“Sol Blong Mi, Yu Mas Blesem Jeova”

NANCY i talem se: “Long ol laswan manis, mi no moa intres long wok blong prij mo mi lusum glad blong mi.”a Blong klosap ten yia, Nancy i mekem wok blong paenia, i minim se hem i talemaot gud nius fultaem. Be, hem i gohed blong talem se: “Mi harem nogud from samting we i hapen long mi. Mi stap talemaot mesej blong Kingdom olsem wan samting we i no impoten mo i no kamaot long hat blong mi. ?Mi save mekem wanem?”

Mo tu, tingbaot eksampel blong Keith, we i wan elda long kongregesen blong ol Witnes blong Jeova. Keith i sek blong harem waef blong hem i talem long hem se: “!Yu yu wari long wan samting! From we i no taem blong kakae, be long prea we yu jes mekem, yu talem tangkiu from kakae.” Keith i talem se: “Mi luksave se mi stap toktok olsem wan mesin nomo we ol prea blong mi oli no moa gat mining.”

I tru se, yu no wantem we fasin blong yu blong presem Jeova God, i kam kolkol mo i lusum mining blong hem. !No gat! Yu wantem se ol fasin ya blong presem hem, oli kamaot from fasin tangkiu we i stap long hat blong yu. Be, wan filing i no olsem wan klos we yu save putum no yu save tekemaot. Wan filing i mas stap insaed long man. ?Olsem wanem hat blong wan man i soem fasin tangkiu? Ol Sam 103 i givhan long yumi blong luksave samting ya.

King Deved long Isrel bifo, i raetem Ol Sam 103. Hem i statem Sam ya wetem ol tok ya i se: “Sol blong mi, yu mas blesem Jeova, yes ol samting we oli stap insaed long mi, yu mas presem tabu nem blong hem.” (Ol Sam 103:​1, NW) Wan buk i talem se: “Taem yumi yusum tok ya blesem, blong tokbaot God, hem i minim presem God. Oltaem tok ya i laenap wetem dip filing blong lavem hem, mo i joen wetem fasin tangkiu tu. Deved i wantem tumas blong presem Jeova wetem wan hat we i fulapgud long lav mo fasin tangkiu. Taswe hem i pusum sol blong hem, i minim hem wan, blong i “blesem Jeova.” Be, ?wanem samting i pulum hat blong Deved blong soemaot dip filing ya, taem hem i wosipim God?

Deved i gohed blong talem se: “Mi no mas fogetem ol wok blong hem [Jeova].” (Ol Sam 103:  2, NW) Fasin tangkiu we yumi soem long Jeova i kamaot taem yumi tingting dip long “ol wok blong hem.” ?Wanem sam long ol wok blong Jeova we Deved i tingbaot? Lukluk ol samting we Jeova i wokem olsem ol sta we oli flasemgud skae taem naet i klia. Yes, ol samting ya oli naf blong pulum hat blong yumi blong talem tangkiu long Man Ya we i Wokem yumi. Ol sta we oli stap long heven oli pulum dip filing blong Deved. (Ol Sam 8:​3, 4; 19:1) Be long Sam 103, Deved i tingtingbak long wan narafala wok blong Jeova.

Jeova “i Fogivim Ol Mastik Blong Mi”

Long Sam ya, Deved i tokbaot ol wok blong God we oli soem lav mo kaengud fasin blong hem. Deved i tokbaot faswan mo stamba blong ol wok ya taem hem i singsing se: ‘Jeova i stap tekemaot ol sin blong mi.’ (Ol Sam 103:3) Deved i luksave se hem i wan sinman. Afta we profet Natan i tok long Deved from rabis fasin we hem i bin mekem wetem Batseba, Deved i luksave se: “Sin ya we mi mekem i agens long yu [Jeova] nomo, mi mi mekem ol samting ya we i nogud tumas long fes blong yu.” (Ol Sam 51:4) From we hat blong hem i harem nogud mo i trabol, hem i singaot strong se: “God, oltaem yu yu lavem man tumas, plis yu sore long mi. Fasin blong yu blong gat sore long man i bigwan tumas, plis yu ravemaot ol sin blong mi. Yu wasemaot ol fasin nogud ya long laef blong mi, yu tekemaot ol sin blong mi, yu mekem mi mi klin.” (Ol Sam 51:​1, 2) !Ating, Deved i tangkiu bigwan from fasin fogif ya! From we hem i sinman, hem i mekem sam narafala sin long laef blong hem, be oltaem hem i tanem tingting blong hem, hem i no agensem man we i stretem hem, mo hem i jenisim ol fasin blong hem. Deved i tingtinggud long kaengud fasin we Jeova i soemaot long hem, ale hem i wantem blesem Jeova from.

Yumi tu yumi sinman. (Rom 5:12) Aposol Pol hem wan i talem se: “Long tingting blong mi, mi glad tumas long loa ya blong God. Be mi luk we rabis fasin ya we i stap wok long laef blong mi, hem i narafala. Hem i agens long loa ya, we long tingting blong mi, mi glad tumas long hem. Fasin ya i stap mekem mi, mi olsem slef blong fasin blong sin, we i stap wok oltaem long tingting blong mi. Man. Mi mi no save harem gud nating. ?Hu man we bambae i save pulumaot mi long laef ya we i stap holemtaet mi, we bambae mi ded from?” (Rom 7:22-24) !Yes, yumi tangkiu long Jeova, from we hem i no kaontem ol mastik blong yumi! Hem i rere blong ravemaot ol mastik ya taem yumi tanem tingting blong yumi mo yumi lukaotem fasin fogif.

Deved i talem bakegen long hem wan se: “[Jeova] i mekem mi mi kamgud bakegen long ol sik blong mi.” (Ol Sam 103:3, NW) Kamgud bakegen i minim se man i kam strong bakegen. Taswe fasin blong kamgud bakegen i minim moa bitim fasin blong fogivim man we i mekem sin. Hem i minim se wan man i no moa gat “ol sik”​—hemia frut we i kamaot taem yumi folem rong rod. Long niufala wol we Jeova i mekem, bambae hem i karemaot ol nogud samting we bodi i kasem from sin, olsem ol sik mo ded. (Aesea 25:8; Revelesen 21:1-4) Be tede tu, God i karemaot ol sik blong yumi long saed long spirit. Maet long samfala, sik ya i minim se oli gat wan voes blong hat we i stikim olgeta mo oli no moa gat fasin frengud wetem God. Taswe, yumi “no mas fogetem” ol samting we Jeova i mekem finis blong givhan long yumi wanwan long saed ya.

Hem “i Pulumaot Laef Blong Mi”

Deved i singsing se: “[Jeova] i pulumaot laef blong mi long hol.” (Ol Sam 103:​4, NW) ‘Hol ya’ i minim beregraon blong ol man​—Seol, no Hades. Bifo we Deved i kam king long Isrel, klosap hem i ded. Eksampel, King Sol i ting nogud we i nogud long saed blong Deved. Taswe hem i traem plante taem blong kilim Deved i ded. (1 Samuel 18:​9-​29; 19:10; 23:​6-​29) Ol man Filistia tu oli wantem kilim Deved i ded. (1 Samuel 21:10-​15) Be, oltaem Jeova i sevem Deved blong i no go long ‘hol ya.’ !From samting ya, taem Deved i tingtingbak long ol wok blong Jeova, ating hem i mas tangkiu bigwan long Jeova!

?Olsem wanem long yu? ?Jeova i bin sapotem yu long taem we tingting blong yu i foldaon no taem wan we yu laekem hem tumas i ded? Maet yu save sam stori long taem blong yumi we oli soemaot olsem wanem Jeova i sevem laef blong ol trufala Witnes blong hem long ded. Ating yu ridim ol stori long magasin ya we oli tokbaot olsem wanem Jeova i sevem sam man. I gud sipos yu tu yu tekem taem blong tingbaot mo laekem ol wok blong trufala God. Mo tu, evriwan long yumi i gat risen blong soem tangkiu long Jeova, from hop blong laef bakegen.​—Jon 5:28, 29; Ol Wok 24:15.

Jeova i givim laef wetem olgeta samting we oli save mekem se yumi glad mo haremgud long laef ya. Man we i raetem Sam ya i talem se, God i “flasem yu wetem lav, mo sore.” (Ol Sam 103:4, NW) Long taem we yumi gat nid, Jeova i no lego yumi, be hem i givhan long yumi tru long ogenaesesen blong hem long wol mo ol elda, we oli man blong lukaot long sipsip long kongregesen. Wan help olsemia i givhan long yumi blong winim ol traem, mo long semtaem, yumi no lusum respek mo gudfala tingting we yumi gat long yumi wan. Ol Kristin man we oli lukaot long ol sipsip, oli kea bigwan long ol sipsip ya. Oli leftemap tingting blong olgeta we oli sik mo olgeta we tingting blong olgeta i foldaon. Mo oli traem bes blong olgeta blong mekem wan we i foldaon, i kam strong bakegen. (Aesea 32:1, 2; 1 Pita 5:2, 3; Jud 22, 23) Tabu spirit blong Jeova i pulum ol man we oli lukaot long ol sipsip, blong soem fasin sore mo lav long ol sipsip ya. “Lav, mo sore” blong hem i olsem hat blong king we i flasem yumi mo i givim respek long yumi. Yumi no mas fogetem ol wok blong Jeova, ale bambae yumi wantem blesem hem mo tabu nem blong hem.

Deved i gohed blong givim advaes long hem wan taem hem i singsing se: “[Jeova] i stap mekem mi mi harem gud long ol gudgudfala samting ya we hem i stap givim long mi, mo i mekem mi mi stap yang, mi stap strong oltaem, olsem bigfala pijin ya igel.” (Ol Sam 103:5) Laef we Jeova i givim, hem i wan laef we i karem glad mo i mekem man i harem gud. Yes, stret save blong trutok i wan samting we i sas tumas i bitim ol narafala samting mo tu, trutok ya i stamba blong bigfala glad. Tingbaot olsem wanem yumi haremgud tumas long wok we Jeova i askem long yumi blong mekem, hemia wok blong prij mo mekem disaepol. I gud tumas blong faenem wan man we i wantem lanem moa long saed long trufala God, mo blong halpem man ya blong save Jeova mo blesem Hem. Nating sipos ol man long eria blong yu oli lesin no nogat, i wan bigfala jans blong joen long wok ya. Wok ya i leftemap tabu nem blong Jeova mo i pruvum se hae rul blong Jeova i nambawan.

Taem yumi stap gohed long wok blong talemaot Kingdom, maet yumi save kam taed mo les lelebet. Be oltaem, Jeova i givim paoa long ol man blong hem. Hem i mekem se oli kam “olsem bigfala pijin ya igel” we i gat wing we i strong mo i save flae antap olgeta long skae. Yumi tangkiu tumas long Papa blong yumi long heven we i laekem yumi. From ‘paoa ya’ we hem i givim long yumi, nao yumi naf blong stap tru long wok blong hem evri dei.​—Aesea 40:29-31.

Wan eksampel: Clara i wok fultaem, mo tu hem i spenem klosap 50 aoa evri manis long wok blong prij. Hem i talem se: “Samtaem mi taed, mo mi mas fosem mi blong go long wok blong prij from we mi mekem plan finis blong wok wetem narawan. Be, afta we mi joen long wok ya, mi harem se mi kasem paoa bakegen.” Maet yu tu, yu harem samtaem se yu kasem paoa ya we i kamaot long God mo we i halpem yu blong gohed long Kristin wok blong yu. Ating yu wantem talem tok olsem Deved taem hem i statem Sam ya, i se: “Sol blong mi, yu mas blesem Jeova, yes ol samting we oli stap insaed long mi, yu mas presem tabu nem blong hem.”

Jeova i Sevem Ol Man Blong Hem

Man we i raetem Sam ya i talem se: “Jeova i mekem ol wok long stret fasin, mo hem i mekem kot blong jajem olgeta we ol narafala man oli spolem olgeta. Hem i soemaot ol rod blong hem long Moses, mo i letem ol laen blong Isrel oli save ol wok blong hem.” (Ol Sam 103:6, 7, NW) Taem Deved i yusum tok ya “spolem” ating hem i stap tingbaot ol man Isrel long taem blong Moses, we oli stap aninit long strong paoa blong ol man Ijip. Taem Deved i tingting dip long ol rod we Jeova i soemaot long Moses blong sevem olgeta, samting ya i pulum hat blong Deved blong soem fasin tangkiu long Jeova.

Yumi save gat sem fasin tangkiu, taem yumi tingbaot ol wok we Jeova i mekem long ol man Isrel. Be, yumi no mas fogetem ekspiryens blong ol man blong Jeova tede tu, olsem ol stori we oli stap long japta 29 mo 30 long buk ya Jehovah’s Witnesses​—Proclaimers of God’s Kingdom. Ol stori we oli stap long buk ya, mo long ol narafala buk blong Watch Tower Sosaeti, oli givhan long yumi blong luk olsem wanem Jeova i sapotem ol man blong hem long taem blong yumi. Plante long olgeta oli go long kalabus, ol grup blong man oli kilim olgeta, gavman i putum tabu long wok blong prij blong olgeta, oli go long ol rabis haos kalabus, mo long ol kamp blong wok olsem slef. Oli kasem traem long ol kantri we faet i bigwan, olsem Burundi, Laeberia, Ruwanda, mo kantri ya we bifo oli kolem Yugoslavia. Nomata weples ol trabol oli kamaot, oltaem han blong Jeova i sapotem ol man blong hem we oli stap tru. Fasin blong tingbaot ol wok blong haefala God, Jeova, i save gat paoa long yumi, olsem we i gat paoa long Deved taem hem i tingbaot stori blong God we i sevem ol man blong hem long Ijip.

Tingbaot tu, olsem wanem, wetem kaen fasin, Jeova i mekem yumi fri long sin. Hem i givim “blad blong Kraes” blong “mekem tingting blong yumi i klin long ol samting we yumi mekem we i blong ded nomo.” (Hibrus 9:14) Yumi mas tanem tingting blong yumi long ol sin blong yumi mo lukaot fasin fogif we i kamaot long blad blong Kraes. Nao God i save putum ol sin blong yumi “i go longwe we i longwe long yumi, olsem we saed long is i stap longwe long saed long wes,” nao hem i save glad long yumi bakegen. Mo tingbaot ol samting we Jeova i givim tru long ol Kristin miting, gudfala kampani blong ol brata sista we oli mekem yumi strong, ol elda long kongregesen, mo ol buk we yumi kasem tru long ‘slef we i stret mo waes.’ (Matiu 24:45) Ol samting ya oli givhan long yumi blong mekem fasin fren blong yumi wetem God i kam strong moa. Deved i talemaot se: “Hae God, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem we oltaem i stap lavem man tumas, hem i gud we i gud, i bitim mak. . . . Hem i no save panisim yumi stret long mak blong ol sin blong yumi, mo hem i no save givimbak ol fasin nogud ya long yumi we yumi stap mekem long hem.” (Ol Sam 103:8-14) Taem yumi tingting dip long fasin kea mo lav we Jeova i gat, samting ya i pusum yumi blong presem hem mo leftemap tabu nem blong hem.

“Yufala Ol Samting We Hem i Mekem, Yufala i Mas Blesem Jeova”

Jeova i no save ded samtaem, hem i ‘God we i stap oltaem nomo.’ Samting ya i defren olgeta long ‘man we i save ded,’ yes laef blong yumi i rili sot​—“olsem wael flaoa.” Be Deved i glad blong talem se: “Ol man we oli stap ona long Hae God, oltaem bambae hem i stap lavem olgeta, gogo i no save finis. Mo sipos olgeta we oli stap kamaot biaen long olgeta oli stap holem promes ya we hem i mekem wetem ol olfala blong olgeta, mo oli stap obei long ol loa blong hem, gudfala fasin blong hem bambae i stap oltaem long olgeta, gogo i no save finis.” (Jenesis 21:33, futnot, NW; Ol Sam 103:15-18) Jeova i no fogetem olgeta we oli fraet long hem. Long stret taem, bambae hem i givim laef we i no save finis long olgeta ya.​—Jon 3:16; 17:3.

Deved i soemaot se hem i glad we Jeova i king, hem i se: “Hae God, hem i king. Hem i stap long ples blong hem long heven, mo i stap rul long olgeta samting.” (Ol Sam 103:19) Bifo, tru long kingdom blong Isrel, i klia se Jeova i king. Nating se i olsem, jea blong king blong hem, i stap long heven. From we Jeova i Man we i Wokem Yumi, hem i Hae Rula blong heven mo wol mo hem i mekem stamba tingting blong hem i kamtru long heven mo long wol ya olsem we hem i wantem.

Deved i pulum ol enjel tu, taem hem i singsing se: “Yufala ol enjel blong hem. !Yufala i blesem Jeova! Yufala i strong, oltaem yufala i stap obei long tok blong hem mo yufala i stap lesin long voes blong hem. !Blesem Jeova, ol ami blong hem! Yufala we i man blong wok blong hem, yufala i mas blesem hem. Blesem Jeova, yufala ol samting we hem i mekem, long olgeta ples we hem i king. !Sol blong mi, yu mas blesem Jeova!” (Ol Sam 103:20-22, NW) Taem yumi tingbaot ol wok blong Jeova we oli soemaot lav blong hem ?samting ya i no pulum yumi blong blesem hem? !Yes! Mo yumi sua se noes blong voes blong yumi, bambae i no smol tumas insaed long bigfala grup ya we i stap presem hem, nating se i gat ol stretfala enjel tu long grup ya. Yumi mas presem Papa blong yumi long heven wetem ful hat blong yumi. Oltaem, yumi mas talem ol gudfala toktok long saed blong hem. Yes, hat blong yumi i agri fulwan long tok blong Deved se, “Sol blong mi, yu mas blesem Jeova.”

[Futnot]

[Tok Blong Pija Long Pej 23]

Deved i tingting dip long ol wok oli soemaot lav blong Jeova. ?Olsem wanem long yu?