Hem i Givhan Blong Mekem Laet i Kasem Ol “Laswan Ples Blong Wol”
APOSOL Pol i mekem se laet long saed blong spirit i go kasem “ol laswan ples blong wol.” From samting ya, plante man “we oli stret blong kasem laef blong olwe, oli bilif.”—Ol Wok 13:47, 48, NW; Aesea 49:6.
Laef blong William Lloyd Barry, wan memba blong Hed Kampani blong ol Witnes blong Jeova, i soemaot klia se, hem tu, i wantem tumas blong mekem laet long saed blong spirit i kasem plante ples. Brata Barry i givim laef blong hem i go fulwan long wok blong God nomo, mo hem i wan Kristin we i traehad oltaem. Brata Barry i ded long Julae 2, 1999, taem hem i givim wan tok long Distrik Asembli long Hawai.
Lloyd Barry i bon long Niusilan long Desemba 20, 1916. Bifo we hem i bon, papa mo mama blong hem tufala i soem intres long trutok blong Baebol, we i stap insaed long ol buk blong C. T. Russell, we Watch Tower Bible and Tract Society i bin prentem. From samting ya, Brata Barry i gruap long wan Kristin famle we i stap ona gud long God.
Brata Barry i laekem spot mo edukesen, mekem se hem i kasem wan stefeket long sayens. Be, hem i no lusum bigfala intres we hem i gat long ol samting long saed blong spirit. Taswe, long Janewari 1, 1939, hem i stat blong mekem wok blong God fultaem. Hem i kam wan memba blong famle blong Betel, long branj ofis blong Sosaeti long Ostrelia. Taem gavman i putum tabu long wok blong Sosaeti long 1941, Brata Barry i stap bisi long ol wok blong ofis. Samtaem, wok blong hem i blong raetem sam atikol blong leftemap tingting blong ol brata. Mo tu, hem i soem gudfala eksampel long saed blong wok blong prij.
Long Febuwari 1942, Brata Barry i mared long wan sista we i mekem wok blong God fultaem. Long olgeta yia we oli pas, gudfala waef blong hem, Melba, i wok klosap long hem oltaem, long plante ples blong wol. Tufala i wantem mekem wok long ol narafala kantri, taswe tufala i joen long namba 11 klas blong Wajtaoa Baebol skul blong Gilead, long Yunaeted Stet. Kantri we oli sanem tufala blong wok long hem, ating i wan ples we plante man oli save talem se hem i stap long “ol laswan ples blong wol”—hemia Japan. Afta we tufala i kasem Japan, long Novemba 1949, tufala i statem misinari wok long taon blong Kobe, we i stap long wan haba. Long taem ya, i gat 12 man nomo we oli stap talemaot gud nius long Japan. Brata Barry i lanem lanwis mo ol fasin blong laef blong niufala ples ya we hem i stap long hem. Hem i wok wetem ol man Japan blong 25 yia. Mo long olgeta taem ya, lav blong hem long ol man ya i gru moa. Hem i soemaot klia se hem i laekem olgeta “we oli stret blong kasem laef blong olwe.” Mo long Japan, namba blong olgeta ya i kam antap bigwan. From fasin lav we Brata Barry i gat, hem i naf blong lukaot gud long branj ofis blong bitim 20 yia.
Long medel blong yia 1975, taem i gat 30,000 Witnes long Japan, Lloyd mo Melba tufala i muf i go long Bruklin, long Niu Yok. Tabu spirit i makemaot Brata Barry. Taswe, oli askem hem blong wok olsem wan memba blong Hed Kampani blong ol Witnes blong Jeova. (Rom 8:16, 17) Brata Barry i gat save finis long wok blong raetem ol atikol. Samting ya i givhan bigwan long niufala wok we hem i kasem long Raeting Dipatmen. Mo tu, hem i kam memba blong Pablising Komiti. Ekspiryens we hem i kasem blong wok long wan narafala kantri mo long ol wok blong branj ofis, i rerem hem blong mekem gudfala wok long komiti ya blong Hed Kampani.
Long ol yia we oli pas, lav we Brata Barry i gat long ol Kantri blong Is mo long ol man we oli stap long ol kantri ya, i neva lus. Ol studen blong Gilead Skul mo ol memba blong famle blong Betel, oli save se oltaem long ol tok blong hem, i gat ol gudfala stori long saed blong ol misinari, we i makemgud tingting blong olgeta we oli lesin. Yes, taem Brata Barry i glad tumas blong talem ol ekspiryens blong hem, i isi moa blong kasem save se wok blong talemaot Kingdom long “laswan ples blong wol” i kamtru. Sam long ol ekspiryens ya, oli stap long Wajtaoa blong Septemba 15, 1960 (Engglis).
Yumi sua se, olsem wan man we i ‘joen long Kraes,’ Brata Barry bambae i gohed blong soem intres long olgeta “we oli stret blong kasem laef blong olwe.” I tru se, olgeta we oli save hem mo oli laekem hem, bambae oli mestem hem bigwan, from we hem i bin strong long saed blong spirit mo hem i mekem wok blong Jeova wetem ful paoa blong hem. Mo tu, hem i soem bigfala lav long ol man blong God. Be, yumi glad from we Brata Barry i stanap strong long God, go kasem en blong laef blong hem long wol ya.—Revelesen 2:10.
[Tok Blong Pija Long Pej 16]
Lloyd Barry mo John Barr long 1988, taem buk ya “Insight on the Scriptures” i kamaot
[Tok Blong Pija Long Pej 16]
Ol misinari blong namba 11 klas blong Gilead, taem oli kam wanples bakegen long Japan, 40 yia biaen