed ya. Nomata we yumi traehad olsem wanem, be yumi no save ronwe fulwan long sin. (1 Jon 1:8) Samtaem, maet yumi gat filing olsem Pol, we i raetem se: “Taem mi wantem mekem ol samting we i gud, be oltaem mi stap jusumaot ol samting nomo we i nogud olgeta. Long tingting blong mi, mi glad tumas long Loa ya blong God. Be mi luk we rabis fasin ya we i stap wok long laef blong mi, hem i narafala. Hem i agensem Loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin, we i stap wok oltaem long tingting blong mi. Man. Mi mi no save harem gud nating.”​—Rom 7:​21-​24.

¹⁵ !Nating se i olsem, ransom i mekem se yumi gat hop! Jisas nao i laen ya we God i bin promes se bambae hem i yusum blong ‘givim blesing long olgeta nesen long wol.’ (Jenesis 22:18; Rom 8:​20) Sakrefaes blong Jisas i openem rod long olgeta we oli soem bilif long hem, blong oli kasem ol nambawan blesing. I gud yumi luk sam long ol blesing ya.

Kasem Blesing From Sakrefaes Blong Kraes

16. Nating se yumi gat sin, ?wanem ol blesing we yumi save kasem naoia from sakrefaes blong Jisas?

¹⁶ Jemes, man blong raetem Baebol, i luksave se “plante taem, yumi evriwan i mekem i no stret.” (Jemes 3:2) Be sakrefaes blong Kraes i mekem se God i save fogivim ol sin blong yumi. Jon i raetem se: “Sipos wan long yumi i mekem sin, i gat Jisas Kraes i stap, we fasin blong hem i stret gud, mo hem i man blong givhan long yumi, blong toktok long Papa blong yumi long saed blong yumi. Kraes ya, hem i man we i ded blong mekem rod blong God i tekemaot ol sin blong yumi.” (1 Jon 2:​1, 2) I tru, yumi no mas ting se fasin blong mekem sin i nating nomo. (Jud 4; skelem wetem 1 Korin 9:​27.) Be, sipos yumi mestem, nao yumi mekem sin, yumi save talemaot long Jeova, olgeta samting we i stap long hat blong yumi. Yumi trastem fulwan se ‘hem i rere blong fogivim yumi.’ (Ol Sam 86:5; 130:​3, 4; Aesea 1:​18; 55:7; Ol Wok 3:​19) Taswe, sakrefaes blong Jisas i givhan long yumi blong wosip long God wetem tingting we i no stikim yumi, mo i mekem se yumi save prea long Hem tru long nem blong Jisas Kraes.​—Jon 14:13, 14; Hibrus 9:​14.

17. ?Sakrefaes blong Kraes i mekem se yumi save kasem wanem blesing long fiuja?

¹⁷ Sakrefaes blong Kraes i openem rod long God blong mekem stamba tingting ya blong hem i kamtru se: ol man we oli obei, bambae oli laef blong olwe long Paradaes long wol. (Ol Sam 37:29) Pol i raetem se: “Jisas ya, hem i olsem ansa we i talem ‘Yes’ long olgeta promes we God i talem finis.” (2 Korin 1:​20) I tru se ded i bin “rul olsem king.” (Rom 5:​17, NW) Be, sakrefaes blong Kraes i mekem rod blong God i winim “laswan blong ol enemi ya,” hemia ded. (1 Korin 15:26; Revelesen 21:4) Olgeta we oli ded finis, olgeta tu oli save kasem blesing from sakrefaes blong Jisas. Jisas i talem se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.”​—Jon 5:​28, 29; 1 Korin 15:20-​22.

18. ?Wanem bigfala trabol we sin i mekem long ol man, mo olsem wanem bambae trabol ya i finis long niufala wol blong God?

¹⁸ !Traem tingbaot! !Bambae yumi harem gud tumas long wan nambawan laef, hemia laef ya we God i wantem fastaem​—⁠laef we i no gat ol wari we oli stap mekem yumi harem nogud tede! Sin i spolem fasin fren blong yumi wetem God, be tu, i spolem tingting, hat, mo bodi blong yumi. Be, Baebol i promes se, long niufala wol blong God, “bambae i no moa gat man olbaot long kantri ya we i save talem se hem i sik.” Yes, bambae i no moa gat man i sik no i harem nogud long filing blong hem. ?From wanem? Aesea i ansa, se: “From we Hae God bambae i fogivim ol man long ples ya, i tekemaot ol sin blong olgeta.”​—Aesea 33:24.

Ransom Sakrefaes​—Wan Rod Blong Soem Lav

19. ?Wanwan long yumi i mas mekem wanem long saed blong sakrefaes blong Kraes?

¹⁹ Lav i pusum Jeova blong sanem Pikinini blong hem i kam long wol. (Rom 5:8; 1 Jon 4:9) Mo, lav i pusum Jisas blong ‘i ded from olgeta man.’ (Hibrus 2:9; Jon 15:13) I stret nomo we Pol i raetem se: “From we Kraes i lavem mifala tumas, nao fasin ya blong hem i stap holemtaet mifala. . . . Hem i ded blong sevem olgeta man, blong bambae ol man we oli laef wetem hem, oli no moa laef blong mekem ol wok blong olgeta nomo. Olgeta oli laef blong mekem wok blong hem, we hem i ded, mo i laef bakegen, blong i sevem olgeta.” (2 Korin 5:​14, 15) Sipos yumi gat fasin tangkiu long samting we Jisas i mekem blong sevem yumi, bambae yumi lesin long hem. !Tingbaot, ransom i mekem se God i sevem yumi long ded! Yes, yumi mas soemaot long ol fasin blong yumi se yumi tinghae long sakrefaes blong Jisas.​—Hibrus 10:29.

20. ?Wanem sam rod we yumi save folem blong obei long “ol tok” blong Jisas?

²⁰ ?Olsem wanem yumi save soem wetem fulhat blong yumi se yumi gat fasin tangkiu long sakrefaes ya? Smoltaem bifo we oli holem Jisas, hem i talem se: “Man we i lavem mi, hem bambae i save obei long ol tok blong mi.” (Jon 14:23) “Ol tok” blong Jisas, oli joen wetem oda ya we hem i givim long yumi blong gohed strong long wok ya se: “Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta.” (Matiu 28:19) Mo tu, blong obei long Jisas, yumi mas soem lav long ol brata blong yumi.​—Jon 13:34, 35.

21. ?From wanem yumi mas joen long Memoriol long Epril 1, 1999?

²¹ Wan long ol beswan rod we yumi save folem blong soem fasin tangkiu, hemia taem yumi go long Memoriol blong ded blong Kraes. Long yia ya, Memoriol hem i long Epril 1.b Oda ya tu, i wan haf blong “ol tok” blong Jisas. Taem Jisas i stanemap lafet ya, hem i talem long ol man blong hem se: “Yufala i mas mekem samting ya blong tingbaot mi bakegen.” (Luk 22:19) I gud yumi joen long lafet ya we i moa impoten bitim ol narafala lafet long histri, mo tu i gud we yumi obeigud long olgeta oda we Kraes i givim. Long rod ya, bambae yumi soemaot bilif blong yumi se sakrefaes blong Jisas nao i rod blong God blong sevem ol man. Tru ya, “i no gat wan narafala man nating we i save sevem yumi.”​—Ol Wok 4:​12.

[Ol futnot]

?Yu Save Tingbaot?

◻ ?From wanem ol man oli no save tekemaot sin blong olgeta?

◻ ?Long wanem rod Jisas i kam olsem “wan ransom we i sem mak”?

◻ ?Olsem wanem Jisas i yusum raet blong hem blong mekem ol man oli kam stret gud, blong givhan long yumi?

◻ ?Sakrefaes blong Kraes i mekem se ol man oli kasem wanem blesing?

[Tok Blong Pija Long Pej 15]

Wan man we i no gat sin​—we i sem mak long Adam​—hem nomo i save pemaot yumi long stret fasin

[Tok Blong Pija Long Pej 16]

From we Jisas i gat raet blong mekem ol man oli kam stret gud olgeta, ded blong hem i gat bigfala praes