Ol Papa Mama, ?Eksampel Blong Yufala i Tijim Wanem?
“Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem. Yufala i mas lavem ol man.”—EFESAS 5:1, 2.
1. ?Jeova i givim wanem rod blong lidim faswan man mo woman?
JEOVA i Stamba blong ol famle. Olgeta famle oli kamaot long hem, from we hem nao i stanemap faswan famle mo i mekem se faswan man mo woman, tufala i naf blong karem pikinini. (Efesas 3:14, 15) Hem i givim sam stamba tijing long Adam mo Iv long saed blong ol wok blong tufala, mo i letem tufala i fri blong yusum save blong tufala blong mekem ol wok ya. (Jenesis 1:28-30; 2:6, 15-22) Taem Adam mo Iv, tufala i sin, laef blong famle i kam hadwok moa. Nating se i olsem, Jeova i lavem tumas ol man blong hem, taswe hem i givim ol advaes we oli save givhan blong lidimgud famle blong olgeta.
2. (a) ?Jeova i yusum wanem rod blong talemaot ol tijing blong hem, antap long hemia we ol man oli raetem daon? (b) ?Ol papa mama oli mas askem wanem kwestin long olgeta wanwan?
2 Jeova, hem i Bigfala Tija blong yumi. Tru long ol tijing blong hem we ol man oli raetemdaon, hem i soem rod long yumi, i talem wanem we yumi mas mekem mo wanem we yumi no mas mekem. Be i no hemia nomo. Long ol taem bifo, Jeova i yusum wan narafala rod bakegen. Hem i yusum ol pris, ol profet, mo ol hed blong famle blong tijim narafala. Tede, ?i gat man we Jeova i stap yusum blong tijim yumi? Yes i gat. Hemia ol Kristin elda mo ol papa mama. Sipos yu wan papa no wan mama, ?yu yu stap tijim famle blong yu blong folem ol rod blong Jeova?—Ol Proveb 6:20-23.
3. ?Ol hed blong famle oli save lanem wanem long Jeova sipos oli wantem givim tijing we i karem gudfala frut?
3 ?Olsem wanem yu save tijim ol pikinini blong yu? Jeova i soem eksampel. Hem i talemaot klia wanem i gud mo wanem i nogud, mo wetem kaen fasin, hem i stap talem ol samting ya bakegen mo bakegen. (Eksodas 20:4, 5; Dutronome 4:23, 24; 5:8, 9; 6:14, 15; Josua 24:19, 20) Hem i yusum ol kwestin we oli pulum tingting blong man. (Job 38:4, 8, 31) Hem i yusum ol pijatok mo ol trufala eksampel blong pulum filing mo blong stretem hat blong yumi. (Jenesis 15:5; Daniel 3:1-29) Ol papa mama, taem yufala i stap tijim ol pikinini blong yufala, ?yufala i folem ol fasin ya?
4. ?Yumi lanem wanem long Jeova long saed blong fasin stretem, mo from wanem fasin stretem i impoten?
4 Oltaem, Jeova i stanap strong long stret fasin. Nating se i olsem, be hem i kasem save se yumi no stret olgeta, yumi mekem mastik samtaem. Taswe, bifo we hem i panisim ol sinman, hem i tijim olgeta, i givim woning long olgeta bakegen mo bakegen, mo i givim advaes long olgeta. (Jenesis 19:15, 16; Jeremaea 7:23-26) Hem i stap stretem yumi long fasin we i stret nomo, i no bitim mak. (Ol Sam 103:10, 11; Aesea 28:26-29) Sipos yumi gat ol fasin ya taem yumi stap wok wetem ol pikinini blong yumi, yumi pruvum se yumi save Jeova. Nao long rod ya, ol pikinini tu bambae oli kasem save long Jeova.—Jeremaea 22:16; 1 Jon 4:8.
5. ?Ol papa mama oli save lanem wanem long Jeova long fasin ya blong lesin?
5 Samting we i nambawan se Jeova, Papa blong yumi long heven, we i lavem yumi tumas, hem i stap lesin long yumi. Hem i no jes givim oda long yumi. Hem i leftemap tingting blong yumi blong talemaot hat blong yumi long hem. (Ol Sam 62:8) Mo sipos samting we yumi talemaot long hem i no stret, hem i no faerap long yumi blong stretem yumi, nogat. Hem i mekem tingting blong hem i longfala mo i tijim yumi. From samting ya, advaes we aposol Pol i talem i stret nomo, se: “Yufala i pikinini blong God, mo hem i lavem yufala tumas, nao from samting ya, yufala i mas traehad blong folem fasin blong hem.” (Efesas 4:31–5:1) !Jeova i soem nambawan eksampel long ol papa mama taem oli wantem tijim ol pikinini blong olgeta! Eksampel ya i kasem hat blong yumi mo i mekem se yumi wantem tumas blong folem rod blong Jeova long laef blong yumi.
Paoa Blong Eksampel
6. ?Olsem wanem tingting mo fasin blong ol papa mama i save gat paoa long ol pikinini blong olgeta?
6 Eksampel blong ol papa mama i gat bigfala paoa long ol yangfala. Nomata sipos papa mama, tufala i wantem no nogat, be bambae ol pikinini blong tufala oli folem eksampel blong tufala. Maet papa mama, tufala i glad tumas—mo maet samtaem tufala i sek—taem tufala i harem se ol pikinini blong tufala oli talem samting we tufala i bin talem. Taem papa mama, tufala i soemaot long fasin mo tingting blong tufala se tufala i tinghae long ol samting long saed blong spirit, samting ya i pulum ol pikinini blong oli mekem sem mak.—Ol Proveb 20:7.
7. ?Jeftaha i soem wanem eksampel long gel blong hem, mo wanem risal blong samting ya?
7 Long Baebol, i gat wan stori we i soem se eksampel blong papa mama i gat paoa long pikinini. Jeftaha, we Jeova i bin yusum hem blong winim ol man Amon, hem tu i wan papa. Ansa we Jeftaha i givim long king blong ol man Amon i soem se plante taem, Jeftaha i bin ridim stori long saed blong ol wok we Jeova i mekem wetem ol man Isrel. Hem i save gud ol stori ya, mo hem i soem se bilif blong hem long Jeova i strong. I sua se eksampel blong Jeftaha i halpem dota blong hem blong gat strong bilif, mo i mekem se hem i rere blong lego samting we hem nomo i wantem. Gel ya i neva mared, hem i givim ful laef blong hem blong mekem wok blong Jeova.—Jajes 11:14-27, 34-40; skelem wetem Josua 1:8.
8. (a) ?Papa mama blong Samuel, tufala i soem wanem nambawan tingting? (b) ?Olsem wanem samting ya i givhan long Samuel?
8 Samuel i wan nambawan eksampel taem hem i pikinini mo hem i stap tru long God olsem wan profet long ful laef blong hem. ?Yu yu wantem se ol pikinini blong yu oli kam olsem Samuel? Sipos yes, tingbaot gudfala eksampel we papa mama blong hem, hemia Elkana mo Hana, tufala i soemaot. Nating se samtaem, famle ya i gat hadtaem long laef blong olgeta, be oltaem oli go long Silo, long ples we tabu haos tapolen i stap, blong mekem wosip. (1 Samuel 1:3-8, 21) Tingbaot dip filing we Hana i gat taem hem i prea. (1 Samuel 1:9-13) Makemgud olsem wanem tufala i tinghevi long enikaen promes we tufala i mekem i go long God, mo tufala i traehad blong holem promes blong tufala. (1 Samuel 1:22-28) I sua se eksampel blong tufala i halpem Samuel blong wokem ol fasin we oli mekem hem i naf blong wokbaot long rod we i stret—nomata we ol man raonabaot long hem, we oli talem se oli wosip long Jeova, oli no soem respek long ol rod blong God. Biaen, Jeova i makemaot Samuel olsem profet blong Hem.—1 Samuel 2:11, 12; 3:1-21.
9. (a) ?Wanem fasin long famle i givhan bigwan long Timoti? (b) ?Timoti i kam wanem kaen man?
9 ?Yu yu wantem se boe blong yu i kam olsem Timoti? Timoti i wan yangfala we i joen plante wetem aposol Pol. Papa blong Timoti, hem i no wan Kristin. Be mama mo bubu woman blong Timoti, tufala nao i soem nambawan eksampel long fasin blong tinghevi long ol samting long saed blong spirit. I sua se samting ya i givhan blong wokem wan strongfala fandesen long Kristin laef blong Timoti. Pol i talem long yumi se mama blong Timoti, Yunis, mo bubu blong hem Loes, tufala i gat “bilif . . . we i no blong giaman.” Tufala i no folem wan laef we i gat tu fes, no gat. Tufala i mekem wanem we tufala i bilif long hem, mo tufala i tijim Timoti blong mekem sem mak. Timoti i pruvum se narafala i save dipen long hem mo se hem i rili kea long ol narafala.—2 Timoti 1:5; Filipae 2:20-22.
10. (a) ?Afsaed long famle, wanem eksampel i save gat paoa long ol pikinini blong yumi? (b) ?Yumi mas mekem wanem sipos ol toktok mo tingting blong ol pikinini blong yumi oli stap kam nogud?
10 I no eksampel blong papa mama nomo we i save gat paoa long ol pikinini. I gat ol narafala pikinini long skul mo ol tija we wok blong olgeta i blong mekem tingting blong ol pikinini i folem wan rod. I gat ol man we oli gat strong filing se evriwan i mas fasgud long laen mo kastom blong olgeta, i gat ol top man blong spot we fulap man i stap presem olgeta from samting we oli mekem, mo i gat ol haeman blong gavman we fasin blong olgeta i stap kamaot long nius. Mo tu, plante milyan pikinini oli luk ol raf fasin blong kilim man long faet. ?Bambae yu yu sapraes sipos ol samting ya oli gat paoa long toktok mo fasin blong pikinini blong yu? ?Yu ting se wan strongfala fasin stretem no wan strong tok bambae i stretem problem ya? Nogat. Bifo we yu tekem aksin blong stretem pikinini blong yu, i gud we yu askem long yu wan se, ‘?Wanem eksampel blong Jeova we i save givhan long mi blong luksave rod blong stretem problem ya?’—Skelem wetem Rom 2:4.
11. ?Olsem wanem mastik blong ol papa mama i save gat paoa long tingting blong ol pikinini blong olgeta?
11 I tru, ol papa mama oli no stret gud olgeta. Taswe, oli no save stretem ol problem long beswan rod oltaem. Bambae oli mekem mastik samtaem. Taem ol pikinini oli luk samting ya, ?bambae oli lusum respek long papa mama blong olgeta? Oli save lusum respek sipos papa mama, tufala i mekem i strong long pikinini blong tufala blong traem haedem mastik we tufala i mekem. Be sipos tufala i holem tingting daon mo talemaot mastik blong tufala, gudfala frut i save kamaot from. Tufala i soem nambawan eksampel long ol pikinini blong tufala, we oli nidim blong lanem fasin ya blong talemaot ol mastik blong olgeta.—Jemes 4:6.
Eksampel Blong Yumi i Save Tijim Wanem
12, 13. (a) ?Ol pikinini oli nidim blong lanem wanem long saed blong lav, mo wanem nambawan rod blong tijim fasin ya? (b) ?From wanem i impoten we ol pikinini oli kasem save long fasin lav?
12 Pikinini i save lanem plante samting long yumi sipos ol tijing blong yumi oli joen wetem gudfala eksampel. Hemia sam rod blong folem.
13 Soem trufala lav: Wan impoten lesen we yumi save tijim tru long eksampel blong yumi, hemia mining blong lav. “Yumi stap lavem God mo ol narafala man, from we God i lavem yumi fastaem.” (1 Jon 4:19) God i Stamba blong lav mo hem i soem beswan eksampel long saed ya. Lav ya a·gaʹpe, we i stanap long stret fasin, Baebol i tokbaot hem bitim 100 taem. Lav ya nao i makemaot ol trufala Kristin. (Jon 13:35) Yumi mas soem lav ya long God mo Jisas Kraes. Mo tu, yumi mas soem lav ya long olgeta man—long olgeta ya tu we maet yumi no gat filing long olgeta. (Matiu 5:44, 45; 1 Jon 5:3) Fastaem, lav ya i mas stap long hat blong yumi, mo yumi mas soemaot long laef blong yumi. Ale, biaen yumi save tijim lav ya long ol pikinini blong yumi. Ol fasin blong yumi oli gat moa paoa bitim tok blong yumi. Insaed long famle, ol pikinini oli mas luk se yumi lavem olgeta tumas. Yumi mas soemaot ol fasin ya we oli joen wetem lav, olsem fasin blong soem filing long narafala. Sipos yumi no mekem olsem, bambae pikinini i no save harem gud long saed blong bodi, tingting mo filing blong hem. Mo tu, ol pikinini oli mas luk olsem wanem blong soem lav mo filing long ol Kristin brata sista blong yumi.—Rom 12:10; 1 Pita 3:8.
14. (a) ?Olsem wanem ol papa mama oli save tijim ol pikinini blong mekem gudfala wok we i givim glad? (b) ?Olsem wanem yu save mekem samting ya long famle blong yu?
14 Lanem olsem wanem blong wok: Fasin blong wok i wan stamba samting long laef. Blong man i harem se hem i no blong nating nomo, hem i mas lanem blong mekem gud wan wok. (Prija 2:24; 2 Tesalonaeka 3:10) Sipos papa mama i givim sam wok long wan pikinini, be tufala i no tijim hem fastaem blong mekem wok ya, nao tufala i singaot strong long hem from we hem i no mekem gud ol wok ya, bambae pikinini i no save lanem wan samting. Ol pikinini oli kwik blong lanem wan wok we i givim glad, sipos oli wok wanples wetem papa mama blong olgeta mo sipos papa mama i presem olgeta from wok we oli mekem. Papa mama i mas eksplenem gud wan wok long ol pikinini blong tufala mo soem olsem wanem blong mekem wok ya. Olsem nao, bambae ol pikinini oli no jes lanem wok ya, be bambae oli lanem tu blong winim ol problem, mo olsem wanem blong finisim gud wok ya. Antap long hemia, bambae oli lanem blong tingting gud mo mekem ol stret disisen. Long ol taem olsem, papa mama i save givhan long pikinini blong luksave se Jeova tu i stap wok, hem i stap mekem gudfala wok, mo se Jisas i folem eksampel blong Papa blong hem. (Jenesis 1:31; Ol Proveb 8:27-31; Jon 5:17) Sipos wan famle i gat wan plantesin, no oli gat wan bisnes, maet i gud we sam long ol memba blong famle oli wok tugeta. No maet mama i save tijim boe no gel blong hem blong kukum kakae, mo wasem plet afta we oli kakae. Sipos papa i stap wok longwe long famle, hem i save mekem plan blong wok wetem ol pikinini blong hem taem hem i stap long haos. !I gud tumas sipos ol papa mama, oli tingbaot blong trenem pikinini blong olgeta blong lukaot long laef blong olgeta biaen, be i no jes blong kasem wan wok!
15. ?Olsem wanem blong tijim fasin ya blong gat strong bilif? Eksplenem.
15 Holemtaet bilif taem i gat traem: Bilif tu i wan impoten haf blong laef. Taem wan famle i tokbaot bilif long stadi blong olgeta, ol pikinini bambae oli save lanem rod blong eksplenem fasin ya. Mo tu, oli lanem sam samting we i save mekem bilif i stat blong gru long hat blong olgeta. Be taem ol pikinini oli luk we papa mama blong olgeta i holemstrong long bilif taem i gat traem, oli save folem eksampel ya long ful laef blong olgeta. Long Panama, i gat wan woman we i stap stadi Baebol. Hasban blong hem i agensem hem, i talem long hem se sipos hem i gohed blong wosip long Jeova, hem i mas aot long haos. Nating se i olsem, oltaem woman ya wetem fo smol pikinini blong hem oli stap wokbaot 16 kilometa mo biaen oli mas ron long bas long narafala 30 kilometa blong go long Haos Kingdom we i stap moa klosap. Eksampel ya i rili leftemap tingting. Naoia, samwe long 20 memba blong famle blong hem oli akseptem trutok.
Soem Eksampel Long Fasin Blong Ridim Baebol Evri Dei
16. ?From wanem i gud tumas we famle i joen wanples blong ridim Baebol evri dei?
16 Wan nambawan kastom we wan famle i save folem—wan kastom we i karem blesing long papa mama mo i wan eksampel we ol pikinini oli save folem—hemia blong ridim Baebol evri dei. Sipos yufala i gat jans, traem ridim sam haf blong Baebol evri dei. Mak blong yumi i no blong ridim plante japta blong Baebol wantaem, no gat. Samting we i moa impoten, hemia blong ridim Baebol evri dei mo rod we yumi folem blong ridim Baebol. Blong givhan long ol pikinini, maet i gud blong lesin long kaset ya My Book of Bible Stories sipos i gat long lanwis blong yufala. Fasin ya blong ridim Tok blong God evri dei i halpem yumi blong putum tingting blong God long fasples oltaem. Mo sipos ful famle i ridim Baebol tugeta, samting ya i save halpem olgeta evriwan blong wokbaot long ol rod blong Jeova. Distrik Asembli ya “Fasin Blong Laef We God i Glad Long Hem” i makemgud fasin ya we famle i ridim Baebol tugeta. Yumi luk samting ya long drama we nem blong hem, Ol Famle—!Mekem Baebol Riding i Kam Wan Fasin Blong Laef Evri Dei!—Ol Sam 1:1-3.
17. ?Olsem wanem fasin we famle i stadi Baebol tugeta mo rimemba sam stamba vas i givhan blong folem advaes we i stap long Efesas 6:4?
17 Fasin ya we famle i ridim Baebol tugeta, i laenap wetem leta we tabu spirit i pusum aposol Pol blong raetem i go long ol Kristin long Efesas. Hem i se: “Yufala ol papa, yufala i no mas mekem ol pikinini blong yufala oli harem nogud gogo oli kam kros. Be yufala i mas gohed blong stretem olgeta, mo blong trenem tingting blong olgeta olsem we Jeova i wantem.” (Efesas 6:4, NW) ?Samting ya i minim wanem? Tok ya “trenem tingting” i minim “putum tingting i go insaed.” Taswe, ol Kristin papa oli kasem oda se oli mas putum tingting blong Jeova God i go insaed long pikinini blong olgeta—oli mas halpem ol pikinini blong save tingting blong Jeova. I gud we papa i leftemap tingting blong ol pikinini blong rimemba sam stamba vas. Samting ya bambae i halpem ol pikinini blong letem tingting blong Jeova i lidim tingting blong olgeta. Long rod ya, ol samting we ol pikinini oli laekem, mo ol fasin blong olgeta, bambae i laenap wetem ol stret rul blong God nomata we oli stap wetem papa mama blong olgeta no oli stap olgeta nomo. Baebol i fandesen blong tingting ya.—Dutronome 6:6, 7.
18. ?Taem yumi stap ridim Baebol, yumi mas mekem wanem sipos yumi wantem (a) kasem save klia long Baebol? (b) kasem blesing from advaes blong hem? (c) folem samting we hem i soemaot long saed blong stamba tingting blong Jeova? (d) kasem blesing from samting we Baebol i talem long saed blong tingting mo fasin blong ol man?
18 Yes, sipos yumi wantem se Baebol i jenisim laef blong yumi, yumi mas kasem save long samting we hem i talem. Plante man, oli mas ridim wan haf blong Baebol tu no tri taem blong kasem save long hem. Blong savegud sam tok, yumi nidim blong jekemap sam wod long diksonari no long buk ya Insight on the Scriptures. Sipos vas ya i wan advaes no wan loa, tekem taem blong tokbaot olsem wanem yumi save mekem vas ya i wok long laef blong yumi tede. Ale, maet yu save askem se, ‘?Sipos yumi folem advaes ya, yumi save kasem wanem frut?’ (Aesea 48:17, 18) Sipos vas ya i stap tokbaot wan stamba tingting blong Jeova, maet yu save askem se, ‘?Olsem wanem samting ya i joen wetem laef blong yumi?’ Maet yu stap ridim wan stori we i tokbaot tingting mo fasin blong sam man. ?Wanem ol hadtaem we ol man ya oli fesem long laef blong olgeta? ?Olsem wanem oli winim ol hadtaem ya? ?Olsem wanem eksampel blong olgeta i save givhan long yumi? Oltaem, i gud blong makem olsem wanem yumi save folem stori ya long laef blong yumi tede.—Rom 15:4; 1 Korin 10:11.
19. ?Taem yumi folem fasin blong God, yumi save soem wanem long ol pikinini blong yumi?
19 !Hemia wan nambawan rod blong mekem ol tingting blong God oli stap strong long maen mo hat blong yumi! Samting ya i rili givhan long yumi blong ‘folem fasin blong God, olsem ol pikinini we hem i lavem tumas.’ (Efesas 5:1) Mo bambae yumi soem gudfala eksampel we ol pikinini blong yumi oli save folem.
?Yu Yu Rimemba?
◻ ?Olsem wanem ol papa mama oli save kasem gudfala frut from eksampel blong Jeova?
◻ ?From wanem ol papa mama oli mas soem eksampel taem oli stap tijim ol pikinini blong olgeta?
◻ ?Wanem sam nambawan samting we papa mama i save tijim long pikinini tru long eksampel blong olgeta?
◻ ?Olsem wanem wan famle i save kasem bigfala blesing taem oli ridim Baebol tugeta?
[Tok Blong Pija Long Pej 10]
Plante famle oli joen wanples blong ridim Baebol evri dei