?From Wanem Yu Mas Holem Promes Blong Yu?

“VOT long man we i no promes blong mekem plante samting, long rod ya bambae yu no harem nogud long plante samting.” Hemia toktok we laswan advaesa blong presiden blong Amerika, Bernard Baruch, i talem. Long wol tede i luk olsem se ol promes we man i mekem oli blong brekem nomo. Maet oli ol promes blong mared, ol kontrak long saed blong bisnes, no ol promes blong spenem moa taem wetem pikinini. Plante man oli no moa tingbaot mining blong olfala tok ya se: “Yumi jajem man long fasin blong hem blong holem promes blong hem.”

I tru se, plante man oli no gat tingting ya blong holem promes blong olgeta. Sam narafala oli kwik blong mekem ol promes we oli no naf blong holem, no oli brekem promes blong olgeta jes from we i isi moa blong mekem olsem.

I klia se, maet i hadwok blong holem wan promes sipos sam samting we yumi no bin tingbaot fastaem, oli hapen long laef blong yumi. ?Be yumi rili spolem man taem yumi no holem wan promes blong yumi? ?Yumi mas tinghevi long ol promes we yumi mekem? Eksampel blong Jeova i save givhan long yumi blong luksave from wanem i gud blong tinghevi long bisnes ya.

Jeova i Mekem Ol Promes Blong Hem Oli Kamtru

Yumi wosipim wan God we nem blong hem i joen wetem fasin blong mekem ol promes blong hem oli kamtru. Long taem blong Baebol, plante taem, ol nem we oli putum long man oli talem se man ya i olsem wanem. Samting ya i tru tu long saed blong nem ya Jeova, we i minim “Hem i Mekem i Kamaot.” Taswe nem blong God i minim se God bambae i mekem ol promes mo ol stamba tingting blong hem oli kamtru.

Olsem mining blong nem ya i soem, Jeova i holem evri promes we hem i mekem long nesen blong Isrel bifo. Long saed blong ol promes ya, King Solomon i talem se: “Yumi evriwan ya, yumi man blong Hae God. Yumi presem hem, from we hem i bin mekem we yumi gat pis, olsem we hem i bin promes blong mekem. Olgeta gudgudfala promes ya blong hem we i bin givim long Moses, man blong wok blong hem bifo, blong i talemaot long ol bubu blong yumi, hem i holem olgeta, we hem i no mestem wan blong olgeta nating.”​—1 King 8:​56.

From we yumi save trastem Jeova, aposol Pol i save talem se: “Taem God i mekem promes long Ebraham bifo, hem i yusum nem blong hem nomo blong mekem tok ya blong hem i strong, from we i no gat man i hae moa long hem.” (Hibrus 6:​13) Yes, Jeova hem wan mo nem blong hem oli olsem wan sua promes we bambae hem i mekem olgeta promes blong hem oli kamtru, nating se hem i mas pem bigfala praes from. (Rom 8:​32) From we Jeova i mekem ol promes blong hem oli kamtru, hemia i givim wan hop long yumi we i olsem wan angka blong holem laef blong yumi.​—Hibrus 6:​19.

Ol Promes Blong Jeova Mo Fiuja Blong Yumi

Hop blong yumi, bilif blong yumi, mo laef blong yumi i dipen long ol promes we bambae Jeova i mekem oli kamtru. ?Wanem hop we yumi laekem tumas? “God i promes finis blong putum niufala skae mo niufala wol, we stret fasin nomo i stap long hem. Mo yumi stap wet long ol samting ya blong oli kamtru.” (2 Pita 3:​13) Baebol i givim wan risen blong bilif se “God bambae i mekem olgeta man we oli ded oli laef bakegen, ol man we oli stret, wetem ol man we oli no stret.” (Ol Wok 24:15) Mo yumi sua se i gat sam samting moa i bitim laef blong yumi naoia. Yes, samting ya we aposol Jon i kolem “samting we Kraes i promes blong givim,” hemia “laef ya we i no save finis.” (1 Jon 2:​25) Be ol promes blong Jeova, we oli stap long Tok blong hem, oli no blong fiuja nomo. Oli givim mining long laef blong yumi long taem blong naoia tu.

Man blong raetem Sam i singsing se: “Oltaem [Jeova] i stap klosap long olgeta we oli stap krae i go long hem, . . . oltaem hem i stap harem krae blong olgeta.” (Ol Sam 145:18, 19) Mo tu, God i promes se “olgeta we oli taed, hem i stap givim paoa long olgeta, mo olgeta we oli no strong, hem i stap mekem olgeta oli strong bakegen.” (Aesea 40:29) Mo yumi haremgud tumas blong save se ‘God i no save letem wan samting i traem yumi, we i strong tumas long yumi. Be stret long taem ya we samting olsem i traem yumi, hem bambae i mekem rod blong yumi, blong yumi winim samting ya’! (1 Korin 10:13) Sipos yumi luk se promes ya i kamtru finis long laef blong yumi, yumi save sua se Jeova i wan God we yumi save trastem hem fulwan. Taem yumi tingbaot ol blesing we yumi kasem from olgeta promes we God i mekem mo i holem, ?wanem tingting blong yumi long saed blong ol promes we yumi mekem long hem?

Holem Ol Promes We Yumi Mekem Long God

Taem yumi givim laef blong yumi i go long Jeova, hemia wan promes we i impoten i bitim ol narafala promes. Taem yumi mekem promes ya, yumi soemaot se yumi wantem mekem wok blong Jeova blong olwe. I tru se ol loa blong God oli no strong tumas. Be, from we yumi stap long rabis wol ya, maet i no isi blong mekem ol samting we hem i wantem, oltaem. (2 Timoti 3:​12; 1 Jon 5⁠:3) Be taem yumi “holem stia blong bot” mo yumi givim laef blong yumi long Jeova mo kam ol disaepol blong Pikinini blong hem, Jisas Kraes, yumi no mas luklukbak long ol samting blong wol we yumi lego finis.​—Luk 9:​62.

Taem yumi prea long Jeova, maet tingting i pusum yumi blong promes se bambae yumi traehad blong winim wan slak fasin, no blong wokem wan gudfala Kristin fasin, no blong kamgud moa long wan tiokratik wok. ?Be wanem samting bambae i givhan long yumi blong holem promes ya?​—Skelem wetem Prija 5:​2-5.

Ol trufala promes oli kamaot long hat mo tingting blong yumi. Taswe, blong pruvum se ol promes blong yumi long Jeova oli sua, yumi mas prea wetem fulhat blong yumi. Yumi mas talemaot long hem, olgeta samting we oli mekem yumi fraet, olgeta samting we yumi wantem, wetem olgeta slak fasin blong yumi. Taem yumi prea from wan promes, samting ya bambae i mekem tingting blong yumi i strong moa blong holem promes ya. Yumi save tingbaot ol promes blong yumi long God olsem ol kaon. I tektaem blong pembak ol kaon we oli bigwan. Long sem fasin, ol promes we yumi mekem long Jeova, bambae oli tektaem blong yumi mekem. Be taem yumi traehad oltaem blong mekem samting we yumi naf blong mekem blong Jeova, yumi soemaot se yumi wantem holem promes blong yumi, mo bambae Jeova i blesem yumi from.

Yumi save soemaot we yumi tinghevi long ol promes blong yumi, taem yumi prea from ol promes ya oltaem, maet evri dei. Samting ya bambae i soemaot long Papa blong yumi long heven, se yumi rili wantem holem promes blong yumi. Mo tu, fasin ya bambae i mekem yumi rimemba long promes ya we yumi bin mekem. Deved i soem wan gudfala eksampel long yumi long saed ya. Long wan singsing, hem i askem strong long Jeova se: “God. Plis yu harem krae blong mi, yu lesin long prea blong mi. . . . Evri dei, bambae mi stap givim ol samting ya long yu we mi promes blong givim, mo oltaem, bambae mi sing blong presem yu.”​—Ol Sam 61:​1, 8.

Taem Yu Holem Promes Narafala i Trastem Yu

Sipos yumi mas tinghevi long ol promes we yumi mekem long Jeova, ale, yumi mas tinghevi tu long ol promes we yumi mekem long ol Kristin brata blong yumi. Yumi no mas mekem olsem long Jeova mo mekem i narafala long ol brata blong yumi. (Skelem wetem 1 Jon 4:​20.) Long Bigfala Toktok blong Jisas antap long Hil, hem i talem se: “Sipos yu talem se ‘Yes,’ yu mas talem ‘Yes’ nomo. Mo sipos yu talem se ‘No,’ yu mas talem ‘No’ nomo.” (Matiu 5:​37) Taem yumi meksua se ol man bambae oli save trastem tok blong yumi, i olsem we yumi stap “mekem i gud . . . long olgeta ya we oli brata mo sista blong yumi from we olgeta tu oli bilif long Kraes.” (Galesia 6:​10) Evri promes we yumi holem, i mekem man i trastem yumi moa.

Trabol we i kamaot from we yumi no holem promes blong yumi i kam bigwan moa, taem hem i wan bisnes long saed blong mane. Nating se i blong pembak wan kaon, mekem wan wok, no fulumap wan kontrak long saed blong bisnes, wan Kristin i mas holem promes blong hem. God i glad long fasin ya. Mo tu, fasin ya i mekem se ol brata oli trastem olgeta, hemia i impoten tumas blong mekem se “ol man blong God oli stap wanples, we oli gat wan tingting nomo.”​—Ol Sam 133:1.

Taem yumi no folemgud olgeta toktok blong wan kontrak, samting ya i save spolem kongregesena mo olgeta insaed long kontrak ya tu. Wan seket elda i talem se: “Plante taem ol rao long saed blong bisnes oli kamaot from we wan, no moa man, we oli joen long bisnes ya, oli ting se narafala i no bin folemgud olgeta toktok blong kontrak ya. From samting ya, plante brata we oli gat save long bisnes ya oli seraot, mo wan nogud filing i save stap bitwin ol man insaed long Haos Kingdom.” Taswe, i impoten tumas blong tingting gud bifo we yu agri long wan kontrak. !Mo i impoten blong raetem ol poen we i stap insaed long kontrak ya, i go long pepa!b

Yumi mas lukaot tu, taem yumi salem sam samting we oli sas tumas, no taem yumi pulum narafala blong putum mane insaed long wan bisnes, antap moa, sipos yumi wan i win smol long bisnes ya. Mo taem yumi tokbaot ol gudfala risal we yumi kasem from wan samting no wan meresin, yumi no mas bitim mak. I nogud blong promes long man se, sipos hem i putum mane long wan bisnes, bambae hem i win bitim mak. Ol Kristin we oli gat lav bambae oli talemaot klia ol denja we oli stap insaed long ol bisnes olsem. (Rom 12:10) From we bighaf blong ol brata oli no gat tumas ekspiryens long saed blong bisnes, bambae oli trastem advaes blong yumi from we oli gat sem bilif olsem yumi. !Sore tumas sipos yumi daonem tras blong olgeta!

Yumi ol Kristin, yumi no save yusum ol kruked fasin blong mekem bisnes, mo yumi no mas ting nating long ol samting we narafala i laekem. (Efesas 2:​2, 3; Hibrus 13:18) Sipos yumi wantem se Jeova i glad long yumi olsem ‘man we i stret blong go long Haos Tapolen blong hem,’ yumi mas man we ol narafala oli save trastem. ‘Oltaem yumi stap mekem ol samting we yumi promes blong mekem, nating we i had tumas long yumi.’​—Ol Sam 15:​1, 4.

Jaj Jeftaha blong Isrel, i promes se, sipos God i halpem hem blong winim faet agensem ol man Amon, bambae hem i givim faswan man we i kamaot long haos blong mitim hem, afta we hem i kambak long faet ya, man ya i go olsem wan sakrefaes long Jeova. Faswan man we i kamaot long haos, hemia pikinini gel blong Jeftaha, wan nomo we hem i gat. Nating se i olsem, Jeftaha i no brekem promes blong hem. Dota blong hem i agri long disisen ya wetem fulhat blong hem. Nao, Jeftaha i givim hem i go blong wok long haos prea blong God long ful laef blong hem​—hemia wan sakrefaes we i sas tumas mo we maet i mekem hem i harem nogud bigwan.​—Jajes 11:30-​40.

Ol Kristin elda oli gat responsabiliti blong holem tok we oli agri long hem. Olsem 1 Timoti 3:2 i talem, wan elda i mas “man we i no gat rabis poen long hem nating.” Hemia i kamaot long wan Grik tok we i minim se man i “no save pulum hem blong mekem rong, no gat poen, no gat doti long nem blong hem.” Hem “i no minim we man ya i gat wan gudnem nomo, be fasin blong hem i mekem se hem i gat raet blong holem gudfala nem ya.” (A Linguistic Key to the Greek New Testament) From we wan elda i no mas gat poen agens long hem, hem i mas holem ol promes blong hem.

Sam Narafala Rod Blong Holem Promes Blong Yumi

?Wanem tingting blong yumi long saed blong ol promes we yumi mekem long olgeta we oli no Kristin brata blong yumi? Jisas i talem se: “Letem laet ya i saenaot i kasem ol man, blong oli save luk ol gudgudfala wok we yufala i stap mekem. Nao bambae olgeta oli save leftemap nem blong Papa blong yufala, we i stap long heven.” (Matiu 5:​16) Taem yumi holem promes blong yumi, maet yumi save pulum narafala blong intres long Kristin mesej blong yumi. Nating se tede, i no moa gat fulap man we oli holem promes blong olgeta, be plante long olgeta oli tinghae yet long fasin ya. Taem yumi holem promes blong yumi, hemia wan rod blong soemaot lav long God mo ol man raonabaot yumi. Mo hem i wan rod tu, blong pulum ol man we oli laekem stret fasin.​—Matiu 22:36-​39; Rom 15:2.

Long 1998 sevis yia, ol Witnes blong Jeova oli spenem bitim wan bilyan aoa blong talemaot gud nius blong Kingdom blong God long olgeta man. (Matiu 24:14) Maet sam man oli no bin wantem lesin long mesej ya from we yumi no bin holem promes blong yumi taem yumi mekem bisnes, no long sam narafala samting bakegen. From we yumi wok long nem blong God blong trutok, i stret nomo we ol man oli luk yumi olsem ol man blong holem promes. Taem yumi mekem se ol man oli save trastem yumi mo yumi no man blong giaman, yumi “leftemap tok blong God ya we i sevem yumi, long fes blong ol man.”​—Taetas 2:​10.

Long wok blong prij, yumi save holem promes blong yumi taem yumi gobak long ol man we oli intres long mesej blong Kingdom. Sipos yumi talem se bambae yumi kambak, yumi mas kambak. Taem yumi go luk bakegen olsem we yumi promes, yumi stap ‘mekem i gud long man, stret olsem we hem i wantem.’ (Ol Proveb 3:​27) Wan sista i tokbaot samting ya olsem: “Plante taem, mi mitim ol man we oli intres mo we oli talem se wan Witnes i bin promes blong visitim olgeta bakegen, be hem i no mekem. I tru se, samtaem maet ol man ya oli no stap taem Witnes ya i kambak no maet i gat sam samting we i blokem Witnes ya blong gobak. Be mi mi no wantem se wan man i talem samting ya long saed blong mi. Taswe, mi traehad blong faenem man ya bakegen. Mi tingting se, sipos mi no holem promes blong mi, samting ya bambae i sakem doti long nem blong Jeova mo long olgeta brata sista blong mi.”

Samtaem, maet yumi no wantem gobak long man from we yumi ting se hem i no rili intres. Sista ya we yumi tokbaot antap, i gohed blong talem se: “Mi no traem blong jajem man se hem i rili intres no nogat. Ekspiryens blong mi i tijim mi se, fastaem we yumi mitim wan man, i hadwok blong luksave sipos hem i rili intres no nogat. Taswe mi traehad blong gat wan gudfala tingting, mi tingbaot ol wanwan man olsem we oli save kam brata no sista blong mi.”

Long Kristin wok mo long plante narafala samting blong laef, yumi mas soemaot se man i save trastem promes blong yumi. I tru, i isi blong talem wan tok, be i no isi blong holem tok ya. Waes man ya i talem se: “Ol man oli stap talem se tingting blong olgeta bambae i stap strong oltaem long ol fren blong olgeta, be sipos yu traem lukaot man olsem, bambae yu no save faenem” (Ol Proveb 20:6) Wetem strong tingting, yumi save stap tru mo holem promes blong yumi.

Ol Sas Blesing We God i Givim

I no stret blong mekem wan promes we yumi no gat tingting blong holem, i olsem we yumi raetem wan jek, be mane i no stap long bang. !Taem yumi holem promes blong yumi, tingbaot gudfala frut mo blesing we bambae yumi kasem from! Wan blesing we i kamaot taem narafala i save trastem yumi, hemia se tingting blong yumi bambae i no stap jajem yumi. (Skelem wetem Ol Wok 24:16.) Mo from we tingting blong yumi i no stap jajem yumi oltaem, yumi haremgud, yumi glad, mo yumi stap long pis. Antap long samting ya, taem yumi holem promes blong yumi, yumi givhan long kongregesen. Yes, fasin joengud i dipen long fasin blong yumi blong trastem yumi. Mo tu, taem yumi “stap talemaot trutok,” yumi soemaot se yumi man blong wok blong God ya blong trutok.​—2 Korin 6:3, 4, 7.

Jeova i mekem olgeta tok blong hem oli kamtru, mo hem i no laekem nating “fasin blong giaman.” (Ol Proveb 6:​16, 17) Taem yumi folem Papa blong yumi long heven, bambae yumi kam klosap moa long hem. Taswe, i klia se, yumi gat gudfala risen blong holem ol promes blong yumi.

[Ol futnot]

[Tok Blong Pija Long Pej 10]

Jeftaha i holem promes blong hem, nating se long rod ya hem i mekem i had long hem wan

[Tok Blong Pija Long Pej 11]

Sipos yu promes blong kambak, yu mas reregud blong mekem olsem