Ol Yangfala—!Trenem Paoa Blong Tingting Blong Yufala!

“Strong kakae i blong olgeta we oli kam bigman finis, we oli stap traehad longtaem finis, nao oli trenem paoa blong tingting blong olgeta blong i naf blong jusumaot wanem fasin i gud mo wanem fasin i nogud.”​—HIBRUS 5:​14, NW.

1, 2. (a) ?Olsem wanem laef blong yumi tede, i sem mak long ol Kristin blong Efesas bifo? (b) ?Wanem fasin i save protektem yu long ol denja, mo olsem wanem yu save kasem ol fasin ya?

“YUFALA i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes. Yufala i mas yusum evri janis we yufala i kasem blong mekem ol gudfala wok, from we naoia, ol fasin nogud oli gat paoa.” (Efesas 5:​15, 16) Aposol Pol i raetem ol tok ya, tu taosen yia bifo, taswe yumi save talem se naoia ‘ol man nogud wetem ol man blong giaman oli gohed blong mekem i mowas olgeta.’ Yumi laef long ‘taem ya we laef blong wol i kam strong tumas,’ no olsem wan narafala Baebol i tanem se, ol taem ya we oli “fulap long denja.”​—2 Timoti 3:1-5, 13; Phillips.

² Be, yu save blokem ol trabol we oli kamaot long ol denja raonabaot long yu. Blong mekem olsem, yu mas kasem ‘waes, . . . save, mo kam naf blong tingtinggud.’ (Ol Proveb 1:​4, NW) Ol Proveb 2:​10-​12 (NW) i talem se: “Taem fasin waes i kam insaed long hat blong yu, mo sol blong yu i harem gud long save, ale nao fasin blong tingtinggud bambae i lukaot long yu. Fasin luksave bambae i sevem yu, i tekemaot yu long rong rod mo man we i tokbaot ol samting nogud.” Be ?olsem wanem yu save wokem ol fasin ya? Hibrus 5:​14 (NW) i talem se: “Strong kakae i blong olgeta we oli kam bigman finis, we oli stap traehad longtaem finis, nao oli trenem paoa blong tingting blong olgeta blong i naf blong jusumaot wanem fasin i gud mo wanem fasin i nogud.” Taem man i wantem gat gudhan long wan wok, hem i nidim trening. Long sem fasin, man we i wantem gat gudhan blong jusumaot wanem fasin i gud mo wanem fasin i nogud, hem i mas trenem tingting blong hem. Grik tok we Pol i yusum i minim ‘kasem trening olsem man blong resis.’ ?Olsem wanem yu yu save statem trening olsem?

Trenem Paoa Blong Tingting Blong Yu

3. ?Olsem wanem yu save yusum paoa blong tingting blong yu taem i gat wan disisen blong mekem?

³ Makemgud se man we i trenem paoa blong tingting​—fasin blong jusumaot wanem fasin i gud mo wanem fasin i nogud​—hem i “traehad longtaem finis.” Taem yu mas mekem wan disisen yu no save jusum samting long waes fasin sipos yu tingting nomo se maet i gud blong mekem olsem, no sipos yu tekem aksin kwiktaem, no sipos yu jes folem tingting blong narafala man. Blong mekem ol disisen we oli waes, yu mas yusum paoa blong tingting blong yu. ?Olsem wanem blong mekem samting ya? Fastaem yu mas luklukgud long bisnes ya mo traem kasem ol impoten haf blong hem. Sipos i nidim, askem kwestin long narafala. Luksave sipos i gat sam narafala rod we maet yu save jusum. Ol Proveb 13:16 i talem se: “Man we i gat hed, oltaem nomo hem i stap tingting gud fastaem.” Nekis samting, traem faenem olgeta loa mo rul we Baebol i givim long saed blong bisnes ya. (Ol Proveb 3:5) Be, i tru se blong mekem olsem, yu mas gat save long Baebol tu. From samting ya, Pol i leftemap tingting blong yumi blong tekem “strong kakae”​—i minim se yumi mas lanem we trutok “i bigwan olsem wanem, mo i longfala olsem wanem, mo i hae olsem wanem, mo i dip olsem wanem.”​—Efesas 3:​18.

4. ?From wanem i impoten blong kasem save long ol rul blong God?

⁴ I impoten tumas blong mekem olsem, from we yumi sinman mo i isi long yumi blong mekem sin. (Jenesis 8:​21; Rom 5:​12) Jeremaea 17⁠:9 i talem se: “Tingting blong man i stap giaman long hem bakegen. I no gat narafala samting we i save giaman olsem, i nogud we i nogud olgeta.” Sipos yumi no gat ol rul blong God blong lidim yumi, tingting blong yumi i save trikim yumi kwiktaem blong ting se samting we i nogud hem i gud​—jes from we bodi blong yumi i wantem tumas samting ya. (Skelem wetem Aesea 5:​20.) Man blong raetem Ol Sam i talem se: “Mi mi yangfala nomo. ?Bambae mi save mekem laef blong mi i klin olsem wanem? Mi mi mas obei long ol tok blong yu. Mi mi kasem waes long ol loa blong yu, nao mi no laekem nating ol rabis fasin, mi agens long olgeta.”​—Ol Sam 119:9, 104.

5. (a) ?From wanem sam yangfala oli folem ol rod we oli no stret? (b) ?Olsem wanem wan yangfala sista i mekem trutok i kam wan haf blong laef blong hem?

⁵ ?From wanem sam yangfala we oli gruap long ol Kristin famle, oli go folem rong rod? Maet olgeta ya oli neva tektaem blong ‘olgeta nomo i luksave ol samting we God i wantem, wanem i gud, mo wanem God i glad long hem mo wanem i stret gud blong mekem.’ (Rom 12:​2, NW) Maet samfala oli kam long ol miting wetem papa mama blong olgeta mo oli naf blong talem sam long ol stamba tijing blong Baebol. Be, taem yumi askem long olgeta blong pruvum bilif blong olgeta no blong eksplenem sam narafala dip save long Tok blong God, yumi luk se save blong olgeta i smol nomo. I isi nomo blong pulum ol yangfala ya oli foldaon long trap. (Efesas 4:​14) ?Sipos samting ya i tru long saed blong yu, from wanem yu no traem mekem sam jenis? Wan yangfala sista i tingtingbak se: “Mi mekem dip stadi. Mi askem long mi wan se, ‘?Olsem wanem mi mi save se hemia nao trufala skul? ?Olsem wanem mi mi save se i gat wan God we nem blong hem Jeova?’ ”a !Hem i skelemgud Baebol mo long rod ya tingting blong hem i kam strong moa se olgeta samting ya we hem i lanem long papa mama blong hem, oli rili tru!​—Skelem wetem Ol Wok 17:11.

6. ?Olsem wanem yu save ‘faenemaot ol fasin we Masta blong yumi, Jeova, i glad long hem’?

⁶ Taem yu kasem save ya long saed blong ol rul blong Jeova, bambae i isi moa long yu blong “faenemaot ol fasin we Masta blong yumi i glad long hem.” (Efesas 5:​10) Be, ?olsem wanem nao sipos yu no sua long wanem rod i waes blong tekem, taem wan traem i kamaot? Prea long Jeova blong i lidim yu. (Ol Sam 119:144) Traem tokbaot bisnes ya wetem papa mama blong yu no wetem wan Kristin we i bigman finis long saed blong spirit. (Ol Proveb 15:22; 27:17) Yu save faenem help tu sipos yu mekem stadi long Baebol mo ol narafala buk blong Watch Tower Sosaeti. (Ol Proveb 2:​3-5) Moa yu yusum paoa blong tingting blong yu, bambae tingting blong yu i naf moa blong jusumaot samting we i gud.

Soem Fasin Luksave Long Taem Blong Pleplei

7, 8. (a) ?Olsem wanem yu save yusum paoa blong tingting blong yu blong luksave sipos i stret blong go long wan lafet no nogat? (b) ?Wanem tingting blong Baebol long saed blong ol pleplei?

⁷ Naoia bambae yumi luk sam defren samting we maet oli hapen long yu mo olsem wanem yu save yusum paoa blong tingting blong yu long ol taem olsem. Eksampel, tingbaot se sam fren blong yu oli singaot yu blong go long wan lafet. Maet yu kasem wan spesel pepa we i singaot yu long lafet ya. Yu harem se plante yangfala Witnes bambae oli stap long lafet ya. Be, oli askem yu blong givim smol mane blong kavremap praes blong ol samting we bambae oli pem long taem ya. ?Bambae yu yu go long lafet ya?

⁸ Ale, yusum paoa blong tingting blong yu. Fastaem, tingbaot ol impoten samting long saed blong lafet ya. ?Bambae lafet ya i bigwan olsem wanem? ?Hu olgeta we bambae oli kam long taem ya? ?Bambae hem i stat long wanem taem? ?Bambae hem i finis long wanem taem? ?Wanem ol pleplei we oli plan blong mekem long taem ya? ?Bambae i gat man blong lukaot ol samting long lafet ya? Nekis samting, ridim sam atikol we i stap aninit long ol nem olsem “Social Gatherings,” mo “Entertainment” long Watch Tower Publications Index.b ?Wanem sam samting we bambae yu faenem sipos yu mekem olsem? Wan samting se, bambae yu faenemaot we Jeova i no putum tabu long fasin blong joen tugeta blong gat gudtaem. Yes, Prija 8:​15 i talem se, antap long fasin blong wokhad, ‘man i mas stap mekem ol fasin ya we oli save mekem hem i harem gud, hem i mas kakae, mo dring, mo gohed long ol fasin we oli save mekem hem i glad long laef.’ Tru ya, Jisas Kraes hem wan i bin joen long sam spesel lafet mo long wan mared tu. (Luk 5:​27-​29; Jon 2:​1-​10) Sipos yumi no bitim mak long taem blong ol lafet, bambae yumi save kasem plante gudfala frut from.

9, 10. (a) ?Wanem ol denja we i save kamaot long sam lafet? (b) ?Wanem ol kwestin we maet yu askem long yu wan bifo we yu mekem disisen blong joen long wan lafet?

⁹ Nating se i olsem, sipos man i no mekem gud plan blong wan lafet, trabol i save kamaot. 1 Korin 10:​8 i tokbaot sam man Isrel we oli no waesgud taem oli jusum fren blong olgeta, ale, oli mekem nogud wetem woman mo kasem panis ya we “twanti tri taosen blong olgeta oli ded.” Wan narafala woning i kamaot long Rom 13:13: “I gud yumi stap mekem ol stret fasin, olsem ol man we oli stap oltaem long delaet. Bambae yumi no mas mekem ol rabis lafet, mo yumi no mas dring grog we yumi lusum hed. Bambae yumi no mas mekem nogud wetem woman, mo yumi no mas mekem ol krangke fasin. Bambae yumi no mas rao, mo yumi no mas jalus.” (Skelem wetem 1 Pita 4:3.) I tru se, yumi no gat raet blong putum wan stret namba blong man we yumi save singaot i kam long wan lafet. Be long ol taem we oli pas yumi luksave se taem i gat fulap man tumas long wan lafet, i hadwok moa blong lukaot se evri samting i rongud. Sipos wan lafet i no gat fulap man long hem, i folem gudfala plan, i sua se bambae lafet ya i no kam “lafet blong mekem nogud nomo.”​—Galesia 5:​21.

¹⁰ I sua se, sipos yu mekem stadi long saed ya bambae i gat sam moa kwestin oli kam antap long tingting blong yu, olsem: ?Long lafet ya, bambae i gat sam Kristin we oli bigman finis? ?Hu i mekem plan blong lafet ya? ?Mak blong lafet ya i blong kam tugeta blong leftemap tingting blong yumi no i blong winim mane blong wan man? ?I gat sam mak long saed blong wanem kaen man i save stap long lafet ya? Sipos lafet ya i stap long wiken, ?bambae hem i finis long wan taem we i stret blong mekem se olgeta man oli save joen long wok blong prij long nekis dei? Sipos i gat myusek mo danis long lafet ya, ?bambae oli stret folem ol Kristin rul? (2 Korin 6:3) Maet i no isi blong askem ol kwestin olsem. Be, Ol Proveb 22:3 i givim woning ya se: “Man we i gat gudfala tingting i save luksave we trabol i stap kam, nao i save ronwe long hem, be man we i no save tingting gud, hem i save letem trabol i kam, i kasem hem, we biaen i sore from.” Yes, yu save blokem trabol sipos yu yusumgud paoa blong tingting blong yu.

Fasin Luksave Taem Yu Plan From Edukesen

11. ?Olsem wanem ol yangfala oli save yusum paoa blong tingting blong olgeta taem oli mekem plan blong fiuja blong olgeta?

¹¹ Baebol i talem se i waes blong mekem plan blong fiuja. (Ol Proveb 21:5) ?Yu toktok finis wetem papa mama blong yu long saed blong fiuja blong yu? Maet yu gat plan blong joen long wok blong fultaem paenia. Tru tumas, i no gat wan narafala wok we i karem moa glad i bitim wok ya. Sipos yu stat naoia blong lan long fasin blong stadi yu wan mo blong gat gudhan long wok blong prij, yu stap rerem yu wan blong yu kam naf long nambawan wok ya blong paenia. ?Yu tingbaot finis se olsem wanem bambae yu naf blong pem ol samting we yu nidim sipos yu joen long wok blong paenia? ?Sipos long fiuja yu gat wan famle, bambae yu naf blong givim samting we olgeta oli nidim long saed blong bodi? Blong mekem ol gudfala disisen long saed blong ol samting ya yu nidim blong yusum paoa blong tingting blong yu.

12. (a) Folem ekonomi long sam kantri, ?olsem wanem sam famle oli givhan blong pikinini i kasem trening blong wok? (b) ?Fasin blong kasem moa edukesen hem i blokem wan yangfala blong i no save kasem mak ya blong paenia? Eksplenem.

¹² Long sam kantri ol yangfala oli kasem trening blong mekem wan wok long semtaem we oli joen long wok ya. I gat sam yangfala we oli lanem wan wok tru long bisnes blong famle blong olgeta, no oli kasem trening long bisnes blong sam fren blong famle. Sam narafala yangfala oli tekem sam kos long skul, we biaen i save givhan long olgeta blong winim smol mane. Long ol ples we ol yangfala oli no gat jans blong mekem ol samting ya, ol papa mama we oli tingtinggud fastaem, maet oli save mekem plan blong ol pikinini blong tufala i kasem sam moa edukesen afta long haeskul. Fasin ya blong mekem plan fastaem from we yangfala i wantem mekem gud wok olsem bigman mo antap moa, from we hem i wantem kam naf blong joen long wok blong paenia, i laenap wetem fasin ya blong putum Kingdom blong God long fasples long laef blong yumi. (Matiu 6:​33, NW) Mo sipos wan yangfala i jusum blong kasem moa edukesen, samting ya i no minim se hem i no save paenia. Eksampel, wan yangfala gel we i Witnes, hem i gat tingting blong paenia longtaem finis. Afta we hem i finis long haeskul, papa mama blong hem​—we tufala tugeta i paenia tu​—tufala i mekem plan blong gel ya i gohed long skul. Yangfala ya i naf blong joen long wok blong paenia long semtaem ya we hem i stap skul. Naoia hem i gat wan wok we i givim naf mane long hem blong hem i save gohed long wok blong paenia.

13. ?Olsem wanem ol famle oli save tingtinggud fastaem, bifo we oli mekem disisen blong wan yangfala i kasem moa edukesen?

¹³ Hem i disisen blong olgeta famle wanwan blong talem sipos yangfala blong olgeta bambae i kasem moa edukesen no nogat. Taem yumi jusumgud edukesen olsem, hem i save givhan bigwan. Be, hem i save stap olsem wan trap tu. Sipos yu stap tingbaot blong kasem moa edukesen, ?wanem mak we yu wantem kasem? ?Hem i from we yu wantem rerem yu wan blong mekemgud olgeta wok we bambae yu mas mekem taem yu kam bigman? no, ?yu stap traem nomo blong “kasem gudfala laef”? (Jeremaea 45:⁠5; 2 Tesalonaeka 3:​10; 1 Timoti 5:8; 6:9) ?Olsem wanem nao sipos yu wantem kasem moa edukesen mo yu mas lego kantri blong yu no haos blong yu, maet blong laef long ol haos blong wan yunivesiti no kolej? ?Yu ting se hemia wan waes disisen, taem yu tingbaot woning blong Pol se ‘ol fren we oli no stret, oli save spolem fasin blong ol stret man’? (1 Korin 15:33; 2 Timoti 2:​22) Tingbaot tu se, “yumi no gat plante taem i stap.” (1 Korin 7:​29) ?Bambae yu spenem hamas taem blong kasem edukesen ya? ?Bambae yu yusum ful yangtaem blong yu long edukesen nomo? Sipos yu mekem samting ya, ?olsem wanem bambae yu mekem tok blong Baebol i wok long laef blong yu, we i talem se ‘yufala i yangfala yet, oltaem yufala i mas tingbaot God we i mekem yumi’? (Prija 12:1) Mo tu, ?ol kos ya we yu wantem tekem, bambae oli letem taem long yu blong joen long ol impoten Kristin wok olsem, kam long ol miting, joen long wok blong prij, mo stadi yu wan? (Matiu 24:14; Hibrus 10:24, 25) Sipos paoa blong tingting blong yu i sapgud, bambae yu neva gowe long ol mak long saed blong spirit taem yu mo papa mama blong yu, yufala i mekem plan long saed blong fiuja.

Holem Klin Fasin Taem Yu Fren Blong Mared

14. (a) ?Wanem ol rul long fasin blong soem filing we tufala i mas tingbaot taem tufala i stap fren? (b) ?Olsem wanem samfala we oli stap fren oli no soem gudfala tingting long saed ya?

¹⁴ Wan narafala samting we yu nidim blong yusum paoa blong tingting blong yu long hem, hemia taem yu stap fren wetem narafala blong mared. I stret nomo we taem yumi laekem narafala yumi wantem soem filing blong yumi long hem. Boe mo gel ya we Sing blong Solomon i tokbaot, tufala i mekem sam fasin we i soemaot se tufala i laekem tufala, bifo we tufala i mared. (Sing blong Solomon 1:2; 2:6; 8:5) Tede, sam man mo woman we tufala i stap fren, maet oli tingting se i stret nomo sipos tufala i holem han mo kis, antap moa sipos tufala i sua finis blong mared. Be rimemba: “Man we oltaem i stap folem tingting blong hem nomo, hem i krangke we i bitim mak.” (Ol Proveb 28:26) Sore tumas be, plante yangfala we oli fren blong mared, oli no bin yusum fasin luksave. Nao, from samting ya, oli pulum traem i kam long olgeta. Oli soem filing blong olgeta bitim mak mo oli no moa save bos long olgeta. Biaen, oli mekem sam doti fasin mo oli foldaon long fasin blong slip tugeta.

15, 16. ?Wanem ol waes disisen we tufala we i stap fren, tufala i save tekem blong mekem se fasin fren blong tufala i stap klin?

¹⁵ Sipos yu stap fren wetem narafala, yu waes blong lukaot we yutufala i no stap yutufala nomo long ol ples we i no gat man long hem. I moagud yutufala i haremgud long kampani blong yutufala taem yufala i joen wetem ol narafala no long ol ples we i gat ol man long hem. Samfala we oli stap fren oli jusum wan man no woman blong i kampani oltaem wetem tufala. Mo tu, tingbaot ol tok ya blong Hosea 4:​11: “Ol waen ya we yufala i stap dring, nating we i olfala, no i niuwan yet, be i stap mekem hed blong yufala i krangke nomo.” Alkol i save mekem yumi lusum gudfala tingting blong yumi mo i save lidim yumi blong mekem samting we biaen maet yumi sore from.

¹⁶ Ol Proveb 13:10 (NW) i talem se: “Man we i flas, hem i mekem faet i kamaot. Be olgeta we oli toktok gud tugeta fastaem oli waes.” Yes, “toktok gud tugeta” mo tokbaot olsem wanem yutufala i save lukaot long ol fasin we oli no stret. Putum mak we yutufala bambae i no mas bitim, taem yutufala i soemaot filing blong yutufala. Wanwan long yutufala i mas respektem filing blong narawan mo tingting we i stap jajem hem. (1 Korin 13:5; 1 Tesalonaeka 4:​3-7; 1 Pita 3:​16) Ating fastaem i no isi blong tokbaot bisnes ya tugeta, be rod ya i save blokem yutufala blong no mekem fasin we bambae i karem problem i kam biaen.

Kasem Tijing ‘Taem Yu Yangfala Yet’

17. ?Olsem wanem Deved i trastem Jeova ‘taem hem i yangfala yet,’ mo samting ya i tijim wanem long ol yangfala tede?

¹⁷ Blong no foldaon long ol trap blong Setan yumi mas stap wekap oltaem. Samtaem, blong mekem samting ya, yumi nidim fasin no fraet. Tru tumas, maet samtaem bambae yu stap defren long ol narafala, maet i no jes long ol fren blong yu, be long ful wol. Deved, we i raetem Ol Sam, i prea olsem se: “Mi mi putum tingting blong mi, i stap long yu nomo. I stat bifo, taem mi mi yangfala yet, mi stap trastem yu. God, i stat long taem we mi mi yangfala, yu yu stap tijim mi, mo mi stap tokbaot yet ol bigbigfala wok ya blong yu.” (Ol Sam 71:​5, 17)c Yumi savegud se Deved i wan man we i no fraet. Be, ?wetaem hem i wokem fasin ya? !Hem i mekem olsem taem hem i yangfala yet! Bifo long taem ya we Deved i kilim Golaeat i ded, hem i soemaot fasin no fraet taem hem i stap lukaot long ol sipsip blong papa blong hem​—hem i bin kilim wan laeon mo wan bea tufala i ded. (1 Samuel 17:34-​37) Be, taem Deved i win long eni samting we hem i mekem, oltaem hem i givim ona i go long Jeova. Hem i se “taem mi mi yangfala yet, mi stap trastem yu.” From we Deved i lan blong dipen oltaem long Jeova, samting ya i givhan long hem blong winim eni traem we hem i fesem. Yu tu, bambae yu luk se sipos yu dipen long Jeova, bambae hem i mekem yu yu no fraet mo yu strong blong ‘winim wol ya.’​—1 Jon 5:4.

18. ?Wanem advaes i stap blong ol yangfala we oli laekem God tede?

¹⁸ Plante handred yangfala olsem yu oli no fraet blong stanap strong long trutok mo naoia oli mekem wok olsem ol pablisa blong gud nius. !Mifala i tangkiu long God from bilif mo strong tingting we ol yangfala ya oli soem! Yufala i mas strong blong ronwe long kruked fasin blong wol ya. (2 Pita 1:4) Gohed blong yusum paoa blong tingting blong yufala we Baebol i trenemgud finis. Sipos yufala i mekem olsem bambae yufala i save blokem trabol naoia mo biaen, bambae yufala i sua blong kasem sef. Olsem laswan stadi bambae i soemaot, yu save karem gudfala frut long laef blong yu.

[Ol futnot]

Ol Kwestin Blong Tingtingbak

◻ ?Olsem wanem wan yangfala i trenem paoa blong tingting blong hem?

◻ ?Olsem wanem wan yangfala i save yusum paoa blong tingting blong hem taem hem i joen long ol lafet we narafala Kristin i mekem?

◻ ?Wanem sam poen blong tingbaot taem wan yangfala i mekem plan long saed blong edukesen blong hem?

◻ ?Olsem wanem olgeta we oli stap fren oli save lukaotgud blong no foldaon long trap ya blong slip tugeta bifo mared?

[Tok Blong Pija Long Pej 15]

Sipos yu lan blong stadi bambae yu trenem paoa blong tingting blong yu

[Tok Blong Pija Long Pej 16]

Taem wan lafet i smol i isi moa blong lukaot long evri samting, mo i no save gat ol fasin we oli bitim mak

[Tok Blong Pija Long Pej 16]

Ol papa mama oli mas traem givhan long ol pikinini blong olgeta blong mekem plan from edukesen blong olgeta

[Tok Blong Pija Long Pej 17]

I moagud sipos tufala we i stap fren, tufala i kampani taem i gat fulap man