!Kasem Ol Gudfala Frut Long Laef Blong Yu!
‘Olgeta we oli no wantem folem toktok blong ol man nogud, olgeta ya oli save harem gud. Bambae oli win long evri samting we oli stap mekem.’—OL SAM 1:1, 3.
1. (a) ?Wanem tingting blong plante yangfala long wol ya, long saed blong rod blong kasem gudfala frut long laef? (b) ?Baebol i tokbaot man we i kasem gudfala frut long laef blong hem, olsem wanem?
GUDFALA FRUT—?tok ya i minim wanem long yu? Wan yangfala man i talem se: “Impoten samting long laef blong mi hemia blong kasem gudfala frut long wok blong winim mane.” Wan yangfala woman i talem se: “Drim blong mi hemia blong gat wan famle.” Be, wan narafala yangfala woman i talem se: “Drim blong mi i jes blong gat wan haos blong mi mo wan naesfala trak . . . Mi wantem kasem ol samting ya nao, we tingting blong mi i stap long hem.” Problem hemia se blong kasem gudfala frut long laef blong yu, samting ya i no dipen long mane, wan famle, no wan gudfala wok. Long Ol Sam 1:1-3, yumi ridim tok ya se: “Olgeta we oli no wantem folem toktok blong ol man nogud . . . Oli glad blong folem Loa blong Hae God . . . Oli stap win long evri samting we oli stap mekem.”
2. ?Yumi save kasem gudfala frut tru long wanem samting nomo, mo olsem wanem blong kasem samting ya?
2 Long ples ya Baebol i promes se yumi save kasem samting we i no gat wan man i save givim long yumi—!hemia gudfala frut! Be hem i no tokbaot fasin blong winim plante mane. Baebol hem wan i givim woning ya se: “Fasin blong laekem mane tumas, hem i stamba blong olgeta fasin nogud.” (1 Timoti 6:10) Taem man i traehad blong mekem God i glad—hem i folem ol loa blong Jeova—hemia nao rod blong kasem gudfala frut. !Samting ya nomo i save mekem man i harem gud long laef blong hem mo kasem trufala glad! Maet i hadwok blong kasem save se, olsem wanem yumi save harem gud sipos yumi stap oltaem aninit long loa blong Jeova mo letem Hem i talem long yumi wanem samting we yumi mas mekem. Be, Jisas i talem se: “Olgeta we oli luksave se oli nidim ol samting long saed blong spirit, oli save harem gud.” (Matiu 5:3, NW) Nomata sipos yumi luksave samting ya no nogat, be, taem God i wokem yumi, hem i mekem se yumi nidim ol samting long saed blong spirit—olsem save long saed blong God mo ol stamba tingting blong hem. Taswe, yumi save kasem trufala glad nomo sipos yumi kasem ol samting ya we yumi nidim, mo folem “Loa blong Hae God.”
From Wanem Yumi Nidim Loa Blong God
3. ?From wanem yumi mas glad blong letem Jeova i ‘bos long laef blong yumi’?
3 Profet Jeremaea i raetem se: “Hae God. Mi mi save we i no gat man i save wanem samting bambae i kamtru long laef blong hem, mo we i no gat man i save kam bos long laef blong hem.” (Jeremaea 10:23) Hemia i tru long olgeta man, ol yangfala wetem ol olfala. From we yumi sot long waes, ekspiryens, mo save, yumi no naf blong bos long laef blong yumi. Be, i no hemia nomo. Yumi no gat raet blong mekem olsem. Long Revelesen 4:11, Baebol i talem se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.” From we Jeova i Man Ya we i Wokem yumi, hem i “stamba blong laef.” (Ol Sam 36:9) Taswe, hem i naf moa, bitim eni man, blong talem long yumi olsem wanem yumi mas yusum laef blong yumi. From samting ya hem i givim sam loa. Ol loa ya oli no blong karemaot glad blong yumi, be oli blong halpem yumi blong kasem blesing. (Aesea 48:17) Sipos yu no wantem save ol loa blong God, bambae yu folem wan rod we i save karem yu i go long trabol nomo.
4. ?From wanem plante yangfala oli spolem laef blong olgeta?
4 Eksampel, ?yu tingbaot finis se, from wanem plante yangfala oli spolem laef blong olgeta wetem ol drag, ol nogud fasin long saed blong seks, mo olkaen narafala rabis fasin bakegen? Ol Sam 36:1, 2 i eksplenem se: “Man nogud, oltaem fasin blong mekem nogud i stap toktok long hem, insaed olgeta long tingting blong hem. Hem i no laekem God, i no save ona long hem nating, from we hem i flas tumas nao i ting se God bambae i no save faenemaot ol sin blong hem, i no save jajem hem from.” From we oli gat fasin ya blong “no laekem God,” plante yangfala oli trikim olgeta wan bakegen from we oli bilif se i no gat trabol i save kamaot sipos oli mekem sam fasin we i bitim mak lelebet. Be, biaen, oli luksave se tok ya i tru tumas we i talem se: “Wanem sid we man i planem fastaem long garen blong hem, be frut blong hem nomo, man ya bambae i mas kakae. Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we ded nomo. Be sipos hem i planem fasin we Tabu Spirit i wantem, Tabu Spirit bambae i givim kakae long hem, we hemia laef ya we i no save finis.”—Galesia 6:7, 8.
“Kaontem Ol Dei”
5, 6. (a) ?From wanem ol yangfala oli mas “kaontem ol dei,” mo samting ya i minim wanem? (b) ?Tok ya ‘tingbaot God’ i minim wanem?
5 ?Olsem wanem yu save karem ol gudfala frut long laef blong yu mo ‘kasem kakae, hemia laef ya we i no save finis’? Moses i raetem se: “Yia blong mifala i save kasem seventi nomo, no sipos bodi blong mifala i stap strong oltaem, mifala i save kasem eiti . . . Laef blong mifala i save finis kwiktaem nomo, nao mifala i go lus olgeta.” (Ol Sam 90:10) I no oltaem we yu tingbaot se mbae yu ded, no maet yu neva tingbaot samting ya. Yes, plante yangfala oli mekem olsem se i no gat samting we i save spolem laef blong olgeta. Be Moses i wekemap yumi blong luksave se laef i sot. Mo tu, i no gat wan samting we i save pruvum se bambae yumi save laef i go kasem 70 no 80 yia. “From we ol taem mo ol samting we man i no save long hem, oli hapen long evriwan,” nomata se yu yang mo helt blong yu i gud. (Eklesiastis 9:11, NW) Taswe, ?olsem wanem yu save yusum laef ya we i sas tumas, we yu stap harem gud long hem naoia? Moses i prea se: “Soem long mifala olsem wanem blong kaontem ol dei blong mifala long wan rod we i save karem wan hat we i waes.”—Ol Sam 90:12, NW.
6 ?Tok ya se, kaontem ol dei, i minim wanem? Samting ya i no minim se bambae yu wari bitim mak se laef blong yu bambae i go kasem hamas yia. Moses i prea blong Jeova i tijim ol man blong Hem blong oli yusum ol dei we i stap long laef blong olgeta, long wan fasin we bambae i givim ona long Hem. ?Yu yu stap kaontem ol dei blong laef blong yu—yu tingbaot evri dei we i pas olsem wan sas samting we bambae yu yusum blong presem God? Baebol i leftemap tingting blong ol yangfala se: “I nogud yufala i letem wan samting i mekem yufala i tingting tumas, no i mekem yufala i harem nogud long bodi blong yufala. Bambae yufala i no save stap yangfala olsem oltaem. God i mekem yumi, mo naoia we yufala i yangfala yet, oltaem yufala i mas tingbaot hem.” (Prija 11:10–12:1) Tingbaot Man Ya we i Wokem yumi i no minim se yumi tingting nomo se hem i laef i stap. Taem man ya blong brekem loa i talem long Jisas se, ‘tingbaot mi taem yu stap long kingdom blong yu,’ hem i no wantem nomo se Jisas i tingbaot nem blong hem. Nogat. !Hem i wantem se Jisas i tekem aksin, i mekem hem i laef bakegen long ded! (Luk 23:42; skelem wetem Jenesis 40:14, 23; Job 14:13.) Long sem fasin, taem yumi talem se yumi tingbaot Jeova, hemia i joen wetem wan aksin. Hem i minim se yumi mekem samting we hem i glad long hem. ?Yu yu stap tingbaot Jeova?
Lukaot Blong No Jalus Long Ol Man Nogud
7. ?From wanem sam yangfala oli jusum blong fogetem Man Ya We i Wokem olgeta? Givim wan eksampel.
7 Plante yangfala oli mekem jus blong fogetem Jeova from we oli tingting se, taem oli stap olsem wan Witnes, i gat tumas samting we oli no save mekem. Wan brata long Spen i tingbaot taem we hem i yangfala, se: “Mi laekem wol from we mi luk se trutok i hadwok mo i strong tumas. Mi mas sidaon kwaet, stadi, go long ol miting, putum klos we i stret, mo ol samting ya mi no laekem nating blong mekem.” ?Samtaem yu gat tingting ya se, from we yu mekem wok blong God, yu stap mestem jans blong mekem plante samting? Ating bambae yu sapraes blong save se wan long ol man we oli raetem Baebol i bin gat sem filing olsemia. Plis openem Baebol mo ridim Ol Sam 73.
8. ?From wanem Asaf i ‘jalus long ol man we oli stap tok flas’?
8 Bambae yumi lukluk gud long ol vas blong Sam ya. Vas 2 mo 3 i talem se: “Be mi, klosap tingting blong mi i no moa stap long hem, bilif blong mi klosap i lus, from we taem mi luk ol man nogud ya we ol samting long laef blong olgeta oli stap ron gud nomo, mo oli stap praod from, mi mi jalus long olgeta.” Smol tok we i stap antap long Sam ya i soemaot se Asaf nao i raetem ol tok ya. Asaf i wan man blong plei myusek long laen blong Levi we i laef long taem blong King Deved. (1 Kronikel 25:1, 2; 2 Kronikel 29:30) Nating se Asaf i gat nambawan jans ya blong mekem wok long tempel blong God, hem i stap “jalus” long ol man we oli stap tok flas from rabis fasin blong olgeta. I luk olsem se evri samting long laef blong ol man ya i stap gohed gud; oli stap long pis mo oli sef gud. Tru ya, i luk olsem se oli stap kasem ol gudfala frut long laef blong olgeta i ‘winim samting we hat blong olgeta i save tingbaot.’ (Vas 5, 7, NW) Oli stap tokbaot ol nambawan samting we oli gat, long fasin we i “praod tumas,” hemia i minim se oli tok flas. (Vas 8) Oli stap ‘putum maot blong olgeta long heven mo tang blong olgeta i stap wokbaot olbaot long wol,’ oli no kea long ol eni man—nating se hem i olgeta long heven no long wol.—Vas 9, NW.
9. ?Olsem wanem sam yangfala Kristin tede, maet oli gat sem filing olsem Asaf?
9 Ating i sem mak long saed blong ol fren blong yu long skul. Maet yu harem olgeta oli tok flas long ol rabis fasin long saed blong seks we oli stap mekem, ol lafet we oli wael olgeta, mo fasin blong drong mo blong tekem drag. Taem yu luk laef blong olgeta wetem ol samting ya we oli talem se oli stap harem gud long hem, nao yu skelem wetem smol rod ya we yu yu stap wokbaot long hem olsem wan Kristin, maet samtaem yu harem se yu ‘jalus long ol nogud man ya.’ (Matiu 7:13, 14) Asaf hem wan i kasem wan mak we hem i talem se: “Mi mi stap holem tingting blong mi i klin, mi no stap mekem sin, be hemia i blong nating nomo. Oltaem . . . mi harem nogud, i stat long moning, gogo i kasem long sapa.” (Vas 13, 14) Yes, hem i stat tingting se i no impoten blong mekem wok blong God mo gat wan laef we i stret gud.
10, 11. (a) ?Wanem i mekem se tingting blong Asaf i jenis? (b) ?Olsem wanem ol man nogud oli stap stanap long “ples we i glis”? Givim wan eksampel.
10 Laki nomo se, Asaf i no gohed blong holem ol tingting ya blong longtaem. Hem i luksave kwiktaem se pis ya we i luk olsem se ol rabis man oli gat, hem i jes wan drim nomo—!mo hem i blong sot taem nomo! Hem i talem se: “Bambae yu yu putum olgeta long ol ples we i glis, bambae yu mekem olgeta oli foldaon, oli kam nogud olgeta. Bambae yu spolem olgeta kwiktaem nomo, bambae oli godaon long ples we i nogud olgeta.” (Vas 18, 19) Plante long ol fren blong yu tu oli stap stanap long “ples we i glis.” Eni taem nomo, fasin blong olgeta, we i no laenap wetem tingting blong God, bambae i givim panis long olgeta. !Maet oli gat bel we oli no mared yet, maet oli kasem sam sik from nogud fasin blong seks, maet oli go kalabus no oli ded! Be, samting we i moa nogud se, oli stap longwe long God.—Jemes 4:4.
11 Wan yangfala gel blong Spen, we hem i wan Witnes, i luksave se samting ya i tru tumas. Taem hem i yang yet, hem i gat wan dabol laef, mo i stap joen wetem sam narafala yangfala we oli no folem tingting blong God nating. I no longtaem, hem i stat laekem wan boe long grup blong ol yangfala ya we hem i stap joen wetem—boe ya i stap tekem drag. Nating se gel ya i no tekem drag, hem i pem ol drag blong boefren blong hem. Hem i talem tu se: “Mi givhan long hem taem hem i stikim hem wan blong putum drag long bodi blong hem.” Laki nomo long sista ya, hem i luksave rong blong hem mo i kamgud bakegen long saed blong spirit. Hem i sapraes tumas biaen, taem hem i harem se boefren ya we i stap tekem drag, i ded from sik ya AIDS. Yes, olsem man blong raetem Sam i talem, ol man we oli no folem tok blong God oli stanap long “ples we i glis.” Sam man oli ded finis, from we oli gat wan fasin blong laef we i olbaot nomo. Mo sipos ol narafala man, we oli laef yet, oli no jenisim fasin blong olgeta naoia, i no longtaem “Jisas, Masta blong yumi, bambae i aot long heven, i kamtru long yumi, wetem ol strong enjel blong hem, mo faea we i laet. Hem bambae i kam blong givim panis long olgeta we oli no save ona long God, mo long olgeta we oli no save obei long gud nius blong Jisas, Masta blong yumi.”—2 Tesalonaeka 1:7, 8.
12. ?Olsem wanem wan yangfala long Japan i stat luksave se i krangke nomo blong wantem samting we ol rabis man oli gat?
12 !Taswe i krangke nomo blong wantem samting olsem “olgeta we oli no save ona long God”! Ating yumi mas wantem moa blong mekem sem mak olsem olgeta ya we oli gat save long Jeova mo we oli gat hop blong laef gogo i no save finis. Wan yangfala brata long Japan i luksave samting ya. Taem hem i yangfala, hem tu i “wantem fri moa.” Hem i eksplenem se: “Mi ting se mi stap mestem wan gudfala samting. Ale, mi tingbaot se laef blong mi bambae i olsem wanem sipos mi lego trutok. Mi tingbaot se bambae mi olsem wanem sipos mi laef go kasem 70 no 80 yia mo biaen mi ded. Be, !Jeova i givim wan hop blong laef we i no save finis long yumi! Taem mi luksave samting ya, hem i halpem mi blong gat tangkiu from samting ya we mi gat finis.” Be i tru se, i no isi nating blong stanap strong taem i gat fulap man raonabaot long yumi we oli no folem ol loa blong God. ?Wanem sam samting we yu save mekem blong faet agensem ol traem?
Lukaot Long Ol Fren We Yu Jusum
13, 14. ?From wanem i impoten blong jusumgud ol fren blong yumi?
13 I gud yumi ridim bakegen ol tok blong wan man we i kasem gudfala frut long laef blong hem. Toktok blong hem i stap long Ol Sam 1:1-3: “Olgeta we oli no wantem folem toktok blong ol man nogud, mo we oli no wantem folem fasin blong olgeta, mo we oli no wantem joen wetem olgeta we oli stap laf long God, olgeta ya oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet. Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.”
14 Faswan samting we yu mas makemgud hemia se, ol fren blong yu oli save gat bigfala paoa long laef blong yu. Ol Proveb 13:20 i talem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” Samting ya i no minim se yumi no mas toktok no soem kaen fasin long ol yangfala we oli no Witnes blong Jeova. Nogat. Baebol i pulum yumi blong lavem ol man raonabaot long yumi mo blong “gat pis wetem olgeta man.” (Rom 12:18; Matiu 22:39) Be, sipos yu kampani tumas wetem ol yangfala olsem, maet bambae yu luk se yu stap ‘folem toktok’ blong olgeta.
Blesing We i Kamaot From Fasin Blong Ridim Baebol
15. ?Olsem wanem ol yangfala oli save wokem fasin blong wantem tumas blong ridim Baebol?
15 Man blong raetem Sam i makem tu se blong karem gudfala frut long laef blong hem, wan man i mas laekem blong ridim loa blong God mo “tingting long hem long dei mo long naet.” (Ol Sam 1:1, 2) I tru se, Baebol i no wan buk we yumi save ridim isi olsem ol narafala buk. I gat sam samting insaed long hem we oli “strong blong save.” (2 Pita 3:16) Be i no minim se evri taem yu ridim Baebol bambae i hadwok. I gat rod blong “wantem tumas tok blong God we i klin gud, olsem pikinini we i jes bon i wantem titi tumas.” (1 Pita 2:2) Traem ridim wan haf blong Baebol evri dei. Sipos i gat sam tok we yu no kasem save long hem, ale, mekem stadi long ol tok ya. Biaen, tingbaot samting we yu ridim. (Ol Sam 77:11, 12) Sipos yu faenem i had blong putum tingting blong yu i stap stret long wanem we yu ridim, traem rid wetem bigfala voes. Sloslou, bambae yu luk se yu laekem moa blong ridim Baebol. Wan yangfala sista blong Brasil i tingting se: “Bifo, Jeova i olsem wan strenja long mi. Be, long ol manis we oli jes pas, mi stap traehad blong stadi mi wan mo ridim Baebol. Naoia mi harem olsem se fasin fren blong mi wetem Jeova i kam strong moa. Hem i kam olsem wan trufala man long tingting blong mi.”
16. ?Olsem wanem yumi save kasem moa samting long ol miting blong kongregesen?
16 I impoten blong kam long ol miting blong kongregesen tu, sipos yumi wantem gru long saed blong spirit. Sipos yu “lukaotgud olsem wanem yu stap lesin,” bambae yu save kasem plante tok we oli leftemap tingting. (Luk 8:18, NW) ?Samtaem yu harem olsem se yu no intres long ol miting? Ale, askem long yu wan se, ‘?Mi mi stap mekem wanem blong bambae ol miting ya oli pulum intres blong mi? ?Mi rili stap lesingud? ?Mi stap reregud fastaem? ?Mi stap givim ansa?’ Tru ya, Baebol i talem long yumi se yumi mas “tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin, . . . yumi mas toktok gud long yumi blong leftemap tingting blong yumi.” (Hibrus 10:24, 25) !Blong mekem olsem, yu mas serem tingting blong yu long ol miting! Be, blong mekem olsem, yu mas stadi fastaem. Wan yangfala sista i talem stret se: “I rili isi moa blong givim ansa long ol miting sipos yu bin reregud fastaem.”
Folem Rod Blong God Mo Kasem Gudfala Frut Long Laef
17. ?Olsem wanem wan man we i ridim Baebol oltaem hem i sem mak long “ol tri we oli gru long saed blong wota we i stap ron”?
17 Man blong raetem Sam i gohed blong tokbaot man we i kasem gudfala frut long laef blong hem. Hem i se man ya i olsem “ol tri we oli gru long saed blong wota we i stap ron.” Wota ya we i stap ron, ating i minim ol smol reva we man i mekem blong karem wota i go long olgeta tri we oli planem long wan plantesin. (Aesea 44:4) Man we i ridim Baebol evri dei i olsem wan tri we i stanap klosap long wan reva ya mo oltaem i stap kasem wota we i mekem hem i laef. (Jeremaea 17:8) Evri dei bambae yu stap kasem paoa we yu nidim blong winim ol traem mo trabol. Sipos yu kasem save long tingting blong Jeova, bambae yu kasem waes we yu nidim blong mekem ol gudfala disisen.
18. ?Wanem i save givhan long wan yangfala blong kasem ol gudfala frut taem hem i mekem wok blong Jeova?
18 Samtaem maet yu faenem i had blong mekem wok blong Jeova. Be yu neva mas tingting blong lego from we i hadwok tumas. (Dutronome 30:11) Baebol i promes se, long taem we i kam, bambae ‘yu win long evri samting we yu mekem.’ !Be, fastaem yu mas putum mak blong mekem Jeova i harem gud long yu mo mekem hat blong hem i glad! (Ol Proveb 27:11) Mo rimemba se, bambae yu neva stap yu wan blong mekem samting ya. Yu save kasem help blong Jeova mo Jisas Kraes. (Matiu 28:20; Hibrus 13:5) Tufala i save wanem hadtaem we yu fesem, mo neva bambae tufala i lego yu. (Ol Sam 55:22) Mo tu, i gat “kampani blong ol brata” mo papa mama blong yu tu, sipos tufala i wosip long God. (1 Pita 2:17, NW) !Wetem help blong olgeta ya, mo strong tingting mo traehad blong yu, bambae yu save kasem ol gudfala frut long laef blong yu naoia, mo long fiuja tu, gogo i no save finis!
Kwestin Blong Tingtingbak
◻ ?Wanem trufala rod blong kasem gudfala frut long laef blong yumi?
◻ ?From wanem yumi nidim Jeova blong lidim yumi?
◻ ?Olsem wanem ol yangfala oli save “kaontem ol dei” blong olgeta?
◻ ?From wanem i krangke nomo blong wantem samting we ol man nogud oli gat?
◻ ?Olsem wanem fasin blong ridim Baebol mo go long ol miting i save halpem ol yangfala blong kasem gudfala frut long laef blong olgeta?
[Tok Blong Pija Long Pej 20]
Plante yangfala oli gat wan laef we i nogud, from we oli no “laekem God”
[Tok Blong Pija Long Pej 22]
Plante taem ol yangfala oli fogetem se aksin we oli mekem bambae i gat frut long hem
[Tok Blong Pija Long Pej 23]
Wokem fasin blong laekem ridim Baebol
[Tok Blong Pija Long Pej 23]
Yu save laekem ol miting moa, sipos yu givim ansa