!Rere From Mileniam Ya We i Impoten Moa!
TAOSEN Yia Rul blong Kraes bambae i karem bigfala blesing i kam long ol man. Aninit long rul blong Jisas we i gat lav, ol man bambae oli kamaot long nogud fasin blong naoia mo kasem nambawan laef ya we i stretgud olgeta. Tingbaot laef blong yu long taem ya. !Wan helt we i nambawan! Evri moning bambae yu wekap we yu harem gud moa i bitim dei bifo. Tede, plante milyan man, woman mo pikinini oli stap lukluk i go long fiuja, blong laef long hapi taem ya. Oli sua long samting ya, mo oli stap prea from. Baebol stadi blong olgeta i mekem oli bilif se bambae oli haremgud long ol blesing ya.
Be, bifo we Jisas i statem Taosen Yia Rul blong hem, hem i mas spolem olgeta man long wol we oli stap agensem rul blong hem. Bambae hem i mekem samting ya long faet we Baebol i kolem Amageden. (Revelesen 16:16) Ol trufala Kristin long wol bambae oli no joen long faet ya. Hem i faet blong God. Mo faet ya bambae i no stap long wan spesel ples long wol. Baebol i talem se faet ya bambae i kasem olgeta ples long wol. Ol man we oli agensem Rul blong Kraes bambae oli lus. !I no gat wan blong olgeta we bambae i save ronwe!—Jeremaea 25:33.
Nao Jisas bambae i lukluk i go long Devel Setan mo ol rabis enjel blong hem. Traem tingbaot samting ya we man blong raetem buk blong Revelesen i luk: “Nao mi luk wan enjel [Jisas Kraes] we i aot long heven i kamdaon. Long han blong hem, hem i stap holem ki blong lokem bigfala hol ya we i godaon we i godaon olgeta, mo i stap holem wan bigfala jen. Nao hem i holem bigfala algita ya, we hemia snek ya blong bifo, we nem blong hem ‘Setan’ no ‘Man we i stap agensem man.’ Nao hem i fasem hem long jen ya blong i stap wan taosen yia.” (Revelesen 20:1, 2) Biaen, Setan mo ol rabis enjel blong hem bambae oli lus blong olwe.—Matiu 25:41.
“Wan bigfala hip blong ol man, we . . . i no gat man i save kaontem olgeta,” bambae oli sef tru long Amageden. (Revelesen 7:9) Jisas Kraes bambae i lidim olgeta i go blong oli kasem fulwan blesing long “ol springwota ya we i save givim laef,” olsem we man blong lukaot sipsip i lidim ol sipsip blong hem i go long wota we i sevem laef. (Revelesen 7:17) Setan mo ol rabis enjel blong hem bambae oli no moa stap blong blokem ol man ya blong gohed long saed blong spirit. !Ol man ya bambae oli kasem help blong oli save winim ol slak fasin blong olgeta gogo oli kam stretgud olgeta!
Aninit long rul blong Kraes, fasin blong laef bambae i kamgud moa. Jeova God bambae i yusum Jisas Kraes blong finisim olgeta samting we oli mekem ol man oli safa mo oli harem nogud. “Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem.” (Revelesen 21:4) Profet Aesea i tokbaot sam moa blesing, hem i se: “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from.” (Aesea 35:5, 6) !Mo ol dedman, olgeta we “oli haeman wetem olgeta we oli no gat nem,” bambae oli laef bakegen wetem jans blong neva ded samtaem!—Revelesen 20:12.
God i stat finis blong hivimap “bigfala hip blong man” ya we bambae oli sef tru long Amageden. Olgeta ya oli stat rere blong laef long Taosen Yia Rul blong Kraes. Nating se oli no save stret taem we bambae rul ya i stat, oli sua se bambae hem i stat long stret taem we God i makemaot. Yu yu save stap long medel blong olgeta, be yu tu mas rere naoia. Hemia i no min se yu mas salem olting blong yu mo muf i go long wan spesel ples long wol. No gat. Be, yu mas stadi Baebol blong kasem stret save long saed blong Jeova God mo ol stamba tingting blong hem. Ol Witnes blong Jeova oli glad blong soem long yu olsem wanem stadi blong Baebol i save givhan long yu mo famle blong yu, mo yu no pem olgeta from. Olgeta we oli prentem Wajtaoa ya, bambae oli glad blong givim moa save long yu.
[Bokis blong pija long pej 7]
Taosen Yia—?I Gat Narafala Mining No i Wan Stret Namba?
Bighaf blong buk blong Revelesen i yusum ol tok we oli pija blong narafala samting. Taswe wan kwestin i stanap: ?Olsem wanem long Taosen Yia Rul blong Kraes we Revelesen i tokbaot? ?Hem i wan stret namba, no namba ya i minim narafala samting?
I gat plante samting blong soemaot se taosen yia ya i wan stret namba. Tingbaot: Aposol Pol i tokbaot Taosen Yia Rul blong Kraes, olsem wan dei we Kraes bambae i jajem olgeta man long hem. (Ol Wok 17:31; Revelesen 20:4) Aposol Pita i raetem se, long tingting blong Jeova, wan dei (24 aoa) i olsem wan taosen yia. (2 Pita 3:8) Ol samting ya oli pruvum se jajmen “dei” ya, longfala blong hem i wan taosen yia stret. Mo tu, long Revelesen 20:3, 5-7, Baebol i no tokbaot “wan taosen yia,” be long fo defren ples hem i tokbaot “taosen yia ya” (NW). Samting ya i soemaot se, taem ya i wan stret namba blong yia.