Blesing From Fasin Blong Laekem Tok Blong God
“Sipos yu laekem [waestok], hem bambae i holem yu yu stap gud oltaem. . . . Sipos yu holemtaet hem, bambae hem i save mekem ol man oli ona gud long yu.”—OL PROVEB 4:6, 8.
1. ?Man we i rili laekem Tok blong God bambae i mekem wanem?
FASIN blong ridim Baebol hem i impoten tumas long ol Kristin. Be, ridim Baebol nomo i no soemaot se yumi laekem Tok blong God. ?Olsem wanem sipos wan man i ridim Baebol be biaen i mekem samting we Baebol i agensem? I klia se man olsem i no gat lav long Tok blong God olsem man ya we i raetem Sam 119. Lav ya we hem i gat long Tok blong God i pulum hem blong laef folem samting we Tok ya i talem.—Ol Sam 119:97, 101, 105.
2. ?Wanem blesing i kamaot long waes we i stanap long Tok blong God?
2 Blong laef folem samting we Tok blong God i talem, wan man i mas stretem tingting mo fasin blong laef blong hem oltaem. Fasin ya i soemaot waes we i kamaot long God. Hem i minim se yumi stap yusumgud save we yumi lanem tru long stadi blong Baebol mo ol samting we yumi kasem save long hem. “Sipos yu laekem [waestok], hem bambae i holem yu yu stap gud oltaem. Sipos yu laekem waestok ya, bambae hem i save leftemap yu, we nem blong yu bambae i go antap. Sipos yu holemtaet hem, bambae hem i save mekem ol man oli ona gud long yu. Nao hem bambae i kam olsem ol gudfala flaoa ya, we ol man oli hangem long nek blong yu blong ona long yu. Bambae hem i kam olsem wan gudfala samting blong flasem hed blong yu, olsem hat blong king we i saen we i saen.” (Ol Proveb 4:6, 8, 9) !Hemia wan nambawan tok blong leftemap tingting blong yumi blong laekem Tok blong God mo letem hem i lidim yumi! Ating yumi evriwan i laekem blong sefgud, yumi laekem we narafala i leftemap yumi mo i ona long yumi.
Stapgud We Trabol i No Spolem Yumi Olwe
3. ?From wanem ol Kristin oli nidim samting blong givhan long olgeta, naoia moa bitim bifo, mo oli mas lukaot long hu?
3 ?Olsem wanem waes ya we man i kasem taem hem i stadi mo folem Tok blong God long laef blong hem, i save holem hem i stap gud? Wan samting se, waes ya i mekem man i naf blong blokem Devel Setan. Jisas i tijim ol man blong hem blong prea blong bambae God i no letem Setan i spolem olgeta. (Matiu 6:13) Tede, i rili impoten blong tingbaot nid ya taem yumi prea. Setan mo ol rabis enjel blong hem oli kamaot long heven finis long 1914, mo from samting ya Setan i “kros tumas, from we hem i save se i gat smol taem nomo blong hem i stap yet.” (Revelesen 12:9, 10, 12) Stat long taem ya, plante yia i pas finis i kam kasem tede. Taswe, kros blong Setan i kam bigwan moa taem hem i traehad plante taem blong faet agensem olgeta “we oli stap obei long ol tok blong God, mo we oli stap holem ol tok we Jisas i talemaot se i tru.”—Revelesen 12:17.
4. ?Olsem wanem ol traem mo trap blong Setan oli no save spolem ol Kristin?
4 Setan, we i kros bigwan, i gohed blong mekem trabol long ol Kristin man we oli stap prij. Hem i wokem rod blong oli kasem trabol mo narafala hadtaem blong blokem wok blong olgeta. Mo tu, hem i wantem pulum olgeta blong oli putum tingting blong olgeta i stap long fasin blong kasem haenem long wol, gat wan laef we i isi, kasem ol sas samting, mo ronem ol pleplei, i bitim we oli mekem wok blong talemaot mesej blong Kingdom. ?Wanem i givhan long ol man we oli mekem wok blong God, blong oli no letem ol traem blong Setan i winim olgeta mo foldaon long ol trap blong hem? Yes, fasin blong prea, gat wan gudfala fasin fren wetem Jeova, mo bilif long ol promes blong hem we oli sua blong kamtru oli impoten tumas. Be olgeta samting ya oli joen wetem save mo strong tingting we man i gat blong folem ol advaes insaed long Tok blong God. Yumi kasem ol advaes ya taem yumi ridim Baebol mo ol buk we oli tokbaot Baebol, taem yumi kam long ol Kristin miting mo taem yumi lesin long toktok we Kristin brata blong yumi i givim, no taem yumi prea mo tingting dip long ol rul blong Baebol we tabu spirit i mekem yumi tingbaot.—Aesea 30:21; Jon 14:26; 1 Jon 2:15-17.
5. ?Long wanem rod, waes we i stanap long Tok blong God, i save holem yumi stap gud?
5 Ol man we oli laekem Tok blong God, Tok ya i holem olgeta oli stap gud long sam narafala rod bakegen. Eksampel, oli no harem nogud long filing blong olgeta mo oli no kasem sam kaen sik we oli kamaot long ol samting olsem, fasin blong tekem drag, yusum tabak, mo mekem nogud long saed blong seks. (1 Korin 5:11; 2 Korin 7:1) Oli no spolem fasin joengud bitwin ol man from we oli no toktok smol long saed blong narafala mo oli no talem ol tok we oli spolem narafala. (Efesas 4:31) Mo oli no gat tingting we i hafhaf long saed blong trutok, from we oli no soem intres long ol giaman waes blong wol ya. (1 Korin 3:19) From we oli laekem Tok blong God, Tok ya i holem olgeta oli stap gud we i no gat samting i naf blong spolem fasin fren blong olgeta wetem God mo karemaot hop we oli gat long laef we i no save finis. Oli bisi blong halpem ol man raonabaot long olgeta blong kasem bilif long ol nambawan promes we Baebol i tokbaot. Oli save se taem oli mekem olsem, oli ‘sevem olgeta wan wetem ol man we oli stap lesin long olgeta.’—1 Timoti 4:16.
6. ?Olsem wanem waes we i stanap long Tok blong God i save mekem yumi stap gud nating se yumi kasem hadtaem?
6 Tru tumas, “ol taem mo ol samting we man i no save long hem, oli hapen long evriwan”—long olgeta ya tu we oli laekem Tok blong God. (Prija 9:11, NW) I no gat wan long yumi we i naf blong blokem disasta, bigfala sik, aksiden, mo ded blong i no kasem hem. Nating se i olsem, Tok blong God i save holem yumi stap gud. I no gat wan trabol we i save gohed olwe blong mekem soa long man we i rili laekem Tok blong God. Taswe, yumi no mas wari tumas long samting we bambae i hapen long fiuja. Sipos yumi folem ol woning we oli stret, i moagud blong lego samting ya i stap long han blong Jeova mo no letem laef blong tede we i olbaot, i karemaot pis blong yumi. (Matiu 6:33, 34; Filipae 4:6, 7) No fogetem hop ya blong laef bakegen long ded, mo laef ya we bambae i moa gud taem God i “mekem olgeta samting oli kam niuwan bakegen.”—Revelesen 21:5; Jon 11:25.
Pruvum Se Yu Yu “Gudfala Graon”
7. ?Wanem pijatok we Jisas i talem long ol man we oli kam lesin long hem?
7 Long wan parabol we Jisas i talem, hem i soemaot se i impoten tumas blong gat stret tingting long saed blong Tok blong God. Taem Jisas i stap talemaot gud nius long olgeta ples blong Palestaen, plante man oli hivap wanples blong harem hem. (Luk 8:1, 4) Be, i no olgeta evriwan we oli rili laekem Tok blong God. I sua se, plante man oli kam lesin long hem from we oli wantem luk ol merikel blong hem nomo, no from we oli laekem gudfala fasin blong hem blong tijim man. Taswe, Jisas i talem parabol ya long ol man we oli stap lesin long hem, se: “I gat wan man i go blong planem wit long garen blong hem. Taem hem i planem ol wit ya, hem i stap saksakem ol sid i go olbaot long graon, nao sam sid oli folfoldaon long rod. Nao biaen ol man oli stap purumbut long olgeta mo ol pijin oli kakae olgeta. Mo sam sid oli folfoldaon long ston. Nao taem oli stat gru, oli kam drae, from we i no gat wota. Mo sam narafala sid oli foldaon long ples we i gat ropnil long hem. Biaen, rop mo wit tufala i gru wantaem, nao rop ya i kavremap ol wit ya gogo oli ded. Mo sam narafala sid bakegen oli gru, mo oli gat frut we olgeta wanwan oli karem handred frut blong olgeta.”—Luk 8:5-8.
8. ?Long pijatok blong Jisas, wanem ya sid?
8 Parabol blong Jisas i soem se ol man bambae oli soemaot defdefren kaen fasin taem oli harem gud nius, i dipen nomo long hat blong olgeta. Sid we yumi stap saksakem, hemia “tok blong God.” (Luk 8:11) Mo tu, olsem wan narafala vas we i tokbaot parabol ya i talem, sid ya i minim “tok blong kingdom.” (Matiu 13:19, NW) Jisas i save yusum tu defren mining, from we Baebol i gat wan stamba tok nomo, hemia Kingdom blong heven we Jisas Kraes i King long hem, mo we bambae Jeova i yusum blong leftemap hae rul blong hem mo blong mekem nem blong hem i tabu. (Matiu 6:9, 10) Taswe, i olsem we sid ya i minim mesej blong gud nius ya we i stap insaed long Tok blong God, Baebol. Ol Witnes blong Jeova oli tokbaot Kingdom olsem impoten haf blong mesej blong olgeta taem oli sakem sid folem eksampel blong Jisas Kraes, faswan Man blong Sakem Sid. ?Oli faenem wanem kaen man?
9. ?Wanem mining blong sid we i foldaon (a) long rod? (b) long ston? (c) long ples we i gat ropnil long hem?
9 Jisas i talem se sam sid oli foldaon long rod mo ol man oli purumbut long olgeta. Hemia i minim olgeta we sid blong Kingdom i no save gru long hat blong olgeta from we oli bisi tumas long laef. Bifo we oli save gat fasin ya blong laekem Tok blong God, “Setan i kam tekemaot tok ya long tingting blong olgeta, blong oli no save bilif, nao God i no save sevem olgeta.” (Luk 8:12) Sam sid oli foldaon long ston. Hemia i minim ol man we mesej blong Baebol i pulum olgeta be oli no letem mesej ya i kasem hat blong olgeta. Taem oli fesem trabol no oli faenem i had blong folem ol advaes blong Baebol, “oli foldaon” from we oli no gat rus. (Luk 8:13) Mo tu, i gat olgeta we oli harem tok ya be “oli stap tingting tumas long ol samting blong laef blong olgeta, no oli kam rijman, no oli gat gud taem.” Biaen, ol samting ya oli “blokem tok ya long laef blong olgeta,” olsem rabis gras we i jokem wan smol tri.—Luk 8:14.
10, 11. (a) ?Hu olgeta we oli olsem gudfala graon? (b) ?Yumi mas mekem wanem blong “holemstrong” long Tok blong God wetem hat blong yumi?
10 Laswan haf blong parabol ya i talem se sam sid oli foldaon long gudfala graon. Hemia i minim ol man we oli lesin long mesej wetem wan “gudfala tingting.” I sua se, long tingting blong yumi evriwan, yumi wantem bilif se yumi haf blong ol sid ya we oli foldaon long gudfala graon. Be, laswan disisen hemia bambae i stanap long tingting blong God nomo, we i impoten moa. (Ol Proveb 17:3; 1 Korin 4:4, 5) Tok blong God i talem se wan “gudfala tingting” hem i samting we yumi pruvum long ol aksin blong yumi stat naoia i go kasem taem we yumi ded, no kasem taem we God i finisim rabis wol ya. Sipos fastaem we yumi harem mesej blong Kingdom yumi akseptem hem, hemia wan gudfala samting. Be, ol man we oli gat gudfala tingting no hat, oli akseptem Tok blong God, ‘oli holemstrong long hem, mo oli mekem tingting blong olgeta i longfala, nao oli gat frut blong tok ya long laef blong olgeta.’—Luk 8:15.
11 Wan rod nomo blong yumi holem strong Tok blong God long hat blong yumi, hemia taem yumi rid mo stadi yumi wanwan long Baebol mo joen long kampani blong ol Kristin brata blong yumi. Hemia i minim tu se, yumi yusum gud olgeta kakae long saed blong spirit, we yumi stap kasem tru long olgeta ya we Jisas i putumap olgeta blong lukaot long nid blong yumi long saed blong spirit. (Matiu 24:45-47) Long rod ya, olgeta we oli holem strong long Tok blong God wetem hat blong olgeta, oli gat lav we i pusum olgeta blong ‘mekem tingting blong olgeta i longfala, mo karem frut long laef blong olgeta.’
12. ?Wanem frut ya we yumi mas karem wetem longfala tingting?
12 ?Wanem frut i kamaot long gudfala graon ya? Yumi save se taem yumi planem wan sid long garen, sid ya bambae i gru mo i karem semfala frut nomo, we biaen yumi save planem bakegen blong karem moa frut. Hemia i sem mak long ol man we oli gat wan gudfala hat. Sid blong Tok blong God i gru insaed long olgeta, mekem se oli gru long saed blong spirit gogo olgeta tu oli planem sid long hat blong narafala man. (Matiu 28:19, 20) Mo wok ya blong olgeta blong sakem sid i joen wetem longfala tingting. Jisas i soemaot se longfala tingting i impoten taem yumi sakem sid, hem i se: “Be man we i stanap strong gogo olgeta samting ya i finis, bambae God i sevem hem. Nao bambae ol man oli stap talemaot gud nius ya, se God i King blong olgeta man. Bambae oli talemaot long olgeta ples long wol blong oli witnes blong hem long fes blong olgeta man. Nao biaen, bambae Lasdei i save kam.”—Matiu 24:13, 14.
“Karem Frut Long Ol Gudgudfala Wok”
13. ?Wanem prea blong Pol i soemaot se fasin blong karem gudfala frut i joen wetem save long saed blong Tok blong God?
13 Aposol Pol tu, i tokbaot se i impoten blong karem frut, mo hem i joenem fasin blong karem frut wetem Tok blong God. Hem i prea from ol Kristin brata blong hem blong ‘tabu spirit i mekem olgeta oli waes, oli man blong luksave, blong bambae oli savegud olgeta samting we God i wantem, nao bambae oli save mekem laef blong olgeta i kam olsem we Jeova i wantem.’—Kolosi 1:9, 10, NW; Filipae 1:9-11.
14-16. Folem prea blong Pol, ?ol man we oli laekem Tok blong God oli karem wanem frut long laef blong olgeta?
14 Taswe, Pol i soemaot se mak blong yumi i no blong kasem save blong Baebol nomo. Be, lav we yumi gat long Tok blong God i mas pulum yumi blong ‘mekem laef blong yumi i kam olsem we Jeova i wantem’ mo gohed blong ‘karem frut long ol gudgudfala wok we yumi stap mekem.’ ?Wanem gudfala wok? Hemia wok blong talemaot gud nius blong Kingdom. Wok ya i impoten long ol Kristin blong oli mekem long ol lasdei ya. (Mak 13:10) Mo tu, olgeta we oli laekem Tok blong God oli traem bes blong olgeta oltaem blong givim smol mane blong sapotem wok ya. Oli glad tumas from jans ya we oli gat blong save se “God i lavem man we i save givim samting long gladhat blong hem.” (2 Korin 9:7) Presen mane ya we oli givim i sapotem wok we i stap gohed long bitim wan handred Haos Betel long wol. Ol Haos Betel ya oli lidim wok blong talemaot Kingdom mo sam long olgeta oli lukaot long wok blong prentem ol Baebol mo narafala buk we oli tokbaot Baebol. Mo tu, ol presen mane ya oli givhan blong pem ol samting we i nidim blong mekem ol bigfala Kristin asembli mo blong sanem ol elda we oli goraon, ol misinari mo narafala paenia oli go blong wok long ol narafala kantri.
15 Sam narafala gudfala wok hemia blong bildimap mo lukaot long ol haos blong trufala wosip. Lav we ol man blong God oli gat long Tok blong hem i pulum olgeta blong mekem sua se ol Haos Asembli mo ol Haos Kingdom oli stap klin mo gud oltaem. (Skelem wetem Nehemaea 10:39.) From we nem blong God i stap long klia ples fored long ol haos ya, i impoten tumas we ol ples insaed mo afsaed oli stap klin mo naes, mo i impoten we fasin blong ol man we oli kam blong wosip long ol haos ya i no gat poen long hem. (2 Korin 6:3) Sam Kristin oli naf blong mekem moa. Lav we oli gat long Tok blong God i pulum olgeta blong lego kantri blong olgeta blong givhan long wok blong bildim ol niufala haos blong wosip long ol kantri blong wol we oli gat nid, from we oli pua no from we i no gat man blong mekem ol wok ya.—2 Korin 8:14.
16 “Karem frut long ol gudgudfala wok” i minim tu se yumi lukaot long ol wok blong yumi insaed long famle mo soem se yumi kea long ol Kristin brata blong yumi. Lav we yumi gat long Tok blong God i pulum yumi blong harem save nid blong ‘ol brata mo sista blong yumi we oli bilif long Kraes,’ mo mekem ‘nambawan wok blong ol Kristin man, [we i blong] lukaotgud long ol famle blong yumi.’ (Galesia 6:10; 1 Timoti 5:4, 8) Long saed ya, yumi save mekem gudfala wok sipos yumi visitim ol brata mo sista blong yumi we oli sik mo leftemap tingting blong olgeta we oli krae from we oli lusum wan long ded. !Mo i gat gudfala wok blong ol elda blong ol kongregesen wetem ol Komiti we oli wok wetem ol Hospital blong halpem ol brata sista we oli fesem problem long ol disisen we oli mas mekem wetem ol dokta! (Ol Wok 15:29) Mo tu, i gat ol trabol we oli kamaot from ol disasta, we naoia oli stap hapen plante taem—sam oli hapen from ol samting raonabaot long yumi no sam oli hapen from krangke fasin blong man nomo. Wetem help blong tabu spirit blong God, ol Witnes blong Jeova oli kasem wan gudfala nem long plante kantri blong wol taem oli kwik blong givim help long ol Kristin brata blong olgeta mo narafala man we oli kasem trabol long taem blong ol disasta no aksiden. Hemia ol gudfala frut we oli kamaot long laef blong ol man we oli laekem Tok blong God.
Ol Nambawan Blesing Long Fiuja
17, 18. (a) ?Wanem i stap hapen taem yumi saksakem sid blong Kingdom? (b) ?I no longtaem, bambae ol man we oli laekem Tok blong God oli luk wanem samting i hapen?
17 Wok blong saksakem ol sid blong Kingdom i gohed yet blong karem blesing i kam long ol man. Long ol yia we oli jes pas, i gat bitim 300,000 man evri yia, we oli letem mesej blong Baebol i gru long hat blong olgeta nao oli givim laef blong olgeta i go long Jeova mo tekem baptaes long wota blong soemaot samting ya. !Ol man ya bambae oli gat wan nambawan fiuja!
18 Ol man we oli laekem Tok blong God oli save se, i no longtaem, bambae Jeova God i girap blong leftemap nem blong hem. ‘Bigfala Babilon,’ hemia olgeta giaman skul long wol, bambae i lus olgeta. (Revelesen 18:2, 8) Nao King, Jisas Kraes, bambae i kilim i ded olgeta man we oli no wantem laef folem Tok blong God. (Ol Sam 2:9-11; Daniel 2:44) Afta long samting ya, Kingdom blong God bambae i karemaot ol trabol olsem fasin blong brekem loa, faet, mo ol narafala disasta. Bambae i no moa nidim blong leftemap tingting blong narafala man from soa, sik, mo ded.—Revelesen 21:3, 4.
19, 20. ?Wanem nambawan fiuja i stap blong olgeta we oli rili laekem Tok blong God?
19 !Olgeta we oli laekem Tok blong God bambae oli mekem ol nambawan wok! Ol man we oli stap laef afta long Amageden bambae oli statem wan wok we i mekem olgeta oli glad tumas, hemia wok blong mekem wol ya i kam wan paradaes. Bambae oli gat jans blong rerem ol samting we i nidim blong welkamem ol dedman, we naoia oli stap slip long beregraon mo we oli stap long memori blong God. Ol dedman ya bambae oli laef bakegen long ded. (Jon 5:28, 29) Long taem ya, wan rul we i stret gud olgeta bambae i lidim olgeta man long wol. Rul ya i kamaot stret long Haefala Masta, Jeova. Jeova i givim rul ya tru long Pikinini blong hem, Jisas Kraes, we God i givim haenem long hem. ‘Ol buk’ we bambae ‘oli open’ long taem ya, oli soemaot ol rul we Jeova i givim long saed blong laef long niufala wol ya.—Revelesen 20:12.
20 Long stret taem blong Jeova, grup blong olgeta tabu Kristin man blong bilif, bambae oli kasem praes blong olgeta long heven taem oli ‘joen long Kraes blong kasem haf long ol gudgudfala samting we God i putum se bambae oli blong hem.’ (Rom 8:17) Long Wan Taosen Yia Rul blong Kraes, olgeta man long wol, we oli laekem Tok blong God, bambae oli kam stret gud olgeta long tingting mo bodi. Sipos oli stanap strong long bilif blong olgeta afta long laswan traem, bambae oli kasem praes blong laef we i no save finis nao bambae oli glad tumas blong stap “fri olgeta, olsem ol pikinini blong [God].” (Rom 8:21; Revelesen 20:1-3, 7-10) !Hemia wan taem we bambae i nambawan tumas! Tru tumas, nating se hop we Jeova i givim long yumi hem i blong laef long heven no long wol, bambae yumi save stap gud sipos yumi holemtaet lav we yumi gat long Tok blong hem mo gat strong tingting blong laef folem waes blong God. Mo long fiuja waestok ya ‘bambae i save leftemap yu, we nem blong yu bambae i go antap.’—Ol Proveb 4:6, 8.
?Yu Yu Save Eksplenem?
◻ ?Olsem wanem lav long Tok blong God i save mekem yumi stap gud?
◻ ?Wanem sid ya we Jisas i tokbaot long pijatok blong hem, mo hu i saksakem sid ya?
◻ ?Olsem wanem yumi save pruvum se yumi “gudfala graon”?
◻ ?Ol man we oli laekem Tok blong God oli stap wet long wanem blesing we bambae oli save kasem?
[Tok Blong Pija Long Pej 16]
Sid long pijatok blong Jisas i minim mesej blong gud nius we i stap long Tok blong God
Garo Nalbandian
[Tok Blong Pija Long Pej 17]
Ol Witnes blong Jeova oli folem eksampel blong Man ya blong Sakem Sid
[Tok Blong Pija Long Pej 18]
Ol man we oli laef tru long Amageden bambae oli harem gud long ol blesing we bambae oli kamaot long wol ya