Ridim Buk Blong Revelesen Mo Harem Gud
“Man we i ridimaot tok ya we God i givim, hem i save harem gud. Mo olgeta we oli harem tok ya, mo oli holem long tingting blong olgeta, olgeta ya tu bambae oli save harem gud.”—REVELESEN 1:3.
1. ?Aposol Jon i stap wea taem hem i raetem Revelesen, mo from wanem hem i raetemdaon olgeta vison ya?
“MI JON . . . mi stap long aelan ya Patmos, from we mi stap talemaot tok ya we God i talem, mo we Jisas i talemaot se i tru.” (Revelesen 1:9) Hemia ples we aposol Jon i stap long hem taem hem i raetem buk blong Apokalips, no Revelesen. Sam man oli ting se maet hem i go kalabus long aelan blong Patmos, long taem we Domitian (81-96 K.T.) i rul antap long Rom. Rula ya nao i statem fasin we man i wosipim ol lida blong kantri, mo hem i mekem bigfala trabol long ol Kristin. Taem Jon i stap long Patmos, hem i luk plante defren vison we, biaen, hem i raetem olgeta i go long buk. Hem i raetem ol vison ya, i no blong mekem ol faswan Kristin oli fraet, be i blong mekem olgeta oli strong. Hem i wantem leftemap tingting blong olgeta blong oli naf blong fesem ol traem we i stap kasem olgeta, mo ol traem ya tu we bambae oli kam.—Ol Wok 28:22; Revelesen 1:4; 2:3, 9, 10, 13.
2. ?From wanem ol Kristin tede oli intres long samting we i hapen long laef blong Jon mo ol narafala Kristin long taem blong hem?
2 Samting we i stap hapen long taem ya we Jon i raetem buk blong Revelesen i gat bigfala mining long ol Kristin we oli laef tede. Jon i stap kasem traem from we hem i givim witnes long saed blong Jeova mo Pikinini blong Hem, Jisas Kraes. Jon wetem ol narafala Kristin long taem ya oli laef long wan taem we man i agensem olgeta bigwan. Long laef blong olgeta oli stap traehad blong respektem ol loa blong gavman, be long semtaem oli no save folem fasin ya blong wosipim ol lida blong kantri. (Luk 4:8) Long sam kantri tede, ol trufala Kristin oli fesem semfala hadtaem from sam Gavman we oli ting se oli gat raet blong bos long wosip blong ol jos. Taswe, ol toktok ya we oli stap long fastok blong Revelesen oli leftemap tingting, se: “Man we i ridimaot tok ya we God i givim, hem i save harem gud. Mo olgeta we oli harem tok ya, mo oli holem long tingting blong olgeta, olgeta ya tu bambae oli save harem gud, from we taem blong ol samting ya i kam klosap finis.” (Revelesen 1:3) Yes, ol man we oli tingting gud mo obei long ol tok blong Revelesen, oli save faenem trufala glad mo oli save kasem plante blesing.
3. ?Hu i Stamba blong Revelesen we Jon i kasem?
3 ?Hu i Stamba blong Revelesen, mo hem i yusum hu blong karem toktok blong hem? Faswan vas blong buk ya i talem long yumi se: “Long buk ya, mi Jon mi raetem ol samting we Jisas Kraes i soemaot long mi. Hemia ol samting we God i givim long hem, blong hem i soemaot long ol man blong hem. Ol samting ya, bambae i no longtaem, oli kamtru. Mo Jisas i sanem enjel blong hem i kam, blong i soemaot ol samting ya long mi, we mi mi man blong wok blong hem.” (Revelesen 1:1) Blong talem stret, Stamba blong Revelesen hem i Jeova God. Mo hem i givim toktok ya long Jisas, nao tru long wan enjel, Jisas i talemaot ol tok ya long Jon. Taem yumi ridim i go moa, yumi luk tu se, Jisas i yusum tabu spirit blong karem ol mesej i go long ol kongregesen mo blong givim ol vison long Jon.—Revelesen 2:7, 11, 17, 29; 3:6, 13, 22; 4:2; 17:3; 21:10; skelem wetem Ol Wok 2:33.
4. ?Wanem rod we Jeova i stap yusum yet tede, blong lidim ol man blong hem long wol?
4 Jeova i stap yusum Pikinini blong hem, we i ‘hed blong kongregesen,’ blong tijim ol man blong hem long wol ya. (Efesas 5:23; Aesea 54:13; Jon 6:45) Mo tu, Jeova i yusum tabu spirit blong hem blong tijim ol man blong hem. (Jon 15:26; 1 Korin 2:10) Long faswan handred yia, Jisas i bin yusum Jon we i “man blong wok blong hem,” blong givim gudfala kakae long saed blong spirit long ol kongregesen. Tede, Jisas i yusum ‘slef we i stret mo waes,’ we hemia ol tabu “brata” long wol ya, blong givim kakae long saed blong spirit long ol man blong hem, ol narafala Kristin brata, “long stret taem blong hem.” (Matiu 24:45-47; 25:40) Ol man oli save harem gud sipos oli luksave hu ya Stamba blong ol ‘gudfala presen’ we yumi stap kasem olsem ol gudfala kakae long saed blong spirit, mo sipos oli luksave rod we Hem i stap yusum blong givim ol kakae ya.—Jemes 1:17.
Ol Kongregesen We Kraes i Lidim
5. (a) ?Wanem pijatok we Revelesen i yusum blong tokbaot ol Kristin kongregesen mo ol elda blong olgeta? (b) Nating se yumi sinman, ?wanem i save mekem yumi harem gud?
5 Faswan japta blong Revelesen i tokbaot ol ples blong putum laet we oli pija blong ol Kristin kongregesen. Mo ol man we oli lukaot long ol kongregesen ya oli olsem ol enjel (man blong karem mesej) mo ol sta. (Revelesen 1:20)a Jisas Kraes i tokbaot hem wan taem hem i raet long Jon se: “Mi mi stap holem ol seven sta long raethan blong mi, mo mi stap wokbaot long medel blong ol seven ples ya blong putum laet, we oli wokem olgeta long gol, mo tok we mi mi wantem talem long yufala i olsem.” (Revelesen 2:1) Ol seven mesej we oli go long ol seven kongregesen blong Esia, oli soem se long faswan handred yia K.T., ol kongregesen mo elda blong olgeta oli strong blong mekem sam gudfala wok be oli gat sam slak fasin tu. Samting ya i tru tu tede. Taswe, bambae yumi save hapi moa sipos yumi neva lusum tingting ya se Jisas Kraes, we i Hed blong yumi, hem nao i stap lidim ol kongregesen. Hem i save gud olgeta samting we oli stap hapen insaed long ol kongregesen ya. Ol elda oli stap long ‘raethan blong hem,’ hemia i min se Jisas i bos long olgeta mo i stap lidim olgeta. Bambae oli gat kaon blong givimbak long Jisas from olgeta samting we oli mekem taem oli stap lidim ol kongregesen ya.—Ol Wok 20:28; Hibrus 13:17.
6. ?Wanem i soem se i no ol elda nomo we bambae oli mas givim kaon long Jisas Kraes from olgeta wok we oli mekem?
6 Be, ating yumi mestem bigwan sipos yumi gat tingting ya se ol elda nomo bambae oli gat kaon blong givimbak long Jisas Kraes from ol wok blong olgeta. Long wan long ol mesej ya, Jisas i talem se: “Olgeta [‘kongregesen,’ NW] oli save we mi mi save tingting blong olgeta man, mo wanem samting olgeta oli wantem. Bambae mi mi givim pei long yufala evriwan wanwan, stret long mak blong fasin blong yufala.” (Revelesen 2:23) Toktok ya i olsem wan woning mo long semtaem hem i leftemap tingting. Hem i givim woning se Jisas Kraes i save olgeta tingting we oli stap pusum yumi blong wok. Mo hem i leftemap tingting from we i soemaot se Jisas Kraes i luksave traehad we yumi mekem mo bambae i blesem yumi sipos yumi givim bes blong yumi.—Mak 14:6-9; Luk 21:3, 4.
7. ?Olsem wanem ol Kristin long Filadelfia oli ‘holemgud tok ya long saed blong fasin blong Jisas blong stanap strong ’?
7 Mesej we Jisas i sanem i go long kongregesen blong Filadelfia long taon blong Lydia, i no blong stretem olgeta, be hem i tokbaot wan promes we yumi intres bigwan long hem. “From we yu stap holemgud tok ya long saed blong fasin blong mi blong stanap strong, bambae mi mi lukaotgud long yu long aoa blong traem ya, we bambae i kam blong traem olgeta man blong wol.” (Revelesen 3:10, NW) Grik tok blong talem “holemgud tok ya long saed blong fasin blong mi blong stanap strong,” i save minim tu se “holemgud tok ya we mi mi talem se yufala i mas stanap strong.” Vas 8 i soemaot se ol Kristin long Filadelfia oli no jes obei long ol rul blong Jisas Kraes be tu, oli folem ol advaes blong hem se oli mas stanap strong long bilif blong olgeta.—Matiu 10:22; Luk 21:19.
8. (a) ?Wanem promes we Jisas i mekem long ol Kristin blong Filadelfia? (b) ?“Aoa blong traem” ya bambae i kasem hu tede?
8 Jisas i gohed blong talem se bambae hem i lukaotgud long olgeta “long aoa blong traem ya.” Yumi no save stret se tok ya i minim wanem long ol Kristin bifo. I tru se, afta we Domitian i ded long yia 96 K.T, ol trabol we ol man oli mekem agensem ol Kristin i stop. Be, hemia blong smoltaem nomo from we ol trabol ya oli stat bakegen aninit long rul blong Trajan (98-117 K.T.), mo from samting ya ol Kristin oli kasem ol traem bakegen. Be bigfala “aoa blong traem” ya bambae i kamtru long “dei ya blong Masta” we hem i long “taem blong en,” hemia taem we yumi stap long hem naoia. (Revelesen 1:10; Daniel 12:4, NW) Ol Kristin we tabu spirit i makemaot olgeta, oli gotru long wan bigfala traem jes afta long Faswan Bigfala Faet blong Wol. Be, “aoa blong traem” i stap kam. Bambae hem i kasem “olgeta man blong wol,” wetem ol milyan man ya tu we oli haf blong bigfala kampani, mo we oli hop blong stap sef tru long bigfala trabol. (Revelesen 3:10; 7:9, 14) Bambae yumi harem gud sipos yumi ‘holemgud tok ya we Jisas i talem se yumi mas stanap strong.’ Tok ya blong hem i olsem: “Man we i stanap strong gogo olgeta samting ya i finis, bambae God i sevem hem.”—Matiu 24:13.
Haremgud Blong Stap Aninit Long Hae Rul Blong Jeova
9, 10. (a) ?Vison long saed blong bigfala jea blong Jeova i mas mekem wanem long yumi? (b) ?Olsem wanem yumi save harem gud taem yumi ridim Revelesen?
9 Vison blong japta 4 mo 5 long Revelesen we i tokbaot bigfala jea blong Jeova mo kot blong hem long heven, i pulum yumi blong wantem ona long God. Toktok we ol strongfala enjel long heven oli yusum blong presem Jeova wetem fulhat blong olgeta, mo fasin blong olgeta blong stap daon aninit long stretfala rul blong Jeova, i mas gat paoa long tingting blong yumi. (Revelesen 4:8-11) Voes blong yumi i mas joen wetem voes blong olgeta ya we oli stap talem se: “Man ya we i stap sidaon long bigfala jea blong king, mo Smol Sipsip ya tu, yumi mas presem tufala, yumi mas ona long tufala, yumi mas leftemap nem blong tufala, mo yumi mas talemaot paoa blong tufala, gogo i no save finis.”—Revelesen 5:13.
10 Long saed blong yumi, tok ya i minim se yumi glad blong mekem evri samting folem wanem we Jeova i wantem. Aposol Pol i raetem se: “Evri samting we yufala i mekem, mo evri tok we yufala i talem, be yufala i mas mekem long nem blong Jisas, Masta blong yumi. Mo oltaem yufala i mas joen long hem, blong talem tangkiu long God ya we i Papa blong yumi.” (Kolosi 3:17) Yumi rili save harem gud taem yumi ridim Revelesen sipos, dip insaed long tingting mo hat blong yumi, yumi luksave hae rul blong Jeova mo tingbaot samting we hem i wantem long evri haf blong laef blong yumi.
11, 12. (a) ?Olsem wanem wol blong Setan bambae i seksek mo i lus olgeta? (b) Folem Revelesen japta 7, ?hu bambae i “naf blong stanap” long taem ya?
11 Fasin blong wantem stap aninit long hae rul blong Jeova, hemia fandesen blong fasin glad we yumi wanwan, wetem olgeta samting long heven mo wol, i save kasem. I no longtaem bambae God i seksekem wol ya blong Setan gogo i spolem gud fandesen blong hem mo mekem i lus olgeta. Ol man we oli no wantem kam aninit long Kingdom gavman blong Jisas Kraes long heven, we hem i minim rul blong God, bambae oli no gat ples blong haed long hem. Profet tok i talem se: “Nao ol king blong wol, wetem ol bigfala jif mo ol hed kapten blong ol soldia, wetem ol rijman mo ol haeman, wetem ol narafala man, ol slef wetem ol friman, oli go haed. Olgeta evriwan oli go haed long ol hol blong ston, mo aninit long ol bigbigfala ston olbaot long ol hil. Nao oli talem long ol bigfala hil mo ol ston se, ‘Plis yufala i foldaon antap long mifala, yufala i haedem mifala, nao bambae mifala i no pas long fes blong Man ya we i stap sidaon long bigfala jea blong king, mo Smol Sipsip ya bambae i no save panisim mifala. Bigfala Dei ya blong tufala, we bambae tufala i panisim ol man from sin blong olgeta, i kamtru finis. ?Hu nao bambae i naf blong stanap long Dei ya?’ ”—Revelesen 6:12, 15-17.
12 Long saed blong kwestin ya, nekis japta we aposol Jon i raetem, hem i tokbaot olgeta we oli haf blong bigfala kampani ya we i sef tru long bigfala trabol. Hem i talem se bigfala kampani ya i stap “stanap long fran blong bigfala jea blong king, mo long fes blong Smol Sipsip ya.” (Revelesen 7:9, 14, 15) From we oli stap stanap long fored blong jea blong God, hemia i min se oli luksave rul blong man we i stap long jea ya, se hem i stret, mo oli rere blong stap aninit long rul ya blong Jeova. From samting ya, ol man ya oli stret man long fes blong God.
13. (a) ?Bighaf blong ol man long wol oli wosipim wanem, mo mak ya we i stap long fored blong olgeta mo long raethan blong olgeta, i saen blong wanem? (b) ?From wanem yumi nidim fasin ya blong stanap strong?
13 Nao japta 13 i tokbaot sam narafala man long wol ya we oli stap wosipim ol politik paoa blong Setan, we wan wael anamol i pija blong olgeta. Ol man ya oli kasem wan mak long “fored” blong olgeta no long “raet han” blong olgeta, we i soem se tingting mo wok blong olgeta i fulwan blong sapotem ol politik paoa ya. (Revelesen 13:1-8, 16, 17) Ale, japta 14 i gohed se: “God i putum wan kap waen i rere finis blong ol man we oli bodaon blong mekem wosip long anamol ya wetem wud ya we i pija blong hem. Hemia ol man ya we oli gat mak blong anamol ya long fored blong olgeta no long han blong olgeta. Kap waen ya hem i pija blong kros blong God, mo olgeta ya bambae oli mas dring waen ya, we bambae oli kasem kros blong God long fulpaoa blong hem, olsem waen we i no gat wota i miks wetem. . . . Yufala ol man blong God we yufala i stap folem ol tok blong hem, mo we yufala i stap bilif strong long Jisas, yufala i mas harem ol tok ya, nao yufala i mas stanap strong.” (Revelesen 14:9, 10, 12) Long ol taem we i kam, kwestin ya bambae i kam antap moa se: ?Yu yu stap sapotem hu? ?Yu yu stap sapotem Jeova mo hae rul blong hem, no yu stap sapotem ol politik paoa ya we wael anamol i pija blong olgeta mo we oli no stap obei long God? Olgeta we oli no wantem kasem mak blong wael anamol ya bambae oli save harem gud. Yes, olgeta we oli stanap strong long bilif blong olgeta mo oli stap aninit long hae rul blong Jeova, bambae oli save harem gud.
14, 15. ?Wanem mesej i katem tok blong Revelesen long saed blong Amagedon, mo samting ya i minim wanem long yumi?
14 Ol rula blong “evri ples long wol” oli stap go from taem ya we bambae oli mas fesem Jeova blong stretem bisnes ya long saed blong hae rul blong Hem. En blong bisnes ya bambae i kamtru long Amagedon, we i “faet long bigfala Dei blong God ya we i gat olgeta paoa.” (Revelesen 16:14, 16) Taem Jon i stap tokbaot taem ya we olgeta rula blong wol bambae oli hivap blong faet agensem Jeova, wan samting i hapen we i katem tok blong hem. Jisas hem wan i kamtru long vison ya blong talem se: “Yufala i lesin. Bambae mi mi kamtru long yufala olsem we man blong stil i kam. Man we i stap lukaotgud, i no tekemaot klos blong hem blong i slip, bambae hem i save harem gud. Bambae hem i no wokbaot neked, we ol man oli luk we hem i sem.” (Revelesen 16:15) Toktok ya i laenap wetem ol Livaet we oli gad long tempel long taem bifo. Sipos oli faenem se wan long ol Livaet ya i stap slip long taem we hem i mas mekem gad, bambae oli tekemaot olgeta klos blong hem mo mekem hem i wokbaot neked long fored blong ol man blong mekem hem i sem.
15 Mesej i klia nomo: Sipos yumi wantem sef long taem blong Amagedon, yumi mas stap wekap long saed blong spirit mo yumi no mas lusum olgeta samting ya we oli olsem klos blong yumi we i makemaot yumi olsem ol Witnes blong Jeova God. Yumi save harem gud sipos yumi no slip long saed blong spirit mo no kam slak blong joen fulwan long wok blong “talemaot gud nius” blong Kingdom blong God we i stanap finis.—Revelesen 14:6.
‘Olgeta We Oli Harem Tok Ya Oli Save Haremgud’
16. ?From wanem ol laswan japta blong Revelesen oli mekem yumi harem gud tumas?
16 Ol hapi man blong ridim buk blong Revelesen oli save hapi moa taem oli kamtru long ol laswan japta blong buk ya long saed blong nambawan hop blong yumi—wan niufala heven mo wan niufala wol, we i minim stretfala Kingdom gavman long heven we i rul antap long wan niufala fasin blong laef we i klingud. Olgeta evriwan oli presem “Jeova God we i gat Olgeta Paoa.” (Revelesen 21:22, NW) Taem ol vison ya klosap oli kasem en blong olgeta, enjel ya we i stap karem ol mesej, i talem long Jon se: “Ol tok ya i tru, mo yu yu save bilif long hem. Mo Hae God ya we i givim Tabu Spirit blong hem i go long ol profet, hem i sanem mi, mi enjel blong hem, blong mi soemaot long ol man blong hem ol samting we bambae oli kamtru i no longtaem. . . . Yu lesin. Bambae mi mi kamtru i no longtaem. Olgeta we oli harem ol tok ya we God i givim, we i stap long buk ya, oli save harem gud.”—Revelesen 22:6, 7.
17. (a) ?Revelesen 22:6 i mekem yumi sua long wanem samting? (b) ?Yumi mas wekap gud blong lukaot long wanem samting?
17 Ol hapi man blong ridim Revelesen oli rimemba se ol tok ya oli sem mak long ol tok we oli kamaot long stat blong “buk ya.” (Revelesen 1:1, 3) Ol tok ya oli mekem yumi sua se olgeta “samting” we laswan buk ya long Baebol i talem, bambae oli kamtru “i no longtaem.” Yumi stap laef klosap tumas long taem blong en, minim se yumi save sua se i no longtaem olgeta samting ya we Revelesen i tokbaot oli save kamtru kwiktaem nomo, folfolem olgeta. Taswe, yumi no mas letem eni samting long wol blong Setan, we maet i luk olsem se i stanap strong, oli pulum yumi blong slip long saed blong spirit. Man we i ridim buk blong Revelesen wetem tingting we i wekap gud, bambae i no save fogetem olgeta woning we oli stap long ol mesej ya we i go long ol seven kongregesen blong Esia. Man olsem bambae i lukaot gud blong no foldaon long ol trap we i olsem fasin blong ronem mane, wosip long ol aedol, nogud fasin long saed blong seks, tingting we i hafhaf long saed blong spirit, mo apostasi.
18, 19. (a) ?From wanem bambae Jisas i kam, mo wanem hop we yumi gat olsem Jon? (b) ?From wanem risen, bambae Jeova i “kam”?
18 Long buk blong Revelesen, Jisas i talemaot plante taem se: “Bambae mi mi kamtru long yufala i no longtaem.” (Revelesen 2:16; 3:11; 22:7, 20a) Bambae hem i mas kamtru yet, blong jajem Bigfala Babilon, ol politik paoa blong Setan, mo olgeta man we oli no wantem stap aninit long hae rul blong Jeova, we i kamaot tru long Kingdom blong Mesaea. Yumi joenem voes blong yumi long voes blong aposol Jon, we i singaot se: “Amen. Jisas, Masta, plis yu kam.”—Revelesen 22:20b, NW.
19 Jeova hem wan i talem se: “Yu lesin. Bambae mi mi kamtru i no longtaem. Mo bambae mi karem pei blong ol man, blong givim long olgeta wanwan, stret long mak blong fasin we oli mekem.” (Revelesen 22:12) Taem yumi stap wet blong kasem nambawan presen ya blong laef we i no save finis, long “niufala heven” no long “niufala wol,” i gud yumi wok strong blong singaot olgeta man we hat blong olgeta i stret, se: “ ‘Yu kam.’ Yufala we i tosta, yufala i kam. Yufala we i wantem dring, yufala i kam tekem wota ya blong laef, we i olsem presen blong yufala.” (Revelesen 22:17) !I gud olgeta ya tu, oli harem gud taem oli ridim nambawan buk ya blong Revelesen, we i kamaot long God!
[Futnot]
a Lukluk Revelesen—Nambawan En Blong Hem i Kolosap!, pej 28-29, 136 (futnot).
Ol Poen Blong Tingtingbak
◻ ?Wanem rod we Jeova i yusum blong givim Revelesen long man, mo samting ya i tijim yumi long wanem?
◻ ?From wanem yumi mas hapi blong ridim ol mesej we oli go long ol seven kongregesen blong Esia?
◻ ?Olsem wanem yumi save stap sef taem “aoa blong traem” i kam?
◻ ?Sipos yumi lesin long ol tok we oli stap long buk blong Revelesen, bambae yumi save harem gud long wanem samting?
[Tok Blong Pija Long Pej 15]
Man we i luksave Stamba blong ol gudfala nius ya, hem i save harem gud
[Tok Blong Pija Long Pej 18]
Man we i stap wekap oltaem bambae i harem gud