?Yu Yu Soem Fasin Tangkiu?

Long wan haos blong ol misinari long wes afrika, i gat wan dog we nem blong hem teddy. Taem man i sakem wan pis mit i go long teddy, kwiktaem nomo hem i solemdaon mit ya, hem i no tektaem blong testem mo kakae gud. Hem i stap pulum win aninit long hot san ya, i stap wet nomo blong man i sakem wan narafala pis mit i kam long hem. Ale, taem i no moa gat mit, hem i tanraon, i gowe.

Teddy i neva soem fasin tangkiu from samting we hem i kasem. Mo i no gat man tu, we bambae i askem hem blong mekem olsem. Tru ya, hem i jes wan dog.

ATING yumi wantem tumas blong ol man oli gat fasin tangkiu, oli no folem fasin blong anamol. Be, plante taem yumi harem nogud, from we fulap man oli kwik blong karem ol samting we oli wantem long laef, mo oli gohed blong wantem moa. Yumi no sapraes long samting ya. Baebol i talemaot finis se long ol las dei, ol man bambae oli no gat fasin tangkiu.​—2 Timoti 3:1, 2.

Be, ol man blong God oli mas gat wan tingting we i defren. Oli mas traehad blong folem advaes blong aposol Pol, we i talem long ol Kristin brata blong hem se: “Oltaem yufala i mas talem tangkiu.”​—Kolosi 3:15.

Jeova i Soem Fasin Tangkiu

Jeova God i soem nambawan eksampel long saed blong fasin blong soem tangkiu. Tingbaot wanem tingting blong hem long saed blong ol man blong hem. Tabu spirit i pusum Pol blong raet i go long ol Hibru Kristin se: “Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem hem, mo we yufala i givhan finis long ol narafala Kristin man, mo we yufala i stap givhan long olgeta yet.”​—Hibrus 6:​10.

I gat fulap eksampel long saed blong fasin tangkiu we Jeova i soemaot long ol man blong hem we oli holemstrong long bilif blong olgeta. Jeova i blesem Ebraham taem hem i mekem ol pikinini blong hem oli kam plante gogo oli “olsem ol sta long skae, mo olsem sanbij daon long solwota.” (Jenesis 22:17) Jeova i soem tangkiu long Job from we hem i bin fasgud long God nating se hem i kasem ol traem. Jeova i mekem Job i kam rijman bakegen, be tu, olgeta samting ya we Job i gat fastaem, Jeova i “dabolem evriwan.” (Job 42:10) Olgeta wok we Jeova i mekem long ol man, long ol taosen yia we oli pas kam kasem tede, oli pruvum se tok ya i tru tumas se: “Oltaem, Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”​—2 Kronikel 16:⁠9.

God i gat fasin tangkiu mo hem i wantem mekem i gud long olgeta we oli stap traehad blong mekem wok blong hem. Hemia ol impoten haf blong ol nambawan fasin blong Jeova. Yumi mas luksave samting ya from we long Kristin bilif blong yumi yumi mas soemaot ol fasin ya. Pol i raetem se: “Sipos man i no bilif strong long God, hem i no save mekem God i glad long hem, from we sipos wan man i wantem kam long God, hem i mas bilif we God . . . i stap mekem i gud long olgeta we oli stap traem faenem hem.”​—Hibrus 11:⁠6.

Sipos Jeova i gat fasin we i strong mo i stap lukluk ol nogud poen long yumi oltaem, ating yumi evriwan i lus finis. Man blong raetem Ol Sam i soemaot samting ya longtaem bifo, se: “?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem?” (Ol Sam 130:⁠3) Jeova i no save gat fasin we i strong, we i no soem tangkiu, mo hem i no save stap faenem rong long yumi oltaem. Hem i tinghae long olgeta we oli mekem wok blong hem. Hem i soem fasin tangkiu long olgeta.

Jisas​—Wan Man We i Gat Bigfala Fasin Tangkiu

Jisas Kraes i soemaot ol semfala fasin olsem Papa blong hem long heven. Hem i gat tangkiu from ol wok we narafala oli mekem wetem bilif. Tingbaot samting ya we i hapen wan taem long tempel blong Jerusalem: “Nao taem Jisas i luklukraon, hem i luk we ol rijman oli stap sakem kleksen blong olgeta, long ples blong sakem kleksen, long haos blong God. Mo hem i luk wan wido woman we i pua, i kam sakem tu smol mane we i olsem twanti vatu nomo. Nao Jisas i talem se, ‘Tru mi talem long yufala. Kleksen we wido ya i sakem i moa long ol mane we olgeta narafala man ya oli sakem. Ol arafala man ya, taem oli sakem kleksen blong olgeta, oli stap sakem haf mane blong olgeta we i stap nating nomo. Be woman ya we i pua, hem i sakem olgeta mane we hem i gat, we i blong pem kakae blong hem long hem.’ ”​—Luk 21:​1-4.

I tru se, mane we woman ya i givim i smol nomo, antap moa sipos yumi skelem wetem mane we ol rijman oli givim. Ating plante man long tempel ya oli no luk woman ya nating. Be, Jisas i luk olfala wido woman ya. Hem i luksave se laef blong woman ya i olsem wanem. Jisas i luk woman ya mo i gat tangkiu long hem.

I gat wan narafala stori blong wan rij woman, nem blong hem Meri. Taem Jisas i stap sidaon mo i stap kakae, woman ya i kam long hem mo i kafsaedem oel i go long leg mo hed blong Jisas. Praes blong oel ya i sas tumas. Sam man oli tok nogud long fasin blong woman ya, oli se i moagud sipos hem i salem oel ya mo yusum mane blong hem blong halpem ol puaman. ?Jisas i mekem wanem? Hem i se: “!Ei! !Yufala i livim woman ya! ?From wanem yufala i stap spolem hem? Hem i mekem wan gudfala samting long mi ya. Tru mi talem long yufala, long evri ples long wol we bambae oli talemaot gud nius blong mi, be bambae oli mas tokbaot samting ya we woman ya i mekem, blong tingbaot hem bakegen.”​—Mak 14:​3-6, 9; Jon 12:3.

Jisas i no faenem fol agensem woman ya mo talem se hem i sore tumas blong luk se hem i westem oel ya. Jisas i gat tangkiu from kaengud fasin we Meri i gat we i soemaot lav mo bilif blong hem. Stori blong hem i stap long Baebol blong tingbaot gudfala fasin ya blong hem. Ol stori ya, wetem sam narafala bakegen, oli soem se Jisas i wan man we i gat fasin tangkiu.

Sipos yu yu wan man blong God, yu save sua se Jeova God mo Jisas Kraes, tufala i rili gat bigfala tangkiu long ol traehad we yu mekem blong sapotem klin wosip. Taem yumi tingbaot samting ya, hem i pulum yumi i kam long tufala mo i pusum yumi blong folem fasin blong tufala blong gat fasin tangkiu.

Tingting Blong Setan, Hemia Blong Faenem Fol

Naoia bambae yumi tingbaot eksampel blong wan man we i no soem fasin tangkiu. Man ya hem i Devel Setan. From we Setan i no gat fasin tangkiu, samting ya i lidim hem blong rebel agensem God long wan fasin we i mekem bigfala trabol i kamaot.

Setan i wokem wan nogud tingting insaed long hem we i mekem se hem i mas faenem fol oltaem mo i neva glad long wan samting. Biaen, hem i traem putum tingting ya tu long ol narafala. Tingbaot wanem i hapen long garen blong Iden. Jeova i wokem faswan man mo woman, i putum tufala long wan naesfala garen we i paradaes, mo i talem long tufala se: “Olgeta tri long ples ya, yu yu save kakae frut blong olgeta.” I gat wan rul nomo i stap. God i talem se: “Wan tri nomo i stap we i tabu blong yu kakae frut blong hem. Hemia tri ya we frut blong hem i save mekem yu yu save ol fasin we i gud, mo ol fasin we i nogud. Tri ya, sipos yu kakae frut blong hem, be long sem dei nomo, bambae yu ded.”​—Jenesis 2:​16, 17.

Be, i no longtaem biaen long samting ya, Setan i agensem paoa mo raet blong Jeova. Long wan saed, Setan i wantem mekem Iv i no gat tangkiu nating long Jeova. Hem i wantem mekem se, bambae Iv i rebel agensem Jeova, olsem we hem wan i bin mekem. Setan i askem se: ‘?I tru we God i blokem yutufala se i tabu blong yutufala i kakae frut blong ol tri long ples ya?’ (Jenesis 3:⁠1) Kwestin ya i wantem mekem Iv i tingting se God i stap holembak wan nambawan samting long Iv, wan samting we i save openem ae blong Iv mo mekem hem i kam olsem God hem wan. Iv i no moa tingbaot olgeta blesing we Jeova i bin givim long hem. Hem i no moa gat fasin tangkiu long ol samting ya, nao hem i stat wantem tumas blong kasem samting ya we i tabu.​—Jenesis 3:⁠5, 6.

Yumi savegud wanem bigfala trabol i kamaot biaen. Iv, we nem blong hem i “mama blong olgeta man we i laef” naoia i kam mama blong olgeta man we oli stap ded. Tru long Adam, olgeta man oli kasem sin we biaen i mekem man i ded.​—Jenesis 3:20; Rom 5:​12.

Folem Eksampel Blong God Mo Kraes

Setan i defren olgeta long Jisas. Baebol i tokbaot Setan olsem “Man ya we i agensem ol brata blong yumi . . . , [we i stap] talemaot ol poen blong hem agens long olgeta long fes blong God.” (Revelesen 12:10) Jisas hem i “save sevem olgeta we oli joen long hem blong kam long God, i stat naoia, gogo i no save finis, from we hem bambae i laef oltaem, mo bambae i stanap oltaem long fes blong God, blong prea from olgeta.”​—Hibrus 7:⁠25.

Setan i tok agensem ol man blong God. Jisas, hem i gat tangkiu long olgeta mo i toktok i go long God from olgeta. Ol Kristin oli mas folem eksampel blong Kraes. Oli mas traehad blong lukaot ol gudfala samting long narafala man. Oli mas gat tangkiu mo tinghae long narafala. Taem oli mekem olsem, oli soem se oli gat tangkiu long hemia we i soem nambawan eksampel blong fasin tangkiu, hemia Jeova God.​—1 Korin 11:⁠1.

[Tok Blong Pija Long Pej 17]

Jisas i soem fasin tangkiu from gudfala aksin we Meri i mekem