!Yufala i Stap Lukaot Gud Mo i Wok Strong!

“Yufala i mas lukaot gud, from we yufala i no save dei blong samting ya mo aoa blong hem.”​—MATTHEW 25:13.

1. ?Aposol Jon i stap wet long wanem samting?

LONG laswan toktok blong Baebol, Jisas i mekem promes ya, se: “Bambae i no longtaem, mi mi kamtru.” Aposol Jon i ansa, i se: “Jisas, Masta, plis, yu kam.” Aposol ya i no hafhaf long tingting blong hem, se Jisas bambae i kamtru. Bifo, Jon i stap wetem olgeta we oli bin askem Jisas se: “?Wetaem bambae ol samting ya oli kamtru? ?Mo wanem saen bambae i soemaot we yu yu stap finis [Grik, pa·rou·siʹa] mo we fasin ya blong wol i kasem en blong hem?” Yes, i klia we Jon i stap wet blong Jisas i kam stap bakegen, mo hem i bilif long samting ya.​—Revelesen 22:20; Matiu 24:3.

2. ?Long saed blong taem ya we Jisas i stap bakegen finis, wanem tingting blong ol jos?

² Tede, i no gat fulap man we oli bilif strong olsemia. I tru, plante jos oli tijim ol man long “seken kaming” blong Jisas, be smol man nomo oli rili wet long hem. Mo long laef blong olgeta, oli no tingbaot. Wan buk (The Parousia in the New Testament) i talem se: “Parousia ya hem i gat smol paoa nomo long laef blong ol man, long bilif mo ol wok blong olgeta insaed long jos. . . . Ol man blong Jos oli sud mekem ol wok we oli hareap tumas, olsem wok blong tanem tingting blong olgeta from ol sin blong olgeta, mo wok blong misinari blong talemaot gud nius. Be ol wok ya oli slak nomo, no maet oli lus finis.” !I tru ya, be i gat sam man we oli no slak olsem!

3. (a) ?Ol tru Kristin oli gat wanem filing long pa·rou·siʹa ya? (b) ?Bambae yumi mekem stadi long wanem poen naoia?

³ Ol tru disaepol blong Jisas oli strong blong wet long en blong rabis fasin ya blong wol blong naoia. Yumi mas gohed blong wet olsem, mo tu, yumi mas kasem gud save long evri samting long saed blong taem ya we Jisas i stap bakegen finis, mo mekem ol wok we i joen wetem save ya. Bambae samting ya i save givhan long yumi blong ‘stanap strong gogo olgeta samting ya i finis, mo bambae God i sevem yumi.’ (Matiu 24:​13) Insaed long profet tok we Jisas i givim long Matiu 24 mo 25, hem i givim sam waes advaes we yumi save folem, blong bambae yumi kasem blesing olwe. Long japta 25, i gat sam parabol we maet yu save finis. Wan parabol ya i tokbaot ten yang gel, mo wan narawan i tokbaot ol talen mane. (Matiu 25:​1-​30) ?Ol parabol ya oli save halpem yumi olsem wanem?

!Stap Wekap Gud Olsem Faef Gel Ya!

4. ?Wanem stori blong parabol blong ol ten yang gel?

⁴ Ating i stret yu ridim bakegen parabol blong ol ten yang gel long Matiu 25:​1-​13. Jisas i storebaot wan bigfala kakae blong mared olsem we ol man Jyu oli stap mekem bifo. Man we i mared i mas wokbaot i go long haos blong papa blong gel, nao hem i tekem gel ya i kam long haos blong hem (no maet long haos blong papa blong hem), we plante man oli wokbaot wetem olgeta. Insaed long kampani blong olgeta we oli wokbaot olsem, i gat sam man blong plei miusek mo singsing. Ol man oli no save stret long wanem taem olgeta ya oli kamtru. Long parabol, hem i tudak finis, mo ten yang gel oli stap wet blong man we i mared i kam. Faef oli krangke, oli no karem naf karsin blong laet blong olgeta, nao oli mas go pem sam moa karsin afsaed. Ol faef narafala oli waes, oli karem sam botel karsin wetem olgeta, nao oli save fulumap ol laet blong olgeta taem oli stap wet. Ol faef gel ya nomo oli stap mo oli rere taem man we i mared i kamtru. Taswe olgeta nomo, oli letem olgeta oli go insaed long ples blong kakae. Taem ol faef gel we oli krangke oli kambak, hem i let, oli no save go insaed.

5. ?Wanem vas i halpem yumi blong kasem save long mining blong pijatok ya blong ol ten yang gel?

⁵ Plante haf blong parabol ya, yumi save se oli pijatok nomo. Eksampel, Baebol i talem se Jisas i olsem man we i mekem mared blong hem. (Jon 3:​28-​30) Jisas tu i talem se hem wan i olsem wan pikinini blong king we kakae blong mared blong hem i rere finis. (Matiu 22:​1-​14) Mo Baebol i talem se Kraes i olsem wan hasban. (Efesas 5:​23) Yumi save makem wan poen tu, se parabol ya i no tokbaot gel we i mared, nating we samtaem Baebol i talem se ol tabu kristin oli olsem “woman” blong Kraes. (Jon 3:​29; Revelesen 19:7; 21:​2, 9) Be parabol ya i tokbaot ten yang gel, mo Baebol i talem tu se ol tabu Kristin oli olsem wan gel we i gat promes blong mared long Kraes.​—2 Korin 11:2.a

6. ?Long en blong parabol ya blong ol ten yang gel, Jisas i pulum yumi blong mekem wanem?

⁶ Yumi save intres long stori blong parabol ya mo long mining blong hem. Be yumi mas intres tu long ol gudfala rul insaed long parabol ya we oli save tijim yumi. Eksampel, Jisas i finisim parabol ya wetem tok ya, i se: “Yufala i mas lukaot gud, from we yufala i no save dei blong samting ya mo aoa blong hem.” Yes, parabol ya i i pulum yumi blong lukaot gud. blong yumi save luksave we en blong rabis fasin ya blong wol i stap kam klosap. Mo en ya i stap kam klosap. Samting ya i klia, nating se yumi no save dei blong hem. Taswe i gud yumi intres naoia long fasin blong tufala kampani blong ol yang gel.

7. ?From wanem yumi save se faef yang gel oli no waes?

⁷ Jisas i talem se: “Faef long olgeta oli no waes.” ?From wanem? ?Ating from we oli no rili ting se man we i mared bambae i kam? ?No ating oli go pleplei afsaed? ?No maet wan man i giaman long olgeta? No gat. I no from olgeta risen ya. Jisas i talem se olgeta “oli go blong mitim man we i jes mared.” Oli save se hem i stap kam, mo oli wantem joen long hem, mo joen long “kakae blong mared” tu. ?Olsem wanem nao? ?Olgeta oli reregud? No gat. Oli wet smol, gogo “medel naet” i kam, be oli no rere blong welkamem hem long eni taem. Fastaem oli ting se oli save wetaem bambae hem i kam, be ating hem i save kam eli, no hem i save kam let.

8. ?Faef long ol gel ya oli mekem wanem we i waes?

⁸ Ol faef narafala gel, we Jisas i talem se oli waes, olgeta tu oli tekem laet blong olgeta, mo oli go mitim man we i jes mared, we bambae i kam hom. Olgeta tu oli stat wet, be olgeta oli “waes.” Tok ya “waes” long lanwis Grik i save min se ‘oli lukaotgud, oli kasem stret save, oli waes gud.’ Ol faef gel ya oli soemaot we oli waes from we oli karem sam botel karsin blong fulumap ol laet blong olgeta wetem, from we maet oli nidim samting ya. Olgeta ya oli gat strong tingting blong oli rere gud from man we i jes mared, taswe oli no wantem givim sam karsin blong olgeta i go long narafala man. Oli no lukaotgud blong nating. Yumi luksave samting ya, from we taem man we i mared i kamtru, olgeta oli stap mo oli rere finis. Nao ol “gel ya we oli rere long hem, oli go wetem hem, oli joen long kakae blong mared. Nao ol man oli satem doa.”

9, 10. ?Wanem bigfala poen blong parabol blong ol ten yang gel? ?Mo wanem ol kwestin we yu mas askem long yu wan?

⁹ Jisas i no wantem givim wan lesen blong soemaot ol gudfala fasin blong man we i go long wan kakae blong mared, no gat. Mo tu, hem i no wantem soemaot fasin blong serem olting blong yumi wetem narafala. Bigfala poen blong parabol ya, hemia: “Yufala i mas [“stap,” NW] lukaot gud, from we yufala i no save dei blong samting ya mo aoa blong hem.” Traem askem kwestin ya long yu wan: ‘?Olsem wanem? ?Mi mi stap lukaot gud long saed blong taem ya we Jisas i stap bakegen?’ Yumi bilif we Jisas i stat rul finis long heven naoia. Be, ?olsem wanem? ?Yu rili gohed strong blong wet long taem ya we bambae ‘hem i kamaot long klaod long skae, wetem olgeta paoa we hem i gat, mo long bigfala laet we bambae i saenaot raonabaot long hem?’ (Matiu 24:30) Long “medel naet,” aoa blong man we i jes mared bambae i kamtru, i kam klosap moa, bitim taem we ol yang gel oli jes go blong mitim hem. Sem mak tede, taem ya blong Pikinini blong Man i kamtru blong spolem ol rabis fasin blong wol ya blong naoia, hem tu i kam klosap moa, bitim taem we yumi jes stat wet long hem. (Rom 13:11-​14) ?Olsem wanem long yu? ?Yu stap lukaot gud, mo yu stap lukaot moa yet, from we taem ya blong hem i kamtru, i stap kam klosap moa?

¹⁰ Blong obei long oda ya se, “yufala i mas stap lukaot gud,” yu mas lukaot oltaem. Faef yang gel oli letem karsin blong olgeta i ronaot mo oli mas go pem sam moa karsin. Sem mak tede, maet sam Kristin oli no rere gud blong welkam long Jisas we klosap i kam, from we oli tingbaot tumas sam bisnes blong laef blong olgeta. Samting ya i hapen bifo, long sam Kristin long faswan handred yia. Mo tede tu, hem i save hapen long samfala. Taswe i stret yu stap askem long yu wan se: ‘?Samting ya i stap hapen long mi?’​—1 Tesalonaeka 5:​6-8; Hibrus 2:1; 3:​12; 12:3; Revelesen 16:15.

Wok Strong From We En i Kam Klosap

11. ?Afta, Jisas i givim wanem parabol? ?Parabol ya i klosap sem mak long wanem?

¹¹ Jisas i talem finis parabol blong ol yang gel we sam oli waes mo sam oli krangke, blong soemaot we yumi mas lukaot gud. Nao long nekis parabol we hem i mekem, parabol blong ol talen mane, Jisas i go moa, bitim advaes ya. (Ridim Matiu 25:14-​30.) Plante haf blong parabol ya oli sem mak long wan narafala parabol we hem i mekem bifo, parabol blong ol maenas mane. Parabol ya, hem i bin mekem from we ol man oli stap tingbaot “se naoia nomo, Kingdom blong God i save kamtru wantaem long olgeta.”​—Luk 19:11-​27, NW.

12. ?Wanem ol bigfala poen blong parabol blong ol talen mane?

¹² Long parabol blong ol talen mane, Jisas i tokbaot wan man we i rere blong go long wan ples farawe, nao bifo we hem i go, hem i singaot trifala slef blong hem oli kam long fored blong hem. Long wan, hem i givim faef talen mane, long sekenwan hem i givim tu talen mane, mo long laswan hem i givim wan nomo​—from we ‘hem i makem finis save blong olgeta.’ Maet Jisas i minim talen mane we oli wokem long selva. Wan man blong wok i mas wok 14 yia blong kasem wan talen mane. !Bigfala mane ya! Ale, taem man ya i kambak, hem i jekemap wanem ol slef blong hem oli bin mekem wetem mane ya long “plante yia” we hem i stap long ples farawe. Tufala faswan slef i dabolem finis mane we tufala i kasem. Long tufala wanwan, man ya i talem se: “!Ei, yu yu mekem wan gudfala wok!” Nao hem i promes blong givim sam moa wok long tufala, mo hem i finis olsem, i se: “!Yu kam joen long lafet blong mi!” Be slef we i kasem wan talen mane nomo, i no bin mekem mane blong masta i winim narafala mane bakegen, from we hem i talem se masta blong hem i strong tumas long hem. Hem i jes haedem mane ya, i no putum long bank blong winim smol mane blong intres. Nao masta i talem se hem i ‘rabis man we i les tumas,’ from we hem i wok agens long bisnes blong masta blong hem. Taswe oli tekemaot talen mane ya long hem, mo oli sakem hem i go afsaed, we long ples ya “ol man oli stap krae, nao oli stap harem nogud tumas, oli stap kakae tut blong olgeta from.”

13. ?Weswe Jisas i soemaot we hem i olsem masta blong parabol ya?

¹³ Bakegen, ol haf blong parabol ya oli olsem pija blong narafala samting. Wan eksampel, man ya we i go stap long wan ples farawe i pija blong Jisas. Hem tu bambae i livim ol disaepol blong hem, hem i go long heven, mo hem i mas wet longtaem, gogo hem i save kasem paoa blong King.b (Ol Sam 110:​1-4; Ol Wok 2:​34-​36; Rom 8:​34; Hibrus 10:12, 13) Antap long samting ya, bakegen yumi save kasem wan lesen, wan bigfala advaes, we yumi evriwan i mas mekem i wok long laef blong yumi. ?Wanem ya?

14. ?Parabol blong ol talen mane i soemaot wanem fasin we yumi nidim tumas?

¹⁴ Nating we yu gat hop blong laef long heven we yu no save ded samtaem, no yu gat hop blong stap blong olwe long paradaes long wol ya, be i klia from parabol blong Jisas we yu mas wokhad long ol Kristin wok. Tufala tok nomo i naf blong talemaot mining blong parabol ya: !Wok strong! I stat long Pentekos blong yia 33 K.T., ol aposol oli soemaot rod long yumi. Baebol i talem se: “Nao Pita i stap talemaot plante tok bakegen long olgeta. mo i talem strong long olgeta se, ‘Yufala i mas kamaot long ol rabis man ya, blong yufala i no kasem panis wetem olgeta.’ ” (Ol Wok 2:​40-​42) !Mo hem i kasem nambawan frut from hadwok ya blong hem! Sam moa man oli joen long ol aposol blong mekem Kristin wok blong prij, nao olgeta tu oli wok strong, mekem se gud nius ya “i stap goaot moa yet long olgeta ples long wol.”​—Kolosi 1:​3-6, 23; 1 Korin 3:​5-9.

15. ?Yumi save folem wanem spesel rod blong mekem bigfala poen blong parabol ya i wok long laef blong yumi?

¹⁵ Yu mas tingbaot ol narafala tok we Jisas i mekem jes bifo long parabol ya​—⁠hemia profet tok long taem ya we bambae hem i stap bakegen. Yumi save luksave plante samting we oli olsem pruf we pa·rou·siʹa blong Jisas i stap gohed moa mo bambae hem i kasem big blong hem. Yu mas rimemba we Jisas i laenemap “en” we bambae i kam, wetem wok we ol Kristin oli mas mekem. Hem i talem se: “Mo gud nius ya blong Kingdom, bambae oli talemaot long olgeta ples long wol we i gat man long hem, blong oli witnes long olgeta nesen. Nao biaen, en bambae i kam.” (Matiu 24:​14, NW) Yumi wanwan i mas tingbaot samting ya blong traem save se yumi wanem kaen slef. Traem askem long yu wan se: ‘?Olsem wanem? ?Mi gat sam fasin we i sem mak long slef we i go haedem mane we masta blong hem i bin givim long hem, from we maet hem i lukaot long prapa bisnes blong hem nomo? ?No ating i klia we mi mi olsem tufala ya we oli gud mo oli ona long masta. ?Tingting blong mi i strong finis blong holem olgeta jans we mi gat blong mekem olting blong masta blong mi i gru moa?’

Lukaot Gud Mo Wok Strong: Jisas i Stap Finis

16. ?Tufala parabol ya we yumi jes storebaot oli givim wanem mesej long yu?

¹⁶ Yes, tufala parabol i gat mining olsem pija tok mo profet tok. Be antap long samting ya, Jisas hem wan i yusum tufala blong leftemap tingting blong yumi. Mesej blong tufala i olsem: Yu mas lukaot gud. Mo yu mas wok strong, speseli taem ol man oli save luk saen blong pa·rou·siʹa blong Kraes. Taem ya hemia naoia. ?Olsem wanem nao? ?Yu stap lukaot gud mo wok strong?

17, 18. ?Disaepol Jemes i givim wanem advaes long saed blong taem ya we Jisas i stap bakegen?

¹⁷ Jemes we i wan brata blong Jisas, i no stap long hil blong ol Oliftri blong lesin long profet tok blong Jisas. Be biaen, hem i lan long hem, mo hem i kasem impoten mining blong hem. Hem i raetem tok ya, se: “Ol brata mo sista. Yufala i mas mekem tingting blong yufala i longfala, blong wet gogo Masta blong yumi i kambak bakegen. Yufala i traem tingbaot fasin blong wokem garen. Yufala i save mekem tingting blong yufala i longfala blong wet, gogo garen blong yufala i karem kakae. Yufala i save wet long san, blong yufala i go bonem garen, mo biaen yufala i planem. Mo yufala i save wet longtaem bakegen blong go tekem kakae long hem. Nao long sem fasin, yufala i mas mekem tingting blong yufala i longfala, mo yufala i mas mekem tingting blong yufala i strong tu, from we dei ya blong Masta blong yumi [“i kam stap,” NW] bambae i kamtru i no longtaem.”​—Jemes 5:​7, 8.

¹⁸ Fastaem Jemes i talem strong se God bambae i jajem mo i panisim olgeta we oli yusum ol rij samting blong olgeta long fasin nogud. Nao hem i pulum ol Kristin we oli stap wet blong Jeova i mekem wok blong hem, blong oli no lusum longfala tingting blong olgeta. Wan Kristin we i no gat longfala tingting maet hem i wantem rao nomo, olsem we i bisnes blong hem blong stretem evri rong samting we ol rij man ya oli mekem. Be i no stret yumi mekem olsem, from we yumi save finis we taem blong jajmen bambae i kam. Eksampel blong wan fama i soemaot samting ya, olsem we Jemes i talem gud.

19. ?Long Isrel, ol fama oli mas gat longfala tingting from wanem?

¹⁹ Taem wan fama long Isrel i planem sid finis, hem i mas wet. Ale, fastaem ol smol gras blong kakae oli kamaot long graon, nao hem i gru i kam raep, mo biaen taem blong karem kakae long garen i kam. (Luk 8:​5-8; Jon 4:​35) Long ol manis ya, hem i save fraet long taem we i pas mo ating tu, long ol samting we i hapen long garen. Hem i gat sam kwestin olsem olgeta: ?Bambae i gat ren long ol fas manis, mo wota ya i naf long garen? ?Olsem wanem long ren we i kam long ol las manis? ?Maet ol bebet no wan stom oli save spolem ol garen? (Skelem wetem Joel 1:4; 2:​23-​25.) Be i klia we ol fama long Isrel oli save trastem Jeova mo ol samting we oli mas kamaot long prapa manis blong olgeta, olsem we Jeova i setemap finis. (Dutronome 11:14; Jeremaea 5:​24) Fama we i gat longfala tingting i save wet, we hem i sua blong kasem frut. Long bilif blong hem, hem i save gud we ol samting we hem i stap wet long olgeta, bambae oli kam. !Mo oli rili kam!

20. ?Olsem wanem blong soemaot longfala tingting ya we Jemes i tokbaot?

²⁰ Ating wan fama i save wetaem bambae i taem blong karem kakae long garen, be ol Kristin long faswan handred yia oli no save kaontem wetaem Jisas bambae i kam stap bakegen. Be oli sua we bambae hem i kam. Jemes i talem se: “Taem ya blong Masta blong yumi i kam stap [long grik pa·rou·siʹa] i stap kam klosap moa.” (NW) Long taem we Jemes i raetem tok ya, i no klia yet we saen ya blong soemaot we Kraes i kam stap finis, i kamtru long olgeta ples long wol. !Be naoia, si! ?So yumi mas harem wanem filing long taem ya naoia? Saen ya i klia nomo, yumi save luk hem. Taswe yumi save talem wetem strong tingting, se: ‘Mi luk saen ya i kamtru fulwan.’ Nao yumi gat gud risen blong trastem Jeova mo talem se: ‘Taem ya blong Masta blong yumi i kam stap, i kam finis, mo bigfala poen blong taem ya i kam klosap moa.’

21. ?Yumi gat strongfala tingting blong mekem wanem?

²¹ From we hem i stap kam klosap moa, yumi gat strong risen blong tingtinggud long tufala stamba lesen we Jisas i givim long tufala parabol we yumi storebaot finis, mo blong folem tufala. Hem i talem se: “Yufala i mas lukaot gud, from we yufala i no save dei blong samting ya mo aoa blong hem.” (Matiu 25:13) I klia we hem i stret taem naoia blong gat strongfala tingting long Kristin wok blong yumi. Yumi mas soemaot long laef blong yumi evri dei we yumi kasem poen ya we Jisas i mekem i klia. !Yumi mas lukaot gud! !Yumi mas wok strong!

[Ol futnot]

?Yu Yu Rimemba?

◻ ?Yu yu kasem wanem lesen from parabol blong ol yangfala gel, we sam i waes mo sam i no waes?

◻ ?Jisas i yusum parabol blong ol talen mane blong givim wanem stamba advaes long yu?

◻ ?Olsem wanem longfala tingting blong yu long saed blong pa·rou·siʹa i olsem longfala tingting blong wan fama long Isrel?

◻ ?From wanem yumi stap laef long wan taem we i rili taem blong glad mo taem blong hadwok tu?

[Tok Blong Pija Long Pej 23]

?Parabol blong ol ten yang gel, mo parabol blong ol talen mane, tufala i tijim yumi long wanem?