Evriwan Bambae Oli Fri

“Long tingting blong mi, taem we yumi stap tingbaot gudfala laef ya blong heven we bambae i save kamtru long yumi, ol samting ya we naoia oli stap mekem yumi harem nogud tumas, oli olsem nating nomo. Naoia, olgeta samting we God i mekem oli stap wet, we oli wantem tumas blong luk we God bambae i soemaot ol pikinini blong hem. God i jajem finis olgeta samting ya we hem i mekem, se oli mas kam nating. Mo hemia i no from we olgeta samting ya oli wantem olsem, i from we God i wantem olsem, be tingting blong God i stap yet. Naoia i olsem we olgeta samting ya we God i mekem oli stap panis, from we oli stap rotin nomo. Be long dei ya we God bambae i mekem ol pikinini blong hem oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem. Yumi save finis, we i kam kasem naoia, olgeta samting ya we God i mekem oli stap krae, from we olgeta oli stap harem nogud, olsem we woman i harem nogud blong bambae pikinini blong hem i bon.”​—ROM 8:​18-​22.

LONG haf ya blong leta blong hem long ol man Rom, aposol Pol i eksplenem gud from wanem ol man we oli stap laef oli no rili fri. Hemia from we plante taem oli filim we laef blong olgeta i nating mo oli harem nogud. Mo tu, Pol i soemaot olsem wanem yumi save kam fri olgeta.

“Naoia . . . Yumi Harem Nogud Tumas”

Pol i talem se sipos yumi tingbaot olsem wanem God bambae i blesem yumi, “ol samting ya we naoia oli stap mekem yumi harem nogud tumas, oli olsem nating nomo.” Pol i no stap tok olbaot ya. Long taem blong Pol, mo biaen tu, ol Kristin oli harem nogud tumas from ol strong gavman blong ol man Rom, we oli no kea long ol raet blong ol man. Taem ol man Rom oli jajem finis ol Kristin, se olgeta oli enemi blong gavman, oli stat ronem strong olgeta. Wan man blong raetem Histri, nem blong hem J. M. Roberts, i talem se: “Ol man Rom oli kilim i ded plante Kristin long Rom long rabis fasin, we sam oli letem ol wael anamol oli kakae olgeta, sam oli laetem bodi blong olgeta taem oli laef yet.” (Shorter History of the World) Narafala ripot blong ol trabol we Hae Gavman ya Nero i mekem, i talem se: “Sam long olgeta, oli nilim olgeta long ol pos. Sam narafala, oli somap skin blong anamol long olgeta mo oli letem ol dog oli ronem mo kakae olgeta, Mo sam narafala bakegen, oli kavremap bodi blong olgeta wetem kolta, nao oli putum faea long olgeta blong givim laet long olgeta taem i tudak finis.”​—New Testament History, F. F. Bruce i raetem.

I tru we ol Kristin ya blong bifo oli wantem kam fri, oli no wantem kasem trabol olsem. Be oli no wantem brekem ol loa blong Jisas Kraes blong oli save gofri. Wan eksampel, oli no tekem pat nating long faet blong gavman blong Rom wetem ol man Jiu we oli ‘Fridom Faeta’ long taem ya olsem ol man Silot. (Jon 17:16; 18:36) Long tingting blong ol Silot ya, “i no naf blong talemaot nomo long ol man se oli mas wet long God, blong bambae hem i kam stretem ol trabol long taem ya.” No gat. Olgeta oli ting se oli mas “tekem strong aksin agensem ol enemi blong olgeta,” ol man Rom. (New Testament History) Ol Kristin blong taem ya oli defren. Oli ting se “oli mas wet long God,” from we fasin ya nomo i waes. Oli ting se God nomo i save finisim gud “ol samting ya we naoia oli stap mekem yumi harem nogud tumas,” mo hem nomo i save mekem ol man oli rili fri gogo i no save finis. (Maeka 7:7; Habakuk 2:3) Long ol pej biaen, bambae yumi luk olsem wanem samting ya i kamtru. Be fastaem yumi traem save from wanem “olgeta samting we God i mekem . . . oli mas kam nating.”

“Oli Mas Kam Nating”

?Long vas ya, tok ya “olgeta samting we God i mekem” i minim wanem? Benjamin Wilson, wan man blong raetem buk (The Emphatic Diaglott) i talem se long tingting blong sam man, Pol i minim “ol samting olsem graon we i no gat tingting,” be oli rong from we tok ya i minim “olgeta man.” (Skelem wetem Kolosi 1⁠:23.) Tok ya i stret long yumi olgeta man long wol we yumi wantem tumas blong kam fri. God i jajem finis yumi, se yumi mas kam nating, from we ol fas bubu blong yumi oli bin mekem nogud. Mo hemia “i no from we [yumi] wantem olsem,” hem i no risal blong wan jus we yumi mekem, no gat. Yumi kasem trabol ya from ol bubu blong yumi. From samting ya Baebol i soemaot we man ya Rousseau i rong taem hem i talem se “olgeta man oli fri taem oli bon.” Yumi evriwan yumi slef finis long sin mo ded taem yumi bon. Ol samting ya oli stap fasem laef blong yumi olsem jen, mekem we yumi mas harem nogud mo yumi mas kam nating.​—Rom 3:​23.

?From wanem i mas olsem? From we tufala faswan bubu blong yumi, Adam mo Iv, tufala i wantem “kam olsem [God],” tufala i wantem kam fri olgeta, blong mekem prapa disisen blong olgeta long wanem i gud mo wanem i nogud. (Jenesis 3:5) Be i gat wan samting long saed blong fasin fri we tufala i no save. God nomo i fri olgeta. Hem i gat paoa long evri samting long heven mo wol. (Aesea 33:22; Revelesen 4:​11) Fasin fri blong man i no olsem. Hem i fri insaed long sam loa. Taswe Jemes i pulum ol Kristin long taem blong hem blong folem “loa ya we i save mekem man i fri, i stret olgeta.”​—Jemes 1:​25.

Jeova i gat raet blong putumaot Adam mo Iv long bigfala famle blong hem, nao tufala i ded from. (Jenesis 3:​19) ?Be olsem wanem long ol man long laen blong tufala biaen long tufala? Tufala i no moa save pasem wan laef we i stretgud i go long ol pikinini blong olgeta, tufala i save givim sin mo ded nomo long olgeta. Be God i gat sore long ol man, nao hem i letem tufala i gat pikinini. Taswe “ol man oli stap ded.” (Rom 5:​12) Long fasin ya, “God i jajem finis [olgeta man] se oli mas kam nating.”

“God Bambae i Soemaot Ol Pikinini Blong Hem”

I tru, Jeova i jajem finis olgeta man se oli mas kam nating, be “tingting blong God i stap yet.” Tingting ya se, wan dei bambae ol man oli fri bakegen, from wok we bambae “ol pikinini blong God” oli mekem. ?Hu ya olgeta “pikinini blong God” ya? Olgeta oli disaepol blong Jisas Kraes, mo sem mak long “olgeta samting ya we God i mekem”​—⁠ol narafala man​—⁠oli sinman mo oli no stretgud olgeta. Yes, olgeta tu oli slef long ol fasin ya, i stat taem we oli bon. Taem oli bon, oli no gat raet blong joen long bigfala famle blong olgeta pikinini blong God, we oli klin mo oli stret olgeta. Be Jeova i mekem wan nambawan samting blong sevem olgeta. Tru long ransom sakrefaes blong Jisas Kraes, Hem i mekem olgeta oli fri long sin we oli kasem from ol bubu blong olgeta. Mo tu, Hem i talemaot olgeta se oli “stret man finis,” we i min se oli klin long saed blong spirit. (1 Korin 6:​11) Afta, hem i adoptem olgeta blong oli kam olsem “ol pikinini blong God,” nao hem i tekembak olgeta insaed long bigfala famle blong ol pikinini blong hem.​—Rom 8:14-17.

From we Jeova i adoptem finis olgeta olsem ol pikinini blong hem, bambae oli gat haenem. Bambae “oli pris blong mekem wok blong God blong [yumi], mo bambae oli king, oli rul long olgeta man long wol,” bambae oli joen long Jisas Kraes long Kingdom blong God, gavman blong hem we i stap long heven. (Revelesen 5:​9, 10; 14:​1-4) Gavman ya bambae i strong tumas blong mekem ol man oli fri long stret fasin. Bambae hem i no save fosem olgeta blong oli kam slef, mo hem i no save mekem nogud long olgeta. (Aesea 9:​6, 7; 61:​1-4) Aposol Pol i talem se ol pikinini ya blong God oli joen long Jisas, we hem i “laen ya blong Ebraham,” we God i mekem promes blong hem bifo finis. (Galesia 3:​16, 26, 29, NW) Taswe God i yusumgud olgeta blong mekem promes blong hem long fren blong hem Ebraham i kamtru. Promes ya i talem se tru long olgeta ya we oli “laen” (no pikinini) blong Ebraham, “olgeta nesen long wol bambae oli blesem olgeta nomo.”​—Jenesis 22:18, NW.

?Bambae laen ya, oli mekem wanem blong blesem olgeta man? Ol pikinini ya blong God oli joen long wok blong mekem olgeta narafala man long wol oli fri from sin mo from olgeta trabol we oli kasem, nao bambae olgeta man ya oli kam stretgud olgeta bakegen. Nao ol man we “oli kamaot long olgeta kala, mo long olgeta kantri, mo long olgeta laen,” oli save blesem olgeta nomo. Be oli mas gat bilif long ransom sakrefaes blong Jisas Kraes, mo oli mas ona long gudfala rul blong hem. (Revelesen 7:​9, 14-​17; 21:​1-4; 22:​1, 2; Matiu 20:28; Jon 3:​16) Long fasin ya nao, “olgeta samting we God i mekem bambae oli fri olgeta,” bakegen, “olsem ol pikinini blong hem.” Taem bambae oli fri olsem, oli no fri blong smoltaem long wantu samting nomo, olsem we politik i save mekem ol man oli fri. No gat. Bambae oli fri long olgeta traem mo trabol we ol man oli stap kasem, i stat long taem we Adam mo Iv tufala i no moa ona long hae rul blong God. From samting ya, yumi no sapraes we aposol Pol i talem se: “Ol samting ya we naoia oli stap mekem yumi harem nogud tumas, oli olsem nating nomo.” !Ol trabol ya oli nating nomo sipos yumi skelem olgeta wetem nambawan wok we bambae olgeta oli mekem long bigfala paoa blong olgeta!

?Wetaem bambae God i stat blong soemaot olgeta pikinini ya blong Hem? Bambae i no longtaem, taem bambae hem i mekem i klia se hu ya ol pikinini ya. Hemia taem olgeta “pikinini ya” blong hem oli laef bakegen finis long heven, long ples blong ol spirit man, nao bambae oli save joen wetem Jisas long faet blong God long Amageden. Long taem ya, bambae oli klinimaot ol rabis fasin mo ol raf fasin long wol ya. (Daniel 2:​44; 7:​13, 14, 27; Revelesen 2:​26, 27; 16:16; 17:14; 19:​11-​21) Yumi save luk plante pruf raon long yumi, se “ol las dei” klosap oli finis, nao bambae i no longtaem, God bambae i no moa letem ol man oli mekem stronghed long hem mo i no moa letem olgeta oli mekem nogud.​—2 Timoti 3:​1-5; Matiu 24:​3-​31.

Yes, i tru tede olsem aposol Pol i talem, se “i kam kasem naoia, olgeta samting ya we God i mekem oli stap krae, from we olgeta oli stap harem nogud.” Be naoia klosap i finis. Plante milyan man we oli laef i stap naoia, bambae oli luk “olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo.” Long taem ya, olgeta pikinini blong God long wol oli gat pis, oli fri mo oli gat stret fasin.​—Ol Wok 3:21.

Biaen, Oli Rili Fri

?Yu mas mekem wanem blong ‘bambae yu yu fri olgeta, olsem wan pikinini blong God?’ Jisas Kraes i talem se: “Sipos yufala i obei long ol tok ya blong mi, yufala i prapa man blong mi. Nao bambae yufala i save trutok, mo trutok ya bambae i mekem yufala i fri man.” (Jon 8:​31, 32) Hemia nao prapa rod blong kam fri. Yumi mas kasem save long ol loa mo tijing blong Kraes, mo yumi mas obei long olgeta. Long fasin ya, yumi save stat blong kam fri naoia nomo. Mo bambae i no longtaem, yumi save kam fri olgeta aninit long rul blong Jisas Kraes. Sipos yumi waes, bambae yumi mekem wan stadi blong Baebol, blong kasem save long “ol tok ya” blong Jisas. (Jon 17:3) Olsem ol Kristin blong bifo, yu mas kampani wetem kongregesen blong ol trufala disaepol blong Kraes. Nao bambae ol trutok we Jeova i givim long ol man tru long ogenaesesen blong hem tede, oli save mekem we yu tu yu kam fri.​—Hibrus 10:​24, 25.

Sipos yu stap “wantem tumas blong luk we God bambae i soemaot ol pikinini blong hem,” i gud yu strong blong trastem Kraes, olsem we Pol bifo i stap trastem hem. Yu mas bilif we bambae hem i protektem yu mo i keagud long yu, nating we yu harem nogud, no ol man oli mekem i no stret long yu bitim mak. Taem Pol i tokbaot finis ol pikinini blong God we “God bambae i soemaot” olgeta, hem i talem se: “Maet yumi gat trabol, no yumi gat hadtaem, no ol man oli stap spolem yumi, oli stap mekem i nogud tumas long yumi, be nating. Maet yumi hanggri, no yumi puaman, no klosap yumi lusum laef blong yumi, no ol man oli kilim yumi, yumi ded, be ol samting ya oli no save tekemaot yumi long Kraes.” (Rom 8:​35) I tru we ol Kristin long taem blong Pol, i gat ol strong paoa we oli mekem i had long olgeta yet, olsem we “ol jen” oli stap fasem olgeta, olsem we Rousseau i talem. Yes, “ol man oli stap luk [olgeta] olsem ol sipsip ya we oli blong kilim nomo.” (Rom 8:​36) ?Olsem wanem? ?Olgeta oli letem samting ya i spolem glad blong olgeta?

Pol i ansa, i se: “Be nating. Kraes ya we i lavem yumi tumas, hem i stap mekem we yumi winim olgeta samting ya oltaem.” (Rom 8:​37) Ol Kristin blong bifo oli save winim olgeta samting ya we oli stap traem olgeta. ?Oli win olsem wanem? Pol i givim ansa, i se: “Mi mi save finis we i no gat wan samting nating we i save tekemaot yumi long Kraes we hem i lavem yumi tumas. Bambae yumi ded, be hemia i no save tekemaot yumi, mo laef blong yumi i no save mekem. I no gat sam enjel, no sam haeman, no sam narafala paoa long heven we i save mekem. I no gat wan samting we i stap finis, no wan samting we bambae i kam, we i save mekem. I no gat samting blong ples blong God [“samting we i hae,” NW], mo i no gat samting long Hom blong ol Dedman [“samting we i dip,” NW], we i save tekemaot yumi long hem. I no gat wan samting nating long olgeta samting we God i mekem, we i save tekemaot yumi long God, we hem i lavem yumi ya tumas, we yumi joen long Jisas Kraes, Masta blong yumi.” (Rom 8:​38, 39) Yu tu yu save “winim” ol “trabol,” ol “hadtaem” mo ol fasin blong ol man we oli “stap spolem” yu, gogo bambae yu kasem pei blong yu. Lav blong God i mekem sua se bambae​—yes, bambae i no longtaem​—God “i mekem ol pikinini blong hem oli fri olgeta . . . nao olgeta samting ya we God i mekem bambae oli fri olgeta, olsem ol pikinini blong hem.”

[Tok Blong Pija Long Pej 6]

“I kam kasem naoia, olgeta samting ya we God i mekem oli stap krae, from we olgeta oli stap harem nogud”

[Tok Blong Pija Long Pej 7]

‘God bambae i mekem ol pikinini blong hem oli fri olgeta, nao olgeta samting ya we God i mekem bambae oli fri olgeta, olsem ol pikinini blong hem’