Oli Mekem Samting We Jeova i Wantem

Meri i Jusumaot “Gudfala Samting”

LONG taem blong Jisas, ol kastom blong ol rabae i blokem ol woman Jiu long plante samting. Taswe, ol woman ya oli no moa gat intres blong stadi long Loa. Hemia tingting we i kamaot long Misna we i talem se: “Sipos wan man i givim save long saed blong Loa long gel blong hem, i olsem se hem i stap tijim rabis fasin long saed blong seks long hem.”​—Sotah 3:4.

From samting ya, long faswan handred yia, plante woman oli no gat wan gudfala edukesen. The Anchor Bible Dictionary i talem se: “I no gat pruf we i soemaot se, bifo we Jisas i statem wok blong talemaot gud nius, i gat sam woman Jiu we oli bin kam disaepol blong wan bigfala tija. Ating i neva gat wan woman yet we i mekem olsem. Ol woman oli no gat raet blong wokbaot wetem wan tija, mo wan woman i no gat raet blong tijim narafala man, hem i save tijim ol pikinini nomo.” !Mo blong daonem ol woman bakegen, sam lida blong skul oli givim oda ya se wan man i no mas storeyan wetem wan woman long pablik ples!

Jisas i no agri nating wetem ol fasin ya we oli no laenap wetem tingting blong God. Jisas i tijim ol woman olsem we hem i tijim ol man, mo ol man mo woman tu oli save biaenem hem. (Luk 8:​1-3) Wan dei, Mata mo Meri, tufala i singaot Jisas blong kam long haos blong tufala. (Luk 10:38) Tufala woman ya oli sista blong Lasaros, mo trifala ya oli disaepol blong Jisas, oli frengud wetem hem. (Jon 11:5) Yumi save talem se famle ya i gat hae nem, from we plante man oli kam blong sapotem Meri mo Mata, taem Lasaros i ded. Be nating se i olsem wanem, samting we i hapen taem Jisas i stap long haos blong trifala ya i givim wan gudfala lesen long olgeta, be long yumi tu.

Kasem Tijing Klosap Long Leg Blong Jisas

I sua se Mata mo Meri, tufala i wantem tumas blong mekem wan nambawan kakae long Jisas, mo ating tufala i gat naf mane blong mekem olsem. (Skelem wetem Jon 12:​1-3.) Be, taem Jisas i kam, Meri ‘i kam sidaon long floa klosap long leg blong Jisas, i stap lesin long ol tok blong hem.’ (Luk 10:39) !I no gat wan kastom blong man we i save blokem Jisas blong tijim wan woman we i gat stret tingting, mo we i wantem tumas blong lanem samting! Traem tingbaot Meri we i sidaon long fored blong Jisas, i olsem wan studen we i lesingud long tijing blong Masta blong hem.​—Skelem wetem Dutronome 33:3; Ol Wok 22:3.

Defren olgeta long Meri, Mata i “gat tumas wok blong hem.” Blong mekem rere bigfala kakae ya, hem i bisi tumas. From samting ya, Mata i stap harem nogud from we hem wan nomo i wok, !be sista blong hem i stap sidaon klosap long leg blong Jisas! Ale, Mata i katem tok blong Jisas, mo maet hem i toktok strong taem hem i se: “Masta. ?Olsem wanem? ?Yu ting se i gud we sista blong mi i livim ol wok ya i stap, blong mi wan nomo mi mekem? Plis yu tok long hem blong i kam givhan long mi.”​—Luk 10:40.

I no gat samting we i rong long tok blong Mata. I tru se, i no isi blong mekem rere wan kakae blong plante man, mo tu i no stret se wan man nomo i rerem kakae olsem. Nomata long samting ya, Jisas i tekem jans ya blong tijim wan nambawan lesen. Hem i talem se: “Mata. Yu stap harem nogud, mo yu stap trabol long plante samting. Be i gat wan samting nomo we i stret blong yufala i mekem. Mo Meri, hem i jusumaot gudfala samting ya finis, mo mi mi no save tekemaot samting ya long hem.”​—Luk 10:41, 42.

Jisas i no minim se Mata i no intres long ol samting long saed blong spirit. Nogat. Hem i save se Mata i fasgud long God.a Yumi save sua se Mata i onagud long God; hemia fasin we i pusum hem blong invaetem Jisas i kam long haos blong hem. Be nating se i olsem, Jisas i makemaot se, from we Mata i bisi tumas long wok blong kukum kakae, hem i lego wan bigfala jans blong harem wan tijing we i kamaot stret long Pikinini blong God.

I klia se long taem ya, ol man oli jajem ol woman long saed blong ol wok long haos we oli naf blong mekem. !Be tok blong Jisas i soem se ol woman tu, olsem ol man, oli save sidaon klosap long leg blong Pikinini blong God, mo kasem ol tok blong laef! (Jon 4:​7-​15; Ol Wok 5:​14) Taswe, i moa gud sipos Mata i bin mekem smol kakae nomo, nao hem i save tekem jans ya blong sidaon long leg blong Masta, mo harem ol tok blong hem.​—Skelem wetem Matiu 6:​25.

Lesen Blong Yumi

Tede, i gat ol man mo woman tu, we oli obei long tok ya blong Jisas, blong “tekem wota ya blong laef, we i olsem presen.” (Revelesen 22:17) Lav i pusum sam long olgeta blong givim bes blong olgeta​—olsem Mata​—blong givhan long narafala brata we oli nidim samting long saed blong bodi. Oli gat ol gudfala tingting blong givhan mo oli kwik blong tekem aksin. Jeova i mekem promes se bambae hem i no save fogetem lav mo wok blong olgeta ya. (Hibrus 6:​10; 13:16) Sam narafala maet oli moa olsem Meri. Oli kwaet mo oli tingting dip long ol samting long saed blong spirit. Fasin blong olgeta blong tingbaot Tok blong God, i halpem olgeta blong stanap strong long bilif blong olgeta.​—Efesas 3:​17-​19.

Tufala defren fasin ya we ol Kristin oli soemaot, oli impoten tumas long Kristin kongregesen. Be, sipos evriwan i tingbaot ol samting long saed blong spirit olsem we oli impoten moa, oli soem se oli stap jusumaot “gudfala samting.” Nao, bambae yumi kasem blesing blong Jeova.​—Filipae 1:​9-​11.

[Futnot]