?Yu Yu Spenem Taem Wetem Famle Blong Yu?

“LONG Japan Ol Pikinini Oli Laekem Tumas Papa Blong Olgeta​—Nating Se Ol Papa Oli Bisi Long Wok Mo Oli No Pleplei Wetem Pikinini Blong Olgeta.” Sam yia bifo, stamba tok ya i bin stap long wan niuspepa blong Japan, we nem blong hem Mainichi Shimbun. Niuspepa ya i tokbaot wan stadi we gavman i bin mekem long sam pikinini blong Japan. Stadi ya i soemaot se klosap 88 pesen blong ol pikinini ya oli talem se oli wantem tumas blong lukaot long papa blong olgeta taem oli kam olfala. Long sem niuspepa ya we i kamaot long Engglis, stori ya i karem wan defren stamba tok, se “Ol Papa Mo Ol Pikinini: Oli No Kea.” Defren long niuspepa long lanwis Japan, store ya i tokbaot wan narafala haf blong stadi ya: Long evri dei blong wok, ol papa long Japan oli stap spenem 36 menet nomo wetem pikinini blong olgeta. Taem yumi skelem wetem ol papa long Wes Jemani, olgeta oli spenem 44 menet wetem pikinini blong olgeta long ol dei blong wik, mo long Yunaeted Stet, namba ya hem i 56 menet.

I no jes ol papa nomo we oli spenem smol taem wetem pikinini blong olgeta. Ol mama tu, from we plante moa mama oli wok blong winim mane. Eksampel, plante mama we oli no mared oli mas wok blong sapotem famle blong olgeta. From samting ya, ol papa mama tugeta oli gat smol taem nomo blong spenem wetem pikinini blong olgeta.

Long yia 1997, wan stadi long bitim 12,000 yangfala blong Amerika i faenemaot se ol yangfala we oli joengud wetem papa mama blong olgeta bambae oli no trabol tumas long saed blong filing, oli no save tingbaot blong kilim olgeta wan i ded, oli no save joen long raf fasin no yusum drag. Mo wan long ol tija we i joen long stadi ya i talem se: “Yu no save joengud wetem ol pikinini blong yu sipos yu no stap spenem taem wetem olgeta.” I impoten tumas blong spenem taem wetem pikinini blong yu mo storeyan wetem olgeta.

Taem Papa Mama Mo Pikinini Oli No Storeyan Tugeta

Long wan famle we papa no mama i wok longwe long ples blong hem, i had moa long famle ya blong storeyan tugeta. I tru se, fasin blong no storeyan tugeta i no wan problem we i kamaot long ol famle ya nomo. Sam papa mama, nating se oli stap long semfala haos wetem famle blong olgeta, be oli lego haos ya blong go long wok bifo we ol pikinini blong olgeta oli wekap, mo oli kambak long haos afta we ol pikinini oli slip finis. From we oli no gat plante taem blong joen tugeta, taswe blong givhan long famle blong olgeta, sam papa mama oli spenem taem wetem famle long wiken mo long holide. Oli talem se oli “yusum gud” smol taem ya we oli spenem wetem pikinini blong olgeta.

?Be i tru se fasin blong yusum gud taem we yumi spenem wetem pikinini blong yumi, nating se i smol taem nomo, hem i naf blong givhan long olgeta? Wan man blong stadi, Laurence Steinberg, i ansa se: “Plante taem i tru se, ol pikinini we oli spenem moa taem wetem papa mama blong olgeta oli harem gud moa i bitim ol pikinini we oli no spenem tumas taem wetem papa mama. I had tumas blong stretem problem we i kamaot from we yumi no spenem naf taem wetem pikinini. Mo tingting ya se i oraet blong spenem smol taem, sipos yumi yusum gud taem ya, i no wok.” Hemia nao tingting blong wan woman long Burma. Man blong hem, wan man Japan, i aot long wok mo i kambak long haos long wan no tu klok evri moning. Nating se man ya i spenem taem wetem famle blong hem long wiken, waef blong hem i talem se: “Blong stap long haos long Sarede mo Sande i no naf, i olsem we wan samting i lus, from we yu no stap wetem famle long ol narafala dei blong wik. . . . Yu no save lego kakae long ol dei blong wik mo kakae olgeta kakae blong wik ya long Sarede mo Sande nomo.”

Yumi Nidim Fasin Traehad

I isi blong talem se yumi mas storeyan tugeta wetem famle, be i no isi nating blong mekem samting ya oltaem. Mo from we sam papa mama oli mas wok blong winim mane blong laef mo lukaot long famle blong olgeta, samting ya i mekem se i hadwok blong spenem taem wetem famle. From we sam papa mama oli mas wok longwe long haos blong olgeta, oli yusum telefon no raetem leta oltaem blong toktok wetem famle blong olgeta. Be nating se famle i stap tugeta long haos no wan i wok longwe long haos, i nidim fasin traehad blong gohed blong storeyan tugeta.

Ol papa mama we oli no ting hevi long fasin blong storeyan wetem famle blong olgeta, bambae oli mas kasem trabol from. Wan papa we i spenem smol taem nomo wetem famle blong hem, mo we i no stap kakae wetem olgeta tu, i fesem bigfala trabol. Fasin blong pikinini boe blong hem i kam raf, mo oli kasem gel blong hem we i stap stil long stoa. Wan sande moning taem papa i rere blong go plei golf, boe blong hem i harem nogud mo i singaot se: “?Yumi gat mama nomo long haos ya? Mama nomo i mekem olgeta disisen long famle ya. Papa, yu neva . . .”

Ol tok ya oli mekem papa i tingting. Hem i mekemap tingting blong hem se hem i mas dring ti wetem famle blong hem evri moning. Fastaem, i jes hem mo waef blong hem we tufala i dring ti tugeta. Be sloslou, ol pikinini tu oli joen, mo taem blong kakae i kam wan taem blong storeyan tugeta. I no longtaem biaen, oli stap kakae tugeta long naet taem tu. Long rod ya nao, papa ya i traehad blong sevem famle blong hem bifo we famle ya i seraot olgeta.

Tok Blong God i Givhan

Baebol i leftemap tingting blong ol papa mama blong tekem taem blong storeyan wetem pikinini blong olgeta. Tru long profet Moses, ol man Isrel oli kasem oda ya: “!Yufala i lesin gud! Hae God i God blong yumi, mo hem wan nomo i God. Mo yufala i mas lavem hem long olgeta tingting blong yufala, mo long olgeta laef blong yufala, mo long olgeta paoa blong yufala. Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.” (Dutronome 6:​4-7) Yes, yumi we yumi papa mama, sipos yumi wantem tijim tok blong God long famle blong yumi mo tajem hat blong olgeta, yumi mas spenem taem tugeta.

Be i gud tumas blong save se, stadi we yumi bin tokbaot fastaem, we ol man oli mekem long bitim 12,000 yangfala long Amerika long 1997, i soemaot se “klosap 88 pesen . . . blong ol man ya we oli talem se oli gat skul finis, oli luksave se jos mo prea i wan samting we i save lukaot long olgeta.” Ol trufala Kristin oli luksave se oli mas tijimgud ol pikinini blong olgeta long saed blong Baebol taem oli stap long haos. Long rod ya, bambae oli blokem ol yangfala blong spolem laef blong olgeta from ol samting olsem drag no alkol, fasin blong trabol long filing, fasin blong wantem kilim olgeta wan i ded, mo blong joen long raf fasin no ol narafala samting olsem.

Sam papa mama oli ting se i had tumas blong faenem taem blong spenem wetem famle blong olgeta. Samting ya i tru moa long ol famle we i no gat papa. Ating wan mama i wantem tumas blong spenem taem wetem pikinini blong hem, be from we hem i stap wan nomo, hem i mas wok blong winim mane. ?Olsem wanem olgeta ya oli save aenem gudfala taem blong stap wetem famle blong olgeta? Baebol i talem se “Holemtaet fasin waes we i save wokgud mo fasin blong tingting gud.” (Ol Proveb 3:21, NW) Ol Papa mama oli save yusum “fasin blong tingting gud” taem oli spenem taem wetem famle. ?Be olsem wanem oli save mekem samting ya?

Sipos yu wan mama we yu mas wok mo yu harem se yu taed tumas long en blong dei, i gud yu askem ol pikinini blong yu blong givhan blong rerem kakae. Samting ya i wan jans blong spenem taem tugeta mo blong frengud moa. Fastaem, maet bambae i tektaem blong rerem kakae ya. Be i no longtaem, bambae yu faenem se yu haremgud mo yu sevem moa taem.

Maet yu wan papa, we yu gat plante wok blong mekem long Sarede mo Sande. ?From wanem yu no askem ol pikinini blong yu blong givhan long yu? Yu save storeyan wetem olgeta taem yufala i wok tugeta mo long semtaem yu save tijim plante samting long olgeta. Advaes ya long Baebol se yu mas tijim tok blong God long ol pikinini blong yu, i leftemap tingting blong yu blong toktok wetem olgeta, ‘taem yu stap long haos, no taem yu stap wokbaot’​—yes, long evri jans we yu gat. Sipos yu storeyan wetem ol pikinini blong yu taem yufala i wok tugeta, yu soem se yu stap “holemtaet fasin waes we i save wokgud.”

Sipos yu spenem taem wetem famle blong yu, bambae yu save karem blesing we i stap longtaem. Olsem wan Proveb long Baebol i talem se “Olgeta we oli toktok gud tugeta fastaem oli waes.” (Ol Proveb 13:10, NW) Sipos yu spenem taem blong storeyan tugeta, bambae yu save lidimgud famle blong yu taem oli fesem ol problem long laef blong evri dei. Ol advaes we yu givim naoia, bambae oli givhan long yu blong no spenem fulap taem blong stretem ol problem long fiuja mo blong harem nogud. Antap long samting ya, bambae yu mo famle blong yu i kasem glad. Blong lidimgud famle blong yu, bambae yu mas yusum Tok blong God Baebol, we i fulap long waes. Yusum waes ya blong tijim ol pikinini blong yu mo lidim famle blong yu.​—Ol Sam 119:105.

[Tok Blong Pija Long Pej 4]

Ol yangfala we oli frengud wetem papa mama oli no trabol tumas long filing blong olgeta

[Tok Blong Pija Long Pej 5]

Fasin blong storeyan tugeta i save karem bigfala blesing i kam long famle

[Tok Blong Pija Long Pej 6]

Taem yu wok wetem pikinini blong yu, yu save storeyan mo tijim hem long plante samting we i save givhan long hem