I Gat Man We i Rili Kea
PLANTE taosen man oli soemaot se oli rili kea long narafala. Olgeta ya oli gat filing mo oli no tingbaot olgeta nomo. Oli no gat tingting ya se problem we narafala i kasem hem i bisnes blong hem. Defren olgeta, oli traehad blong givhan long ol man we oli safa. Samtaem oli rere blong lego laef blong olgeta blong mekem se narafala i no safa. Fasin ya blong givhan long narafala, i wan bigfala wok, mo wok ya i kam strong moa from sam samting we man i no naf blong blokem.
Wan man we i wok blong givhan long ples we i gat trabol, i tokbaot ol samting olsem fasin griri, politik, faet, mo ol disasta. Hem i talem se, ol samting ya oli save spolem “ol beswan save mo strong tingting [we man i gat] blong finisim fasin hanggri.” Be fasin hanggri, hemia wan problem nomo long olgeta problem we ol man we oli kea oli mas finisim. I gat ol narafala trabol blong winim, olsem ol sik, fasin pua, kruked fasin, mo ol bigfala trabol we oli kamaot from faet. ?Be ol man oli stap winim ol problem ya?
Bos blong wan kampani we i givhan long ol man we oli trabol, i talem se olgeta we oli wokhad wetem “beswan save mo strong tingting” blong winim fasin hanggri mo soa, oli olsem gudfala man Sameria long pijatok blong Jisas Kraes. (Luk 10:29-37) Be, man ya i gohed blong talem se, nating sipos oli mekem plante samting, namba blong ol man we oli safa i stap gohed blong kam antap. Taswe hem i askem se: “?Bambae gudfala man Sameria i mekem wanem, sipos hem i wokbaot long sem rod evri dei, blong plante yia, mo evri wik hem i faenem wan narafala man bakegen we ol man blong stil oli kilim hem?”
I isi blong “kam taed” long fasin blong kea long narafala mo i kwik blong lego wok ya from we yu kam les long hem. Be, from we ol man oli wantem kasem gudnem, oli gohed long wok ya blong kea long narafala. (Galesia 6:9, 10) Eksampel, wan man i raet i go long Jewish Telegraph blong Engglan, mo hem i presem ol Witnes blong Jeova. Hem i se we long taem blong ol Nasi long Jemani, olgeta ya oli “givhan long plante taosen Jiu blong laef tru long taem blong rabis kalabus long Auschwitz.” Man ya i raetem se: “!Taem kakae i sot, olgeta ya oli serem bred blong olgeta wetem ol brata sista blong yumi [ol man Jyu]!” Ol Witnes oli traem bes blong olgeta blong yusum smol samting we oli gat, blong givhan long ol narafala.
I tru se, nomata hamas bred we yumi serem long ol man, hemia bambae i no naf blong finisim fulwan olgeta fasin blong safa. I no minim se ol man we oli traehad blong kea long narafala oli wok blong nating nomo. Nogat. Olgeta wok we man i mekem blong daonem fasin blong safa, oli gud tumas. Ol Witnes oli bin mekem ol man we oli kalabus wetem olgeta oli harem gud lelebet, mo biaen ol Nasi oli lus. Be, fasin blong wol we i mekem ol man oli safa, i stap yet, mo ol man we oli no kea long narafala oli plante yet. Yes, “i gat ol man we oli stap mekem i strong tumas long ol puaman, mo long ol man we oli stap long trabol. Oli stap ravem olgeta, we oli stap spolemgud olgeta, mo fasin ya nao, oli stap laef long hem.” (Ol Proveb 30:14) Ating, yu wantem save from wanem i olsem.
?From Wanem Man i Pua Mo i Harem Nogud?
Jisas Kraes i talem: “Ol puaman bambae oli stap oltaem wetem yufala. Mo sipos yufala i wantem, oltaem yufala i save mekem i gud long olgeta.” (Mak 14:7) ?Jisas i minim se fasin pua mo ol kaen trabol we i mekem ol man i harem nogud, bambae oli neva finis? ?Jisas i gat tingting olsem sam man se, fasin blong safa i wan plan we God i mekem blong givim jans long ol man we oli gat sore blong soem se oli rili kea? !Nogat! Jisas i no gat tingting ya. Hem i stap minim nomo se fasin pua bambae i stap go kasem taem we fasin blong laef long wol ya i jenis. Be, Jisas i save tu se: I no stamba tingting blong Papa blong hem long heven, blong ol trabol olsem oli stap long wol.
Jeova God i wokem graon ya olsem wan paradaes. Hem i no wokem wan ples we i fulap long fasin pua, kruked fasin, mo ol fasin we i mekem ol man oli harem nogud. Jeova i soem se hem i kea bigwan long ol man taem hem i givim ol nambawan presen blong mekem oli harem gud long laef blong olgeta. !Tingbaot, nem blong garen ya we faswan papa mama blong yumi, Adam mo Iv, tufala i stap long hem! Garen ya, oli kolem Iden, we i minim se “Haremgud.” (Jenesis 2:8, 9) Jeova i no givim ol samting we man i nidim nomo blong stap laef. Hem i no putum tufala long wan ples we i no naes nating mo we i strong blong laef long hem. Nogat. Taem Jeova i finisim olgeta wok we hem i mekem, hem i lukluk olgeta samting ya, mo hem i talem se oli “gud tumas.”—Jenesis 1:31.
Sipos i olsem, ?from wanem fasin pua, fasin blong harem nogud, mo ol narafala samting we i mekem man i safa, oli plante long wol tede? Rabis wol blong naoia i stap from we faswan papa mama blong yumi oli jusum blong agensem God. (Jenesis 3:1-5) Samting ya i stanemap wan kwestin se, i stret we God i askem ol man blong obei long hem no nogat. Ale, Jeova i letem ol pikinini blong Adam oli seraot long hem blong smoltaem mo oli fri blong mekem samting we oli wantem. Be, God i gohed yet blong tingbaot ol man mo hem i kea long wanem we i stap hapen long olgeta. Hem i wokem rod blong tekemaot ol trabol we oli bin kamaot taem ol man oli agensem hem. Mo i no longtaem, bambae Jeova i finisim fasin pua mo fasin blong harem nogud. Yes, bambae hem i finisim olgeta samting we oli mekem man i safa.—Efesas 1:8-10.
Wan Problem We Man i No Naf Blong Winim
Stat long taem we God i wokem man, i kam kasem tede, ol man oli go longwe moa long ol rul blong Jeova. (Dutronome 32:4, 5) From we ol man oli gohed blong agensem ol loa mo ol rul blong God, ale oli stap faet agensem olgeta bakegen, mo “man i rulum man blong spolem olgeta nomo.” (Eklesiastis 8:9, NW) Ol man oli traehad blong kasem wan laef we i no moa gat fasin safa. Be, ol plan ya oli foldaon from we ol man oli tingbaot olgeta nomo, mo oli no wantem obei long hae rul blong God.
I gat wan narafala problem i stap. Maet plante man oli tingting se i krangke blong talem se samting ya i wan problem. Man ya we i stamba blong fasin rebel agensem God, i gohed blong pusum ol man blong mekem nogud mo blong tingbaot olgeta nomo. Man ya hemia Devel Setan. Jisas Kraes i tokbaot hem se, hem i man we i “stap rulum wol ya.” (Jon 12:31; 14:30; 2 Korin 4:4; 1 Jon 5:19) Long revelesen we aposol Jon i kasem, hem i tokbaot Setan olsem stamba blong olgeta trabol—hem i man we “i lidim olgeta man long wol oli go krangke.”—Revelesen 12:9-12.
Nating se sam man oli rili kea long narafala man, bambae oli neva save tekemaot Devel Setan. Ol man oli no naf blong jenisim laef long wol blong naoia, we namba blong ol man we oli stap harem nogud i gohed blong kam antap. Taswe, ?i nidim wanem blong winim ol problem blong man? Rod blong winim problem ya i no jes blong gat wan man we i kea long narafala. Yumi nidim wan man we i wantem, mo we i gat paoa, blong finisim Setan mo olgeta kruked fasin blong wol.
‘Olgeta Man Long Wol Oli Mekem Samting We Yu Yu Wantem’
God i promes blong spolem ol rabis fasin blong wol ya. Hem i wantem mo hem i naf blong mekem samting ya. (Ol Sam 147:5, 6; Aesea 40:25-31) Long Baebol, profet tok blong Daniel i talem se: “God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis”—yes, blong olwe. (Daniel 2:44) Gavman ya long heven, i blong olwe, mo bambae hem i mekem i gud long olgeta man. Jisas Kraes i stap tingbaot gavman ya taem hem i tijim ol man blong hem blong prea long God se: “Letem Kingdom blong yu i kam. Mekem olgeta samting we yu yu wantem oli kamaot long wol olsem oli kamaot finis long heven.”—Matiu 6:9, 10, NW.
Bambae Jeova i ansa long prea ya, from we hem i rili kea long ol man. Profet tok blong Ol Sam 72 i talem se, God bambae i givim paoa long Pikinini blong hem, Jisas Kraes, blong karemaot fasin safa we i spolem ol puaman, olgeta we oli harem nogud, mo ol man we narafala i spolem olgeta. Bambae hem i mekem olgeta ya we oli stap sapotem hae rul blong hem, oli harem gud bakegen, blong olwe. Taswe man blong raetem Sam i singsing se: “Plis yu mekem we hem [Mesaea King blong God] i gat stret fasin taem hem i jajem olgeta we oli trabol soa, i sevem pikinini blong puaman, mo i daonem ol man we oli stap spolem ol puaman ya. . . . Hem bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”—Ol Sam 72:4, NW, 12-14.
Long wan vison, we i soemaot taem blong yumi, aposol Jon i luk wan “niufala heven wetem niufala wol.” Hemia i minim wan niufala fasin blong laef we bambae i stap long wol, we God bambae i stanemap. !Long taem ya, olgeta man we oli safa, bambae oli harem gud! Jon i gohed blong talemaot wanem we bambae Jeova i mekem. Hem i raetem se: “Nao mi harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, mo olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’ Nao Man ya we i stap sidaon long bigfala jea blong hem i talem se, ‘!Yu luk! Mi mi stap mekem olgeta samting oli kam niuwan bakegen.’ Nao hem i talem long mi bakegen se, ‘Yu raetem tok ya, from we tok blong mi i tru, mo ol man oli save bilif long hem.’ ”—Revelesen 21:1-5.
Yes, yumi save bilif long ol tok ya, from we oli tru. I no longtaem, bambae Jeova i tekemaot fasin pua, hanggri, fasin we man i mekem narafala i harem nogud, ol sik, mo olgeta narafala kruked fasin. Olsem Wajtaoa ya i soem plante taem finis, Baebol i givim fulap pruf blong soemaot se yumi stap long taem ya we olgeta promes ya bambae oli kamtru. !Niufala wol we God i promes long hem, i klosap! (2 Pita 3:13) I no longtaem, Jeova bambae ‘i mekem we ded i go lus olgeta,’ mo bambae “hem i ravemaot wota blong ae” blong olgeta man.—Aesea 25:8.
Go kasem taem ya, yumi glad blong save se naoia tu, i gat sam man we oli rili kea long ol narafala. Be wan samting we i mekem yumi harem glad moa, i blong save se Jeova God i rili kea. I no longtaem, bambae hem i finisim olgeta fasin we i mekem ol man oli harem nogud, mo fasin blong safa.
Yumi save trastem ol promes blong Jeova fulwan. I sua se man blong hem Josua, i trastem hem. Wetem ful tras hem i talem long ol man blong God blong bifo, se: “Yufala evriwan i savegud long tingting blong yufala we Hae God ya i givim ol gudgudfala samting ya long yumi, stret olsem we hem i promes bifo finis. Olgeta promes ya blong hem, hem i mekem oli kamtru evriwan, i no gat wan promes nating i stap we i no kamtru.” (Josua 23:14) Taswe long taem we rabis fasin blong wol ya i stap yet, yumi no mas letem ol traem we yumi stap fesem oli mekem yumi harem nogud tumas. Yumi mas putum ol wari blong yumi long han blong Jeova, from we hem i rili kea long yumi.—1 Pita 5:7.
[Tok Blong Pija Long Pej 7]
Long niufala wol God i promes blong mekem, bambae i no moa gat fasin pua, fasin blong harem nogud, ol sik, mo kruked fasin