?Lav We Yu Gat Long Tok Blong God i Bigwan Olsem Wanem?
“Mi mi laekem Loa blong yu tumas, mi stap tingting long hem i stat long moning, gogo kasem sapa.”—OL SAM 119:97.
1. ?Wanem wan rod we ol man blong God oli save folem blong soemaot se oli laekem Tok blong God?
PLANTE handred man mo woman oli gat Baebol. Be, samting ya i no minim se man we i gat Baebol hem i laekem Tok blong God. ?Wan man i save talem se hem i laekem Tok blong God, sipos hem i ridim Baebol wan wantaem nomo? !No gat! Nating se i olsem, i gat sam man we bifo oli no tinghevi long Baebol, be naoia oli ridim buk ya evri dei. Oli lanem blong laekem Tok blong God. Oli stap tingbaot Tok blong God “i stat long moning, gogo kasem sapa,” olsem man ya blong raetem Sam.—Ol Sam 119:97.
2. ?Olsem wanem wan Witnes blong Jeova i holemstrong bilif blong hem nomata se hem i fesem hadtaem?
2 Wan man olsem, we i lanem blong laekem Tok blong God, hemia Nasho Dori. Hem wetem sam narafala Kristin, oli stanap strong blong plante yia mo mekem wok blong Jeova long kantri blong olgeta Albania. Long ol yia ya, gavman i putum tabu long wok blong ol Witnes blong Jeova. Ol Kristin ya we oli holemtaet bilif blong olgeta, oli no stap kasem plante buk we oli tokbaot Baebol. Nating se i olsem, bilif blong Brata Dori i stap strong. ?Olsem wanem hem i naf blong mekem samting ya? Hem i talem se: “Mak blong mi, hemia blong ridim Baebol klosap wan aoa evri dei. Mi mekem olsem blong samwe 60 yia bifo we ae blong mi i kam nogud.” I no longtaem i pas, fulwan Baebol i kamaot long lanwis blong Albania, be bifo, taem Brata Dori i smol yet, hem i bin lanem Grik lanwis, mekem se hem i stap ridim Baebol long lanwis ya. Fasin blong ridim Baebol oltaem, i mekem Brata Dori i strong blong winim ol defren traem we hem i fesem. Sem samting i save halpem yumi tu.
Wokem Fasin Blong “Wantem Tumas” Tok Blong God
3. ?Wanem fasin we ol Kristin oli mas gat long saed blong Tok blong God?
3 Aposol Pita i raetem se: “Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas.” (1 Pita 2:2) Olsem wan bebi we i wantem tumas blong dring melek blong mama blong hem, wan Kristin we i luksave se hem i nidim kakae long saed blong spirit, hem i glad tumas blong ridim Tok blong God. ?Hemia filing blong yu? Sipos yu no harem olsemia, yu no mas letem tingting blong yu i foldaon. Yu tu, yu save wokem fasin ya blong wantem tumas Tok blong God.
4. ?I nidim wanem blong mekem se fasin ya blong ridim Baebol i gohed evri dei?
4 Blong mekem olsem, fastaem yu mas stretem yu wan blong mekem se fasin blong ridim Baebol i gohed oltaem, maet evri dei, sipos yu gat jans. (Ol Wok 17:11) Maet yu no gat jans blong spenem wan aoa evri dei blong ridim Baebol, olsem Nasho Dori i mekem. Be, i sua se yu save putum smol taem evri dei blong tingbaot wan haf blong Tok blong God. Plante Kristin oli wekap eli moning blong tingting dip long wan haf blong Baebol. Hemia wan nambawan rod blong statem dei blong yu. Samfala oli laekem moa blong ridim Baebol long en blong dei, bifo we oli go slip. Sam narafala bakegen oli ridim Baebol long eni taem long dei, we i stret long olgeta. Impoten samting hemia blong ridim Baebol evri dei. Biaen, tekem smol taem blong tingting dip long samting we yu ridim. Naoia bambae yumi tingbaot eksampel blong sam man we oli kasem blesing from fasin blong ridim mo tingting dip long Tok blong God.
Wan Man Blong Raetem Ol Sam We i Laekem Loa Blong God
5, 6. Yumi no save nem blong man ya we i raetem Sam 119, ?be, yumi save lanem wanem taem yumi ridim mo tingting dip long ol tok we hem i raetem?
5 Man blong raetem Sam namba 119 i rili gat bigfala tangkiu long Tok blong God. ?Hu i raetem Sam ya? Baebol i no givim nem blong man we i raetem Sam ya. Be, ol toktok we man ya i raetem oli givhan long yumi blong lanem sam samting long saed blong man ya. Yumi lanem se hem i kasem sam problem long laef blong hem. Sam fren blong hem, we oli man blong wosipim Jeova, oli no gat lav olsem we hem i gat long ol rul blong Baebol. Nating se i olsem, man blong raetem Sam ya i no letem fasin blong olgeta i blokem hem blong mekem samting we i stret. (Ol Sam 119:23) Sipos yu stap laef no wok wetem ol man we oli no gat respek long ol rul blong Baebol, maet bambae yu luk se i gat sam samting we oli sem mak wetem laef blong man blong raetem Sam ya.
6 Nating se man blong raetem Sam ya i wan man blong God, hem i no tinghae long hem wan. Hem i luksave se hem i stap mekem mastik tu. (Ol Sam 119:5, 6, 67) Be, hem i no letem sin i bos long hem. Hem i askem se: “Mi mi yangfala nomo. ?Bambae mi save mekem laef blong mi i klin olsem wanem?” Nao hem i ansa se: “Mi mi mas obei long ol tok blong yu.” (Ol Sam 119:9) Ale, hem i makemgud olsem wanem we Tok blong God i gat paoa blong pusum man blong mekem i gud, taem hem i talem se: “Oltaem mi stap holem ol tok blong yu long tingting blong mi, blong bambae mi no save mekem sin agens long yu.” (Ol Sam 119:11) !Tru ya, sipos Tok blong God i naf blong blokem yumi blong sin agensem God, hem i rili wan samting we i gat bigfala paoa!
7. ?From wanem ol yangfala oli mas tingbaot fasin blong ridim Baebol evri dei, olsem wan samting we oli nidim tumas?
7 I gud we ol Kristin yangfala oli tingbaot ol tok blong man blong raetem Sam ya. Tede, ol yangfala Kristin oli kasem hadtaem. Devel Setan i wantem tumas blong gat jans blong karem kruked fasin i kam long medel blong ol yangfala we oli stap wosipim Jeova. Mak blong hem, hemia blong pulum ol yangfala Kristin, blong oli letem ol samting long saed blong bodi i winim olgeta nao oli brekem loa blong God. Plante taem, ol film mo program blong televisin oli soemaot tingting blong Devel Setan. Ol man we oli plei long ol film ya oli pulum ae blong yumi mo oli gat sam fasin we i mekem yumi ting se oli ol gudfala man mo woman. Oli soemaot ol nogud fasin long saed blong seks, olsem we oli gudfala samting nomo. ?Wanem tingting i kamaot from? Hemia tingting ya se: ‘I oraet nomo sipos wan man mo woman i slip tugeta bifo mared, samting we i impoten hemia se tufala i rili lavem tufala.’ Sore tumas, evri yia plante yangfala Kristin oli foldaon long trap ya. Bilif blong samfala i olsem sip we i rek long rif. !Yes, ol traem ya oli rili givim hadtaem long ol yangfala! Be, ?yumi save talem se ol traem ya oli strong tumas long ol yangfala blong oli winim? !No gat! Jeova i givhan long ol yangfala Kristin blong winim ol tingting mo filing we oli pulum olgeta blong wantem samting we i nogud. Ol yangfala oli save faet agensem ol traem blong Setan taem oli ‘obei long ol tok blong God mo holem ol tok blong hem oli stap long tingting blong olgeta.’ ?Yu yu spenem hamas taem blong ridim Baebol mo tingting dip long hem?
8. ?Olsem wanem ol eksampel long paragraf ya oli halpem yu blong luksave se Loa blong Moses i nambawan?
8 Man blong raetem Sam namba 119 i talem se: “Mi mi laekem Loa blong yu tumas.” (Ol Sam 119:97) ?Hem i stap tokbaot wanem loa ya? Hemia ol tok we oli kamaot long Jeova, olsem Loa blong Moses. Fastaem, maet yumi ting se Loa ya i blong bifo nomo, mo maet yumi tingting se olsem wanem wan man i save laekem samting ya. Be, taem yumi tingting dip long ol defren haf blong Loa blong Moses, olsem man blong raetem Sam ya i mekem, bambae yumi luksave moa se toktok blong Loa ya i waes tumas. I tru se Loa i fulap long ol profet tok. Be hem i tokbaot plante rul long saed blong fasin blong stap klin mo wanem kakae i stret blong tekem. Ol rul ya oli givhan long man blong stap klin mo gat gudfala helt. (Levitikas 7:23, 24, 26; 11:2-8) Loa i leftemap tingting blong ol man Isrel blong oli no stilim man taem oli mekem bisnes blong winim mane. Loa i pulum olgeta blong soem sore long ol brata blong olgeta we oli pua. (Eksodas 22:26, 27; 23:6; Levitikas 19:35, 36; Dutronome 24:17-21) Taem oli jajem man oli no mas mekem i moagud long wan i bitim narawan. (Dutronome 16:19; 19:15) Man blong raetem Sam namba 119 i lanem plante samting tru long wanem we hem i kasem long laef. I sua se hem i luk ol frut we oli kamaot long laef blong man we i folem Loa blong God, nao hem i stat tinghae moa long Loa ya. Tede tu, taem ol Kristin oli folem ol rul blong Baebol mo oli luk gudfala frut long laef blong olgeta, ale, oli stat laekem mo tinghae moa long Tok blong God.
Wan Prins We i No Fraet Blong Stap Defren
9. ?Wanem tingting we King Hesekia i gat long saed blong Tok blong God?
9 Toktok blong Sam namba 119 i laenap gud wetem laef blong Hesekia taem hem i wan yangfala prins. Sam man we oli stadi long ol tok blong Baebol oli talem se Hesekia nao i bin raetem Sam ya. Yumi no sua long samting ya, be yumi save se Hesekia i gat bigfala respek long Tok blong God. Long laef blong hem, hem i soemaot se tingting blong hem i laenap wetem ol tok blong Ol Sam 119:97. Baebol i tokbaot Hesekia se: “Hem i putum tingting blong hem i stap strong long Hae God, mo oltaem nomo i stap obei long hem, mo i stap holemgud ol loa we hem i bin givim long Moses bifo.”—2 King 18:6.
10. ?Olsem wanem eksampel blong Hesekia i save givhan long ol Kristin we oli gruap long wan famle we papa mama i no obei long Jeova?
10 Stori blong Baebol i soemaot se Hesekia i gruap long wan famle we i no obei long God. Papa blong hem, King Ahas, i no gat bilif, hem i stap wosipim ol giaman god. !King ya i bonem wan long ol pikinini boe blong hem—stret brata blong Hesekia—long faea blong mekem sakrefaes i go long wan giaman god! (2 King 16:3) Nating se papa blong Hesekia i soem wan nogud eksampel, Hesekia i ‘mekem laef blong hem i klin’ taem hem i traem kasem moa save long saed blong Tok blong God mo sakemaot giaman bilif blong ol hiten man.—2 Kronikel 29:2.
11. ?Hesekia i stap luk wanem i hapen long laef blong papa blong hem we i no wosip long Jeova?
11 Taem Hesekia i stap gruap, hem i luk wetem prapa ae blong hem taem papa blong hem, we i stap wosipim ol giaman god, i rul antap long kantri. I gat ol enemi oli stap raonabaot long Juda. I gat King Resin blong Siria, we i joen wetem King Peka blong Isrel, tufala i kam blong faet agensem Jerusalem. (2 King 16:5, 6) I gat ol man Edom mo ol man Filistia, we oltaem oli kam faet agensem ol taon blong Juda, mo oli kam mekem ples blong olgeta long sam long ol taon ya. (2 Kronikel 28:16-19) ?Ahas i mekem wanem long taem blong ol trabol ya? Hem i no askem Jeova blong halpem hem blong faet agensem Siria, be hem i lukluk i go long king blong Asiria. Hem i karem gol mo silva, we sam i kamaot long haos prea blong God, mo i givim i go long king ya blong pem hem. Be samting ya i no givim pis we i stap olwe long Juda.—2 King 16:6, 8.
12. ?Hesekia i mas mekem wanem blong no mekem semfala mastik we papa blong hem i mekem?
12 Biaen, Ahas i ded mo Hesekia i kam king taem hem i gat 25 yia. (2 Kronikel 29:1) Hem i yangfala nomo, be samting ya i no blokem hem blong karem gudfala frut long wok blong hem olsem king. Hem i no folem eksampel blong papa blong hem we i no bilif long God. Hesekia i fasgud long Loa blong Jeova. From samting ya hem i obei long spesel oda ya we olgeta king oli mas folem, se: “Sipos yufala i putumap wan man blong i kam king, bambae hem i mas mekem ol pris oli raetemdaon Loa blong Hae God, wetem ol tok blong hem, blong hem i gat kopi blong buk ya we ol toktok ya i stap long hem we i blong hem nomo. Nao hem i mas holem buk ya oltaem, mo i mas ridim oltaem long laef blong hem, blong mekem we oltaem, hem i save ona long Hae God, mo i save obei long olgeta samting we i stap long buk ya.” (Dutronome 17:18, 19) Taem Hesekia i ridim Tok blong God evri dei, hem i lanem blong fraetgud long Jeova mo lukaot blong no mekem ol semfala mastik we papa blong hem i bin mekem.
13. ?Olsem wanem wan Kristin i save sua se hem i win long evri samting we hem i mekem long saed blong spirit?
13 I no ol king blong Isrel nomo we oli mas tingbaot Tok blong God oltaem. Olgeta man Isrel we oli fraetgud long God oli mas mekem samting ya tu. Faswan buk blong Sam i tokbaot ol man we oli rili hapi se oli “glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet.” (Ol Sam 1:1, 2) Man blong raetem Sam i tokbaot ol man ya se: “Oli stap win long evri samting we oli stap mekem.” (Ol Sam 1:3) Hemia i defren olgeta long man we i no gat bilif long Jeova God. Baebol i tokbaot ol man we oli no bilif, i se oli ‘man we tingting blong olgeta i hafhaf, we oltaem oli stap tingbaot blong go long tu rod.’ (Jemes 1:8) Yumi evriwan i wantem stap glad mo win long olgeta samting we yumi mekem. Yumi mas ridim Baebol evri dei, long fasin we i no olbaot, hemia wan samting we i save karem glad i kam long laef blong yumi.
Tok Blong God i Givim Paoa Long Jisas
14. ?Olsem wanem Jisas i soem se hem i laekem Tok blong God?
14 Wan taem, papa mama blong Jisas i faenem hem i stap sidaon long medel blong ol tija long haos prea blong Jerusalem. !Ol tija ya blong Loa blong God, “oli sapraes tumas long save blong hem, mo long ol ansa blong hem”! (Luk 2:46, 47) Hemia taem we Jisas i gat 12 yia. Yes, nating se hem i smol yet, hem i laekem tumas Tok blong God. Biaen, Jisas i yusum Baebol blong sakemaot ol tok blong Devel Setan, hem i se: “Man i no save laef long kakae nomo. Evri tok we God i talem, hemia nao samting blong mekem man i laef.” (Matiu 4:3-10) Smoltaem afta long samting ya, Jisas i yusum Baebol bakegen taem hem i prij long ol man we oli stap long vilej blong hem long Nasaret.—Luk 4:16-21.
15. ?Olsem wanem Jisas i soem eksampel taem hem i prij long ol narafala?
15 Jisas i yusum Tok blong God plante taem blong sapotem ol tijing blong hem. Ol man we oli lesin long hem oli “sapraes tumas long tok blong hem.” (Matiu 7:28) !Yes, i mas olsem, from we olgeta tijing blong Jisas oli kamaot long Jeova God hem wan! Jisas i talem se: “Ol tok ya we mi stap tijim ol man long hem, oli no blong mi nomo, oli kamaot long God we i sanem mi mi kam. Man we i stap talem ol tok we i kamaot long hem nomo, hem i stap traem pulum ol man blong oli leftemap nem blong hem nomo. Be man we i wantem pulum ol man blong oli leftemap nem blong man we i sanem hem i kam, hem i man blong talem trutok, hem i no man blong giaman.”—Jon 7:16, 18.
16. ?Wanem i soemaot se Jisas i laekem tumas Tok blong God?
16 Defren olgeta long man ya we i raetem Sam namba 119, Jisas “i no man blong giaman.” Hem i no gat sin, hem i Pikinini blong God, we i “mekem tingting blong hem i stap daon blong i obei long God gogo i ded.” (Filipae 2:8; Hibrus 7:26) Nating se Jisas i stret gud olgeta, hem i stadi mo i obei long Loa blong God. Hemia wan long ol stamba samting we i mekem hem i naf blong fasgud long God oltaem. Taem Pita i yusum wan naef blong faet blong traem blokem ol man we oli kam blong holem Jisas, Jisas i blokem aposol ya mo i askem se: “?Yufala i ting se mi no save singaot long Papa blong mi blong i givhan long mi? Sipos mi singaot long hem, wantaem nomo bambae hem i sanem ol enjel, we oli moa long twelef kampani blong ol soldia, blong oli kam lukaot long mi.” (Matiu 26:53, 54) Yes, long tingting blong Jisas, i moa impoten blong mekem ol tok blong Baebol oli kamtru i bitim we hem i ronwe long fasin blong safa mo ded. !Hem i rili soemaot se hem i laekem tumas Tok blong God!
Sam Narafala Man We Oli Folem Fasin Blong Kraes
17. ?Tok blong God i impoten olsem wanem long aposol Pol?
17 Aposol Pol i raet i go long ol Kristin brata blong hem i se: “Yufala i mas folem fasin blong mi, olsem we mi mi stap folem fasin blong Kraes.” (1 Korin 11:1) Pol i wokem wan fasin we i sem mak long Masta blong hem, hemia fasin blong laekem Baebol tumas. Pol i talem se: “Lav we mi gat long Loa blong God i stap dip insaed long mi.” (Rom 7:22, The Jerusalem Bible) Plante taem, Pol i yusum Tok blong God blong sapotem samting we hem i talem. (Ol Wok 13:32-41; 17:2, 3; 28:23) Long ol laswan tok we Pol i raetem i go long Timoti, man ya we i joen wetem hem long minista wok blong hem, Pol i mekem i klia se Tok blong God i impoten long evri dei laef blong wan ‘man blong God.’—2 Timoti 3:15-17.
18. Talem eksampel blong wan man, long taem blong yumi, we i soem respek long Tok blong God.
18 Plante long ol man blong Jeova we oli holemstrong long bilif blong olgeta tede, oli wokem sem kaen lav ya we Jisas i gat long Tok blong God. Long stat blong ol yia 19 handred, wan yangfala man i kasem wan Baebol we wan fren blong hem i sanem i kam long hem. Man ya i talem filing blong hem taem hem i kasem presen ya we i sas tumas: “Long taem ya, mi mekem disisen se, long ful laef blong mi bambae mi mas ridim wan haf blong Baebol evri dei.” Yangfala man ya hem i Frederick Franz. Lav we hem i gat long Baebol i mekem se hem i gohed longtaem long wok blong Jeova mo i karem plante frut long laef blong hem. Ol man oli stap tingbaot hem yet tede olsem wan man we i naf blong talem baehat sam japta blong Baebol.
19. ?Olsem wanem samfala oli traehad blong folem Baebol riding blong Tiokratik Ministri Skul?
19 Ol Witnes blong Jeova oli tinghevi long fasin blong ridim Baebol oltaem. Evri wik, taem oli rerem wan long ol Kristin miting blong olgeta, hemia Tiokratik Ministri Skul, oli ridim sam japta blong Baebol. Long miting ya, oli tokbaot sam impoten poen we i kamaot long ol japta ya. Sam Witnes oli luk se i moagud sipos oli seraotem ol japta ya blong Baebol riding i go long seven smosmol haf we oli save ridim evri dei blong wik. Taem oli ridim ol haf ya, oli tingting gud long samting we oli stap ridim. Sipos oli gat jans, oli yusum sam narafala buk we oli eksplenem Baebol, blong mekem dip stadi long sam long ol vas we oli ridim.
20. ?Yumi nidim wanem blong faenem taem blong ridim Baebol oltaem?
20 Maet yu nidim blong ‘pemaot taem’ we yu yusum blong sam narafala samting, blong bambae yu save ridim Baebol evri dei. (Efesas 5:16) Ol blesing we yu save kasem bambae oli bigwan moa i bitim olgeta samting we yu lego blong mekem olsem. Taem yu lan blong ridim Baebol evri dei, lav we yu gat long Tok blong God bambae i gru. I no longtaem bambae yu talem sem tok ya we man blong raetem Sam i talem se: “Mi mi laekem Loa blong yu tumas, mi stap tingting long hem i stat long moning, gogo kasem sapa.” (Ol Sam 119:97) Gudfala fasin ya bambae i karem plante blesing naoia mo long fiuja, olsem nekis stadi bambae i soemaot.
?Yu Yu Tingbaot?
◻ ?Olsem wanem man blong raetem Sam namba 119 i soemaot se hem i laekem tumas Tok blong God?
◻ ?Wanem lesen we yumi kasem long eksampel blong Jisas mo Pol?
◻ ?Olsem wanem yumi wanwan i save gru moa blong laekem Tok blong God?
[Tok Blong Pija Long Pej 10]
Ol king we oli holem bilif oli mas ridim Tok blong God oltaem. ?Yu yu mekem olsem?
[Tok Blong Pija Long Pej 12]
Taem Jisas i smol yet, hem i laekem tumas Tok blong God