Fasin Blong Lavem Ol Man Bambae i No Save Finis Samtaem
“Yufala i mas putum tingting blong yufala i strong moa blong kasem paoa ya we oli gudfala moa. Be naoia, mi wantem soemaot long yufala wan fasin we i nambawan blong folem, i winim ol narafala fasin.”—1 KORIN 12:31.
1-3. (a) ?Olsem wanem fasin blong lanem blong soem lav i klosap sem mak long fasin blong lanem wan niufala lanwis? (b) ?From wanem i no isi blong lanem blong soem lav?
?YU YU traem finis blong lanem wan niufala lanwis? !Yumi save talem se samting ya i no isi! I tru, wan smol pikinini i save lanem wan lanwis taem hem i lesin nomo long lanwis ya. Bren blong hem i tekem saon mo mining blong ol tok we hem i harem, nao smoltaem biaen, hem i toktok gud lanwis ya, nao maet hem i wantem toktok oltaem. Samting ya i no sem mak wetem yumi ol bigman. Yumi mas lukluk bakegen mo bakegen long wan diksonari jes blong save olsem wanem blong talem wan tok long wan narafala lanwis. Be sloslou, sipos yumi gohed olsem mo yumi stap harem lanwis ya oltaem, ale tingting blong yumi i stat blong tekem niufala lanwis ya. Biaen, yumi save toktok gud long hem.
2 Samting ya i klosap sem mak long fasin ya we man i lanem blong soem lav long narafala. I tru se yumi bon wetem filing blong laekem narafala, wan fasin we i kamaot long God. (Jenesis 1:27; skelem wetem 1 Jon 4:8.) Nating se i olsem, yumi mas lanem blong soem lav long narafala. Mo i nidim bigfala traehad blong mekem olsem—antap moa, long taem blong yumi, we i no gat plante man we oli soem lav. (2 Timoti 3:1-5) Insaed long ol famle tu, fasin blong soem lav long narafala i lus. Yes, plante man oli gruap long wan famle we i raf, mo neva oli harem ol tok we oli soem lav. (Efesas 4:29-31; 6:4) ?Taswe, olsem wanem yumi save lanem blong soem lav long narafala—nating se narafala i no soem lav long yumi?
3 Baebol i save halpem yumi. Long 1 Korin 13:4-8, Pol i no jes mekem wan lis blong ol defren fasin blong lav, be hem i eksplenem klia olsem wanem lav ya we i hae moa, i save wok long laef blong man. Taem yumi stadi long ol vas ya, bambae samting ya i halpem yumi blong kasem trufala mining blong lav, wan fasin we i kamaot long God. Mo tu, samting ya bambae i givhan long yumi blong kam inaf blong soem lav long narafala. I gud yumi luk sam rod blong soem lav we Pol i tokbaot. Bambae yumi seraotem ol rod ya long tri grup: (1) fasin blong yumi wanwan; (2) fasin blong yumi wetem ol narafala; mo (3) fasin blong yumi blong stanap strong longtaem.
Lav i Givhan Long Yumi Blong Winim Fasin Flas
4. ?Baebol i talem se fasin jalus i olsem wanem?
4 Long ol fastok we Pol i raetem long ol Kristin long Korin blong tokbaot lav, hem i talem se: “Man we i stap lavem man, . . . hem i no save jalus.” (1 Korin 13:4) Man i save jalus long ol narafala man from we oli rij no oli gat plante samting. Fasin jalus ya i save spolem man long saed blong bodi, long saed blong filing, mo long saed blong spirit.—Proveb 14:30; Rom 13:13; Jemes 3:14-16.
5. ?Olsem wanem lav i save halpem yumi blong no jalus taem ol elda oli no givim sam tiokratik wok long yumi?
5 Taem yumi tingbaot samting ya, maet i gud blong askem yumi wan se, ‘?Mi mi jalus taem ol elda oli givim tiokratik wok long narafala, be oli no givim long mi?’ Sipos yes, yu no mas harem nogud. Man ya blong raetem Baebol, Jemes, i talem bakegen long yumi se ‘fasin blong wantem samting blong narafala’ i stap long tingting blong olgeta sinman. (Jemes 4:5) Lav we yu gat long brata blong yu i save givhan long yu blong gat stret tingting bakegen. Lav ya i save givhan long yumi blong haremgud wetem wan man we i stap haremgud long wan blesing we hem i kasem no taem narafala i talem ol gudfala tok blong presem hem.—Skelem wetem 1 Samuel 18:7-9.
6. ?Wanem bigfala problem we i stap long kongregesen blong Korin long faswan handred yia?
6 Pol i gohed i se, man we i gat lav, hem i “no save mekem tingting blong hem i go antap, mo i no save flas.” (1 Korin 13:4) Sipos yumi gat bigfala save no waes blong mekem sam kaen wok, yumi no mas flas from samting ya. I klia se hemia wan problem we i stap long kongregesen blong Korin. Samfala man we oli kam insaed long Kristin kongregesen, oli wantem tumas blong kasem hae posisen. Maet ol man ya oli gat bigfala save blong eksplenem sam tijing no maet oli nafgud blong mekem sam wok. Ale, oli stap pulum ol man blong leftemap olgeta. Mo fasin ya i mekem se kongregesen i seraot bigwan. (1 Korin 3:3, 4; 2 Korin 12:20) Trabol ya i kam moa nogud mekem se biaen, Pol i mas stretem ol Kristin long Korin from we oli “letem ol krangke man oli gohed.” Pol i tok agensem ol man ya, i se oli ‘ol giaman aposol.’—2 Korin 11:5, 19, 20.
7, 8. Soem long Baebol olsem wanem yumi save yusum save mo waes blong yumi blong leftemap fasin joen gud.
7 Sem samting olsem i save hapen tede. Eksampel, samfala, maet oli gat fasin blong tok flas from samting we oli mekem long wok blong prij no from ol wok we oli stap mekem long ogenaesesen blong God. Sipos yumi gat save no waes blong mekem wan spesel wok, we ol narafala oli no save mekem, ?yu ting se i stret blong flas from samting ya? No, i no stret. Yumi mas yusum spesel save we yumi gat blong leftemap fasin joen gud—i no blong leftemap yumi wan.—Matiu 23:12; 1 Pita 5:6.
8 Pol i raetem se, nomata we kongregesen i gat plante memba blong hem, be ‘God i stap joenem olgeta memba ya blong oli kam olsem wan bodi.’ (1 Korin 12:19-26) Grik tok we oli tanem i kam “joenem” i minim se meksemap gud, olsem we man i meksemap ol defdefren kala. Taswe, i no mas gat wan long kongregesen we i leftemap hem wan from save blong hem mo i traem blong bos long ol narafala. Man we i praod mo i wantem kasem haenem, hem i no gat ples insaed long ogenaesesen blong God.—Proveb 16:19; 1 Korin 14:12; 1 Pita 5:2, 3.
9. ?Wanem ol eksampel long Baebol long saed blong samfala we oli lukaot prapa intres blong olgeta?
9 Man we i gat lav, hem i “no save tingbaot hem nomo.” (1 Korin 13:5) Man olsem i no save trikim narafala blong kasem samting we hem nomo i wantem. Baebol i givim sam eksampel we oli olsem woning long saed ya. Yumi save luk ol eksampel ya long stori blong Delila, Jesebel, mo Atalia. Wanwan long trifala woman ya i trikim narafala blong kasem samting we trifala nomo i wantem. (Jajes 16:16; 1 King 21:25; 2 Kronikel 22:10-12) Absalom, boe blong King Deved, hem tu i mekem olsem. Hem i go mo i toktok wetem olgeta we oli stap kam long doa blong bigfala stonwol blong king i stretem problem blong olgeta. Hem i giaman long olgeta se king i no rili intres long olgeta. !Ale, hem i talem stret long olgeta se, wanem we kot i rili nidim, hemia wan man we i gat lav olsem hem! (2 Samuel 15:2-4) Yes, Absalom i no rili intres long ol man we narafala i spolem olgeta, no gat. Hem i intres nomo long hem wan. Hem wan i putumap hem olsem king. Mo hem i winim plante man, oli kam aninit long rul blong hem. Be biaen, ol enemi oli winim Absalom long faet. Oli kilim hem i ded, mo oli no berem hem long wan gudfala beregraon.—2 Samuel 18:6-17.
10. ?Olsem wanem blong soem se yumi tingbaot intres blong ol narafala?
10 Stori ya i wan woning long ol Kristin tede. Nomata we yumi man no woman, maet yumi gat fasin ya blong traem pulum narafala blong folem tingting blong yumi. Maet i isi long yumi blong winim narafala, mo bos long wan storeyan, no daonem olgeta we oli gat defren tingting. Be sipos yumi rili gat lav, bambae yumi tingbaot samting we narafala i intres long hem. (Filipae 2:2-4) Bambae yumi no fosem narafala mo pulum olgeta blong folem prapa tingting blong yumi, jes from we yumi gat moa ekspiryens no from posisen blong yumi long ogenaesesen blong God, mo from we yumi ting se tingting blong yumi nomo i beswan. Long defren fasin, bambae yumi tingbaot waes tok ya blong Baebol se: “Man we i praod bambae i kasem trabol we i spolemgud hem, mo man we i flas tumas, bambae i foldaon we i foldaon olgeta.”—Proveb 16:18.
Lav i Givhan Long Yumi Blong Frengud Wetem Ol Narafala
11. (a) ?Long wanem rod yumi save soem lav long fasin we i kaen mo i stret? (b) ?Olsem wanem yumi save soem se yumi no glad long ol fasin we oli no stret?
11 Pol i raetem tu se, man we i gat lav, hem i ‘kaen gud’ mo “i no save jikim man.” (1 Korin 13:4, 5) Yes, lav bambae i givhan long yumi blong no mekem raf fasin, talem ol doti tok, mo mekem ol fasin we oli no soem respek. Defren olgeta, lav bambae i givhan long yumi blong tingbaot filing blong narafala. Eksampel, man we i gat lav, bambae hem i traehad blong no mekem wan samting we i save mekem tingting blong narafala i trabol. (Skelem wetem 1 Korin 8:13.) Man olsem ‘i no save glad taem i luk we wan narafala i mekem i no stret, hem i save glad long ol trutok nomo.’ (1 Korin 13:6) Sipos yumi lavem ol loa blong Jeova, bambae yumi no ting nating long ol nogud fasin long saed blong seks, mo bambae yumi no save glad long ol samting we God i agensem. (Ol Sam 119:97) Lav bambae i halpem yumi blong glad long ol samting we oli bildimap ol narafala, be i no ol samting blong brekem daon olgeta.—Rom 15:2; 1 Korin 10:23, 24; 14:26.
12, 13. (a) ?Yumi mas mekem wanem taem narafala i mekem i no stret long yumi? (b) Talem sam eksampel long Baebol blong soem se fasin kros we yumi ting se i stret i save lidim yumi blong mekem ol krangke fasin.
12 Pol i raetem se, man we gat lav, “hem i no save kros kwik” (“hem i no save harem nogud kwiktaem,” Phillips). (1 Korin 13:5) I tru, samtaem yumi ol sinman, yumi harem nogud mo kam kros taem narafala i mekem i no stret long yumi. Nating se i olsem, i rong blong holem wan nogud tingting long saed blong narafala no blong stap kros longtaem. (Ol Sam 4:4; Efesas 4:26) Sipos yumi no lukaot gud, maet fasin kros we yumi ting se i stret, i save lidim yumi blong mekem wan krangke samting, nao yumi gat kaon long fored blong Jeova.—Jenesis 34:1-31; 49:5-7; Namba 12:3; 20:10-12; Ol Sam 106:32, 33.
13 Samfala oli letem ol slak fasin blong narafala i mekem se oli no moa go long ol Kristin miting, no blong joen long wok blong prij. Plante long olgeta ya, oli bin mekem wan strongfala faet blong holem bilif blong olgeta. Maet famle i agensem olgeta, ol fren long ples blong wok i jikim olgeta, mo ol narafala traem olsem. Oli winim ol traem ya, from we oli tingbaot ol hadtaem ya olsem rod blong traem bilif blong olgeta, mo i stret blong tingting olsem. ?Be olsem wanem sipos wan Kristin i talem no i mekem wan samting we i no soem lav nating? ?Samting ya i no traem bilif blong yumi? Si, hem i traem bilif blong yumi, from we sipos yumi stap kros longtaem, yumi save “givim jans long Setan.”—Efesas 4:27.
14, 15. (a) ?I nidim wanem blong no stap “kros longtaem”? (b) ?Olsem wanem yumi save folem eksampel blong Jeova long saed blong fasin fogif?
14 I stret nomo we Pol i gohed, i talem se man we i gat lav, hem i “no save stap kros longtaem.” (1 Korin 13:5) Long vas ya, Pol i yusum wan tok we i laenap wetem man we i stap makem daon ol kaon blong narafala long buk. I klia se man ya we Pol i stap tokbaot, hem i stap makem daon ol nogud fasin we narafala i bin mekem long hem, olsem nao bambae hem i no fogetem. ?Olsem wanem sipos wan man i talem wan tok no i mekem wan samting we i stikim yumi? ?Bambae yumi makem daon ol samting ya long tingting blong yumi, blong biaen, yumi save yusum bakegen agensem man ya? Sipos yumi gat lav, bambae yumi no mekem olsem. !Yumi glad tumas se Jeova i gat sore long yumi! !Hem i no stap makemdaon evri smosmol mastik blong yumi! (Ol Sam 130:3) Yes, taem yumi tanem tingting from nogud fasin we yumi mekem, hem i tekemaot ol sin blong yumi.—Ol Wok 3:19.
15 Yumi save folem eksampel blong Jeova long saed ya. Yumi no mas kwik blong harem nogud taem narafala i mekem i no stret long yumi. Sipos yumi kwik blong harem nogud, yumi stap spolem yumi moa i bitim we yumi stap spolem man ya we i mekem i no stret long yumi. (Prija 7:9, 22) Long defren fasin, yumi mas tingbaot se man we i gat lav, “hem i stap bilif strong long God, mo i stap putum tingting blong hem i strong long hem.” (1 Korin 13:7) I tru, yumi no wantem kam olsem man we narafala i save trikim hem isi nomo. Be i no stret tu blong ting se ol nogud tingting oli pusum ol brata blong yumi blong spolem yumi. Oltaem, i gud blong tingbaot olgeta se oli gat stret tingting.—Kolosi 3:13.
Lav i Halpem Yumi Blong Stanap Strong Longtaem
16. ?Wetaem lav i save halpem yumi blong gat longfala tingting?
16 Pol i talem long yumi se “man we i stap lavem man, tingting blong hem i longfala.” (1 Korin 13:4) Lav i mekem se yumi naf blong fesem ol hadtaem, nating se yumi mas fesem ol hadtaem ya blong plante yia. Eksampel, sam Kristin oli stap plante yia finis long wan famle we i seraot long ol defren bilif. Samfala oli no mared, i no from we oli wantem stap olsem nomo, be from we oli no faenem wan stret man no woman “blong Masta blong yumi.” (1 Korin 7:39; 2 Korin 6:14) Samfala bakegen, oli mas faet agensem ol problem long saed blong helt. (Galesia 4:13, 14; Filipae 2:25-30) Yes, long olfala wol ya, yumi evriwan i nidim fasin blong stanap strong longtaem.—Matiu 10:22; Jemes 1:12.
17. ?Wanem i save halpem yumi blong stanap strong longtaem?
17 Pol i mekem yumi sua se, man we i gat lav, “hem i no save letem wan samting i daonem tingting blong hem. . . . Maet bigfala trabol i save kasem hem, be tingting blong hem i no save foldaon.” (1 Korin 13:7) Lav we yumi gat long Jeova bambae i halpem yumi blong safa from we yumi wantem holemtaet stret fasin. (Matiu 16:24; 1 Korin 10:13) Hemia i no minim se yumi stap lukaot nomo blong narafala i kilim yumi ded. Nogat. Defren olgeta, yumi wantem gat pis wetem olgeta man, mo blong gat wan laef we i kaet. (Rom 12:18; 1 Tesalonaeka 4:11, 12) Nating se i olsem, taem sam samting oli traem bilif blong yumi, yumi glad blong fesem ol traem ya. Yumi luk ol traem ya olsem praes we yumi mas pem from we yumi kam ol Kristin disaepol. (Luk 14:28-33) Taem yumi fesem hadtaem, i gud we yumi holem strong tingting se, bambae gudfala frut i mas kamaot.
18. Eksplenem from wanem yumi nidim fasin blong stanap strong nating se yumi no fesem hadtaem.
18 I no long taem blong trabol nomo we yumi nidim fasin blong stanap strong. Samtaem, fasin ya blong stanap strong i minim nomo se, blong stap longtaem, no blong gohed long sem rod, nomata we i gat hadtaem no nogat. Fasin blong stanap strong i minim tu se yumi holem wan gudfala program long saed blong spirit. Eksampel, ?yu yu stap joen oltaem long wok blong prij, sipos ol samting long laef blong yu oli letem yu blong mekem olsem? ?Yu yu stap ridim mo tingting dip long Tok blong God? ?Yu yu stap toktok wetem Papa blong yumi long heven tru long prea? ?Yu yu stap go oltaem long ol miting blong kongregesen, mo yu yu stap kasem blesing from fasin ya blong leftemap tingting bitwin ol brata mo sista? Sipos yes, ale nomata we yu stap long gudfala taem no long taem blong trabol, yu soem se yu stap stanap strong. Yumi no mas kam slak blong mekem olsem, “from we long stret taem blong hem, yumi save kasem kakae from ol hadwok ya blong yumi.”—Galesia 6:9.
Lav i “Winim Ol Narafala Fasin”
19. ?Olsem wanem lav i “winim ol narafala fasin”?
19 Pol i makem se i impoten tumas blong soem lav long narafala. Hem i talem se lav, we i stamba fasin blong God, i “winim ol narafala fasin.” (1 Korin 12:31) ?I “winim ol narafala fasin” long wanem rod? Yes, Pol i jes tokbaot ol presen we tabu spirit i givim long plante Kristin long faswan handred yia. Samfala, oli naf blong talemaot profet tok, sam narafala, oli kasem paoa blong mekem ol sikman oli gud bakegen, mo plante long olgeta, oli kasem paoa blong toktok long narafala lanwis. !I rili ol nambawan presen ya! Be Pol i talem long ol Kristin long Korin se: “Sipos mi gat paoa blong toktok long ol lanwis blong ol man mo blong ol enjel tu, be mi no lavem man, tok ya bambae i olsem noes nomo. Bambae mi olsem wan bigfala tamtam we i stap krae nomo, mo mi olsem wan bel we i stap krae blong nating. Sipos mi gat paoa blong talemaot ol tok we God i givim, be mi no lavem man, bambae mi olsem nating. Mo sipos mi kasem olgeta save blong man, wetem mining blong olgeta tok ya tu we God i stap haedem, be mi no lavem man, bambae mi olsem samting nating. Mo sipos mi bilif strong long God we i naf blong mi save seftem ol bigbigfala hil, be mi no lavem man, bambae mi olsem nating nomo.” (1 Korin 13:1, 2) Yes, sipos ol nambawan wok we yumi mekem oli no kamaot from lav we yumi gat long God mo ol man raonabaot long yumi, ol wok ya oli olsem ‘nating nomo.’—Hibrus 6:1.
20. ?From wanem yumi mas gohed blong traehad sipos yumi wantem wokem fasin ya blong laekem ol man?
20 Jisas i givim wan narafala risen from wanem yumi mas gat fasin ya blong God, hemia lav. Hem i talem se: “Nao [sipos] yufala i stap lavlavem yufala, bambae olgeta man oli luksave se yufala i man blong mi.” (Jon 13:35) Taem Jisas i yusum wod ya “sipos,” i olsem we hem i letem ol wanwan Kristin blong jusum se bambae oli soem lav no nogat. Tingbaot, sipos yumi stap long narafala kantri, hemia i no minim se bambae yumi gat strong tingting blong toktok long lanwis blong kantri ya. I sem mak, taem yumi joen long ol miting long Haos Kingdom no wetem ol Kristin brata sista, hemia nomo i no naf blong tijim yumi blong soem lav. Blong lanem “lanwis” ya, i nidim fasin traehad oltaem.
21, 22. (a) ?Yumi mas mekem wanem sipos yumi no kasem mak blong lav we Pol i tokbaot? (b) ?Long wanem rod yumi save talem se ‘lav i no save finis samtaem’?
21 Samtaem, bambae yu no kasem ol mak ya blong lav we Pol i tokbaot. Be yu no mas letem tingting blong yu i foldaon. Gat longfala tingting, mo traehad blong soem fasin ya. Gohed blong ridim Baebol mo folem ol rul blong hem taem yu stap wok wetem ol narafala. Yu neva mas fogetem eksampel we Jeova i soem long yumi. Pol i givim advaes long ol Kristin long Efesas se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.”—Efesas 4:32.
22 Taem yumi stap lanem blong toktok wan niufala lanwis, sloslou lanwis ya i kam moa isi long yumi. Long sem fasin, taem yu stap lanem blong soem lav, sloslou bambae yu faenem se i kam moa isi blong soem lav long narafala. Pol i mekem sua long yumi se: “Fasin ya we oltaem man i lavem man, bambae i no save finis samtaem.” (1 Korin 13:8) Yes, lav i winim ol presen ya we tabu spirit i bin givim tru long wan merikel. Bambae lav i stap oltaem gogo i no save finis. Taswe, gohed blong lanem blong soem fasin ya blong God. Pol i talem se lav i “winim ol narafala fasin.”
?Yu Yu Save Eksplenem?
◻ ?Olsem wanem lav i save givhan long yumi blong winim fasin flas?
◻ ?Long wanem rod lav i save halpem yumi blong leftemap pis insaed long kongregesen?
◻ ?Olsem wanem lav i save givhan long yumi blong stanap strong longtaem?
◻ ?Long wanem rod, lav i “winim ol narafala fasin”?
[Tok Blong Pija Long Pej 19]
Lav bambae i halpem yumi blong fogetem ol mastik blong ol brata sista blong yumi
[Tok Blong Pija Long Pej 23]
Fasin blong stanap strong i minim se yumi folem gud wan tiokratik program